ചില തിന്മകളെ ആളുകൾ അത്ര ഗൗരവമായി കാണാറില്ല. എത്രത്തോളമെന്നാൽ അതൊരു തിന്മയായിപ്പോലും കാണുന്നില്ല. എന്നാൽ അതുവഴി അവരുടെ ഇഹ-പര ജീവിതത്തിൽ ചില പ്രയാസങ്ങളും നഷ്ടങ്ങളും സംഭവിക്കുന്നുണ്ട്. അത്തരത്തിൽ പെട്ട ഒരു തിന്മയാണ് ഭക്ഷണം പാഴാക്കി കളയൽ.
നമ്മുടെ വീടുകളിൽ ഭക്ഷണം പാകം ചെയ്തത് – അത് ഭക്ഷണമോ കറിയോ എന്ത് ആഹാര സാധനമോ ആകട്ടെ, ഫ്രൂട്സുകളാകട്ടെ അത് ചെറിയ അളവിലോ വലിയ അളവിലോ – പാഴായി പോകുന്നില്ലെന്ന് നാം ഉറപ്പുവരുത്തണം. ഈ വിഷയത്തിലെ ഇസ്ലാമിന്റെ നിർദ്ദേശങ്ങൾക്ക് പരിശോധിച്ചാൽ ഭക്ഷണം പാഴായി പോകാത്തവിധം അടിമൾ സൂക്ഷിക്കുന്ന തരത്തിലുള്ള നിയമമാണ് അല്ലാഹു ഏര്‍പ്പെടുത്തിയിട്ടുള്ളതെന്ന് കാണാൻ കഴിയും.
عَنِ الْمِقْدَامِ بْنِ مَعْدِيكَرِبَ، رضى الله عنه عَنِ النَّبِيِّ صلى الله عليه وسلم قَالَ : كِيلُوا طَعَامَكُمْ يُبَارَكْ لَكُمْ
മിഖ്ദാമി ബ്നു മഅ്ദീകരിബ رَضِيَ اللَّهُ عَنْهُ വിൽ നിന്ന് നിവേദനം: നബി ﷺ പറഞ്ഞു: നിങ്ങളുടെ ഭക്ഷണ സാധനങ്ങള്‍ നിങ്ങള്‍ അളന്ന് കൊടുക്കുക, നിങ്ങള്‍ക്ക് ബറകത്ത് ലഭിക്കും. (ബുഖാരി:2128)
عَنِ ابْنِ كَعْبِ بْنِ مَالِكٍ، عَنْ أَبِيهِ، قَالَ كَانَ رَسُولُ اللَّهِ صلى الله عليه وسلم يَأْكُلُ بِثَلاَثِ أَصَابِعَ وَيَلْعَقُ يَدَهُ قَبْلَ أَنْ يَمْسَحَهَا
കഅ്ബ് ബ്നു മാനിക് رَضِيَ اللَّهُ عَنْهُ വിൽ നിന്ന് നിവേദനം: നബി ﷺ മൂന്ന് വിരലുകള്‍കൊണ്ട്‌ ഭക്ഷിക്കുന്നത്‌ ഞാന്‍ കണ്ടു. ഭക്ഷിച്ചുകഴിഞ്ഞാല്‍ കൈ കഴുകുന്നതിനു മുമ്പ് വിരലുകള്‍ അവിടുന്ന് നക്കിയിരുന്നു. (മുസ്ലിം:2032)
عَنِ ابْنِ عَبَّاسٍ، أَنَّ النَّبِيَّ صلى الله عليه وسلم قَالَ: إِذَا أَكَلَ أَحَدُكُمْ فَلاَ يَمْسَحْ يَدَهُ حَتَّى يَلْعَقَهَا أَوْ يُلْعِقَهَا
ഇബ്നുഅബ്ബാസ് رَضِيَ اللَّهُ عَنْهُ വിൽ നിന്ന് നിവേദനം: നബി ﷺ പറഞ്ഞു: നിങ്ങളില്‍ വല്ലവനും ആഹാരം കഴിച്ചാല്‍ ആഹാരത്തിന്റെ അംശങ്ങള്‍ വായ കൊണ്ട്‌ തുടച്ച്‌ എടുത്ത ശേഷമല്ലാതെ കൈ തുടച്ച്‌ വൃത്തിയാക്കരുത്‌. (ബുഖാരി.5456)
عَنْ أَبِي هُرَيْرَةَ، عَنِ النَّبِيِّ صلى الله عليه وسلم قَالَ : إِذَا أَكَلَ أَحَدُكُمْ فَلْيَلْعَقْ أَصَابِعَهُ فَإِنَّهُ لاَ يَدْرِي فِي أَيَّتِهِنَّ الْبَرَكَةُ
