വാനങ്ങൾ ചുരുട്ടപ്പെടും
അല്ലാഹു അന്ത്യനാളിൽ തന്റെ വലത് കൈകൊണ്ട് വാനത്തെ ഏടുകൾ ചുരുട്ടുന്നതുപോലെ ചുരുട്ടും. തൽവിഷയത്തിൽ ആയത്തുകളും ഹദീഥുകളും ഇപ്രകാരമാണ്. അല്ലാഹു പറഞ്ഞു:
وَمَا قَدَرُوا۟ ٱللَّهَ حَقَّ قَدْرِهِۦ وَٱلْأَرْضُ جَمِيعًا قَبْضَتُهُۥ يَوْمَ ٱلْقِيَٰمَةِ وَٱلسَّمَٰوَٰتُ مَطْوِيَّٰتُۢ بِيَمِينِهِۦ ۚ سُبْحَٰنَهُۥ وَتَعَٰلَىٰ عَمَّا يُشْرِكُونَ
അല്ലാഹുവെ കണക്കാക്കേണ്ട നിലയില്‍ അവര്‍ കണക്കാക്കിയിട്ടില്ല. ഉയിര്‍ത്തെഴുന്നേല്‍പിന്‍റെ നാളില്‍ ഭൂമി മുഴുവന്‍ അവന്‍റെ ഒരു കൈപിടിയില്‍ ഒതുങ്ങുന്നതായിരിക്കും. ആകാശങ്ങള്‍ അവന്‍റെ വലതുകൈയ്യില്‍ ചുരുട്ടി പിടിക്കപ്പെട്ടവയുമായിരിക്കും. അവനെത്ര പരിശുദ്ധന്‍! അവര്‍ പങ്കുചേര്‍ക്കുന്നതിനെല്ലാം അവന്‍ അതീതനായിരിക്കുന്നു. (ഖുർആൻ:39/67)
عَنْ عَبْدِ اللَّهِ ـ رضى الله عنه ـ قَالَ جَاءَ حَبْرٌ مِنَ الأَحْبَارِ إِلَى رَسُولِ اللَّهِ صلى الله عليه وسلم فَقَالَ يَا مُحَمَّدُ، إِنَّا نَجِدُ أَنَّ اللَّهَ يَجْعَلُ السَّمَوَاتِ عَلَى إِصْبَعٍ وَالأَرَضِينَ عَلَى إِصْبَعٍ، وَالشَّجَرَ عَلَى إِصْبَعٍ، وَالْمَاءَ وَالثَّرَى عَلَى إِصْبَعٍ، وَسَائِرَ الْخَلاَئِقِ عَلَى إِصْبَعٍ، فَيَقُولُ أَنَا الْمَلِكُ. فَضَحِكَ النَّبِيُّ صلى الله عليه وسلم حَتَّى بَدَتْ نَوَاجِذُهُ تَصْدِيقًا لِقَوْلِ الْحَبْرِ ثُمَّ قَرَأَ رَسُولُ اللَّهِ صلى الله عليه وسلم {وَمَا قَدَرُوا اللَّهَ حَقَّ قَدْرِهِ وَالأَرْضُ جَمِيعًا قَبْضَتُهُ يَوْمَ الْقِيَامَةِ وَالسَّمَوَاتُ مَطْوِيَّاتٌ بِيَمِينِهِ سُبْحَانَهُ وَتَعَالَى عَمَّا يُشْرِكُونَ}
