لَّيْسَ ٱلْبِرَّ أَن تُوَلُّوا۟ وُجُوهَكُمْ قِبَلَ ٱلْمَشْرِقِ وَٱلْمَغْرِبِ وَلَٰكِنَّ ٱلْبِرَّ مَنْ ءَامَنَ بِٱللَّهِ وَٱلْيَوْمِ ٱلْـَٔاخِرِ وَٱلْمَلَٰٓئِكَةِ وَٱلْكِتَٰبِ وَٱلنَّبِيِّـۧنَ وَءَاتَى ٱلْمَالَ عَلَىٰ حُبِّهِۦ ذَوِى ٱلْقُرْبَىٰ وَٱلْيَتَٰمَىٰ وَٱلْمَسَٰكِينَ وَٱبْنَ ٱلسَّبِيلِ وَٱلسَّآئِلِينَ وَفِى ٱلرِّقَابِ وَأَقَامَ ٱلصَّلَوٰةَ وَءَاتَى ٱلزَّكَوٰةَ وَٱلْمُوفُونَ بِعَهْدِهِمْ إِذَا عَٰهَدُوا۟ ۖ وَٱلصَّٰبِرِينَ فِى ٱلْبَأْسَآءِ وَٱلضَّرَّآءِ وَحِينَ ٱلْبَأْسِ ۗ أُو۟لَٰٓئِكَ ٱلَّذِينَ صَدَقُوا۟ ۖ وَأُو۟لَٰٓئِكَ هُمُ ٱلْمُتَّقُونَ

നിങ്ങളുടെ മുഖങ്ങള്‍ കിഴക്കോട്ടോ പടിഞ്ഞാറോട്ടോ തിരിക്കുക എന്നതല്ല പുണ്യം എന്നാല്‍ അല്ലാഹുവിലും, അന്ത്യദിനത്തിലും, മലക്കുകളിലും, വേദഗ്രന്ഥത്തിലും, പ്രവാചകന്‍മാരിലും വിശ്വസിക്കുകയും, സ്വത്തിനോട് പ്രിയമുണ്ടായിട്ടും അത് ബന്ധുക്കള്‍ക്കും, അനാഥകള്‍ക്കും, അഗതികള്‍ക്കും, വഴിപോക്കന്നും, ചോദിച്ചു വരുന്നവര്‍ക്കും, അടിമമോചനത്തിന്നും നല്‍കുകയും, പ്രാര്‍ത്ഥന (നമസ്കാരം) മുറപ്രകാരം നിര്‍വഹിക്കുകയും, സകാത്ത് നല്‍കുകയും, കരാറില്‍ ഏര്‍പെട്ടാല്‍ അത് നിറവേറ്റുകയും, വിഷമതകളും ദുരിതങ്ങളും നേരിടുമ്പോഴും, യുദ്ധരംഗത്തും ക്ഷമ കൈക്കൊള്ളുകയും ചെയ്തവരാരോ അവരാകുന്നു പുണ്യവാന്‍മാര്‍. അവരാകുന്നു സത്യം പാലിച്ചവര്‍. അവര്‍ തന്നെയാകുന്നു (ദോഷബാധയെ) സൂക്ഷിച്ചവര്‍. (ഖു൪ആന്‍:2/177)

ഈ വചനം വ്യക്തമാക്കുന്നത് യഥാർത്ഥ പുണ്യം വെറും ബാഹ്യാനുഷ്ഠാനങ്ങളോ ദിക്കുകളിലേക്ക് തിരിയുകയോ അല്ല, മറിച്ച് അല്ലാഹുവിലും അന്ത്യദിനത്തിലും മലക്കുകളിലും ഉറച്ച വിശ്വസം പുലർത്തുകയും അതോടൊപ്പം ധർമ്മം ചെയ്യുക, നമസ്കാരം നിർവ്വഹിക്കുക, കരാറുകൾ പാലിക്കുക, പ്രതിസന്ധികളിൽ ക്ഷമിക്കുക തുടങ്ങിയ ഉൽകൃഷ്ട സൽക്കർമ്മങ്ങൾ ജീവിതത്തിൽ പാലിക്കുകയുമാണ് എന്നാണ്; അദൃശ്യരായ മലക്കുകളിലുള്ള ഈമാൻ മനുഷ്യനിൽ അല്ലാഹുവിന്റെ നിരീക്ഷണ ബോധം വളർത്തുകയും, അവനെ പൂർണ്ണമായ തഖ്‌വയിലേക്കും സത്യസന്ധതയിലേക്കും നയിക്കുകയും ചെയ്യുന്നു.

ءَامَنَ ٱلرَّسُولُ بِمَآ أُنزِلَ إِلَيْهِ مِن رَّبِّهِۦ وَٱلْمُؤْمِنُونَ ۚ كُلٌّ ءَامَنَ بِٱللَّهِ وَمَلَٰٓئِكَتِهِۦ وَكُتُبِهِۦ وَرُسُلِهِۦ لَا نُفَرِّقُ بَيْنَ أَحَدٍ مِّن رُّسُلِهِۦ ۚ وَقَالُوا۟ سَمِعْنَا وَأَطَعْنَا ۖ غُفْرَانَكَ رَبَّنَا وَإِلَيْكَ ٱلْمَصِيرُ

തന്റെ രക്ഷിതാവിങ്കല്‍ നിന്ന് തനിക്ക് അവതരിപ്പിക്കപ്പെട്ടതില്‍ റസൂല്‍ വിശ്വസിച്ചിരിക്കുന്നു. (അതിനെ തുടര്‍ന്ന്‌) സത്യവിശ്വാസികളും. അവരെല്ലാം അല്ലാഹുവിലും, അവന്റെ മലക്കുകളിലും അവന്റെ വേദഗ്രന്ഥങ്ങളിലും, അവന്റെ ദൂതന്‍മാരിലും വിശ്വസിച്ചിരിക്കുന്നു. അവന്റെ ദൂതന്‍മാരില്‍ ആര്‍ക്കുമിടയില്‍ ഒരു വിവേചനവും ഞങ്ങള്‍ കല്‍പിക്കുന്നില്ല. (എന്നതാണ് അവരുടെ നിലപാട്‌.) അവര്‍ പറയുകയും ചെയ്തു: ഞങ്ങളിതാ കേള്‍ക്കുകയും അനുസരിക്കുകയും ചെയ്തിരിക്കുന്നു. ഞങ്ങളുടെ നാഥാ! ഞങ്ങളോട് പൊറുക്കേണമേ. നിന്നിലേക്കാകുന്നു (ഞങ്ങളുടെ) മടക്കം. (ഖു൪ആന്‍:2/285)

മലക്കുകളിലുള്ള വിശ്വാസം അടിസ്ഥാന വിശ്വാസങ്ങളില്‍ പെട്ടതാണ്.

وَهُوَ ٱلْقَاهِرُ فَوْقَ عِبَادِهِۦ ۖ وَيُرْسِلُ عَلَيْكُمْ حَفَظَةً حَتَّىٰٓ إِذَا جَآءَ أَحَدَكُمُ ٱلْمَوْتُ تَوَفَّتْهُ رُسُلُنَا وَهُمْ لَا يُفَرِّطُونَ

അവനത്രെ തന്‍റെ ദാസന്‍മാരുടെ മേല്‍ പരമാധികാരമുള്ളവന്‍. നിങ്ങളുടെ മേല്‍നോട്ടത്തിനായി അവന്‍ കാവല്‍ക്കാരെ അയക്കുകയും ചെയ്യുന്നു. അങ്ങനെ അവരില്‍ ഒരാള്‍ക്ക് മരണം വന്നെത്തുമ്പോള്‍ നമ്മുടെ ദൂതന്‍മാര്‍ (മലക്കുകള്‍) അവനെ പൂര്‍ണ്ണമായി ഏറ്റെടുക്കുന്നു. (അക്കാര്യത്തില്‍) അവര്‍ ഒരു വീഴ്ചയും വരുത്തുകയില്ല. (ഖു൪ആന്‍ :6/61)

മനുഷ്യന്റെ ജീവിതകാലം മുഴുവൻ സംരക്ഷണം നൽകാനും അവരിലെ കർമ്മങ്ങൾ രേഖപ്പെടുത്താനും അവൻ മലക്കുകളെ കാവൽക്കാരായി ഏർപ്പെടുത്തിയിട്ടുണ്ടെന്നും, മനുഷ്യന്റെ ആയുസ്സ് അവസാനിക്കുന്ന നിമിഷം കൃത്യമായി ആത്മാവ് പിടിക്കാൻ മരണത്തിന്റെ മലക്കുകൾ യാതൊരു വീഴ്ചയും വരുത്താതെ വന്നുചേരുമെന്നും ഈ ആയത്ത് അറിയിക്കുന്നു.

لَهُۥ مُعَقِّبَٰتٌ مِّنۢ بَيْنِ يَدَيْهِ وَمِنْ خَلْفِهِۦ يَحْفَظُونَهُۥ مِنْ أَمْرِ ٱللَّهِ

മനുഷ്യന്ന് അവന്‍റെ മുമ്പിലൂടെയും പിന്നിലൂടെയും തുടരെത്തുടരെ വന്ന് കൊണ്ട് അല്ലാഹുവിന്‍റെ കല്‍പനപ്രകാരം അവനെ കാത്തുസൂക്ഷിച്ച് കൊണ്ടിരിക്കുന്നവര്‍ (മലക്കുകള്‍) ഉണ്ട്‌. (ഖു൪ആന്‍ :13/11)

മനുഷ്യന്റെ മുന്നിലും പിന്നിലുമായി അവന്റെ സംരക്ഷണത്തിനും കർമ്മങ്ങൾ രേഖപ്പെടുത്താനുമായി അല്ലാഹു  മലക്കുകളെ ഏർപ്പെടുത്തിയിട്ടുണ്ട്; അല്ലാഹുവിന്റെ കൽപ്പനയനുസരിച്ച് അവനെ അപകടങ്ങളിൽ നിന്നും ബാഹ്യമായ വിപത്തുകളിൽ നിന്നും ഈ മലക്കുകൾ കാത്തുരക്ഷിക്കുകയും, മനുഷ്യന്റെ ഓരോ ചലനവും വാക്കും കർമ്മവും ഒരു നിമിഷം പോലും പിഴവുകൂടാതെ സൂക്ഷ്മമായി നിരീക്ഷിച്ചു രേഖപ്പെടുത്തുകയും ചെയ്യുന്നു.

يُنَزِّلُ ٱلْمَلَٰٓئِكَةَ بِٱلرُّوحِ مِنْ أَمْرِهِۦ عَلَىٰ مَن يَشَآءُ مِنْ عِبَادِهِۦٓ أَنْ أَنذِرُوٓا۟ أَنَّهُۥ لَآ إِلَٰهَ إِلَّآ أَنَا۠ فَٱتَّقُونِ

തന്‍റെ ദാസന്‍മാരില്‍ നിന്ന് താന്‍ ഉദ്ദേശിക്കുന്നവരുടെ മേല്‍ തന്‍റെ കല്‍പനപ്രകാരം (സത്യസന്ദേശമാകുന്ന) ചൈതന്യവും കൊണ്ട് മലക്കുകളെ അവന്‍ ഇറക്കുന്നു. ഞാനല്ലാതെ യാതൊരു ദൈവവുമില്ല. അതിനാല്‍ നിങ്ങളെന്നെ സൂക്ഷിച്ച് കൊള്ളുവിന്‍ എന്ന് നിങ്ങള്‍ താക്കീത് നല്‍കുക. (എന്നത്രെ ആ സന്ദേശം)(ഖു൪ആന്‍:16/2)

മനസ്സുകൾക്കും ആത്മാക്കൾക്കും ജീവൻ നൽകുന്ന ദിവ്യബോധനവുമായി  അല്ലാഹു മലക്കുകളെ താൻ തെരഞ്ഞെടുക്കുന്ന പ്രവാചകന്മാരിലേക്ക് അയക്കുന്നു.

