അങ്ങേയറ്റം നിന്ദ്യവും ലജ്ജാകരവുമായ ഒരു സ്വഭാവമാണ് ഇസ്റാഫ്. അല്ലാഹുവിന്റെ ഗ്രന്ഥത്തിൽ ഇതിനെ ആക്ഷേപിക്കുകയും ഇത് പ്രവർത്തിക്കുന്നതിനെതിരെ മുന്നറിയിപ്പ് നൽകുകയും ചെയ്തിട്ടുണ്ട്. ഇത്തരക്കാര്‍ക്ക് ഇഹലോകത്തും പരലോകത്തും  അല്ലാഹു ഒരുക്കിവെച്ചിട്ടുള്ള ശിക്ഷകളെക്കുറിച്ച് വിവരിക്കുകയും ചെയ്തിട്ടുണ്ട്. വിശുദ്ധ ഖുർആനിൽ 20 ൽ അധികം സ്ഥലങ്ങളിൽ ഇസ്റാഫിനെ കുറിച്ചുള്ള  പരാമർശങ്ങൾ വന്നിട്ടുണ്ട്.

ഇസ്റാഫിന്റെ ആളുകളെ അല്ലാഹു ഇഷ്ടപ്പെടുന്നില്ല എന്ന് അല്ലാഹു  അറിയിച്ചിരിക്കുന്നു. അല്ലാഹു പറയുന്നു:

….. وَلَا تُسْرِفُوٓا۟ ۚ إِنَّهُۥ لَا يُحِبُّ ٱلْمُسْرِفِينَ

നിങ്ങള്‍ ഇസ്റാഫ് ചെയ്യരുത്‌. ദുര്‍വ്യയം ചെയ്യുന്നവരെ അല്ലാഹു ഇഷ്ടപ്പെടുകയേയില്ല. (ഖു൪ആന്‍:7/31)

ഇസ്റാഫിന്റെ ആളുകൾ തന്നെയാണ് നരകാവകാശികൾ എന്ന് അല്ലാഹു  അറിയിച്ചിരിക്കുന്നു. അല്ലാഹു പറഞ്ഞു:

لَا جَرَمَ أَنَّمَا تَدْعُونَنِىٓ إِلَيْهِ لَيْسَ لَهُۥ دَعْوَةٌ فِى ٱلدُّنْيَا وَلَا فِى ٱلْـَٔاخِرَةِ وَأَنَّ مَرَدَّنَآ إِلَى ٱللَّهِ وَأَنَّ ٱلْمُسْرِفِينَ هُمْ أَصْحَٰبُ ٱلنَّارِ

നിങ്ങള്‍ എന്നെ ഏതൊന്നിലേക്ക് ക്ഷണിച്ചു കൊണ്ടിരിക്കുന്നുവോ അതിന് ഇഹലോകത്താകട്ടെ പരലോകത്താകട്ടെ യാതൊരു പ്രാര്‍ത്ഥനയും ഉണ്ടാകാവുന്നതല്ല എന്നതും, നമ്മുടെ മടക്കം അല്ലാഹുവിങ്കലേക്കാണ് എന്നതും, ഇസ്റാഫിന്റെ ആളുകൾ തന്നെയാണ് നരകാവകാശികള്‍ എന്നതും ഉറപ്പായ കാര്യമാകുന്നു. (ഖു൪ആന്‍:40/43)

ഇസ്റാഫ് ചെയ്യുന്നവരുടെ നാശത്തിനും, ഇഹലോകത്തും പരലോകത്തും അവർക്ക് ശിക്ഷകൾ വന്നെത്തുന്നതിനും അത് കാരണമാണെന്ന് അല്ലാഹു അറിയിച്ചിരിക്കുന്നു. അല്ലാഹു പറഞ്ഞു:

ثُمَّ صَدَقْنَٰهُمُ ٱلْوَعْدَ فَأَنجَيْنَٰهُمْ وَمَن نَّشَآءُ وَأَهْلَكْنَا ٱلْمُسْرِفِينَ