ഇബ്നു മസ്ഊദ് ضى الله عنه വിൽ നിന്നും നിവേദനം: അല്ലാഹുവിന്റെ റസൂലിന്റെ അടുക്കൽ ഒരു വേദപുരോഹിതൻ വന്നു. അദ്ദേഹം പറഞ്ഞു: “മുഹമ്മദ്, നിശ്ചയം, അല്ലാഹു ആകാശങ്ങളെ ഒരു വിരലിലും ഭൂലോകങ്ങളെ ഒരു വിരലിലും വൃക്ഷങ്ങളെ ഒരു വിരലിലും വെള്ളത്തെ ഒരു വിരലിലും മണ്ണിനെ ഒരു വിരലിലും ഇതര സൃഷ്ടികളെ ഒരു വിരലിലും ആക്കും. എന്നിട്ടു പറയും: ഞാൻ രാജാവാണ്. അപ്പോൾ വേദപുരോഹിതന്റെ വാക്കിനെ സത്യപ്പെടുത്തിക്കൊണ്ട് നബി ﷺ തന്റെ അണപ്പല്ലുകൾ വെളിപ്പെടുന്നതുവരെ ചിരിച്ചു പിന്നീട് തിരുമേനി ഓതി: {അല്ലാഹുവെ കണക്കാക്കേണ്ട നിലയില്‍ അവര്‍ കണക്കാക്കിയിട്ടില്ല. ഉയിര്‍ത്തെഴുന്നേല്‍പിന്‍റെ നാളില്‍ ഭൂമി മുഴുവന്‍ അവന്‍റെ ഒരു കൈപിടിയില്‍ ഒതുങ്ങുന്നതായിരിക്കും. ആകാശങ്ങള്‍ അവന്‍റെ വലതുകൈയ്യില്‍ ചുരുട്ടി പിടിക്കപ്പെട്ടവയുമായിരിക്കും. അവനെത്ര പരിശുദ്ധന്‍! അവര്‍ പങ്കുചേര്‍ക്കുന്നതിനെല്ലാം അവന്‍ അതീതനായിരിക്കുന്നു. (39/67) (ബുഖാരി, മുസ്ലിം)
عَبْدُ اللَّهِ بْنُ عُمَرَ، قَالَ قَالَ رَسُولُ اللَّهِ صلى الله عليه وسلم “ يَطْوِي اللَّهُ عَزَّ وَجَلَّ السَّمَوَاتِ يَوْمَ الْقِيَامَةِ ثُمَّ يَأْخُذُهُنَّ بِيَدِهِ الْيُمْنَى ثُمَّ يَقُولُ أَنَا الْمَلِكُ أَيْنَ الْجَبَّارُونَ؟ أَيْنَ الْمُتَكَبِّرُونَ؟ ثُمَّ يَطْوِي الأَرَضِينَ بِشِمَالِهِ ثُمَّ يَقُولُ أَنَا الْمَلِكُ أَيْنَ الْجَبَّارُونَ أَيْنَ الْمُتَكَبِّرُونَ؟
ഇബ്നു ഉമര്‍ رَضِيَ اللَّهُ عَنْهُ വിൽ നിന്ന് നിവേദനം: നബി ﷺ പറഞ്ഞു: അല്ലാഹു ആകാശങ്ങളെ അന്ത്യനാളിൽ ചുരുട്ടും. പിന്നീട് തന്റെ വലത് കൈകൊണ്ട് അവയെ എടുക്കും. ശേഷം പറയും: ഞാനാണ് രാജാവ്. സ്വേച്ഛാധിപതികൾ എവിടെ? അഹങ്കാരികൾ എവിടെ? പിന്നീട് ഏഴ് ഭൂമികളേയും ചുരുട്ടും; അവയെ തൻറെ ഇടത് കയ്യിൽ എടുക്കും. ശേഷം പറയും: ഞാനാണ് രാജാവ്. സ്വേച്ഛാധിപതികൾ എവിടെ? അഹങ്കാരികൾ എവിടെ? (മുസ്ലിം)
ഭൂമിയും പർവ്വതങ്ങളും
അന്ത്യനാൾ സംഭവിക്കുന്നതോടെ ഭൂമിയെ അല്ലാഹു തന്റെ കൈപ്പിടിയിലാക്കുന്നതുമായി ബന്ധപ്പെട്ട വചനങ്ങൾ നാം വായിച്ചു. കൂടാതെ ഉറച്ചു നിൽക്കുന്ന ഈ ഭൂമിയും അതിൽ ആണികളെന്നോണം വർത്തിക്കുന്ന പർവ്വതങ്ങളും അന്ത്യനാളിൽ കൂട്ടിയിടിക്കപ്പെടുകയും ഇടിച്ചുപൊടിക്കപ്പെടുകയും ചെയ്യുമെന്നും പ്രമാണങ്ങളിലുണ്ട്. അല്ലാഹു പറയുന്നു:
فَإِذَا نُفِخَ فِى ٱلصُّورِ نَفْخَةٌ وَٰحِدَةٌ ﴿١٣﴾ وَحُمِلَتِ ٱلْأَرْضُ وَٱلْجِبَالُ فَدُكَّتَا دَكَّةً وَٰحِدَةً ﴿١٤﴾ فَيَوْمَئِذٍ وَقَعَتِ ٱلْوَاقِعَةُ ﴿١٥﴾
കാഹളത്തില്‍ ഒരു ഊത്ത് ഊതപ്പെട്ടാല്‍, ഭൂമിയും പര്‍വ്വതങ്ങളും പൊക്കിയെടുക്കപ്പെടുകയും എന്നിട്ട് അവ രണ്ടും ഒരു ഇടിച്ചു തകര്‍ക്കലിന് വിധേയമാക്കപ്പെടുകയും ചെയ്താല്‍! അന്നേ ദിവസം ആ സംഭവം സംഭവിക്കുകയായി. (ഖുർആൻ:69/13-15)
ـَلَّآ إِذَا دُكَّتِ ٱلْأَرْضُ دَكًّا دَكًّا
അല്ല, ഭൂമി പൊടിപൊടിയായി പൊടിക്കപ്പെട്ടാൽ, (ഖുർആൻ:89/21)
ശക്തമായ പ്രകമ്പനത്തിനും വിറകൊള്ളലിനും വിധേയമായ പർവ്വതങ്ങൾ ഊർന്നിറങ്ങുന്ന മണൽതരികളായി മാറും. അല്ലാഹു പറയുന്നു:
يَوْمَ تَرْجُفُ ٱلْأَرْضُ وَٱلْجِبَالُ وَكَانَتِ ٱلْجِبَالُ كَثِيبًا مَّهِيلًا
ഭൂമിയും പര്‍വ്വതങ്ങളും വിറകൊള്ളുകയും പര്‍വ്വതങ്ങള്‍ ഒലിച്ചു പോകുന്ന മണല്‍ കുന്ന് പോലെയാവുകയും ചെയ്യുന്ന ദിവസത്തില്‍. (ഖു൪ആന്‍:73/14)
ഗിരിശൃംഘങ്ങൾ പഞ്ഞി പോലെയും തുടർന്ന് കടഞ്ഞ് കുടഞ്ഞിട്ട പഞ്ഞിപോലെയും ആയിത്തീരും. അല്ലാഹു പറയുന്നു
وَتَكُونُ ٱلْجِبَالُ كَٱلْعِهْنِ
പര്‍വ്വതങ്ങള്‍ കടഞ്ഞരോമം പോലെയും ആയിത്തീരും. (ഖു൪ആന്‍:70/9)
وَتَكُونُ ٱلْجِبَالُ كَٱلْعِهْنِ ٱلْمَنفُوشِ
പര്‍വ്വതങ്ങള്‍ കടഞ്ഞ ആട്ടിന്‍ രോമം പോലെയും ആകുന്ന ദിവസം. (ഖു൪ആന്‍:101/5)
പിന്നീട് മലകൾ അവയുടെ സ്ഥാനം തെറ്റി ചലിക്കും.. അവ മരീചിക പോലെയായിത്തീരും. അല്ലാഹു പറയുന്നു:
وَسُيِّرَتِ ٱلْجِبَالُ فَكَانَتْ سَرَابًا
പര്‍വ്വതങ്ങള്‍ സഞ്ചരിപ്പിക്കപ്പെടുകയും അങ്ങനെ അവ മരീചിക പോലെ ആയിത്തീരുകയും ചെയ്യും. (ഖുർആൻ:78/20)
وَإِذَا ٱلْجِبَالُ سُيِّرَتْ
പര്‍വ്വതങ്ങള്‍ സഞ്ചരിപ്പിക്കപ്പെടുമ്പോള്‍. (ഖുർആൻ:81/3)
പർവ്വതങ്ങൾ ധൂളികളാക്കി പൊടിക്കപ്പെടുകയും ഭൂമി നിമ്നോന്നതങ്ങളില്ലാതെ നിരത്തപ്പെടുകയും ഭൂമുഖം പരന്നു നിരന്നുകിടക്കുകയും ചെയ്യും.