‏ ٱلَّذِينَ تَتَوَفَّىٰهُمُ ٱلْمَلَٰٓئِكَةُ ظَالِمِىٓ أَنفُسِهِمْ ۖ فَأَلْقَوُا۟ ٱلسَّلَمَ مَا كُنَّا نَعْمَلُ مِن سُوٓءِۭ ۚ بَلَىٰٓ إِنَّ ٱللَّهَ عَلِيمُۢ بِمَا كُنتُمْ تَعْمَلُونَ

അതായത് അവരവര്‍ക്കു തന്നെ ദ്രോഹം ചെയ്തുകൊണ്ടിരിക്കെ മലക്കുകള്‍ ഏതൊരു കൂട്ടരുടെ ജീവിതം അവസാനിപ്പിക്കുന്നുവോ അവര്‍ക്ക്‌. ഞങ്ങള്‍ യാതൊരു തിന്‍മയും ചെയ്തിരുന്നില്ല എന്ന് പറഞ്ഞ് കൊണ്ട് അന്നേരം അവര്‍ കീഴ്‌വണക്കത്തിന് സന്നദ്ധത പ്രകടിപ്പിക്കും അങ്ങനെയല്ല, തീര്‍ച്ചയായും അല്ലാഹു നിങ്ങള്‍ പ്രവര്‍ത്തിച്ച് കൊണ്ടിരിക്കുന്നതിനെപ്പറ്റി അറിയുന്നവനാകുന്നു. (ഖു൪ആന്‍:16/28)

ഈ വചനം വ്യക്തമാക്കുന്നത് സ്വന്തം ആത്മാക്കളോട് അന്യായം ചെയ്ത അക്രമികളുടെ മരണവേളയിൽ മലക്കുകൾ വന്ന് അവരെ പിടികൂടുമ്പോൾ, തങ്ങൾ യാതൊരു തിന്മയും ചെയ്തിട്ടില്ലെന്ന് പറഞ്ഞ് അവർ കീഴടങ്ങാൻ ശ്രമിക്കുമെന്നും; എന്നാൽ അല്ലാഹു അവരുടെ എല്ലാ കർമ്മങ്ങളെക്കുറിച്ചും നന്നായി അറിയുന്നവനാണെന്ന് ഓർമ്മിപ്പിച്ചുകൊണ്ട് മലക്കുകൾ അവരെ നേരിടുമെന്നുമാണ്.

‏ ٱلَّذِينَ تَتَوَفَّىٰهُمُ ٱلْمَلَٰٓئِكَةُ طَيِّبِينَ ۙ يَقُولُونَ سَلَٰمٌ عَلَيْكُمُ ٱدْخُلُوا۟ ٱلْجَنَّةَ بِمَا كُنتُمْ تَعْمَلُونَ ‎

അതായത്‌, നല്ലവരായിരിക്കെ മലക്കുകള്‍ പൂര്‍ണ്ണമായി പിടിച്ചെടുക്കുന്ന [മരണപ്പെടുത്തുന്ന]വര്‍ക്ക്. അവര്‍ (മലക്കുകള്‍) പറയും: നിങ്ങള്‍ക്ക് സമാധാനം. നിങ്ങള്‍ പ്രവര്‍ത്തിച്ച് കൊണ്ടിരുന്നതിന്‍റെ ഫലമായി നിങ്ങള്‍ സ്വര്‍ഗത്തില്‍ പ്രവേശിച്ച് കൊള്ളുക. (ഖു൪ആന്‍:16/32)

ഈ വചനം വ്യക്തമാക്കുന്നത് ജീവിതകാലത്ത് സൽകർമ്മങ്ങൾ അനുഷ്ഠിച്ച് വിശുദ്ധിയോടെ ജീവിച്ച സത്യവിശ്വാസികളുടെ മരണവേളയിൽ മലക്കുകൾ തികഞ്ഞ സംതൃപ്തിയോടെയും ആദരവോടെയും എത്തിച്ചേരുമെന്നും, ‘നിങ്ങൾക്ക് സമാധാനമുണ്ടാകട്ടെ, നിങ്ങൾ ചെയ്തുവെച്ച നന്മകളുടെ പ്രതിഫലമായി സ്വർഗ്ഗത്തിലേക്ക് പ്രവേശിച്ചുകൊള്ളുക’ എന്ന് ആശംസിച്ചുകൊണ്ട് അവർ ആ സന്തോഷവാർത്ത അവരെ അറിയിക്കുമെന്നുമാണ്.

وَلَهُۥ مَن فِى ٱلسَّمَٰوَٰتِ وَٱلْأَرْضِ ۚ وَمَنْ عِندَهُۥ لَا يَسْتَكْبِرُونَ عَنْ عِبَادَتِهِۦ وَلَا يَسْتَحْسِرُونَ ‎﴿١٩﴾‏ يُسَبِّحُونَ ٱلَّيْلَ وَٱلنَّهَارَ لَا يَفْتُرُونَ ‎﴿٢٠﴾

അവന്റേതാകുന്നു ആകാശങ്ങളിലും, ഭൂമിയിയും ഉള്ളവരെല്ലാം. അവന്‍റെ അടുക്കലുള്ളവര്‍ (മലക്കുകള്‍) അവനെ ആരാധിക്കുന്നത് വിട്ട് അഹങ്കരിക്കുകയില്ല. അവര്‍ക്ക് ക്ഷീണം തോന്നുകയുമില്ല. അവര്‍ രാവും പകലും (അല്ലാഹുവിന്‍റെ പരിശുദ്ധിയെ) പ്രകീര്‍ത്തിച്ചു കൊണ്ടിരിക്കുന്നു. അവര്‍ തളരുകയില്ല. (ഖു൪ആന്‍:21/19-20)

മലക്കുകൾ അഹങ്കാരം നടിക്കാതെയും ക്ഷീണം പ്രകടിപ്പിക്കാതെയും രാപ്പകലില്ലാതെ യാതൊരു ഇടവേളയുമില്ലാതെ നിരന്തരം അല്ലാഹുവിന് ഇബാദത്ത് ചെയ്യുന്നവരാണ്.

ٱللَّهُ يَصْطَفِى مِنَ ٱلْمَلَٰٓئِكَةِ رُسُلًا وَمِنَ ٱلنَّاسِ ۚ إِنَّ ٱللَّهَ سَمِيعُۢ بَصِيرٌ ‎﴿٧٥﴾‏ يَعْلَمُ مَا بَيْنَ أَيْدِيهِمْ وَمَا خَلْفَهُمْ ۗ وَإِلَى ٱللَّهِ تُرْجَعُ ٱلْأُمُورُ ‎﴿٧٦﴾

മലക്കുകളില്‍ നിന്നും മനുഷ്യരില്‍ നിന്നും അല്ലാഹു ദൂതന്‍മാരെ തെരഞ്ഞെടുക്കുന്നു. തീര്‍ച്ചയായും അല്ലാഹു കേള്‍ക്കുന്നവനും കാണുന്നവനുമത്രെ. അവരുടെ മുമ്പിലുള്ളതും പിന്നിലുള്ളതും അവന്‍ അറിയുന്നു. അല്ലാഹുവിങ്കലേക്കാകുന്നു കാര്യങ്ങള്‍ മടക്കപ്പെടുന്നത്‌. (ഖു൪ആന്‍:22/75-76)

അല്ലാഹുവിന്റെ സന്ദേശങ്ങള്‍ പ്രവാചകന്‍മാര്‍ക്ക് എത്തിച്ചുകൊടുക്കുക മുതലായ പല കാര്യങ്ങള്‍ക്കും മലക്കുകളില്‍ നിന്ന് അവന്‍ ദൂതന്‍മാരെ നിശ്ചയിക്കുന്നു. മനുഷ്യര്‍ക്ക്‌ അതു എത്തിച്ചുകൊടുക്കാനായി മനുഷ്യരില്‍ നിന്നും ദൂതന്മാരെ നിയോഗിക്കുന്നു. രണ്ടു തരത്തിലുള്ള ദൂതന്‍മാരുടെയും രഹസ്യപരസ്യങ്ങളും, ഭൂതഭാവികളും എല്ലാം അവന്‍ അറിയുന്നു. (അമാനി തഫ്സീര്‍)

ٱلْحَمْدُ لِلَّهِ فَاطِرِ ٱلسَّمَٰوَٰتِ وَٱلْأَرْضِ جَاعِلِ ٱلْمَلَٰٓئِكَةِ رُسُلًا أُو۟لِىٓ أَجْنِحَةٍ مَّثْنَىٰ وَثُلَٰثَ وَرُبَٰعَ ۚ يَزِيدُ فِى ٱلْخَلْقِ مَا يَشَآءُ ۚ إِنَّ ٱللَّهَ عَلَىٰ كُلِّ شَىْءٍ قَدِيرٌ

ആകാശങ്ങളും ഭൂമിയും സൃഷ്ടിച്ചുണ്ടാക്കിയവനും രണ്ടും മൂന്നും നാലും ചിറകുകളുള്ള മലക്കുകളെ ദൂതന്‍മാരായി നിയോഗിച്ചവനുമായ അല്ലാഹുവിന് സ്തുതി. സൃഷ്ടിയില്‍ താന്‍ ഉദ്ദേശിക്കുന്നത് അവന്‍ അധികമാക്കുന്നു. തീര്‍ച്ചയായും അല്ലാഹു ഏത് കാര്യത്തിനും കഴിവുള്ളവനാകുന്നു. (ഖുർആൻ :35/1)

ആകാശഭൂമികളുടെ സ്രഷ്ടാവായ അല്ലാഹു താൻ ഇച്ഛിക്കുന്ന പ്രകാരം രണ്ടോ മൂന്നോ നാലോ അതിലധികമോ ചിറകുകളുള്ള ദൂതന്മാരായി മലക്കുകളെ നിശ്ചയിച്ചിരിക്കുന്നു; തന്റെ സൃഷ്ടിപ്പിൽ അവൻ ഉദ്ദേശിക്കുന്ന രൂപത്തിലും ഭാവത്തിലും മാറ്റങ്ങളും വർദ്ധനവുകളും വരുത്താൻ കഴിവുള്ള സർവ്വശക്തനാണ് അല്ലാഹു എന്ന് ഈ ആയത്ത് ഓർമ്മിപ്പിക്കുന്നു.