അനന്തരം അവരോടുള്ള വാഗ്ദാനത്തില്‍ നാം സത്യസന്ധത പാലിച്ചു. അങ്ങനെ അവരെയും നാം ഉദ്ദേശിക്കുന്നവരെയും നാം രക്ഷപ്പെടുത്തി. ഇസ്റാഫ് ചെയ്യുന്നവരെ നാം നശിപ്പിക്കുകയും ചെയ്തു. (ഖു൪ആന്‍:21/9)

അല്ലാഹു പറഞ്ഞു:

وَإِذَآ أَرَدْنَآ أَن نُّهْلِكَ قَرْيَةً أَمَرْنَا مُتْرَفِيهَا فَفَسَقُوا۟ فِيهَا فَحَقَّ عَلَيْهَا ٱلْقَوْلُ فَدَمَّرْنَٰهَا تَدْمِيرًا

ഏതെങ്കിലും ഒരു രാജ്യം നാം നശിപ്പിക്കാന്‍ ഉദ്ദേശിച്ചാല്‍ അവിടത്തെ സുഖലോലുപന്‍മാര്‍ക്ക് നാം ആജ്ഞകള്‍ നല്‍കും. എന്നാല്‍ (അത് വകവെക്കാതെ) അവര്‍ അവിടെ താന്തോന്നിത്തം നടത്തും. (ശിക്ഷയെപ്പറ്റിയുള്ള) വാക്ക് അങ്ങനെ അതിന്‍റെ (രാജ്യത്തിന്‍റെ) കാര്യത്തില്‍ സ്ഥിരപ്പെടുകയും, നാം അതിനെ നിശ്ശേഷം തകര്‍ക്കുകയും ചെയ്യുന്നതാണ്‌. (ഖു൪ആന്‍:17/16)

ഇസ്റാഫ് എന്നത് തിന്മയ്ക്ക് പ്രേരിപ്പിക്കുന്ന മനസ്സിന്റെയും  പിശാചിന്റെയും അലങ്കാരങ്ങളിൽ (പ്രലോഭനങ്ങളിൽ) പെട്ടതാണെന്ന് അല്ലാഹു അറിയിച്ചിരിക്കുന്നു. അല്ലാഹു പറഞ്ഞു:

وَإِذَا مَسَّ ٱلْإِنسَٰنَ ٱلضُّرُّ دَعَانَا لِجَنۢبِهِۦٓ أَوْ قَاعِدًا أَوْ قَآئِمًا فَلَمَّا كَشَفْنَا عَنْهُ ضُرَّهُۥ مَرَّ كَأَن لَّمْ يَدْعُنَآ إِلَىٰ ضُرٍّ مَّسَّهُۥ ۚ كَذَٰلِكَ زُيِّنَ لِلْمُسْرِفِينَ مَا كَانُوا۟ يَعْمَلُونَ ‎

മനുഷ്യന് കഷ്ടത ബാധിച്ചാല്‍ കിടന്നിട്ടോ ഇരുന്നിട്ടോ നിന്നിട്ടോ അവന്‍ നമ്മോട് പ്രാര്‍ത്ഥിക്കുന്നു. അങ്ങനെ അവനില്‍ നിന്ന് നാം കഷ്ടത നീക്കികൊടുത്താല്‍, അവനെ ബാധിച്ച കഷ്ടതയുടെ കാര്യത്തില്‍ നമ്മോടവന്‍ പ്രാര്‍ത്ഥിച്ചിട്ടേയില്ല എന്ന ഭാവത്തില്‍ അവന്‍ നടന്നു പോകുന്നു. ഇസ്റാഫ് ചെയ്യുന്നവര്‍ക്ക് അപ്രകാരം, അവര്‍ ചെയ്തുകൊണ്ടിരിക്കുന്നത് അലങ്കാരമായി തോന്നിക്കപ്പെട്ടിരിക്കുന്നു. (ഖു൪ആന്‍:10/12)