അബൂഹുറൈറ رَضِيَ اللَّهُ عَنْهُ വിൽ നിന്ന് നിവേദനം: നബി ﷺ പറഞ്ഞു: നിങ്ങളില്‍ ആരെങ്കിലും ഭക്ഷണം കഴിച്ചു കഴിഞ്ഞാല്‍ അവന്‍ വിരലുകള്‍ നക്കട്ടെ. അവന്റെ ആഹാരത്തില്‍ ഏതിലാണ്‌ ബര്‍ക്കത്തെന്ന്‌ അവനറിയില്ല. (മുസ്ലിം : 2035)
عَنْ جَابِرٍ، قَالَ سَمِعْتُ النَّبِيَّ صلى الله عليه وسلم يَقُولُ : إِنَّ الشَّيْطَانَ يَحْضُرُ أَحَدَكُمْ عِنْدَ كُلِّ شَىْءٍ مِنْ شَأْنِهِ حَتَّى يَحْضُرَهُ عِنْدَ طَعَامِهِ فَإِذَا سَقَطَتْ مِنْ أَحَدِكُمُ اللُّقْمَةُ فَلْيُمِطْ مَا كَانَ بِهَا مِنْ أَذًى ثُمَّ لْيَأْكُلْهَا وَلاَ يَدَعْهَا لِلشَّيْطَانِ
ജാബിര്‍ رَضِيَ اللَّهُ عَنْهُ വിൽ നിന്ന് നിവേദനം: നബി ﷺ പറഞ്ഞു: നിങ്ങളുടെ എല്ലാ കാര്യങ്ങളിലും പിശാച്‌ പങ്കെടുക്കും. ഭക്ഷണസമയത്തും കൂടി അവന്‍ പങ്കെടുക്കും. അങ്ങനെ നിങ്ങളിലാരുടെയെങ്കിലും ഒരുപിടി ഭക്ഷണം താഴെ വീണുപോയാല്‍ അത് പെറുക്കിയെടുത്ത്‌ അഴുക്ക്‌ നീക്കി ഭക്ഷിച്ചുകൊള്ളട്ടെ. പിശാചിന് വേണ്ടി അവനത്‌ ഉപേക്ഷിച്ചിടരുത്‌. (മുസ്ലിം:2033)
‘ഭക്ഷണം പാഴാക്കരുത്’ എന്ന് നിര്‍ദ്ദേശിച്ചുകൊണ്ടുള്ള ആയത്തോ ഹദീസോ കാണുകയില്ല, പ്രത്യുത ‘അമിതമായി ഭക്ഷിക്കരുത്, ഭക്ഷണത്തിൽ ധൂർത്ത് കാണിക്കരുത്’ എന്നൊക്കെയാണ് കാണുന്നത്. അല്ലാഹു പറഞ്ഞതു പോലെ:
وَكُلُوا۟ وَٱشْرَبُوا۟ وَلَا تُسْرِفُوٓا۟ ۚ إِنَّهُۥ لَا يُحِبُّ ٱلْمُسْرِفِينَ
നിങ്ങള്‍ തിന്നുകയും കുടിക്കുകയും ചെയ്തു കൊള്ളുക. എന്നാല്‍ നിങ്ങള്‍ ദുര്‍വ്യയം ചെയ്യരുത്‌. ദുര്‍വ്യയം ചെയ്യുന്നവരെ അല്ലാഹു ഇഷ്ടപ്പെടുകയേയില്ല. (ഖു൪ആന്‍: 7/31)
നബി ﷺയുടെ കാലത്ത് ഇന്നത്തെപ്പോലെ സുഭിക്ഷമായ ഭക്ഷണങ്ങൾ ഉണ്ടായിരുന്നില്ല. നബി ﷺ യും അവിടുത്തെ കുടുംബവും തുടർച്ചയായി അനേകം രാത്രികൾ ഒട്ടിയ വയറുമായി കഴിഞ്ഞിരുന്നു. അമിതമായി ഭക്ഷിക്കുന്നതുപോലും തിൻമയായി കണ്ടിരുന്ന അവര്‍ക്ക് ഭക്ഷണം പാഴാക്കുന്നതിനെ കുറിച്ച് ചിന്തിക്കാനേ കഴിയുമായിരുന്നില്ല. ഇന്ന് അത്യാവശ്യം വരുമാന മാര്‍ഗങ്ങളുണ്ട് എന്നതാണ് പലരെയും ഇത് നിസ്സാരവൽക്കരിച്ചത്. എന്നാൽ അറിയുക : വിശ്വാസികൾക്ക് ഇത് ഇഹലോകത്തും പരലോകത്തും നഷ്ടമാണ്.