وَإِذَا ٱلْجِبَالُ نُسِفَتْ
പര്‍വ്വതങ്ങള്‍ പൊടിക്കപ്പെടുകയും, (ഖുർആൻ:77/10)
وَيَوْمَ نُسَيِّرُ ٱلْجِبَالَ وَتَرَى ٱلْأَرْضَ بَارِزَةً وَحَشَرْنَٰهُمْ فَلَمْ نُغَادِرْ مِنْهُمْ أَحَدًا
പര്‍വ്വതങ്ങളെ നാം സഞ്ചരിപ്പിക്കുകയും തെളിഞ്ഞ് നിരപ്പായ നിലയില്‍ ഭൂമി നിനക്ക് കാണുമാറാകുകയും, തുടര്‍ന്ന് അവരില്‍ നിന്ന് (മനുഷ്യരില്‍ നിന്ന്) ഒരാളെയും വിട്ടുകളയാതെ നാം അവരെ ഒരുമിച്ചുകൂട്ടുകയും ചെയ്യുന്ന ദിവസം (ശ്രദ്ധേയമാകുന്നു) (ഖുർആൻ:18/47)
وَيَسْـَٔلُونَكَ عَنِ ٱلْجِبَالِ فَقُلْ يَنسِفُهَا رَبِّى نَسْفًا ﴿١٠٥﴾ فَيَذَرُهَا قَاعًا صَفْصَفًا ﴿١٠٦﴾ لَّا تَرَىٰ فِيهَا عِوَجًا وَلَآ أَمْتًا ﴿١٠٧﴾
പര്‍വ്വതങ്ങളെ സംബന്ധിച്ച് അവര്‍ നിന്നോട് ചോദിക്കുന്നു. പറയുക: എന്‍റെ രക്ഷിതാവ് അവയെ പൊടിച്ച് പാറ്റിക്കളയുന്നതാണ്‌. എന്നിട്ട് അവന്‍ അതിനെ സമനിരപ്പായ മൈതാനമാക്കി വിടുന്നതാണ്‌. ഇറക്കമോ കയറ്റമോ നീ അവിടെ കാണുകയില്ല. (ഖുർആൻ:20/105-107)
സമുദ്രങ്ങൾ കത്തിക്കപ്പെടും
ഭൂമിയുടെ മൂന്നിൽരണ്ടും സമുദ്രങ്ങളാണല്ലോ. അന്ത്യനാളിന്റെ സംഭവ്യതയോടെ സമുദ്രങ്ങൾക്കിടയിലുള്ള മറകൾ നീങ്ങുകയും അതുവരെ ഇരച്ചുകയറാതെ മാറി ഒഴുകിയിരുന്ന സമുദ്ര ജലം കൂടിക്കലർന്ന് സമുദ്രങ്ങളുടെ അവസ്ഥ താളംതെറ്റുകയും ചെയ്യുമെന്ന് പണ്ഡിതന്മാർ ഉണർത്തുന്നു. അണുവിസ്ഫോടനങ്ങൾ സംജാതമാക്കുന്ന ഭീകരതകൾ അറിയുന്നവരാണ് നാം. അഗാധമായ സമുദ്രങ്ങളിൽ ജല കണികകളിൽ ഉണ്ടാകുന്ന മഹാസ്ഫോടനങ്ങൾ എത്രമാത്രം ഭീതിജനകമായിരിക്കും.