وَٱلصَّٰٓفَّٰتِ صَفًّا ‎﴿١﴾‏ فَٱلزَّٰجِرَٰتِ زَجْرًا ‎﴿٢﴾‏ فَٱلتَّٰلِيَٰتِ ذِكْرًا ‎﴿٣﴾‏ إِنَّ إِلَٰهَكُمْ لَوَٰحِدٌ ‎﴿٤﴾

ശരിക്ക് അണിനിരന്നു നില്‍ക്കുന്നവരും, എന്നിട്ട് ശക്തിയായി തടയുന്നവരും, എന്നിട്ട് കീര്‍ത്തനം ചൊല്ലുന്നവരുമായ മലക്കുകളെ തന്നെയാണ സത്യം;  തീര്‍ച്ചയായും നിങ്ങളുടെ ദൈവം ഏകന്‍ തന്നെയാകുന്നു. (ഖുർആൻ :37/1-4)

അല്ലാഹുവിന്‍റെ ആരാധനയിലും, സ്തുതികീര്‍ത്തനങ്ങളിലും മുഴുകിക്കൊണ്ട് അണിയണിയായി നില്‍ക്കുന്ന മലക്കുകളാണ് الصَّافَّاتِ صَفًّا (അണികെട്ടി നിരന്നുനില്‍ക്കുന്നവ) എന്നു പറഞ്ഞതു കൊണ്ടുദ്ദേശ്യം. പൈശാചികമായ ദുഷ്പ്രേരണകളില്‍നിന്നും മറ്റും തടഞ്ഞ് മനുഷ്യര്‍ക്കു സല്‍ബോധം ഉളവാക്കുന്നതിനുള്ള ആത്മീയപ്രവര്‍ത്തനങ്ങള്‍ നടത്തുന്നവരോ, അല്ലെങ്കില്‍ അല്ലാഹുവിന്‍റെ കല്‍പനയനുസരിച്ച് മേഘങ്ങളെ അങ്ങോട്ടുമിങ്ങോട്ടും തെളിച്ചും തടുത്തും നിയന്ത്രിക്കുന്നവരോ ആയ മലക്കുകളാണ് الزَّاجِرَاتِ زَجْرًا (ക൪ശനമായി തടയുന്നവ). അല്ലാഹുവിന്‍റെ സന്ദേശങ്ങള്‍ നബിമാര്‍ക്ക് എത്തിച്ച് പാരായണം ചെയ്തു കൊടുക്കുക, അവന്‍റെ കീര്‍ത്തനങ്ങള്‍ ഘോഷിക്കുക മുതലായവ നടത്തുന്ന മലക്കുകളാണ് التَّالِيَاتِ ذِكْرًا (കീര്‍ത്തനം ഘോഷിക്കുന്നവര്‍ – അഥവാ പാരായണം ചെയ്യുന്നവര്‍.) (അമാനി തഫ്സീര്‍)

إِذْ قَالَ رَبُّكَ لِلْمَلَٰٓئِكَةِ إِنِّى خَٰلِقُۢ بَشَرًا مِّن طِينٍ ‎﴿٧١﴾‏ فَإِذَا سَوَّيْتُهُۥ وَنَفَخْتُ فِيهِ مِن رُّوحِى فَقَعُوا۟ لَهُۥ سَٰجِدِينَ ‎﴿٧٢﴾‏ فَسَجَدَ ٱلْمَلَٰٓئِكَةُ كُلُّهُمْ أَجْمَعُونَ ‎﴿٧٣﴾‏ إِلَّآ إِبْلِيسَ ٱسْتَكْبَرَ وَكَانَ مِنَ ٱلْكَٰفِرِينَ ‎﴿٧٤﴾

നിന്റെ രക്ഷിതാവ് മലക്കുകളോട് പറഞ്ഞ സന്ദര്‍ഭം: തീര്‍ച്ചയായും ഞാന്‍ കളിമണ്ണില്‍ നിന്നും ഒരു മനുഷ്യനെ സൃഷ്ടിക്കാന്‍ പോകുകയാണ്‌. അങ്ങനെ ഞാന്‍ അവനെ സംവിധാനിക്കുകയും, അവനില്‍ എന്‍റെ ആത്മാവില്‍ നിന്ന് ഞാന്‍ ഊതുകയും ചെയ്താല്‍ നിങ്ങള്‍ അവന്ന് പ്രണാമം ചെയ്യുന്നവരായി വീഴണം.അപ്പോള്‍ മലക്കുകള്‍ എല്ലാവരും ഒന്നടങ്കം പ്രണാമം ചെയ്തു; ഇബ്ലീസ് ഒഴികെ. അവന്‍ അഹങ്കരിക്കുകയും സത്യനിഷേധികളുടെ കൂട്ടത്തിലാകുകയും ചെയ്തു.(ഖു൪ആന്‍:38/71-74)

ഈ വചനങ്ങൾ വ്യക്തമാക്കുന്നത് അല്ലാഹു കളിമണ്ണിൽ നിന്ന് മനുഷ്യനെ സൃഷ്ടിക്കുകയും സ്വന്തം ആത്മാവിൽ നിന്ന് അതിലേക്ക് ഊതുകയും ചെയ്ത ശേഷം അവന് മുന്നിൽ സുജൂദ് ചെയ്യാൻ മലക്കുകളോട് കൽപ്പിച്ചപ്പോൾ, മലക്കുകൾ ഒന്നടങ്കം ആ കൽപ്പന പൂർണ്ണമായി അനുസരിച്ച് സുജൂദ് ചെയ്തുവെന്നും; എന്നാൽ ഇബ്ലീസ് അഹങ്കരിക്കുകയും കൽപ്പന ലംഘിച്ച് സത്യനിഷേധികളിൽ ഉൾപ്പെടുകയും ചെയ്തുവെന്നുമാണ്.

وَتَرَى ٱلْمَلَٰٓئِكَةَ حَآفِّينَ مِنْ حَوْلِ ٱلْعَرْشِ يُسَبِّحُونَ بِحَمْدِ رَبِّهِمْ ۖ وَقُضِىَ بَيْنَهُم بِٱلْحَقِّ وَقِيلَ ٱلْحَمْدُ لِلَّهِ رَبِّ ٱلْعَٰلَمِينَ ‎

മലക്കുകള്‍ തങ്ങളുടെ രക്ഷിതാവിനെ സ്തുതിക്കുന്നതോടൊപ്പം കീര്‍ത്തനം ചെയ്തുകൊണ്ട് സിംഹാസനത്തിന്‍റെ ചുറ്റും വലയം ചെയ്യുന്നതായി നിനക്ക് കാണാം. അവര്‍ക്കിടയില്‍ സത്യപ്രകാരം വിധികല്‍പിക്കപ്പെടും. ലോകരക്ഷിതാവായ അല്ലാഹുവിന് സ്തുതി എന്ന് പറയപ്പെടുകയും ചെയ്യും. (ഖു൪ആന്‍:39/75)

അന്ത്യനാളിൽ വിചാരണ വേളയിൽ മലക്കുകൾ അല്ലാഹുവിന്റെ സിംഹാസനത്തിന് ചുറ്റും അണിനിരന്ന് തങ്ങളുടെ രക്ഷിതാവിനെ സ്തുതിച്ചുകൊണ്ട് തസ്ബീഹ് ചെയ്യുന്നതാണ്.

‏ ٱلَّذِينَ يَحْمِلُونَ ٱلْعَرْشَ وَمَنْ حَوْلَهُۥ يُسَبِّحُونَ بِحَمْدِ رَبِّهِمْ وَيُؤْمِنُونَ بِهِۦ وَيَسْتَغْفِرُونَ لِلَّذِينَ ءَامَنُوا۟ رَبَّنَا وَسِعْتَ كُلَّ شَىْءٍ رَّحْمَةً وَعِلْمًا فَٱغْفِرْ لِلَّذِينَ تَابُوا۟ وَٱتَّبَعُوا۟ سَبِيلَكَ وَقِهِمْ عَذَابَ ٱلْجَحِيمِ ‎﴿٧﴾‏ رَبَّنَا وَأَدْخِلْهُمْ جَنَّٰتِ عَدْنٍ ٱلَّتِى وَعَدتَّهُمْ وَمَن صَلَحَ مِنْ ءَابَآئِهِمْ وَأَزْوَٰجِهِمْ وَذُرِّيَّٰتِهِمْ ۚ إِنَّكَ أَنتَ ٱلْعَزِيزُ ٱلْحَكِيمُ ‎﴿٨﴾‏ وَقِهِمُ ٱلسَّيِّـَٔاتِ ۚ وَمَن تَقِ ٱلسَّيِّـَٔاتِ يَوْمَئِذٍ فَقَدْ رَحِمْتَهُۥ ۚ وَذَٰلِكَ هُوَ ٱلْفَوْزُ ٱلْعَظِيمُ ‎﴿٩﴾

സിംഹാസനം വഹിക്കുന്നവരും അതിന്റെ ചുറ്റിലുള്ളവരും (മലക്കുകള്‍) തങ്ങളുടെ രക്ഷിതാവിനെ സ്തുതിക്കുന്നതോടൊപ്പം കീര്‍ത്തനം നടത്തുകയും അവനില്‍ വിശ്വസിക്കുകയും, വിശ്വസിച്ചവര്‍ക്ക് വേണ്ടി (ഇപ്രകാരം) പാപമോചനം തേടുകയും ചെയ്യുന്നു: ഞങ്ങളുടെ രക്ഷിതാവേ, നിന്റെ കാരുണ്യവും അറിവും സകല വസ്തുക്കളെയും ഉള്‍കൊള്ളുന്നതായിരിക്കുന്നു. ആകയാല്‍ പശ്ചാത്തപിക്കുകയും നിന്റെ മാര്‍ഗം പിന്തുടരുകയും ചെയ്യുന്നവര്‍ക്ക് നീ പൊറുത്തുകൊടുക്കേണമേ. അവരെ നീ നരകശിക്ഷയില്‍ നിന്ന് കാക്കുകയും ചെയ്യേണമേ.ഞങ്ങളുടെ രക്ഷിതാവേ, അവര്‍ക്ക് നീ വാഗ്ദാനം ചെയ്തിട്ടുള്ള സ്ഥിരവാസത്തിനുള്ള സ്വര്‍ഗങ്ങളില്‍ അവരെയും അവരുടെ മാതാപിതാക്കളെയും, ഭാര്യമാര്‍, സന്തതികള്‍ എന്നിവരില്‍ നിന്നു സദ്‌വൃത്തരായിട്ടുള്ളവരെയും നീ പ്രവേശിപ്പിക്കേണമേ. തീര്‍ച്ചയായും നീ തന്നെയാകുന്നു പ്രതാപിയും യുക്തിമാനും.അവരെ നീ തിന്‍മകളില്‍ നിന്ന് കാക്കുകയും ചെയ്യേണമേ. അന്നേ ദിവസം നീ ഏതൊരാളെ തിന്‍മകളില്‍ നിന്ന് കാക്കുന്നുവോ, അവനോട് തീര്‍ച്ചയായും നീ കരുണ കാണിച്ചിരിക്കുന്നു. അതു തന്നെയാകുന്നു മഹാഭാഗ്യം. (ഖു൪ആന്‍ :40/7-9)

ഈ വചനങ്ങൾ വ്യക്തമാക്കുന്നത് അല്ലാഹുവിന്റെ സിംഹാസനം (അർശ്) ചുമക്കുന്ന മലക്കുകളും അതിനു ചുറ്റുമുള്ളവരും തങ്ങളുടെ രക്ഷിതാവിനെ സ്തുതിച്ചുകൊണ്ട് തസ്ബീഹ് ചൊല്ലുകയും, അവനിൽ വിശ്വസിക്കുകയും, പശ്ചാത്തപിക്കുകയും ചെയ്ത സത്യവിശ്വാസികൾക്കുവേണ്ടി അല്ലാഹുവോട് പാപമോചനം തേടി പ്രാർത്ഥിക്കുകയും ചെയ്യുന്നു എന്നാണ്; വിശ്വാസികളെയും അവരുടെ സൽകർമ്മികളായ മാതാപിതാക്കളെയും ഇണകളെയും സന്താനങ്ങളെയും നീതിമാനായ അല്ലാഹു വാഗ്ദാനം ചെയ്ത നിത്യസ്വർഗ്ഗത്തിൽ പ്രവേശിപ്പിക്കുവാനും നരകശിക്ഷയിൽ നിന്നും തിന്മകളിൽ നിന്നും അവരെ രക്ഷിക്കുവാനുമായി ആ മലക്കുകൾ ആത്മാർത്ഥമായി പ്രാർത്ഥിക്കുന്നവരാണെന്നും ഈ ആയത്തുകൾ ഓർമ്മിപ്പിക്കുന്നു.

إِنَّ ٱلَّذِينَ قَالُوا۟ رَبُّنَا ٱللَّهُ ثُمَّ ٱسْتَقَٰمُوا۟ تَتَنَزَّلُ عَلَيْهِمُ ٱلْمَلَٰٓئِكَةُ أَلَّا تَخَافُوا۟ وَلَا تَحْزَنُوا۟ وَأَبْشِرُوا۟ بِٱلْجَنَّةِ ٱلَّتِى كُنتُمْ تُوعَدُونَ ‎﴿٣٠﴾‏ نَحْنُ أَوْلِيَآؤُكُمْ فِى ٱلْحَيَوٰةِ ٱلدُّنْيَا وَفِى ٱلْـَٔاخِرَةِ ۖ وَلَكُمْ فِيهَا مَا تَشْتَهِىٓ أَنفُسُكُمْ وَلَكُمْ فِيهَا مَا تَدَّعُونَ ‎﴿٣١﴾‏ نُزُلًا مِّنْ غَفُورٍ رَّحِيمٍ ‎﴿٣٢﴾‏

ഞങ്ങളുടെ രക്ഷിതാവ് അല്ലാഹുവാണെന്ന് പറയുകയും, പിന്നീട് നേരാംവണ്ണം നിലകൊള്ളുകയും ചെയ്തിട്ടുള്ളവരാരോ അവരുടെ അടുക്കല്‍ മലക്കുകള്‍ ഇറങ്ങിവന്നുകൊണ്ട് ഇപ്രകാരം പറയുന്നതാണ്‌: നിങ്ങള്‍ ഭയപ്പെടുകയോ ദുഃഖിക്കുകയോ വേണ്ട നിങ്ങള്‍ക്ക് വാഗ്ദാനം നല്‍കപ്പെട്ടിരുന്ന സ്വര്‍ഗത്തെപ്പറ്റി നിങ്ങള്‍ സന്തോഷമടഞ്ഞ് കൊള്ളുക. ഐഹിക ജീവിതത്തിലും പരലോകത്തിലും ഞങ്ങള്‍ നിങ്ങളുടെ മിത്രങ്ങളാകുന്നു. നിങ്ങള്‍ക്കവിടെ (പരലോകത്ത്‌) നിങ്ങളുടെ മനസ്സുകള്‍ കൊതിക്കുന്നതെല്ലാമുണ്ടായിരിക്കും. നിങ്ങള്‍ക്കവിടെ നിങ്ങള്‍ ആവശ്യപ്പെടുന്നതെല്ലാം ഉണ്ടായിരിക്കും. ഏറെ പൊറുക്കുന്നവനും കരുണാനിധിയുമായ അല്ലാഹുവിങ്കല്‍ നിന്നുള്ള സല്‍ക്കാരമത്രെ അത്‌. (ഖുർആൻ:41/30-32)

ഈ വചനങ്ങൾ വ്യക്തമാക്കുന്നത് ‘ഞങ്ങളുടെ രക്ഷിതാവ് അല്ലാഹുവാണ്’ എന്ന് പ്രഖ്യാപിക്കുകയും ആ നിലപാടിൽ ഉറച്ചുനിൽക്കുകയും (ഇസ്തിഖാമത്ത്) ചെയ്യുന്ന സത്യവിശ്വാസികളുടെ അടുക്കലേക്ക് മരണവേളയില്‍ മലക്കുകൾ ഇറങ്ങിവന്ന്, യാതൊരു ഭയമോ ദുഃഖമോ വേണ്ടെന്നും തങ്ങൾ നിങ്ങൾക്ക് ഇഹത്തിലും പരത്തിലും കൂട്ടുകാരായി കൂടെയുണ്ടെന്നും അറിയിക്കുകയും, നിങ്ങൾ വാഗ്ദാനം ചെയ്യപ്പെട്ട സ്വർഗ്ഗത്തെക്കുറിച്ച് സന്തോഷം കൊള്ളാൻ ആശ്വസിപ്പിക്കുകയും ചെയ്യുമെന്നാണ്; അവിടെ ആഗ്രഹിക്കുന്നതെന്തും അവർക്ക് ലഭിക്കുമെന്നും, ഏറെ പൊറുക്കുന്നവനും കരുണാനിധിയായവനുമായ അല്ലാഹുവിൽ നിന്നുള്ള ആതിഥ്യമായിട്ടാണ് അവർക്ക് അതെന്നും ഈ ആയത്തുകൾ ഓർമ്മിപ്പിക്കുന്നു.

فَإِنِ ٱسْتَكْبَرُوا۟ فَٱلَّذِينَ عِندَ رَبِّكَ يُسَبِّحُونَ لَهُۥ بِٱلَّيْلِ وَٱلنَّهَارِ وَهُمْ لَا يَسْـَٔمُونَ

ഇനി അവര്‍ അഹംഭാവം നടിക്കുകയാണെങ്കില്‍ നിന്‍റെ രക്ഷിതാവിന്‍റെ അടുക്കലുള്ളവര്‍ (മലക്കുകള്‍) രാവും പകലും അവനെ പ്രകീര്‍ത്തിക്കുന്നുണ്ട്‌. അവര്‍ക്ക് മടുപ്പ് തോന്നുകയില്ല.(ഖു൪ആന്‍:41/38)

ഖുർആനിക സന്ദേശങ്ങൾ കേട്ടിട്ടും സത്യം സ്വീകരിക്കാതെ അഹങ്കാരം കാണിക്കുന്നവർ പിന്മാറുകയാണെങ്കിൽ തന്നെ, അല്ലാഹുവിന്റെ അടുക്കലുള്ള മലക്കുകൾ രാപ്പകലില്ലാതെ യാതൊരു ക്ഷീണവുമകൂടാതെ അവനെ സ്തുതിച്ചുകൊണ്ടേയിരിക്കുന്നുണ്ട്; മനുഷ്യരുടെ നിഷേധമോ അഹങ്കാരമോ അല്ലാഹുവിന്റെ മഹത്വത്തെയോ അവന്റെ ദാസന്മാരുടെ ആരാധനയെയോ ഒട്ടും ബാധിക്കുന്നില്ലെന്ന് ഈ ആയത്ത് ഓർമ്മിപ്പിക്കുന്നു.

تَكَادُ ٱلسَّمَٰوَٰتُ يَتَفَطَّرْنَ مِن فَوْقِهِنَّ ۚ وَٱلْمَلَٰٓئِكَةُ يُسَبِّحُونَ بِحَمْدِ رَبِّهِمْ وَيَسْتَغْفِرُونَ لِمَن فِى ٱلْأَرْضِ ۗ أَلَآ إِنَّ ٱللَّهَ هُوَ ٱلْغَفُورُ ٱلرَّحِيمُ

ആകാശങ്ങള്‍ അവയുടെ ഉപരിഭാഗത്ത് നിന്ന് പൊട്ടിപ്പിളരുമാറാകുന്നു. മലക്കുകള്‍ തങ്ങളുടെ രക്ഷിതാവിനെ സ്തുതിക്കുന്നതോടൊപ്പം പ്രകീര്‍ത്തിച്ചു കൊണ്ടിരിക്കുന്നു. ഭൂമിയിലുള്ളവര്‍ക്ക് വേണ്ടി അവര്‍ പാപമോചനം തേടുകയും ചെയ്യുന്നു. അറിയുക! തീര്‍ച്ചയായും അല്ലാഹു തന്നെയാകുന്നു ഏറെ പൊറുക്കുന്നവനും കരുണാനിധിയും. (ഖു൪ആന്‍:42/5)

ഈ വചനം വ്യക്തമാക്കുന്നത് അല്ലാഹുവിന്റെ മഹത്വവും അവനിലുള്ള ഭയവും നിമിത്തം മുകളിലുള്ള ആകാശങ്ങൾപോലൂം പൊട്ടിപ്പിളരാൻ തക്കവണ്ണം വിറകൊള്ളുന്നുണ്ടെന്നും, മലക്കുകൾ അല്ലാഹുവിനെ സ്തുതിച്ചുകൊണ്ട് തസ്ബീഹ് ചെയ്യുമെന്നും ഭൂമിയിലുള്ള മനുഷ്യർക്കുവേണ്ടി പാപമോചനം തേടി പ്രാർത്ഥിക്കുകയും ചെയ്യുന്നുണ്ടെന്നുമാണ്.

إِذْ يَتَلَقَّى ٱلْمُتَلَقِّيَانِ عَنِ ٱلْيَمِينِ وَعَنِ ٱلشِّمَالِ قَعِيدٌ ‎﴿١٧﴾‏ مَّا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ ‎﴿١٨﴾

വലതുഭാഗത്തും ഇടതുഭാഗത്തും ഇരുന്നു കൊണ്ട് ഏറ്റുവാങ്ങുന്ന രണ്ടുപേര്‍ ഏറ്റുവാങ്ങുന്ന സന്ദര്‍ഭം. അവന്‍ ഏതൊരു വാക്ക് ഉച്ചരിക്കുമ്പോഴും അവന്‍റെ അടുത്ത് തയ്യാറായി നില്‍ക്കുന്ന നിരീക്ഷകന്‍ ഉണ്ടാവാതിരിക്കുകയില്ല. (ഖു൪ആന്‍:50/17-18)

മനുഷ്യന്റെ വലതുഭാഗത്തും ഇടതുഭാഗത്തുമായി ഇരുന്ന് അവന്റെ വാക്കുകളും പ്രവൃത്തികളും കൃത്യമായി ഏറ്റെടുത്ത് രേഖപ്പെടുത്തുന്ന രണ്ട് മലക്കുകൾ എപ്പോഴും അവന്റെ കൂടെയുണ്ട്. മനുഷ്യൻ ഏത് ചെറിയ വാക്ക് ഉച്ചരിച്ചാലും അത് രേഖപ്പെടുത്തപ്പെടുന്നുണ്ട്.