ഇസ്റാഫ് എന്നത് അല്ലാഹുവിൽ നിന്നുള്ള ഹിദായത്തും തൗഫീഖും തടയപ്പെടുന്നതിന് കാരണമാണെന്ന് അല്ലാഹു അറിയിച്ചിരിക്കുന്നു. അല്ലാഹു പറഞ്ഞു:

إِنَّ ٱللَّهَ لَا يَهْدِى مَنْ هُوَ مُسْرِفٌ كَذَّابٌ

ഇസ്റാഫ് ചെയ്യുന്നവനും വ്യാജവാദിയുമായിട്ടുള്ള ഒരാളെയും അല്ലാഹു നേര്‍വഴിയിലാക്കുകയില്ല; തീര്‍ച്ച. (ഖു൪ആന്‍:40/28)

كَذَٰلِكَ يُضِلُّ ٱللَّهُ مَنْ هُوَ مُسْرِفٌ مُّرْتَابٌ

അപ്രകാരം ഇസ്റാഫ് ചെയ്യുന്നവനും സംശയാലുവുമായിട്ടുള്ളതാരോ അവരെ അല്ലാഹു വഴിതെറ്റിക്കുന്നു. (ഖു൪ആന്‍:40/34)

ഈ അർത്ഥം വരുന്ന വചനങ്ങൾ ഖുർആനിൽ നിരവധിയുണ്ട്.

ഇസ്റാഫ് എന്നാൽ മിതത്വത്തിന്റെയും മിതവ്യയത്തിന്റെയും പരിധി ലംഘിക്കലാണ്. പലരും കരുതുന്നത് പോലെ അത് പണം ചെലവാക്കുന്ന കാര്യത്തിൽ മാത്രമുള്ള ഒന്നല്ല.

قال إياس بن معاوية رحمه الله  : ما جاوزتَ به أمر الله فهو سَرَف.

ഇമാം ഇയാസ് ബ്നു മുആവിയ رحمه الله പറഞ്ഞു: ‘അല്ലാഹുവിന്റെ കൽപ്പനയെ നീ എവിടെ ലംഘിക്കുന്നുവോ അതെല്ലാം ഇസ്റാഫാണ്.’

അതിനാൽ തന്നെ ഇസ്റാഫിന് പല രൂപങ്ങളുണ്ട്, അത് ഭക്ഷണത്തിലോ പാനീയത്തിലോ സാമ്പത്തിക കാര്യങ്ങളിലോ മാത്രം ഒതുങ്ങുന്നില്ല.

ഇസ്റാഫിന്റെ കൂട്ടത്തിൽ ഏറ്റവും അപകടകരവും മോശവുമായത് പ്രപഞ്ചനാഥനായ അല്ലാഹുവിൽ അവിശ്വസിക്കലും, അവനിൽ പങ്ക് ചേര്‍ക്കലും, അല്ലാഹുവിന്റെ പ്രവാചകന്മാരെ നിഷേധിക്കലുമാണ്.

وَكَذَٰلِكَ نَجْزِى مَنْ أَسْرَفَ وَلَمْ يُؤْمِنۢ بِـَٔايَٰتِ رَبِّهِۦ ۚ وَلَعَذَابُ ٱلْـَٔاخِرَةِ أَشَدُّ وَأَبْقَىٰٓ

അതിരുകവിയുകയും, തന്‍റെ രക്ഷിതാവിന്‍റെ ദൃഷ്ടാന്തങ്ങളില്‍ വിശ്വസിക്കാതിരിക്കുകയും ചെയ്തവര്‍ക്ക് അപ്രകാരമാണ് നാം പ്രതിഫലം നല്‍കുന്നത്‌. പരലോകത്തെ ശിക്ഷ കൂടുതല്‍ കഠിനമായതും നിലനില്‍ക്കുന്നതും തന്നെയാകുന്നു. (ഖു൪ആന്‍:20/127)

കൊലപാതകത്തിലും ഇസ്‌റാഫ് സംഭവിക്കാറുണ്ട്; കൊലയാളിയല്ലാത്ത മറ്റൊരാളെ കൊല്ലുക, അല്ലെങ്കിൽ കൊലയാളിയുടെ കുടുംബത്തോട് അനീതിയും അക്രമവും കാണിക്കുക, അതുമല്ലെങ്കിൽ കൊലയാളിയോട് തന്നെ അവയവങ്ങൾ വികൃതമാക്കിയോ പരിധി ലംഘിച്ചോ അതിക്രമം കാണിക്കുക എന്നിവയെല്ലാം ഇതിൽ ഉൾപ്പെടുന്നു. ഇവയെല്ലാം അല്ലാഹു നിരോധിച്ച അതിരുകവിയലുകളാണ്.”

