യൂസുഫ് നബി  عليه السلام ഈജിപ്തിലെ  ഭരണകര്‍ത്താവായ സംഭവം പ്രസിദ്ധമാണ്. അതോടുകൂടി അദ്ദേഹത്തിന്റെ മാതാപിതാക്കളും സഹോദരന്‍മാരും – അഥവാ യഅ്ഖൂബ് നബി  عليه السلام യും കുടുംബവും – ഈജിപ്തില്‍ വന്നു താമസമാക്കിയിരുന്നു. യഅ്ഖൂബ് നബി  عليه السلام യുടെ സന്താനപരമ്പരകള്‍ക്കാണ് ഇസ്രാഈല്‍ വര്‍ഗ്ഗം (بنو إسرائيل) എന്നു പറഞ്ഞുവരുന്നത്. അവര്‍ ക്രമേണ ഈജിപ്തില്‍ പെരുകിപ്പെരുകി വന്നു. കാലക്രമത്തില്‍ അവരുടെ പൂര്‍വ്വകാല പ്രശസ്തിയും, പ്രതാപവും നശിച്ചുപോയി. ഈജിപ്തിലെ പൂര്‍വ്വനിവാസികളായ ഖിബ്ത്തി (കൊപ്ത്തി)കള്‍ ഭരണകക്ഷിയായ ഉന്നതവര്‍ഗ്ഗ മെന്നും, യൂസുഫ് നബി عليه السلام യുടെ കാലം മുതല്‍ അവിടെ കുടിയേറിപ്പാര്‍ത്തുവന്ന ഇസ്രാഈല്യര്‍ കേവലം അടിമകളായ അധമവര്‍ഗ്ഗമെന്നും വിഭജിക്കപ്പെട്ടിരുന്നു. ഖിബ്ത്തീ വര്‍ഗ്ഗക്കാരായ ഫിര്‍ഔന്‍ രാജാക്കളുടെ  ഭരണത്തില്‍, ഇസ്രാഈല്യര്‍ അങ്ങേഅറ്റം മര്‍ദ്ദിക്കപ്പെട്ടുവന്നു. അടിമകളെപ്പോലെയുമല്ല, ആടുമാടുകളെക്കാള്‍ താണവര്‍ഗ്ഗമായിട്ടാണ് കൊപ്തികള്‍ അവരെ ഗണിച്ചു വന്നത്. ഇഇസ്രാഈല്യരുടെ സംഖ്യാ വര്‍ദ്ധനവ് ഖിബ്ത്തികളില്‍ അസൂയയും ഭയവും ഉളവാക്കി. ഭാവിയില്‍ തങ്ങളുടെ ഭരണം തന്നെ നഷ്ടപ്പെടുവാന്‍ അത് കാരണമായേക്കുമോ എന്നായി. ഒടുക്കം ഇസ്രാഈല്യരില്‍ ജനിക്കുന്ന ആണ്‍കുട്ടികളെയെല്ലാം അറുകൊല ചെയ്യാന്‍ ഫിര്‍ഔന്‍ കല്‍പിച്ചു. മൂസാനബി عليه السلام യിലൂടെയാണ് അല്ലാഹു ഇസ്‌റാഈൽ ജനതയുടെ രക്ഷ നിശ്ചയിച്ചത്. ഇസ്രാഈല്യരുടെ ആണ്‍കുട്ടികളെ ഫിര്‍ഔൻ  കൊന്നൊടുക്കിയിരുന്ന കാലത്താണ് മൂസാ عليه السلام യുടെ ജനനം.

അല്ലാഹു മൂസാ عليه السلام യുടെ ഉമ്മയോട് തന്റെ കുട്ടിയെ മുലയൂട്ടാനും തന്റെയടുക്കൽ താമസിപ്പിക്കാനും,  ഇനി കുഞ്ഞിനെ ആരെങ്കിലും ഫിര്‍ഔന്റെ അടുക്കലേക്ക് കൊണ്ടുപോകുമെന്ന് ഭയപ്പെടുകയാണെങ്കിൽ ഒരു അടച്ച പെട്ടിയിൽ അവനെ നദിയിൽ ഇട്ടേക്കുവാനും തോന്നിപ്പിച്ചു.