فَٱلْمُقَسِّمَٰتِ أَمْرًا

കാര്യങ്ങള്‍ വിഭജിച്ചു കൊടുക്കുന്നവര്‍ (മലക്കുകള്‍) തന്നെയാണ, സത്യം. (ഖു൪ആന്‍:51/4)

അല്ലാഹുവിന്റെ അനുമതിപ്രകാരം കാര്യങ്ങള്‍ നിയന്ത്രിക്കുകയും വിഭജിച്ച് കൊടുക്കുകയും ചെയ്യുന്നവരായ മലക്കുകള്‍. അവരില്‍ ഓരോരുത്തര്‍ക്കും അല്ലാഹു ഇഹപര കാര്യങ്ങള്‍ നിശ്ചയിച്ച് കൊടുക്കുന്നു. അല്ലാഹു നിശ്ചയിച്ചു കൊടുത്ത പരിധി അവര്‍ വിട്ടുകടക്കുന്നില്ല. അതിലൊരു കുറവും വരുത്തുന്നുമില്ല. (തഫ്സീറുസ്സഅ്ദി)

عَلَّمَهُۥ شَدِيدُ ٱلْقُوَىٰ ‎﴿٥﴾‏ ذُو مِرَّةٍ فَٱسْتَوَىٰ ‎﴿٦﴾‏ وَهُوَ بِٱلْأُفُقِ ٱلْأَعْلَىٰ ‎﴿٧﴾‏ ثُمَّ دَنَا فَتَدَلَّىٰ ‎﴿٨﴾‏ فَكَانَ قَابَ قَوْسَيْنِ أَوْ أَدْنَىٰ ‎﴿٩﴾‏ فَأَوْحَىٰٓ إِلَىٰ عَبْدِهِۦ مَآ أَوْحَىٰ ‎﴿١٠﴾‏ مَا كَذَبَ ٱلْفُؤَادُ مَا رَأَىٰٓ ‎﴿١١﴾‏ أَفَتُمَٰرُونَهُۥ عَلَىٰ مَا يَرَىٰ ‎﴿١٢﴾‏ وَلَقَدْ رَءَاهُ نَزْلَةً أُخْرَىٰ ‎﴿١٣﴾‏ عِندَ سِدْرَةِ ٱلْمُنتَهَىٰ ‎﴿١٤﴾

ശക്തിമത്തായ കഴിവുള്ളവനാണ് (ജിബ്‌രീല്‍ എന്ന മലക്കാണ്‌) അദ്ദേഹത്തെ പഠിപ്പിച്ചിട്ടുള്ളത്‌. കരുത്തുള്ള ഒരു വ്യക്തി. അങ്ങനെ അദ്ദേഹം (സാക്ഷാല്‍ രൂപത്തില്‍) നിലകൊണ്ടു. അദ്ദേഹമാകട്ടെ അത്യുന്നതമായ മണ്ഡലത്തിലായിരുന്നു. പിന്നെ അദ്ദേഹം അടുത്തു വന്നു. അങ്ങനെ കൂടുതല്‍ അടുത്തു. അങ്ങനെ അദ്ദേഹം രണ്ടു വില്ലുകളുടെ അകലത്തിലോ അതിനെക്കാള്‍ അടുത്തോ ആയിരുന്നു. അപ്പോള്‍ അവന്‍ (അല്ലാഹു) തന്‍റെ ദാസന് അവന്‍ ബോധനം നല്‍കിയതെല്ലാം ബോധനം നല്‍കി. അദ്ദേഹം കണ്ട ആ കാഴ്ച (അദ്ദേഹത്തിന്‍റെ) ഹൃദയം നിഷേധിച്ചിട്ടില്ല. എന്നിരിക്കെ അദ്ദേഹം (നേരില്‍) കാണുന്നതിന്‍റെ പേരില്‍ നിങ്ങള്‍ അദ്ദേഹത്തോട് തര്‍ക്കിക്കുകയാണോ?  മറ്റൊരു ഇറക്കത്തിലും അദ്ദേഹം മലക്കിനെ കണ്ടിട്ടുണ്ട്‌. അറ്റത്തെ ഇലന്തമരത്തിനടുത്ത് വെച്ച്‌. (ഖു൪ആന്‍:53/5-14)

 മുഹമ്മദ് നബി ﷺ ക്ക് ദിവ്യബോധനം എത്തിച്ചത് ജിബ്‌രീൽ عليه السلام ആണ്. ജിബ്‌രീൽ عليه السلام എന്ന മലക്കിനെ അദ്ദേഹത്തിന്റെ സാക്ഷാല്‍ രൂപത്തില്‍ നബി ﷺ രണ്ട് പ്രാവശ്യമാണ് കണ്ടിട്ടുള്ളത്. ഒന്ന് ഹിറാ മലയില്‍ വെച്ചും, മറ്റൊന്ന് ‘മിഅ്റാജ്’ യാത്രയിലും.

وَكَم مِّن مَّلَكٍ فِى ٱلسَّمَٰوَٰتِ لَا تُغْنِى شَفَٰعَتُهُمْ شَيْـًٔا إِلَّا مِنۢ بَعْدِ أَن يَأْذَنَ ٱللَّهُ لِمَن يَشَآءُ وَيَرْضَىٰٓ

ആകാശങ്ങളില്‍ എത്ര മലക്കുകളാണുള്ളത്‌. അവരുടെ ശുപാര്‍ശ യാതൊരു പ്രയോജനവും ചെയ്യുകയില്ല; അല്ലാഹു അവന്‍ ഉദ്ദേശിക്കുകയും തൃപ്തിപ്പെടുകയും ചെയ്യുന്നവര്‍ക്ക് (ശുപാര്‍ശയ്ക്ക്‌) അനുവാദം നല്‍കിയതിന്റെ ശേഷമല്ലാതെ. (ഖു൪ആന്‍:53/26)

ആകാശത്തു കണക്കറ്റ മലക്കുകളുണ്ട്. അവര്‍ അല്ലാഹുവിന്റെ ആദരണീയരായ അടിയാന്മാരുമാണ്. (بَلْ عِبَادٌ مُّكْرَمُونَ) എന്നാലും, അല്ലാഹുവിന്റെ അനുവാദം കൂടാതെ -അവരുടെ ഇഷ്ടം പോലെ- ആര്‍ക്കും ശുപാര്‍ശ ചെയ്‌വാന്‍ അവര്‍ക്കു സാദ്ധ്യമല്ല. അല്ലാഹു ഉദ്ദേശിക്കുകയും, തൃപ്തിപ്പെടുകയും ചെയ്യുന്നവര്‍ക്കും, അവന്‍ ഉദ്ദേശിക്കുകയും തൃപ്തിപ്പെടുകയും ചെയ്യുന്നവര്‍ക്കു വേണ്ടിയും അല്ലാതെ ശുപാര്‍ശ ചെയ്‌വാന്‍ അവന്‍ ആരെയും അനുവദിക്കയില്ല. അനുവാദമില്ലാത്ത ശുപാര്‍ശ കൊണ്ടു ഫലവുമില്ല. എന്നിരിക്കെ, ആ മലക്കുകളുടെ പേരില്‍ കെട്ടിച്ചമക്കപ്പെട്ട വിഗ്രഹങ്ങളുണ്ടോ അവര്‍ക്കു ശുപാര്‍ശ ചെയ്തു രക്ഷ നല്‍കുന്നു? (അമാനി തഫ്സീര്‍)

إِنَّ ٱلَّذِينَ لَا يُؤْمِنُونَ بِٱلْـَٔاخِرَةِ لَيُسَمُّونَ ٱلْمَلَٰٓئِكَةَ تَسْمِيَةَ ٱلْأُنثَىٰ ‎﴿٢٧﴾‏ وَمَا لَهُم بِهِۦ مِنْ عِلْمٍ ۖ إِن يَتَّبِعُونَ إِلَّا ٱلظَّنَّ ۖ وَإِنَّ ٱلظَّنَّ لَا يُغْنِى مِنَ ٱلْحَقِّ شَيْـًٔا ‎﴿٢٨

തീര്‍ച്ചയായും പരലോകത്തില്‍ വിശ്വസിക്കാത്തവര്‍ മലക്കുകള്‍ക്ക് പേരിടുന്നത് സ്ത്രീ നാമങ്ങളാകുന്നു. അവര്‍ക്ക് അതിനെ പറ്റി യാതൊരു അറിവുമില്ല. അവര്‍ ഊഹത്തെ മാത്രമാകുന്നു പിന്തുടരുന്നത്‌. തീര്‍ച്ചയായും ഊഹം സത്യത്തെ സംബന്ധിച്ചേടത്തോളം ഒട്ടും പ്രയോജനം ചെയ്യുകയില്ല. (ഖു൪ആന്‍:53/27-28)

ആ മുശ്‌രിക്കുകള്‍ ആദ്യമേ പരലോകത്തില്‍ വിശ്വസിക്കുന്നില്ല. അതോടൊപ്പം മലക്കുകളെ അല്ലാഹുവിന്റെ പെണ്മക്കളാണെന്നും, അവര്‍ സ്ത്രീകളാണെന്നും പറഞ്ഞുകൊണ്ട് സ്ത്രീകളുടെതായ നാമവിശേഷണങ്ങള്‍ അവര്‍ക്കു നല്‍കുകയും ചെയ്യുന്നു. ഒരു ന്യായത്തെയും അടിസ്ഥാന മാക്കിയല്ല, ഊഹത്തെ മാത്രം അടിസ്ഥാനമാക്കിയാണു താനും അതു. (അമാനി തഫ്സീര്‍)

يَٰٓأَيُّهَا ٱلَّذِينَ ءَامَنُوا۟ قُوٓا۟ أَنفُسَكُمْ وَأَهْلِيكُمْ نَارًا وَقُودُهَا ٱلنَّاسُ وَٱلْحِجَارَةُ عَلَيْهَا مَلَٰٓئِكَةٌ غِلَاظٌ شِدَادٌ لَّا يَعْصُونَ ٱللَّهَ مَآ أَمَرَهُمْ وَيَفْعَلُونَ مَا يُؤْمَرُونَ

സത്യവിശ്വാസികളേ, സ്വദേഹങ്ങളെയും നിങ്ങളുടെ ബന്ധുക്കളെയും മനുഷ്യരും കല്ലുകളും ഇന്ധനമായിട്ടുള്ള നരകാഗ്നിയില്‍ നിന്ന് നിങ്ങള്‍ കാത്തുരക്ഷിക്കുക. അതിന്‍റെ മേല്‍നോട്ടത്തിന് പരുഷസ്വഭാവമുള്ളവരും അതിശക്തന്‍മാരുമായ മലക്കുകളുണ്ടായിരിക്കും. അല്ലാഹു അവരോട് കല്‍പിച്ചകാര്യത്തില്‍ അവനോടവര്‍ അനുസരണക്കേട് കാണിക്കുകയില്ല. അവരോട് കല്‍പിക്കപ്പെടുന്നത് എന്തും അവര്‍ പ്രവര്‍ത്തിക്കുകയും ചെയ്യും. (ഖു൪ആന്‍ :66/6)