وَلَا تَقْتُلُوا۟ ٱلنَّفْسَ ٱلَّتِى حَرَّمَ ٱللَّهُ إِلَّا بِٱلْحَقِّ ۗ وَمَن قُتِلَ مَظْلُومًا فَقَدْ جَعَلْنَا لِوَلِيِّهِۦ سُلْطَٰنًا فَلَا يُسْرِف فِّى ٱلْقَتْلِ ۖ إِنَّهُۥ كَانَ مَنصُورًا

അല്ലാഹു പവിത്രത നല്‍കിയിട്ടുള്ള ജീവനെ ന്യായപ്രകാരമല്ലാതെ നിങ്ങള്‍ ഹനിക്കരുത്‌. അക്രമത്തിനു വിധേയനായി വല്ലവനും കൊല്ലപ്പെടുന്ന പക്ഷം അവന്‍റെ അവകാശിക്ക് നാം (പ്രതികാരം ചെയ്യാന്‍) അധികാരം വെച്ച് കൊടുത്തിട്ടുണ്ട്‌. എന്നാല്‍ അവന്‍ കൊലയില്‍ അതിരുകവിയരുത്‌. തീര്‍ച്ചയായും അവന്‍ സഹായിക്കപ്പെടുന്നവനാകുന്നു. (ഖു൪ആന്‍:17/33)

അശ്ലീല വൃത്തികളിൽ ഏർപ്പെടുന്നതും മ്ലേച്ഛമായ കാര്യങ്ങൾ പ്രവർത്തിക്കുന്നതും ഇസ്‌റാഫിൽ പെട്ടതാണ്. അതുകൊണ്ടാണ് ലൂഥ് നബി عليه السلام തന്റെ ജനതയെ ഉപദേശിച്ചുകൊണ്ടും അവർക്ക് മുന്നറിയിപ്പ് നൽകിക്കൊണ്ടും ഇപ്രകാരം പറഞ്ഞത്:

إِنَّكُمْ لَتَأْتُونَ ٱلرِّجَالَ شَهْوَةً مِّن دُونِ ٱلنِّسَآءِ ۚ بَلْ أَنتُمْ قَوْمٌ مُّسْرِفُونَ

സ്ത്രീകളെ വിട്ട് പുരുഷന്‍മാരുടെ അടുത്ത് തന്നെ നിങ്ങള്‍ കാമവികാരത്തോടെ ചെല്ലുന്നു. അല്ല, നിങ്ങള്‍ അതിരുവിട്ട് പ്രവര്‍ത്തിക്കുന്ന ഒരു ജനതയാകുന്നു. (ഖു൪ആന്‍:9/81)

ലൂഥ് നബിയുടെ ജനതയ്ക്ക് ശിക്ഷ വന്നെത്തിയ സന്ദർഭത്തെക്കുറിച്ച് പ്രതിപാദിച്ചുകൊണ്ട് അല്ലാഹു പറഞ്ഞു:

قَالَ فَمَا خَطْبُكُمْ أَيُّهَا ٱلْمُرْسَلُونَ ‎﴿٣١﴾‏ قَالُوٓا۟ إِنَّآ أُرْسِلْنَآ إِلَىٰ قَوْمٍ مُّجْرِمِينَ ‎﴿٣٢﴾‏ لِنُرْسِلَ عَلَيْهِمْ حِجَارَةً مِّن طِينٍ ‎﴿٣٣﴾‏ مُّسَوَّمَةً عِندَ رَبِّكَ لِلْمُسْرِفِينَ ‎﴿٣٤﴾