وَأَوْحَيْنَآ إِلَىٰٓ أُمِّ مُوسَىٰٓ أَنْ أَرْضِعِيهِ ۖ فَإِذَا خِفْتِ عَلَيْهِ فَأَلْقِيهِ فِى ٱلْيَمِّ وَلَا تَخَافِى وَلَا تَحْزَنِىٓ ۖ إِنَّا رَآدُّوهُ إِلَيْكِ وَجَاعِلُوهُ مِنَ ٱلْمُرْسَلِينَ

മൂസായുടെ മാതാവിന് നാം ബോധനം നല്‍കി: അവന്ന് നീ മുലകൊടുത്തു കൊള്ളുക. ഇനി അവന്‍റെ കാര്യത്തില്‍ നിനക്ക് ഭയം തോന്നുകയാണെങ്കില്‍ അവനെ നീ നദിയില്‍ ഇട്ടേക്കുക. നീ ഭയപ്പെടുകയും ദുഃഖിക്കുകയും വേണ്ട. തീര്‍ച്ചയായും അവനെ നാം നിന്‍റെ അടുത്തേക്ക് തിരിച്ച് കൊണ്ട് വരുന്നതും , അവനെ ദൈവദൂതന്‍മാരില്‍ ഒരാളാക്കുന്നതുമാണ്‌. (ഖു൪ആന്‍:28/7)

إِذْ أَوْحَيْنَآ إِلَىٰٓ أُمِّكَ مَا يُوحَىٰٓ ‎﴿٣٨﴾‏ أَنِ ٱقْذِفِيهِ فِى ٱلتَّابُوتِ فَٱقْذِفِيهِ فِى ٱلْيَمِّ فَلْيُلْقِهِ ٱلْيَمُّ بِٱلسَّاحِلِ يَأْخُذْهُ عَدُوٌّ لِّى وَعَدُوٌّ لَّهُۥ ۚ وَأَلْقَيْتُ عَلَيْكَ مَحَبَّةً مِّنِّى وَلِتُصْنَعَ عَلَىٰ عَيْنِىٓ ‎﴿٣٩﴾

അതായത് നിന്‍റെ മാതാവിന് ബോധനം നല്‍കപ്പെടേണ്ട കാര്യം നാം ബോധനം നല്‍കിയ സന്ദര്‍ഭത്തില്‍. നീ അവനെ (കുട്ടിയെ) പെട്ടിയിലാക്കിയിട്ട് നദിയിലിട്ടേക്കുക. നദി ആ പെട്ടി കരയില്‍ തള്ളിക്കൊള്ളും. എനിക്കും അവന്നും ശത്രുവായിട്ടുള്ള ഒരാള്‍ അവനെ എടുത്ത് കൊള്ളും. (ഹേ; മൂസാ,) എന്‍റെ പക്കല്‍ നിന്നുള്ള സ്നേഹം നിന്‍റെ മേല്‍ ഞാന്‍ ഇട്ടുതരികയും ചെയ്തു. എന്‍റെ നോട്ടത്തിലായിക്കൊണ്ട നീ വളര്‍ത്തിയെടുക്കപ്പെടാന്‍ വേണ്ടിയും കൂടിയാണത്‌. (ഖു൪ആന്‍:20/38-39)

അവര്‍ കുട്ടിയെ ഒരു പെട്ടിയിലാക്കി നൈല്‍ നദിയിലിട്ടു. ഫിര്‍ഔന്റെ കൊട്ടാരത്തിന്നരികെ ഒഴുകിപ്പോയിക്കൊണ്ടിരിക്കുന്ന ആ നദി അതു കരക്കിട്ടു. അങ്ങനെ ഫിർഔനിന്റെ ആളുകൾ കുട്ടിയെ കണ്ടെടുത്തു.