നരകാഗ്നിയുടെ കാഠിന്യത്തെക്കുറിച്ച് പറഞ്ഞ ശേഷം, അതിന്റെ നോട്ടക്കാരും കൈകാര്യക്കാരുമായ മലക്കുകളുടെ സ്വഭാവമാണ് ചൂണ്ടിക്കാട്ടുന്നത്. ഒട്ടും ദയ തോന്നാത്തവരും, അതി ശക്തന്മാരും, അല്ലാഹുവിന്‍റെ ഏതു കൽപനയും അപ്പടി അനുസരിക്കുന്നവരുമായ മലക്കുകളാണവര്‍. ശിക്ഷയുടെ ഭയങ്കരതയും കഠോരതയും സഹിക്കവയ്യാതെ നരകസ്ഥരായ ആളുകള്‍ സമര്‍പ്പിക്കുന്ന ഒഴിവു കഴിവുകളോ, അപേക്ഷകളോ അവിടെ ഗൗനിക്കപെടുന്നതുമല്ല. ഇങ്ങനെയുള്ള നരകശിക്ഷയില്‍ അകപ്പെടാന്‍ കാരണമാകാതെ ഓരോ സത്യവിശ്വാസിയും തന്താങ്ങളെയും, തന്താങ്ങളുടെ ഭാര്യാമക്കള്‍ മുതലായ കുടുംബാംഗങ്ങളെയും കാത്തുകൊള്ളണം. ഓരോരുത്തനും തന്‍റെ കാര്യം മാത്രം നോക്കിയാല്‍ പോര, കുടുംബത്തിന്റെ കാര്യംകൂടി നോക്കേണ്ടുന്ന കടമയുണ്ട് എന്നെല്ലാമാണ് അല്ലാഹു അറിയിക്കുന്നത്. (അമാനി തഫ്സീര്‍)

فَيَوْمَئِذٍ وَقَعَتِ ٱلْوَاقِعَةُ ‎﴿١٥﴾‏ وَٱنشَقَّتِ ٱلسَّمَآءُ فَهِىَ يَوْمَئِذٍ وَاهِيَةٌ ‎﴿١٦﴾‏ وَٱلْمَلَكُ عَلَىٰٓ أَرْجَآئِهَا ۚ وَيَحْمِلُ عَرْشَ رَبِّكَ فَوْقَهُمْ يَوْمَئِذٍ ثَمَٰنِيَةٌ ‎﴿١٧﴾

അന്നേ ദിവസം ആ സംഭവം സംഭവിക്കുകയായി. ആകാശം പൊട്ടിപ്പിളരുകയും ചെയ്യും. അന്ന് അത് ദുര്‍ബലമായിരിക്കും. മലക്കുകള്‍ അതിന്‍റെ നാനാഭാഗങ്ങളിലുമുണ്ടായിരിക്കും. നിന്‍റെ രക്ഷിതാവിന്‍റെ സിംഹാസനത്തെ അവരുടെ മീതെ അന്നു എട്ടുകൂട്ടര്‍ വഹിക്കുന്നതാണ്‌. (ഖു൪ആന്‍ :69/15-17)

അന്ത്യനാൾ യാഥാർത്ഥ്യമാകുന്നതോടെ ആകാശങ്ങൾ പൊട്ടിപ്പിളർന്നു ദുർബലമായിത്തീരുമെന്നും; ആ ഭീകരമായ വേളയിൽ മലക്കുകൾ ആകാശത്തിന്റെ കോണുകളിലായി സന്നിഹിതരായിരിക്കുമെന്നും, അല്ലാഹുവിന്റെ സിംഹാസനം എട്ടുകൂട്ടം മലക്കുകൾ വഹിച്ചു കൊണ്ടിരിക്കുമെന്നുമാണ്.

അന്ന് ‘അര്‍ശാ’കുന്ന സിംഹാസനം വഹിക്കുന്നത് എട്ടുകൂട്ടരായിരിക്കും എന്ന്‍ പറഞ്ഞതിന്‍റെ വിശദീകരണവും, അതില്‍ അടങ്ങിയ രഹസ്യവും നമുക്കറിയാവുന്നതല്ല. അല്ലാഹുവും അവന്‍റെ റസൂലും പറഞ്ഞു തന്നതില്‍ കവിഞ്ഞ് നമുക്ക് ഇത്തരം കാര്യങ്ങളെക്കുറിച്ച് അനുമാനിക്കുവാന്‍ നിവൃത്തിയുമില്ല. ഏതായാലും ആ സന്ദര്‍ഭത്തിന്‍റെ ഗൗരവാവസ്ഥയാണ് അത് ചൂണ്ടിക്കാട്ടുന്നത്. എട്ടുക്കൂട്ടര്‍ (ثَمَانِيَةٌ )എന്ന്‍ പറഞ്ഞതിന്‍റെ താല്‍പര്യം എട്ട് മലക്കുകള്‍ എന്നാണെന്നും, അതല്ല എട്ടു സംഘം മലക്കുകള്‍ എന്നാണെന്നും, വ്യാഖ്യാതാക്കള്‍ പ്രസ്താവിച്ചിരിക്കുന്നു. സ്ഥലകാലങ്ങളില്‍ നിന്നും, സൃഷ്ടികളുമായുള്ള എല്ലാവിധ സാദൃശ്യങ്ങളില്‍ നിന്നും പരിശുദ്ധനാണല്ലോ അല്ലാഹു. അതുകൊണ്ട് നമ്മുടെ ഐഹിക കോടതികളെപ്പറ്റി നാം വിഭാവനം ചെയ്യുന്നതു പോലെയുള്ള യാതൊരു വിഭാവനയും ലോകസ്രഷ്ടാവായ അല്ലാഹുവിന്‍റെ മഹാകോടതിയെപറ്റി വിഭാവനം ചെയ്തുകൂടാത്തതാകുന്നു. അപ്പോള്‍, അവന്‍റെ അര്‍ശിനെ സംബന്ധിച്ചും, അത് മലക്കുകള്‍ വഹിക്കുന്നതിനെ സംബന്ധിച്ചുമെല്ലാം അത് ഇന്നിന്ന പ്രകാരത്തിലായിരിക്കുമെന്ന്‍ നിര്‍ണയിച്ചു രൂപപ്പെടുത്തുവാന്‍ നമുക്ക് പാടില്ല; നമുക്കതിനുള്ള കഴിവുമില്ല. (അമാനി തഫ്സീര്‍)

تَعْرُجُ ٱلْمَلَٰٓئِكَةُ وَٱلرُّوحُ إِلَيْهِ فِى يَوْمٍ كَانَ مِقْدَارُهُۥ خَمْسِينَ أَلْفَ سَنَةٍ

അമ്പതിനായിരം കൊല്ലത്തിന്റെ അളവുള്ളതായ ഒരു ദിവസത്തില്‍ മലക്കുകളും ആത്മാവും അവങ്കലേക്ക് കയറിപ്പോകുന്നു. (ഖു൪ആന്‍:70/4)

റൂഹ് (روح) കൊണ്ടുദ്ദേശ്യം ജിബ്‌രീല്‍ عليه السلام  എന്ന മലക്കാണെന്നാണ് അധിക വ്യാഖ്യാതാക്കളുടെയും അഭിപ്രായം. “അമ്പതിനായിരം കൊല്ലത്തെ വലുപ്പമുള്ള ദിവസം” എന്ന് പറഞ്ഞത് ഖിയാമത്ത് നാളാകുന്നു. (അമാനി തഫ്സീര്‍)

عَلَيْهَا تِسْعَةَ عَشَرَ ‎﴿٣٠﴾‏ وَمَا جَعَلْنَآ أَصْحَٰبَ ٱلنَّارِ إِلَّا مَلَٰٓئِكَةً ۙ وَمَا جَعَلْنَا عِدَّتَهُمْ إِلَّا فِتْنَةً لِّلَّذِينَ كَفَرُوا۟ لِيَسْتَيْقِنَ ٱلَّذِينَ أُوتُوا۟ ٱلْكِتَٰبَ وَيَزْدَادَ ٱلَّذِينَ ءَامَنُوٓا۟ إِيمَٰنًا ۙ وَلَا يَرْتَابَ ٱلَّذِينَ أُوتُوا۟ ٱلْكِتَٰبَ وَٱلْمُؤْمِنُونَ ۙ وَلِيَقُولَ ٱلَّذِينَ فِى قُلُوبِهِم مَّرَضٌ وَٱلْكَٰفِرُونَ مَاذَآ أَرَادَ ٱللَّهُ بِهَٰذَا مَثَلًا ۚ كَذَٰلِكَ يُضِلُّ ٱللَّهُ مَن يَشَآءُ وَيَهْدِى مَن يَشَآءُ ۚ وَمَا يَعْلَمُ جُنُودَ رَبِّكَ إِلَّا هُوَ ۚ وَمَا هِىَ إِلَّا ذِكْرَىٰ لِلْبَشَرِ ‎﴿٣١﴾

അതിന്‍റെ (നരകത്തിന്റെ) മേല്‍നോട്ടത്തിന് പത്തൊമ്പത് പേരുണ്ട്‌. നരകത്തിന്‍റെ മേല്‍നോട്ടക്കാരായി നാം മലക്കുകളെ മാത്രമാണ് നിശ്ചയിച്ചിരിക്കുന്നത്‌. അവരുടെ എണ്ണത്തെ നാം സത്യനിഷേധികള്‍ക്ക് ഒരു പരീക്ഷണം മാത്രമാക്കിയിരിക്കുന്നു. വേദം നല്‍കപ്പെട്ടിട്ടുള്ളവര്‍ക്ക് ദൃഢബോധ്യം വരുവാനും സത്യവിശ്വാസികള്‍ക്ക് വിശ്വാസം വര്‍ദ്ധിക്കാനും വേദം നല്‍കപ്പെട്ടവരും സത്യവിശ്വാസികളും സംശയത്തിലകപ്പെടാതിരിക്കാനും അല്ലാഹു എന്തൊരു ഉപമയാണ് ഇതു കൊണ്ട് ഉദ്ദേശിച്ചിട്ടുള്ളതെന്ന് ഹൃദയങ്ങളില്‍ രോഗമുള്ളവരും സത്യനിഷേധികളും പറയുവാനും വേണ്ടിയത്രെ അത്‌. അപ്രകാരം അല്ലാഹു താന്‍ ഉദ്ദേശിക്കുന്നവരെ പിഴപ്പിക്കുകയും, താന്‍ ഉദ്ദേശിക്കുന്നവരെ നേര്‍വഴിയിലാക്കുകയും ചെയ്യുന്നു. നിന്‍റെ രക്ഷിതാവിന്‍റെ സൈന്യങ്ങളെ അവനല്ലാതെ മറ്റാരും അറിയുകയില്ല. ഇത് മനുഷ്യര്‍ക്ക് ഒരു ഉല്‍ബോധനമല്ലാതെ മറ്റൊന്നുമല്ല. (ഖു൪ആന്‍:74/30-31)

ഈ വചനങ്ങൾ വ്യക്തമാക്കുന്നത് നരകത്തിന്മേൽ കാവൽക്കാരായി പത്തൊൻപത് മലക്കുകളെയാണ് നിശ്ചയിച്ചിട്ടുള്ളതെന്നും, സത്യനിഷേധികളെ പരീക്ഷിക്കാനും വേദക്കാരായ ആളുകൾക്ക് സത്യം ബോധ്യപ്പെടാനും വിശ്വാസികളുടെ ഈമാൻ വർദ്ധിപ്പിക്കാനുമാണ് ഈ സംഖ്യയെ അല്ലാഹു നിശ്ചയിച്ചിട്ടുള്ളതെന്നുമാണ്; ഹൃദയത്തിൽ രോഗമുള്ളവരും അവിശ്വാസികളും ഇതിന്റെ യുക്തിയെക്കുറിച്ച് സംശയം പ്രകടിപ്പിക്കുമെങ്കിലും, അല്ലാഹുവിന്റെ സൈന്യങ്ങളുടെ യഥാർത്ഥ എണ്ണം അവനല്ലാതെ മറ്റാരും അറിയുകയില്ലെന്നും ഈ ആയത്തുകൾ ഓർമ്മിപ്പിക്കുന്നു.