അന്ത്യനാളിൽ സമുദ്രങ്ങൾ കത്തിക്കപ്പെടുന്നതുമായി ബന്ധപ്പെട്ട് അല്ലാഹു് പറയുന്നു:
وَإِذَا ٱلْبِحَارُ سُجِّرَتْ
സമുദ്രങ്ങള്‍ ആളിക്കത്തിക്കപ്പെടുമ്പോള്‍. (ഖുർആൻ:81/6)
അന്ത്യനാളിൽ സമുദ്രങ്ങൾ പൊട്ടിയൊഴുകുന്നതുമായി ബന്ധപ്പെട്ട് അല്ലാഹു പറയുന്നു:
وَإِذَا ٱلْبِحَارُ فُجِّرَتْ
സമുദ്രങ്ങള്‍ പൊട്ടി ഒഴുകുമ്പോള്‍. (ഖുർആൻ:82/3)
ആകാശങ്ങൾ ചഞ്ചലിതമാകും
അന്ത്യനാൾ സംഭവിക്കുന്നതോടെ ഭൂമിയെ അല്ലാഹു ഏടുകൾ ചുരുട്ടുന്നതുപോലെ ചുരുട്ടിപ്പിടിക്കുന്നതുമായി ബന്ധപ്പെട്ട വചനങ്ങൾ നാം വായിച്ചു. കൂടാതെ അന്ത്യനാളിൽ അതിഭദ്രമായ ആകാശ മേൽകൂരക്ക് വിള്ളൽ വീഴുകയും അത് ചഞ്ചലിതമാകുകയും പ്രകമ്പനം കൊള്ളുകയും ചെയ്യുമെന്ന് ധാരാളം വചനങ്ങൾ അറിയിച്ചിട്ടുണ്ട്. അല്ലാഹു പറയുന്നു:
يَوْمَ تَمُورُ ٱلسَّمَآءُ مَوْرًا
ആകാശം ശക്തിയായി പ്രകമ്പനം കൊള്ളുന്ന ദിവസം. (ഖുർആൻ:52/9)
ശക്തിമത്തായ ആകാശ പാളികൾ പൊട്ടുകയും അതിൽ വിള്ളലുണ്ടാവുകയും ചെയ്യും. അല്ലാഹു പറയുന്നു:
إِذَا ٱلسَّمَآءُ ٱنفَطَرَتْ
ആകാശം പൊട്ടി പിളരുമ്പോള്‍. (ഖുർആൻ:82/1)
إِذَا ٱلسَّمَآءُ ٱنشَقَّتْ ﴿١﴾ وَأَذِنَتْ لِرَبِّهَا وَحُقَّتْ ﴿٢﴾
ആകാശം പിളരുമ്പോള്‍, അത് അതിന്റെ രക്ഷിതാവിന് കീഴ്പെടുകയും ചെയ്യുമ്പോള്‍-അത് (അങ്ങനെ കീഴ്പെടാന്‍) കടപ്പെട്ടിരിക്കുന്നുതാനും. (ഖുർആൻ:84/1-2)
അംബരചുംബികളായ ആകാശ ഗോപുരങ്ങളും കോട്ടക്കൊത്തളങ്ങളും ഭൂകുലുക്കത്തിൽ ബലക്ഷയമാകുന്നതുപോലെ ആകാശങ്ങളും ദുർബലമാകും. അല്ലാഹു പറയുന്നു:
وَٱنشَقَّتِ ٱلسَّمَآءُ فَهِىَ يَوْمَئِذٍ وَاهِيَةٌ
ആകാശം പൊട്ടിപ്പിളരുകയും ചെയ്യും. അന്ന് അത് ദുര്‍ബലമായിരിക്കും. (ഖുർആൻ:69/16)
يَوْمَ تَكُونُ ٱلسَّمَآءُ كَٱلْمُهْلِ
ആകാശം ഉരുകിയ ലോഹം പോലെ ആകുന്ന ദിവസം! (ഖുർആൻ:70/8)
നീലിമയുടുത്ത് സുന്ദരമായിരുന്ന ആകാശം നിറംമാറും. വിശുദ്ധ ഖുർആൻ പറയുന്നു:
إِذَا ٱنشَقَّتِ ٱلسَّمَآءُ فَكَانَتْ وَرْدَةً كَٱلدِّهَانِ
എന്നാല്‍ ആകാശം പൊട്ടിപ്പിളരുകയും, അത് കുഴമ്പു പോലുള്ളതും റോസ് നിറമുള്ളതും ആയിത്തീരുകയും ചെയ്താല്‍. (ഖുർആൻ:55/37)