فَٱلْتَقَطَهُۥٓ ءَالُ فِرْعَوْنَ لِيَكُونَ لَهُمْ عَدُوًّا وَحَزَنًا ۗ إِنَّ فِرْعَوْنَ وَهَٰمَٰنَ وَجُنُودَهُمَا كَانُوا۟ خَٰطِـِٔينَ

എന്നിട്ട് ഫിര്‍ഔന്‍റെ ആളുകള്‍ അവനെ (നദിയില്‍ നിന്ന്‌) കണ്ടെടുത്തു. അവന്‍ അവരുടെ ശത്രുവും ദുഃഖഹേതുവും ആയിരിക്കാന്‍ വേണ്ടി. തീര്‍ച്ചയായും ഫിര്‍ഔനും ഹാമാനും അവരുടെ സൈന്യങ്ങളും അബദ്ധം പറ്റിയവരായിരുന്നു. (ഖു൪ആന്‍:28/8)

ഭാവിയില്‍ തങ്ങളുടെ രാജത്വവും പ്രതാപവുമെല്ലാം നഷ്ടപ്പെടുവാനും, തീരാദുഃഖത്തിനും ഈ കുട്ടി കാരണമാകുമെന്ന് അവര്‍ക്ക് മനസ്സിലാക്കാൻ കഴിഞ്ഞില്ല.

وَقَالَتِ ٱمْرَأَتُ فِرْعَوْنَ قُرَّتُ عَيْنٍ لِّى وَلَكَ ۖ لَا تَقْتُلُوهُ عَسَىٰٓ أَن يَنفَعَنَآ أَوْ نَتَّخِذَهُۥ وَلَدًا وَهُمْ لَا يَشْعُرُونَ

ഫിര്‍ഔന്‍റെ ഭാര്യ പറഞ്ഞു: എനിക്കും അങ്ങേക്കും കണ്ണിന് കുളിര്‍മയത്രെ (ഈ കുട്ടി.) അതിനാല്‍ ഇവനെ നിങ്ങള്‍ കൊല്ലരുത്‌. ഇവന്‍ നമുക്ക് ഉപകരിച്ചേക്കാം. അല്ലെങ്കില്‍ ഇവനെ നമുക്ക് ഒരു മകനായി സ്വീകരിക്കാം. അവര്‍ യാഥാര്‍ത്ഥ്യം ഗ്രഹിച്ചിരുന്നില്ല. (ഖു൪ആന്‍:28/9)

കുട്ടിയെ കണ്ടപ്പോള്‍  സദ്ഗുണസമ്പന്നയും വിശ്വാസിനിയുമായിരുന്ന ഫിർഔനിന്റെ ഭാര്യ – ആസിയ ബിൻത് മുസാഹിം – പറഞ്ഞു: നമുക്ക് കൺകുളിർമയാകാനും നമ്മുടെ ജീവിതം സന്തോഷമാകാനും ഈ കുട്ടിയെ നിലനിര്‍ത്താം.  ഒന്നുകിൽ നമുക്ക് അവനെ ഒരു മകനായി ദത്തെടുക്കാം. അല്ലെങ്കിൽ നമുക്ക് പ്രയോജനം ലഭിക്കുന്ന ഒരു സേവകനായിരിക്കും.

അവരും അവരുടെ സര്‍വസ്വവും നശിക്കുവാനും, അവരെ തീരാദുഃഖത്തിലാഴ്ത്തുവാനും കാരണഭൂതനായി കലാശിക്കുന്ന ആ കുഞ്ഞിനെ അവരുടെ കൈക്കു തന്നെ അല്ലാഹു രക്ഷപ്പെടുത്തി. നൈല്‍നദിയിലൂടെ ഒഴുകിപ്പോകുകയായിരുന്ന ആ കുട്ടിയെ എടുത്തു രക്ഷപ്പെടുത്തുകവഴി അവര്‍ തങ്ങള്‍ക്കു തന്നെ വമ്പിച്ച ആപത്തു വലിച്ചിടുകയാണ് ചെയ്തത്. ആ കുട്ടി ഇസ്രാഈല്യരില്‍ പെട്ടവനായിരിക്കാമെന്നും, അവനെ കൊലപ്പെടുത്തണമെന്നും ഫിര്‍ഔന്‍ ഉത്തരവിടാതിരുന്നില്ല. പക്ഷേ, അല്ലാഹു ഉദ്ദേശിച്ചത് ഫിര്‍ഔന്‍റെ ലാളനയില്‍ തന്നെ കുട്ടി വളരണമെന്നായിരുന്നു. (അമാനി തഫ്സീര്‍)