وَٱلْمُرْسَلَٰتِ عُرْفًا ‎﴿١﴾‏ فَٱلْعَٰصِفَٰتِ عَصْفًا ‎﴿٢﴾‏ وَٱلنَّٰشِرَٰتِ نَشْرًا ‎﴿٣﴾‏ فَٱلْفَٰرِقَٰتِ فَرْقًا ‎﴿٤﴾‏ فَٱلْمُلْقِيَٰتِ ذِكْرًا ‎﴿٥﴾‏ عُذْرًا أَوْ نُذْرًا ‎﴿٦﴾

നന്മയായി അയക്കപ്പെടുന്നവയും, ശക്തിയായി ആഞ്ഞടിക്കുന്നവയും, പരക്കെ വ്യാപിപ്പിക്കുന്നവയും, വേര്‍തിരിച്ചു വിവേചനം ചെയ്യുന്നവയും, ദിവ്യസന്ദേശം ഇട്ടുകൊടുക്കുന്നവയാണെ സത്യം; ഒരു ഒഴികഴിവായികൊണ്ടോ താക്കീതായിക്കൊണ്ടോ. (ഖു൪ആന്‍:77/1-6)

സൂറ: മുര്‍സലാത്ത് മലക്കുകളെ കൊണ്ട് സത്യം ചെയ്തു കൊണ്ടാണ് ആരംഭിക്കുന്നത്.

1). (നന്മയായി അയക്കപ്പെടുന്നവയും) ഉയിര്‍ത്തെഴുന്നേല്‍പിനെക്കുറിച്ചും പ്രവര്‍ത്തനങ്ങള്‍ക്കുള്ള പ്രതിഫലത്തെക്കുറിച്ചും അല്ലാഹു സത്യം ചെയ്തു പറയുന്നത് നന്മയായി അയക്കപ്പെടുന്നവയെ കൊണ്ടാണ്. വിധി സംബന്ധമായ കാര്യങ്ങള്‍ക്കും ലോകത്തിന്റെ നിയന്ത്രണത്തിനും മതപരമായ കാര്യങ്ങള്‍ക്കും പ്രവാചകന്മാര്‍ക്ക് വഹ്‌യ് നല്‍കാനും അല്ലാഹു നിയോഗിക്കുന്ന മലക്കുകളാണവര്‍. (നന്മയാല്‍) അയക്കപ്പെടുന്ന മലക്കുകളുടെ അവസ്ഥയാണിത്. അതായത് നന്മയും വിജ്ഞാനവുമായി; തിന്മയും ഫലശൂന്യതയും കൊണ്ടല്ല.

2). (ശക്തിയായി ആഞ്ഞടിക്കുന്നവയും) ഇതും അല്ലാഹു നിയോഗിക്കുന്ന മലക്കുകള്‍ തന്നെ. കല്‍പനകള്‍ വേഗത്തില്‍ നിര്‍വഹിക്കുന്നവര്‍ എന്നാണ് വിശേഷിപ്പിച്ചത്. കല്‍പനകള്‍ നടപ്പിലാക്കുന്നതിലുള്ള വേഗത അടിച്ചുവീശുന്ന കാറ്റുപോലെയാണ്. അല്ലെങ്കില്‍ ശക്തമായി അടിച്ചുവീശുന്ന കൊടുങ്കാറ്റു പോലെ.

3). (പരക്കെ വ്യാപിപ്പിക്കുന്നവയും) ഇതും മലക്കുകളെക്കുറിച്ചാകാനാണ് സാധ്യത. അവരോട് നിര്‍ദേശിച്ചതിനെ അവര്‍ വ്യാപിപ്പിക്കുന്നു; അല്ലെങ്കില്‍ ഭൂമിയില്‍ വ്യാപിപ്പിക്കാന്‍ നിര്‍ദേശിച്ച കാര്‍മേഘത്തെ. അതുമൂലം ഭൂമി നിര്‍ജീവമായതിന് ശേഷം ജീവനുള്ളതായിത്തീരുന്നു.

5). (ദിവ്യസന്ദേശം ഇട്ടുകൊടുക്കുന്നവ) ഇതും മലക്കുകളാണ്. ശ്രേഷ്ഠമായ കാര്യങ്ങള്‍ ഇട്ടുകൊടുക്കുന്നവര്‍, അല്ലാഹു തന്റെ അടിമക്ക് കരുണയായി നല്‍കിയ ഉല്‍ബോധനം. അവര്‍ക്കുള്ള നന്മകളും പ്രയോജനങ്ങളും അതില്‍ അവരെ ഉല്‍ബോധിപ്പിക്കുന്നു. അത് അവര്‍ പ്രവാചകന്മാര്‍ക്ക് ഇട്ടുകൊടുക്കുന്നു.

6). (ഒരു ഒഴികഴിവ് ആയിക്കൊണ്ടോ താക്കീതായിക്കൊണ്ടോ) ജനങ്ങള്‍ക്ക് താക്കീതോ ഒഴികഴിവോ ആയിട്ടുള്ളത്. ഭാവിയില്‍ വരാനിരിക്കുന്ന ഭയങ്ങളെക്കുറിച്ച് മുന്നറിയിപ്പ് നല്‍കി അവരുടെ ഒഴികഴിവ് ഇല്ലാതാക്കുന്നു. അങ്ങനെ അല്ലാഹുവിനെതിരെ അവര്‍ക്ക് തെളിവില്ലാതായിത്തീരുന്നു. (തഫ്സീറുസ്സഅ്ദി)

എല്ലാ ആയത്തിലും ഉദ്ദേശിക്കപ്പെട്ടിരിക്കുന്നതു മലക്കുകളാണെന്നും, ആദ്യത്തെ മൂന്നില്‍ കാറ്റും, ഒടുവിലത്തെ രണ്ടില്‍ മലക്കുകളുമാണെന്നും അഭിപ്രായമുണ്ട്. മറ്റ് അഭിപ്രായങ്ങളുമുണ്ട്. الله أعلم.

يَوْمَ يَقُومُ ٱلرُّوحُ وَٱلْمَلَٰٓئِكَةُ صَفًّا ۖ لَّا يَتَكَلَّمُونَ إِلَّا مَنْ أَذِنَ لَهُ ٱلرَّحْمَٰنُ وَقَالَ صَوَابًا

റൂഹും മലക്കുകളും അണിയായി നില്‍ക്കുന്ന ദിവസം. പരമകാരുണികനായ അല്ലാഹു അനുവാദം നല്‍കിയിട്ടുള്ളവനും സത്യം പറഞ്ഞിട്ടുള്ളവനുമല്ലാതെ അന്ന് സംസാരിക്കുകയില്ല. (ഖുർആൻ:78/38)

അത് {റൂഹ് നില്‍ക്കുന്ന ദിവസം} മലക്കുകളില്‍ ശ്രേഷ്ഠനായ ജിബ്‌രീല്‍ ആണത്. {മലക്കുകള്‍} അതായത് മുഴുവന്‍ മലക്കുകളും. {അണിയായി} അല്ലാഹുവിന് കീഴ്‌പ്പെട്ടവരായി. (തഫ്സീറുസ്സഅ്ദി)

ഈ വചനം വ്യക്തമാക്കുന്നത് അന്ത്യനാളിൽ റൂഹും (ജിബ്രീൽ) മലക്കുകളും നിരനിരയായി അണിനിരന്ന് നിൽക്കുമെന്നും, പരമകാരുണികനായ അല്ലാഹു അനുവാദം നൽകുകയും സത്യം പറയുകയും ചെയ്തവരല്ലാത്ത ആർക്കും അന്ന് സംസാരിക്കാൻ കഴിയുകയില്ലെന്നുമാണ്; അല്ലാഹുവിന്റെ മുമ്പിലുള്ള ആ മഹാസഭയുടെ വിറയാർന്ന അന്തരീക്ഷവും പരമമായ അധികാരവും നീതിയും ഈ ആയത്ത് ഓർമ്മിപ്പിക്കുന്നു.

وَٱلنَّٰزِعَٰتِ غَرْقًا ‎﴿١﴾‏ وَٱلنَّٰشِطَٰتِ نَشْطًا ‎﴿٢﴾‏ وَٱلسَّٰبِحَٰتِ سَبْحًا ‎﴿٣﴾‏ فَٱلسَّٰبِقَٰتِ سَبْقًا ‎﴿٤﴾‏ فَٱلْمُدَبِّرَٰتِ أَمْرًا ‎﴿٥﴾‏

(അവിശ്വാസികളിലേക്ക്‌) ഇറങ്ങിച്ചെന്ന് (അവരുടെ ആത്മാവുകളെ) ഊരിയെടുക്കുന്നവ തന്നെയാണ സത്യം. (സത്യവിശ്വാസികളുടെ ആത്മാവുകളെ) സൌമ്യതയോടെ പുറത്തെടുക്കുന്നവ തന്നെയാണ, സത്യം. ഊക്കോടെ ഒഴുകി വരുന്നവ തന്നെയാണ, സത്യം. എന്നിട്ടു മുന്നോട്ടു കുതിച്ചു പോകുന്നവ തന്നെയാണ, സത്യം. കാര്യം നിയന്ത്രിക്കുന്നവയും തന്നെയാണ, സത്യം. (ഖു൪ആന്‍:79/1-5)

സൂറ:അന്നാസിആത്ത് മലക്കുകളെ കൊണ്ട് സത്യം ചെയ്തു കൊണ്ടാണ് ആരംഭിക്കുന്നത്. ഒന്നാമത്തെ ആയത്തിൽ അവിശ്വാസികളുടെ ആത്മാക്കളെ കാഠിന്യത്തോടെയും പരുഷതയോടെയും ഊരിയെടുക്കുന്ന മലക്കുകളെ കൊണ്ടും, രണ്ടാമത്തെ ആയത്തിൽ സത്യവിശ്വാസികളുടെ ആത്മാക്കളെ എളുപ്പത്തിലും സൗമ്യമായും ഊരിയെടുക്കുന്ന മലക്കുകളെ കൊണ്ടും, മൂന്നാമത്തെ ആയത്തിൽ ആകാശത്ത് നിന്നു ഭൂമിയിലേക്ക് അല്ലാഹുവിൻ്റെ കൽപ്പനയുമായി ഒഴുകിവരുന്ന മലക്കുകളെ കൊണ്ടും, നാലാമത്തെ ആയത്തിൽ അല്ലാഹുവിന്റെ കൽപ്പന നിറവേറ്റാൻ മുന്നോട്ട് കുതിക്കുന്ന മലക്കുകളിൽ ചിലരെ കൊണ്ടും, അഞ്ചാമത്തെ ആയത്തിൽ മേൽ വിവരിച്ചതും അതല്ലാത്തതുമടക്കം ഭൂമിയിൽ നടപ്പാക്കുവാൻ കൽപ്പിക്കപ്പെട്ട കാര്യങ്ങളെല്ലാം ചിട്ടയും പരിപാടിയുമനുസരിച്ചു നടത്തുന്ന മലക്കുകളെ കൊണ്ടും അല്ലാഹു സത്യം ചെയ്യുന്നു.