അദ്ദേഹം ചോദിച്ചു: ഹേ; ദൂതന്‍മാരേ, അപ്പോള്‍ നിങ്ങളുടെ കാര്യമെന്താണ്‌? അവര്‍ പറഞ്ഞു: ഞങ്ങള്‍ കുറ്റവാളികളായ ഒരു ജനതയിലേക്ക് അയക്കപ്പെട്ടതാകുന്നു. കളിമണ്ണുകൊണ്ടുള്ള കല്ലുകള്‍ ഞങ്ങള്‍ അവരുടെ നേരെ അയക്കുവാന്‍ വേണ്ടി. അതിക്രമകാരികള്‍ക്ക് വേണ്ടി തങ്ങളുടെ രക്ഷിതാവിന്‍റെ അടുക്കല്‍ അടയാളപ്പെടുത്തിയ (കല്ലുകള്‍) (ഖു൪ആന്‍:51/31-34)

പൊതുവായി പറയുകയാണെങ്കിൽ, എല്ലാത്തരം പാപങ്ങൾ പ്രവർത്തിക്കുന്നതും തെറ്റുകളിൽ ഏർപ്പെടുന്നതും ഇസ്‌റാഫിൽ പെട്ടതാണ്. അത്തരം പ്രവർത്തികൾ ചെയ്യുന്നവർ അല്ലാഹുവിന്റെ ശിക്ഷയ്ക്ക് വിധേയരാകാൻ സാധ്യതയുള്ളവരുമാണ്.

എന്നാൽ സാമ്പത്തികമായ കാര്യങ്ങളിലും, ഭക്ഷണപാനീയങ്ങളിലും, വസ്ത്രധാരണത്തിലും അതുപോലെയുള്ള മറ്റ് മേഖലകളിലുമുള്ള  ഇസ്‌റാഫ് എന്നത് ജനങ്ങൾക്കിടയിൽ വളരെ പ്രശസ്തവും എല്ലാവർക്കും അറിയാവുന്നതുമായ ഒരു കാര്യമാണ്.

وَكُلُوا۟ وَٱشْرَبُوا۟ وَلَا تُسْرِفُوٓا۟ ۚ إِنَّهُۥ لَا يُحِبُّ ٱلْمُسْرِفِينَ

നിങ്ങള്‍ തിന്നുകയും കുടിക്കുകയും ചെയ്തു കൊള്ളുക. എന്നാല്‍ നിങ്ങള്‍ ദുര്‍വ്യയം ചെയ്യരുത്‌. ദുര്‍വ്യയം ചെയ്യുന്നവരെ അല്ലാഹു ഇഷ്ടപ്പെടുകയേയില്ല. (ഖു൪ആന്‍:7/31)

عن عبد الله بن عمرو بن العاص رضي الله عنهما أنَّ النبي صلى الله عليه وسلم قال : كُلُوا وَاشْرَبُوا وَتَصَدَّقُوا وَالْبَسُوا فِي غَيْرِ مَخِيلَةٍ وَلَا سَرَفٍ.

അബ്ദില്ലാഹിബ്നു അംറ് ഇബ്നുൽ ആസ് رضي الله عنهما വിൽ നിന്ന് നിവേദനം: നബി ﷺ പറഞ്ഞു: അഹങ്കാരമോ ധൂർത്തോ ഇല്ലാത്ത രീതിയിൽ നിങ്ങൾ തിന്നുകയും കുടിക്കുകയും ദാനം ചെയ്യുകയും വസ്ത്രം ധരിക്കുകയും ചെയ്യുക. (അഹ്മദ്)

عن ابن عباس رضي الله عنهما أنَّه قال : كُلْ مَا شِئْتَ وَالبَسْ مَا شِئْتَ مَا أَخْطَأَتْكَ اثْنَتَانِ: سَرَفٌ أَوْ مَخِيلَةٌ.