മൂസാനബിയെ നഷ്ടപ്പെട്ടപ്പോൾ അദ്ദേഹത്തിന്റെ മാതാവ് അതികഠിനമായി ദുഖിച്ചു. സാധാരണ മനുഷ്യന് സംഭവിക്കുന്ന പോലെ വേദനയാൽ ഹൃദയത്തിന് ശൂന്യത അനുഭവപ്പെട്ടു. ദുഖവും ഭയവും വേണ്ടെന്ന് അല്ലാഹു അവരോട് നിർദേശിച്ചു. അദ്ദേഹത്തെ തിരിച്ചു നൽകുമെന്ന ഉറപ്പും നൽകി

وَأَصْبَحَ فُؤَادُ أُمِّ مُوسَىٰ فَٰرِغًا ۖ إِن كَادَتْ لَتُبْدِى بِهِۦ لَوْلَآ أَن رَّبَطْنَا عَلَىٰ قَلْبِهَا لِتَكُونَ مِنَ ٱلْمُؤْمِنِينَ

മൂസായുടെ മാതാവിന്‍റെ മനസ്സ് (അന്യ ചിന്തകളില്‍ നിന്ന്‌) ഒഴിവായതായിത്തീര്‍ന്നു. അവളുടെ മനസ്സിനെ നാം ഉറപ്പിച്ചു നിര്‍ത്തിയില്ലായിരുന്നുവെങ്കില്‍ അവന്‍റെ കാര്യം അവള്‍ വെളിപ്പെടുത്തിയേക്കുമായിരുന്നു. അവള്‍ സത്യവിശ്വാസികളുടെ കൂട്ടത്തിലായിരിക്കാന്‍ വേണ്ടിയത്രെ (നാം അങ്ങനെ ചെയ്തത്‌.) (ഖു൪ആന്‍:28/10)

അവളെ അല്ലാഹു ഉറപ്പിച്ചു നിർത്തി. അതിനാൽ അത് പുറത്തുപറയാതെ അവൾ ക്ഷമിച്ചു. ആ ക്ഷമ കൊണ്ടും സ്ഥൈര്യം കൊണ്ടും സത്യവിശ്വാസികളുടെ കൂട്ടത്തിൽ അവൾ ആയിത്തീരാൻ വേണ്ടി.

ഒരാൾക്ക് വിപത്തുക്കളും പ്രയാസങ്ങളും വന്നാൽ ക്ഷമിക്കുകയും ഉറച്ചു നിൽക്കുകയും ചെയ്താൽ അതുമൂലം വിശ്വാസം വർധിക്കും. എപ്പോഴും മനസ്സ് അസ്വസ്ഥമാവുക എന്നത് വിശ്വാസത്തിന്റെ ദുർബലതയെ സൂചിപ്പിക്കുന്നു. (തഫ്സീറുസ്സഅ്ദി)

കുട്ടിയുടെ സ്ഥിതിയെപ്പറ്റി ഗൂഢമായി അന്വേഷിക്കുവാന്‍ മൂസായുടെ മൂത്ത സഹോദരിയെ മാതാവ് ഏര്‍പ്പാട് ചെയ്തിരുന്നു.

وَقَالَتْ لِأُخْتِهِۦ قُصِّيهِ ۖ فَبَصُرَتْ بِهِۦ عَن جُنُبٍ وَهُمْ لَا يَشْعُرُونَ

അവള്‍ അവന്‍റെ (മൂസായുടെ) സഹോദരിയോട് പറഞ്ഞു: നീ അവന്‍റെ പിന്നാലെ പോയി അന്വേഷിച്ചു നോക്കൂ. അങ്ങനെ ദൂരെ നിന്ന് അവള്‍ അവനെ നിരീക്ഷിച്ചു. അവര്‍ അതറിഞ്ഞിരുന്നില്ല. (ഖു൪ആന്‍:28/11)