സൂര്യനക്ഷത്രാദികൾ
ഉജ്ജ്വലമായി ഉലകത്തെ സജീവമാക്കുന്ന സൂര്യൻ ചുരുണ്ടുകൂടി അതിന്റെ പ്രഭ കെട്ടടങ്ങും. അല്ലാഹു പറയുന്നു:
إِذَا ٱلشَّمْسُ كُوِّرَتْ
സൂര്യന്‍ ചുറ്റിപ്പൊതിയപ്പെടുമ്പോള്‍. (ഖുർആൻ:81/1)
പൂനിലാവുകൾ തീർക്കുന്ന ചന്ദ്രൻ ഗ്രഹണബാധയേറ്റ് പ്രകാശരഹിതമാകും. അല്ലാഹു പറയുന്നു:
فَإِذَا بَرِقَ ٱلْبَصَرُ ﴿٧﴾ وَخَسَفَ ٱلْقَمَرُ ﴿٨﴾
എന്നാല്‍ കണ്ണ് അഞ്ചിപ്പോകുകയും ചന്ദ്രന് ഗ്രഹണം ബാധിക്കുകയും (ഖുർആൻ:75/7-8)
എണ്ണിയാലൊടുങ്ങാത്ത നക്ഷത്രങ്ങളാണ് വിണ്ണിലുളളത്. അവയും ഇതര ആകാശ ഗോളങ്ങളും നിയന്ത്രണം തെറ്റി ഉതിർന്ന് വീഴുകയും അവയുടെ വെളിച്ചം കെടുകയും ചെയ്യും. അല്ലാഹു പറയുന്നു:
وَإِذَا ٱلنُّجُومُ ٱنكَدَرَتْ
നക്ഷത്രങ്ങള്‍ ഉതിര്‍ന്നു വീഴുമ്പോള്‍. (ഖുർആൻ:81/2)
وَإِذَا ٱلْكَوَاكِبُ ٱنتَثَرَتْ
നക്ഷത്രങ്ങള്‍ കൊഴിഞ്ഞു വീഴുമ്പോള്‍. (ഖുർആൻ:82/2)
ജന്തുമൃഗാദികൾ
അന്ത്യനാളിൽ ജന്തുമൃഗാദികളേയും ഒരുമിച്ച് കൂട്ടപ്പെടുന്നതാണ്. അല്ലാഹു പറയുന്നു:
وَإِذَا ٱلْوُحُوشُ حُشِرَتْ
വന്യമൃഗങ്ങള്‍ ഒരുമിച്ചുകൂട്ടപ്പെടുമ്പോള്‍. (ഖുർആൻ:81/5)
അബൂഹുറയ്റയിൽനിന്ന് നിവേദനം. അല്ലാഹുവിന്റെറസൂൽ പറഞ്ഞു:
يحشر الخلائق كلهم يوم القيامة البهائم والدواب والطير وكل شيء ….
അന്ത്യനാളിൽ സൃഷ്ടികളെല്ലാം ഒരുമിച്ച് കൂട്ടപ്പെടും. മൃഗങ്ങളും ഇഴജന്തുക്കളും പറവകളും മുഴു വസ്‌തുക്കളും.
എന്നാൽ, ഭീകരമായ പരലോക വേദിയിൽ മനുഷ്യൻ തനിക്ക് വിലപ്പെട്ടതെല്ലാം എറിഞ്ഞോടും. അറബികൾ ഏറെ പ്രിയപ്പെടുന്ന മൃഗമാണ് ഒട്ടകം. പെണ്ണൊട്ടകം പൂർണ്ണഗർഭം പേറിയാൽ ഏറെ ശ്രദ്ധയും പരിഗണയും നൽകുന്നവരാണ് അവർ. എന്നാൽ ഒരുമിച്ചു കൂട്ടപ്പെടുന്ന മൃഗാദികളിൽ തന്റെ വിലപ്പെട്ട ഒട്ടകത്തെ കണ്ണിൽപ്പെട്ടാൽ പോലും അവർ അതിനെ പരിഗണിക്കുകയില്ല. അല്ലാഹു പറഞ്ഞു:
وَإِذَا ٱلْعِشَارُ عُطِّلَتْ
പൂര്‍ണ്ണഗര്‍ഭിണികളായ ഒട്ടകങ്ങള്‍ അവഗണിക്കപ്പെടുമ്പോള്‍. (ഖുർആൻ:81/4)
ആ വിധം ഭീകരതയിലായിരിക്കും മനുഷ്യകുലം.
അബ്ദുൽ ജബ്ബാർ മദീനി
www.kanzululoom.com