ഇബ്നു അബ്ബാസ് رضي الله عنهما പറഞ്ഞു: രണ്ട് കാര്യങ്ങൾ നിന്നെ ബാധിക്കാതിരുന്നാൽ നിനക്ക് ഇഷ്ടമുള്ളത് ഭക്ഷിക്കാം, ഇഷ്ടമുള്ളത് ധരിക്കാം: ഇസ്റാഫും അഹങ്കാരവും. (ബുഖാരി)

സാമ്പത്തിക കാര്യങ്ങളിലും ഭക്ഷണപാനീയങ്ങളിലും വസ്ത്രധാരണത്തിലുമുള്ള ഇസ്റാഫ് എന്നത്, അവ സമ്പാദിക്കുന്ന മാർഗ്ഗങ്ങളിലോ അല്ലെങ്കിൽ അവ ചിലവഴിക്കുന്ന രീതികളിലോ സംഭവിക്കുന്ന എല്ലാത്തരം അതിരുകവിയലുമാണ്. ഇവയിലെല്ലാം ‘ഇസ്‌റാഫ്’ കടന്നുവരാം. എന്തെന്നാൽ, ഈ ധനം സമ്പാദിക്കുന്നതിലോ അത് ചിലവഴിക്കുന്നതിലോ ശറഇന്റെ (ഇസ്‌ലാമിക നിയമത്തിന്റെ) പരിധികൾ ലംഘിക്കുന്ന ഏത് പ്രവർത്തിയും ധൂർത്തിന്റെ ഗണത്തിൽ പെടുന്നതാണ്; അത് ചെയ്യുന്നവൻ ശിക്ഷയ്ക്ക് വിധേയനുമാണ്.

അതുകൊണ്ട് തന്നെ പലിശ തിന്നുന്നതും, കൈക്കൂലി വാങ്ങുന്നതും, ചൂതാട്ടത്തിൽ ഏർപ്പെടുന്നതും, ജനങ്ങളെ വഞ്ചിക്കുന്നതും, കച്ചവട ഇടപാടുകളിൽ  കൃത്രിമം കാണിക്കുന്നതും എല്ലാം ധനം സമ്പാദിക്കുന്ന കാര്യത്തിൽ സംഭവിക്കുന്ന ഇസ്‌റാഫാണ്.

അതുപോലെതന്നെ, അല്ലാഹു നിഷിദ്ധമാക്കിയ ഭക്ഷണപാനീയങ്ങൾ കഴിക്കുന്നതും ഇതിൽ ഉൾപ്പെടുന്നു; ലഹരിവസ്തുക്കൾ ഉപയോഗിക്കുക, മദ്യം കുടിക്കുക, പുകയില ഉൽപ്പന്നങ്ങൾ ഉപയോഗിക്കുക എന്നിവയെല്ലാം ധൂർത്താണ്. ഇത്തരം ഹറാമായ കാര്യങ്ങൾ വാങ്ങുന്നതിനും വിൽക്കുന്നതിനുമായി എത്രയോ വലിയ തുകകളാണ് പാഴാക്കിക്കൊണ്ടിരിക്കുന്നത്! ഇത് ചെയ്യുന്നവൻ അല്ലാഹുവിന്റെ ശിക്ഷയ്ക്ക് വിധേയനുമാണ്.

വസ്ത്രധാരണത്തിന്റെ കാര്യത്തിലും, അല്ലാഹു നിശ്ചയിച്ച പരിധികൾ ലംഘിച്ചുകൊണ്ട് എത്രയോ ഇനം നിഷിദ്ധമായ ധൂർത്തുകളിലാണ്  ജനങ്ങൾ വീണുപോകുന്നത്! അത് അടിസ്ഥാനപരമായിത്തന്നെ നിഷിദ്ധമായ വസ്ത്രങ്ങൾ ധരിച്ചുകൊണ്ടുള്ളതാകാം; ഉദാഹരണത്തിന് പുരുഷന്മാർ സ്വർണ്ണവും പട്ടും ധരിക്കുന്നത് പോലെ. അല്ലെങ്കിൽ ശറഇന്റെ പരിധികൾ ലംഘിച്ചുകൊണ്ടുള്ളതാകാം; വസ്ത്രം കണങ്കാലിന് താഴെ ഇറക്കി ഉടുക്കുക, അഹങ്കാരത്തിനോ പ്രശസ്തിക്കോ വേണ്ടി വസ്ത്രം ധരിക്കുക തുടങ്ങിയവ ഇതിൽ പെടുന്നു. ഇവയെല്ലാം നിഷിദ്ധമായ അതിരുകവിയലാണ് , ഇത് ചെയ്യുന്നവൻ അല്ലാഹുവിന്റെ ശിക്ഷയ്ക്ക് വിധേയനുമാണ്.