അവന്റെ കാര്യത്തിന് വേണ്ടിയല്ലാതെ വെറുതെ കടന്നുപോകുന്ന ഒരാളെ പോലെ അവൾ പിറകെ നടന്നു. അവളുടെ നിശ്ചയദാർഢ്യവും ജാഗ്രതയുമാണത്. അവൾ അവനെ കാണുകയും ബോധപൂർവം അവരുടെ അടുക്കൽ ചെല്ലുകയും ചെയ്തിരുന്നുവെങ്കിൽ അവളാണ് അവനെ നദിയിയിൽ എറിഞ്ഞതെന്ന് വിചാരിക്കുകയും അത് ചെയ്തതിന് അവന്റെ കുടുംബത്തിന് ഒരു ശിക്ഷയായി അവനെ അറുക്കാൻ അവർ തീരുമാനിക്കുകയും ചെയ്‌തേക്കാം. (തഫ്സീറുസ്സഅ്ദി)

അപ്പോൾ അവിടെ മറ്റൊരു കാര്യം സംഭവിച്ചു. കുട്ടി ആരുടെയും പാൽ കുടിക്കുന്നില്ല. അല്ലാഹുവിന്റെ തീരുമാനവും തന്ത്രവും.

وَحَرَّمْنَا عَلَيْهِ ٱلْمَرَاضِعَ مِن قَبْلُ فَقَالَتْ هَلْ أَدُلُّكُمْ عَلَىٰٓ أَهْلِ بَيْتٍ يَكْفُلُونَهُۥ لَكُمْ وَهُمْ لَهُۥ نَٰصِحُونَ

അതിനു മുമ്പ് മുലയൂട്ടുന്ന സ്ത്രീകള്‍ അവന്ന് മുലകൊടുക്കുന്നതിന് നാം തടസ്സമുണ്ടാക്കിയിരുന്നു. അപ്പോള്‍ അവള്‍ (സഹോദരി) പറഞ്ഞു: നിങ്ങള്‍ക്ക് വേണ്ടി ഇവനെ സംരക്ഷിക്കുന്ന ഒരു വീട്ടുകാരെപ്പറ്റി ഞാന്‍ നിങ്ങള്‍ക്ക് അറിവ് തരട്ടെയോ? അവര്‍ ഇവന്‍റെ ഗുണകാംക്ഷികളായിരിക്കുകയും ചെയ്യും. (ഖു൪ആന്‍:28/12)

മൂസാനബിയോടും അദ്ദേഹത്തിന്റെ മാതാവിനോടും അല്ലാഹു കാണിച്ച ദയയാണ് മറ്റൊരു സ്ത്രീയുടെയും മുലപ്പാൽസ്വീകരിക്കുന്നതിൽ നിന്ന് അദ്ദേഹത്തെ തടഞ്ഞു എന്നത്. കുട്ടി ആരുടെയും മുലകുടിക്കുവാന്‍ കൂട്ടാക്കാതെ കൊട്ടാരവാസികള്‍ വിഷമിക്കുന്നത് കണ്ടപ്പോൾ ആ സന്ദര്‍ഭം സാമര്‍ത്ഥ്യപൂര്‍വ്വം സഹോദരി ഉപയോഗപ്പെടുത്തുകയും ചെയ്തു. ആ കൊട്ടാരക്കുഞ്ഞിനെ ഏറ്റുവാങ്ങി വേണ്ടത്ര പരിഗണനയോടു കൂടി വളര്‍ത്തുവാന്‍ പറ്റിയ ഒരുവീട്ടുകാര്‍ തന്‍റെ പാട്ടിലുണ്ടെന്നു ഉണര്‍ത്തിച്ചു. ഈ വീട്ടുകാർ അവനെ നന്നായി പരിപാലിക്കുമെന്ന് പറഞ്ഞുകൊണ്ടുള്ള അവളുടെ സംസാരം അവരിൽ താൽപര്യമുണ്ടാക്കി. അവനെ ശ്രദ്ധിക്കുമെന്നും സംരക്ഷിക്കാനുള്ള ഗുണകാംക്ഷ കാണിക്കുമെന്നും അവർക്ക് തോന്നി. ഉടൻ അവൾക്കവർ മറുപടി നൽകി. അപ്പോൾ അവൾ ആ വീട്ടുകാരെക്കുറിച്ചുള്ള വിവരം നൽകി; അങ്ങനെ അല്ലാഹു മൂസായുടെ മാതാവിന് നൽകിയ വാഗ്ദാനം യാഥാര്‍ത്ഥ്യമായി.