كـَلَّآ إِنَّهَا تَذْكِرَةٌ ‎﴿١١﴾‏ فَمَن شَآءَ ذَكَرَهُۥ ‎﴿١٢﴾‏ فِى صُحُفٍ مُّكَرَّمَةٍ ‎﴿١٣﴾‏ مَّرْفُوعَةٍ مُّطَهَّرَةِۭ ‎﴿١٤﴾‏ بِأَيْدِى سَفَرَةٍ ‎﴿١٥﴾‏ كِرَامِۭ بَرَرَةٍ ‎﴿١٦﴾

നിസ്സംശയം ഇത് (ഖുര്‍ആന്‍) ഒരു ഉല്‍ബോധനമാകുന്നു; തീര്‍ച്ച. അതിനാല്‍ ആര്‍ ഉദ്ദേശിക്കുന്നുവോ അവനത് ഓര്‍മിച്ച് കൊള്ളട്ടെ. ആദരണീയമായ ചില ഏടുകളിലാണത്‌. ഔന്നത്യം നല്‍കപ്പെട്ടതും പരിശുദ്ധമാക്കപ്പെട്ടതുമായ (ഏടുകളില്‍), ചില സന്ദേശവാഹകരുടെ കൈകളിലാണത്‌. മാന്യന്‍മാരും പുണ്യവാന്‍മാരും ആയിട്ടുള്ളവരുടെ. (ഖു൪ആന്‍:80/11-16)

{ചില സന്ദേശവാഹകന്മാരുടെ കൈകളിലാണത്} അവര്‍ മലക്കുകളാണ്; അല്ലാഹുവിനും അവന്റെ ദാസന്മാര്‍ക്കും ഇടയിലുള്ള സന്ദേശവാഹകന്മാര്‍. (തഫ്സീറുസ്സഅ്ദി)

അല്ലാഹു തന്റെ ഗ്രന്ഥത്തിന് ഏര്‍പെടുത്തിയ സംരക്ഷണമാണിതെല്ലാം. സൂക്ഷ്മാലുക്കളും ശക്തരും മാന്യന്മാരുമായ ദൂതന്മാരായ മലക്കുകളെ അതിന്റെ സന്ദേശവാഹകരാക്കി. പിശാചുക്കള്‍ക്ക് യാതൊരു വഴിയും അതിന്മേലില്ല. ഇതെല്ലാം നാം പൂര്‍ണമായി അംഗീകരിച്ച് വിശ്വസിക്കേണ്ട കാര്യങ്ങളാണ്. (തഫ്സീറുസ്സഅ്ദി)

إِنَّهُۥ لَقَوْلُ رَسُولٍ كَرِيمٍ ‎﴿١٩﴾‏ ذِى قُوَّةٍ عِندَ ذِى ٱلْعَرْشِ مَكِينٍ ‎﴿٢٠﴾‏ مُّطَاعٍ ثَمَّ أَمِينٍ ‎﴿٢١﴾

തീര്‍ച്ചയായും ഇത് (ഖുര്‍ആന്‍) മാന്യനായ ഒരു ദൂതന്‍റെ വാക്കാകുന്നു. ശക്തിയുള്ളവനും, സിംഹാസനസ്ഥനായ അല്ലാഹുവിങ്കല്‍ സ്ഥാനമുള്ളവനുമായ (ദൂതന്‍റെ) അവിടെ അനുസരിക്കപ്പെടുന്നവനും വിശ്വസ്തനുമായ (ദൂതന്‍റെ) (ഖു൪ആന്‍:81/19-21)

അല്ലാഹുവിങ്കല്‍ നിന്ന് വിശുദ്ധ ഖുര്‍ആന്‍ മുഹമ്മദ് നബി ﷺ ക്ക് വന്നുകിട്ടുന്നത് ജിബ്രീല്‍ عليه السلام മുഖേനയാണല്ലോ. അദ്ദേഹം വളരെ മാന്യനായ ഒരു ദൈവദൂതനാകുന്നുവെന്ന് സത്യംചെയ്തുകൊണ്ട് അല്ലാഹു സ്ഥാപിക്കുന്നു. തുടര്‍ന്ന് ജിബ്രീല്‍ عليه السلام യുടെ രണ്ട് പ്രത്യേകതകൾ എടുത്തു പറയുന്നു. ജിബ്രീല്‍ عليه السلامവളരെ ശക്തിമാനും, ലോകാലോകങ്ങളുടെ സിംഹാസനാധിപതിയായ അല്ലാഹുവിന്റെ അടുക്കല്‍ ഉയര്‍ന്ന സ്ഥാനമാനങ്ങളുള്ള മഹാനുമാണ്. മാത്രമല്ല, അവിടെ – അഥവാ മലക്കുകളുടെ ആവാസകേന്ദ്രമായ മലഉല്‍ അ‌അ്‌ലായിൽ – അനുസരിക്കപ്പെടുന്ന നേതാവുമാണ്.

وَإِنَّ عَلَيْكُمْ لَحَٰفِظِينَ ‎﴿١٠﴾‏ كِرَامًا كَٰتِبِينَ ‎﴿١١﴾‏ يَعْلَمُونَ مَا تَفْعَلُونَ ‎﴿١٢﴾‏

തീര്‍ച്ചയായും നിങ്ങളുടെ മേല്‍ ചില മേല്‍നോട്ടക്കാരുണ്ട്‌. രേഖപ്പെടുത്തിവെക്കുന്ന ചില മാന്യന്‍മാര്‍. നിങ്ങള്‍ പ്രവര്‍ത്തിക്കുന്നത് അവര്‍ അറിയുന്നു. (ഖുർആൻ:82/10-12)

നിങ്ങളുടെ പ്രവര്‍ത്തനങ്ങളും വാക്കുകളും രേഖപ്പെടുത്താന്‍ അല്ലാഹു നിങ്ങളുടെ മേല്‍ മാന്യന്മാരായ മലക്കുകളെ നിശ്ചയിച്ചിട്ടുണ്ട്. അവര്‍ നിങ്ങളുടെ പ്രവര്‍ത്തനങ്ങളെ കണ്ടുകൊണ്ടിരിക്കുന്നു. ഇതില്‍ ഹൃദയങ്ങളുടെയും അവയവങ്ങളുടെയും പ്രവര്‍ത്തനങ്ങള്‍ ഉള്‍പ്പെടും.  (തഫ്സീറുസ്സഅ്ദി)

سَنَدْعُ ٱلزَّبَانِيَةَ

നാം സബാനിയത്തിനെ (ശിക്ഷ നടപ്പാക്കുന്ന മലക്കുകളെ) വിളിച്ചുകൊള്ളാം. (ഖുർആൻ:96/18)

زبانية (സബാനിയ്യത്ത്) എന്ന വാക്കിന് ‘മല്ലന്മാര്‍, ഊക്കന്മാര്‍, കാവല്‍ക്കാര്‍, പോലീസ്’ എന്നൊക്കെയാണ് അര്‍ത്ഥം. കഠിനന്മാരും ഊക്കന്മാരും ആയ നരകത്തിലെ ഉദ്യോഗസ്ഥന്മാരാകുന്ന മലക്കുകളാണ് വിവക്ഷ. (അമാനി തഫ്സീര്‍)

ഈ വചനം വ്യക്തമാക്കുന്നത് സത്യനിഷേധിയും ധിക്കാരിയുമായ മനുഷ്യൻ തന്റെ ആളുകളെയും കൂട്ടുകാരെയും സഹായത്തിനായി വിളിച്ചോട്ടെ എന്നും, എന്നാൽ അത്തരം ധിക്കാരികളെ നേരിടാൻ നരകത്തിലെ കാവൽക്കാരായ കഠിനഹൃദയരും ശക്തരുമായ ‘സബാനിയ’ മലക്കുകളെ അല്ലാഹു ഉടൻ വിളിച്ചുവരുത്തുമെന്നുമാണ്; അല്ലാഹുവിന്റെ മുന്നിൽ അഹങ്കാരം കാണിക്കുന്നവർക്ക് കടുത്ത ശിക്ഷ നടപ്പിലാക്കാൻ സജ്ജരായ ആ മലക്കുകളുടെ പ്രതാപത്തെയും അധീശത്വത്തെയുമാണ് ഈ ആയത്ത് ഓർമ്മിപ്പിക്കുന്നത്.

إِنَّا أَنزَلْنَاهُ فِي لَيْلَةِ الْقَدْرِ ‎﴿١﴾‏ وَمَا أَدْرَاكَ مَا لَيْلَةُ الْقَدْرِ ‎﴿٢﴾‏ لَيْلَةُ الْقَدْرِ خَيْرٌ مِّنْ أَلْفِ شَهْرٍ ‎﴿٣﴾‏ تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِم مِّن كُلِّ أَمْرٍ ‎﴿٤﴾‏ سَلَامٌ هِيَ حَتَّىٰ مَطْلَعِ الْفَجْرِ ‎﴿٥﴾‏

തീര്‍ച്ചയായും നാം ഇതിനെ (ഖുര്‍ആനിനെ) നിര്‍ണയത്തിന്‍റെ രാത്രിയില്‍ അവതരിപ്പിച്ചിരിക്കുന്നു. നിര്‍ണയത്തിന്‍റെ രാത്രി എന്നാല്‍ എന്താണെന്ന് നിനക്കറിയാമോ? നിര്‍ണയത്തിന്‍റെ രാത്രി ആയിരം മാസത്തെക്കാള്‍ ഉത്തമമാകുന്നു.  മലക്കുകളും ആത്മാവും അവരുടെ രക്ഷിതാവിന്‍റെ എല്ലാകാര്യത്തെ സംബന്ധിച്ചുമുള്ള ഉത്തരവുമായി ആ രാത്രിയില്‍ ഇറങ്ങി വരുന്നു. പ്രഭാതോദയം വരെ അത് സമാധാനമത്രെ. (ഖു൪ആന്‍:97/1-5)

റൂഹ്(ആത്മാവ്) എന്ന് സൂചിപ്പിച്ചിട്ടുള്ളത് ജിബ്രീല്‍ عليه السلام എന്ന മലക്കിനെയാണ്. ജിബ്‌രീല്‍ ഉള്‍പ്പടെയുള്ള മലക്കുകൾ ആ രാത്രിയില്‍ ഇറങ്ങിവരുന്നു. അതായത് ആ രാത്രിയില്‍ അവര്‍ ധാരാളമായി ഇറങ്ങുന്നു എന്നര്‍ഥം.

മലക്കുകളും ജിബ്രീൽ عَلَيْهِ السَّلَام യും അല്ലാഹുവിന്റെ അനുമതിയോടെ ആ രാത്രിയിൽ ഇറങ്ങി വരുന്നു. ആ വർഷത്തിൽ അല്ലാഹു തീരുമാനിച്ചിട്ടുള്ള എല്ലാ വിധികളുമായാണ് അവർ ഇറങ്ങി വരിക. (ഓരോ വ്യക്തിക്കും) അല്ലാഹു വിധിച്ച ഉപജീവനവും മരണവും ജനനവും മറ്റുമെല്ലാം അതിൽ ഉണ്ടായിരിക്കും. (തഫ്സീർ മുഖ്തസ്വർ)

 

 

www.kanzululoom.com