വിശേഷ അവസരങ്ങളിലും ആഘോഷങ്ങളിലും, പ്രത്യേകിച്ച് വിവാഹ വേളകളിലും മറ്റും കാണിക്കുന്ന ധൂര്‍ത്ത് ഇതിൽ ഉൾപ്പെടുന്നു. അത്തരം സന്ദർഭങ്ങളിൽ എത്രയോ നികൃഷ്ടമായ രീതിയിലുള്ള ധൂർത്തുകളാണ് നടക്കുന്നത്! അതിലുപരിയായി, അവിടെ അരങ്ങേറുന്ന നിഷിദ്ധമായ കാര്യങ്ങളും വെറുക്കപ്പെട്ട പ്രവർത്തികളും അതിരുകടക്കലിന്റെ ഇസ്‌റാഫിന്റെ ഭാഗമാണ്. ഇത്തരം കാര്യങ്ങൾ ചെയ്യുന്നവർ അല്ലാഹുവിന്റെ ശിക്ഷയ്ക്ക് വിധേയരാകാൻ സാധ്യതയുള്ളവരുമാണ്.

സൂക്ഷ്മമായി നിരീക്ഷിക്കുന്നവർക്കും ചിന്തിക്കുന്നവർക്കും മനസ്സിലാക്കാൻ സാധിക്കുന്ന അത്രയും വിശാലമായ ഒരു മേഖലയാണ് ‘ഇസ്‌റാഫ്’. അതുകൊണ്ട് നാം നമ്മുടെ രക്ഷിതാവായ അല്ലാഹുവിനെ സൂക്ഷിക്കുക. നമ്മുടെ മടക്കം അല്ലാഹുവിലേക്കാണെന്നും, അവന്റെ മുമ്പിൽ നാം നിൽക്കേണ്ടി വരുമെന്നും ഓർക്കുക. അവിടെ നാം ചോദ്യം ചെയ്യപ്പെടുന്നതാണ്. അതിനാൽ അവിടെ മറുപടി നൽകാൻ നാം തയ്യാറെടുക്കേണ്ടതുണ്ട്.

ധൂർത്തിന്റെ എല്ലാ രൂപങ്ങളിൽ നിന്നും അല്ലാഹുവിലേക്ക് പശ്ചാത്തപിച്ചു മടങ്ങാൻ ഖുർആനിലെ ഏറ്റവും പ്രതീക്ഷാനിർഭരമായ ഒരു വചനത്തിലൂടെ അല്ലാഹു തന്റെ ദാസന്മാരെ വിളിക്കുന്നു. പാപം എത്ര വലുതാണെങ്കിലും കുറ്റം എത്ര ഗൗരവമാണെങ്കിലും പശ്ചാത്തപിക്കുന്നവരുടെ തൗബ അല്ലാഹു സ്വീകരിക്കുമെന്ന വലിയ വാഗ്ദാനമാണത്.