فَرَدَدْنَٰهُ إِلَىٰٓ أُمِّهِۦ كَىْ تَقَرَّ عَيْنُهَا وَلَا تَحْزَنَ وَلِتَعْلَمَ أَنَّ وَعْدَ ٱللَّهِ حَقٌّ وَلَٰكِنَّ أَكْثَرَهُمْ لَا يَعْلَمُونَ

അങ്ങനെ അവന്‍റെ മാതാവിന്‍റെ കണ്ണ് കുളിര്‍ക്കുവാനും, അവള്‍ ദുഃഖിക്കാതിരിക്കുവാനും, അല്ലാഹുവിന്‍റെ വാഗ്ദാനം സത്യമാണെന്ന് അവള്‍ മനസ്സിലാക്കുവാനും വേണ്ടി അവനെ നാം അവള്‍ക്ക് തിരിച്ചേല്‍പിച്ചു. പക്ഷെ അവരില്‍ അധികപേരും (കാര്യം) മനസ്സിലാക്കുന്നില്ല. (ഖു൪ആന്‍:28/13)

അങ്ങനെ അവൻ അവളോടൊപ്പം സന്തോഷത്തോടെയും സമാധാനത്തോടെയും നിർഭയത്വത്തോടെയും വളരാനും അതിന് വലിയൊരു പ്രതിഫലം കൈപ്പറ്റാനും സാധിച്ചു.

ഉന്നതമായ കാര്യങ്ങളും ലക്ഷ്യങ്ങളും നേടാൻ അതിന്റെ വഴിയിൽ അല്ലാഹു തടസ്സങ്ങളും പ്രയാസങ്ങളും സൃഷ്ടിക്കുമെന്ന് ഇതിൽനിന്ന് വ്യക്തം.

അങ്ങനെ മൂസാ عليه السلام ഫിർഔനിന്റെ കുടുംബത്തോടൊപ്പം താമസിച്ചു. അവരുടെ രാജകുടുംബത്തിലെ ഒരാളായി വളർന്നു. രാജകീയ വാഹനങ്ങളും വസ്ത്രങ്ങളും ഉപയോഗിച്ചു. ഉമ്മക്ക് സമാധാനം ലഭിച്ചു. മുലയൂട്ടുന്ന ബന്ധത്തിലൂടെ അവൾ അദ്ദേഹത്തിന്റെ ഉമ്മയാണെന്ന് സ്ഥിരീകരിച്ചു. അതിനാൽ അവൾ അവനോടൊപ്പം എപ്പോഴും ഉണ്ടാകുന്നതിനോ അനുകമ്പ കാണിക്കുന്നതിനോ എതിർപ്പുണ്ടായില്ല. അല്ലാഹു മൂസാ عليه السلام യോട് കാണിച്ച കാരുണ്യത്തെക്കുറിച്ച് ചിന്തിച്ചുനോക്കൂ! തന്റെ സംസാരത്തിൽ കളവ് പറയേണ്ടിവരാത്ത സാഹചര്യം അല്ലാഹു ഉണ്ടാക്കി. ഉമ്മയെന്ന് വിളിക്കാനുള്ള ഒരു ബന്ധം അല്ലാഹു അവർക്കിടയിൽ ഉണ്ടാക്കി. ജനങ്ങൾ വിചാരിച്ചത് അത് മുലകുടി ബന്ധത്തിലൂടെയുള്ള ഉമ്മയാണെന്നായിരിക്കും. അപ്പോൾ അദ്ദേഹത്തിന്റെ അധിക സംസാരങ്ങളും മറ്റുള്ളവർ പറയുന്നതും അമ്മയും മകനുമെന്ന നിലയിൽ സത്യവും യാഥാർഥ്യവുമായി.

 

 

www.kanzululoom.com