قُلْ يَٰعِبَادِىَ ٱلَّذِينَ أَسْرَفُوا۟ عَلَىٰٓ أَنفُسِهِمْ لَا تَقْنَطُوا۟ مِن رَّحْمَةِ ٱللَّهِ ۚ إِنَّ ٱللَّهَ يَغْفِرُ ٱلذُّنُوبَ جَمِيعًا ۚ إِنَّهُۥ هُوَ ٱلْغَفُورُ ٱلرَّحِيمُ ‎

പറയുക: സ്വന്തം ആത്മാക്കളോട് അതിക്രമം പ്രവര്‍ത്തിച്ച് പോയ എന്‍റെ ദാസന്‍മാരേ, അല്ലാഹുവിന്‍റെ കാരുണ്യത്തെപ്പറ്റി നിങ്ങള്‍ നിരാശപ്പെടരുത്‌. തീര്‍ച്ചയായും അല്ലാഹു പാപങ്ങളെല്ലാം പൊറുക്കുന്നതാണ്‌. തീര്‍ച്ചയായും അവന്‍ തന്നെയാകുന്നു ഏറെ പൊറുക്കുന്നവനും കരുണാനിധിയും. (ഖു൪ആന്‍:39/53)

ഇസ്റാഫിന്റെ കാര്യത്തിൽ, വിശുദ്ധ ഖുർആനിലെ ഒരു പ്രാർത്ഥന കാണുക:

رَبَّنَا ٱغْفِرْ لَنَا ذُنُوبَنَا وَإِسْرَافَنَا فِىٓ أَمْرِنَا وَثَبِّتْ أَقْدَامَنَا وَٱنصُرْنَا عَلَى ٱلْقَوْمِ ٱلْكَٰفِرِينَ

ഞങ്ങളുടെ രക്ഷിതാവേ, ഞങ്ങളുടെ പാപങ്ങളും, ഞങ്ങളുടെ കാര്യങ്ങളില്‍ വന്നുപോയ അതിക്രമങ്ങളും ഞങ്ങള്‍ക്ക് നീ പൊറുത്തുതരേണമേ. ഞങ്ങളുടെ കാലടികള്‍ നീ ഉറപ്പിച്ചു നിര്‍ത്തുകയും, സത്യനിഷേധികളായ ജനതക്കെതിരില്‍ ഞങ്ങളെ നീ സഹായിക്കുകയും ചെയ്യേണമേ. (ഖു൪ആന്‍:3/147)

നബി ﷺ തന്റെ നമസ്കാരത്തിൽ തശഹ്ഹുദിനും (അത്തഹിയ്യാത്ത്) സലാമിനും ഇടയിലായി ഇപ്രകാരം പ്രാർത്ഥിക്കാറുണ്ടായിരുന്നു:”

اَللهُمَّ اغْفِرْ لِي مَا قَدَّمْتُ ، وَمَا أَخَّرْتُ ، وَمَا أَسْرَرْتُ ، وَمَا أَعْلَنْتُ ، وَمَا أسْرَفْتُ ، وَمَا أَنْتَ أَعْلَمُ بِهِ مِنِّي . أَنْتَ الْمُقَدِّمُ ، وَأَنْتَ الْمُؤَخِّرُ لاَ إِلَهَ إِلاَّ أَنْتَ

അല്ലാഹുവേ, നീ എനിക്ക് പൊറുത്തു തരേണമേ! ഞാന്‍ ചെയ്തു കഴിഞ്ഞ പാപവും, ഇനി ചെയ്യാന്‍ പോകുന്ന പാപവും, രഹസ്യമായും പരസ്യമായും അതിരുകവിഞ്ഞും ചെയ്ത പാപവും, അവ എന്നേക്കാള്‍ കൂടുതല്‍ അറിയുന്നവന്‍ നീയാണ്. ‘അല്‍-മുഖദ്ദിം’ഉം, ‘അല്‍-മുഅഖ്ഖിര്‍’ഉം (നിന്‍റെ ഔദാര്യമോ ശിക്ഷയോ നല്‍കുന്നതില്‍ മുന്തിപ്പിക്കുന്നവനും പിന്തിപ്പിക്കുന്നവനും) നീയാണ്. യഥാര്‍ത്ഥത്തില്‍ നീയല്ലാതെ ആരാധനക്കര്‍ഹനായി മറ്റാരുമില്ല. (മുസ്ലിം:771)

 

 

www.kanzululoom.com