ലോകത്ത് ഇന്നും പട്ടിണി മരണങ്ങൾ നടക്കുന്നുണ്ട്. ഒരു നേരത്തെ ഭക്ഷണത്തിന് വേണ്ടി യാചിക്കുന്ന മനുഷ്യരെ നമുക്ക് കാണാം. ഭക്ഷണത്തിനായി കരയുന്ന കുഞ്ഞുങ്ങളെ ഗസ്സയിൽ നാം കണ്ടില്ലേ? ലോകത്ത് എല്ലാവരും നമ്മെപ്പോലെ മൂന്ന് നേരവും നാല് നേരവും ഭക്ഷിക്കുന്നവരല്ല. ഒരു നേരത്തെ ഭക്ഷണം കഴിക്കുന്നവര്‍പോലും പ്രസ്തുത അനുഗ്രഹത്തിന്റെ പേരിൽ അല്ലാഹുവിന്റെ മുമ്പിൽ മറുപടി പറയേണ്ടിവരും.
ثُمَّ لَتُسْـَٔلُنَّ يَوْمَئِذٍ عَنِ ٱلنَّعِيمِ
പിന്നീട് ആ ദിവസത്തില്‍ സുഖാനുഭവങ്ങളെ പറ്റി തീര്‍ച്ചയായും നിങ്ങള്‍ ചോദ്യം ചെയ്യപ്പെടുകതന്നെ ചെയ്യും. (ഖു൪ആന്‍:102/8)
عَنْ أَبِي هُرَيْرَةَ، قَالَ خَرَجَ رَسُولُ اللَّهِ صلى الله عليه وسلم ذَاتَ يَوْمٍ أَوْ لَيْلَةٍ فَإِذَا هُوَ بِأَبِي بَكْرٍ وَعُمَرَ فَقَالَ ” مَا أَخْرَجَكُمَا مِنْ بُيُوتِكُمَا هَذِهِ السَّاعَةَ ” . قَالاَ الْجُوعُ يَا رَسُولَ اللَّهِ . قَالَ ” وَأَنَا وَالَّذِي نَفْسِي بِيَدِهِ لأَخْرَجَنِي الَّذِي أَخْرَجَكُمَا قُومُوا ” . فَقَامُوا مَعَهُ فَأَتَى رَجُلاً مِنَ الأَنْصَارِ فَإِذَا هُوَ لَيْسَ فِي بَيْتِهِ فَلَمَّا رَأَتْهُ الْمَرْأَةُ قَالَتْ مَرْحَبًا وَأَهْلاً . فَقَالَ لَهَا رَسُولُ اللَّهِ صلى الله عليه وسلم ” أَيْنَ فُلاَنٌ ” . قَالَتْ ذَهَبَ يَسْتَعْذِبُ لَنَا مِنَ الْمَاءِ . إِذْ جَاءَ الأَنْصَارِيُّ فَنَظَرَ إِلَى رَسُولِ اللَّهِ صلى الله عليه وسلم وَصَاحِبَيْهِ ثُمَّ قَالَ الْحَمْدُ لِلَّهِ مَا أَحَدٌ الْيَوْمَ أَكْرَمَ أَضْيَافًا مِنِّي – قَالَ – فَانْطَلَقَ فَجَاءَهُمْ بِعِذْقٍ فِيهِ بُسْرٌ وَتَمْرٌ وَرُطَبٌ فَقَالَ كُلُوا مِنْ هَذِهِ . وَأَخَذَ الْمُدْيَةَ فَقَالَ لَهُ رَسُولُ اللَّهِ صلى الله عليه وسلم ” إِيَّاكَ وَالْحَلُوبَ ” . فَذَبَحَ لَهُمْ فَأَكَلُوا مِنَ الشَّاةِ وَمِنْ ذَلِكَ الْعِذْقِ وَشَرِبُوا فَلَمَّا أَنْ شَبِعُوا وَرَوُوا قَالَ رَسُولُ اللَّهِ صلى الله عليه وسلم لأَبِي بَكْرٍ وَعُمَرَ ” وَالَّذِي نَفْسِي بِيَدِهِ لَتُسْأَلُنَّ عَنْ هَذَا النَّعِيمِ يَوْمَ الْقِيَامَةِ أَخْرَجَكُمْ مِنْ بُيُوتِكُمُ الْجُوعُ ثُمَّ لَمْ تَرْجِعُوا حَتَّى أَصَابَكُمْ هَذَا النَّعِيمُ ” .
അബൂഹുറൈറ رَضِيَ اللَّهُ عَنْهُ വിൽ നിന്ന് നിവേദനം: അദ്ധേഹം പറഞ്ഞു : ഒരു രാവിലെയൊ രാത്രിയോ അല്ലാഹുവിന്റെ റസൂൽ ﷺ പുറത്തിറങ്ങി, അപ്പോൾ അബൂ ബക്കറുമായും ഉമറുമായും – رضي الله عنهما – കണ്ടു മുട്ടി. അവിടുന്ന് ചോദിച്ചു : ‘ഈ സമയത്ത്‌ നിങ്ങളെ വീട്ടിൽ നിന്ന് പുറത്തിറങ്ങാൻ പ്രേരിപ്പിച്ചതെന്താണ്?’ അവർ പറഞ്ഞു : ‘വിശപ്പ്‌ കാരണമാണു അല്ലാഹുവിന്റെ റസൂലേ’ , അവിടുന്ന് പറഞ്ഞു : ‘എന്റെ ആത്മാവ്‌ ആരുടെ കയ്യിലാണോ , നിങ്ങളെ എന്താണോ പുറത്തിറങ്ങിയത്‌ അത് തന്നെയാണ് എന്നെയും പുറത്തിറക്കിയത്‌ , എഴുന്നേല്‍ക്കൂ’. അങ്ങനെ അവർ അദ്ധേഹത്തോടൊപ്പം അൻസ്വാരികളിൽ പെട്ട ഒരു വ്യക്തിയുടെ അടുത്തേക്ക്‌ പോയി , അപ്പോൾ അദ്ധേഹം വീട്ടിലില്ലായിരുന്നു. അദ്ധേഹത്തിന്റെ ഭാര്യ നബി ﷺ കണ്ടപ്പോൾ ‘നിങ്ങൾക്ക്‌ സ്വാഗതം’ എന്ന് പറഞ്ഞു. അപ്പോൾ നബി ﷺ അവരോട്‌ ‘ഇന്ന വ്യക്തി എവിടെയാണെന്ന് അന്വേഷിച്ചു’. ‘ഞങ്ങൾക്ക്‌ വേണ്ടി വെള്ളമെടുക്കാൻ പോയതാണ് എന്ന് പറഞ്ഞു , ആ സമയത്ത്‌ ആ അൻസ്വാരി തിരിച്ചു വരികയും റസൂലിനെയും സ്വഹാബികളെയും കാണുകയും ചെയ്തു. അദ്ധേഹം പറഞ്ഞു : ‘അല്ലാഹുവിനു സ്തുതി , എനിക്കിന്ന് ഉള്ളത്‌ പോലെയുള്ള ആദരണീയരായ അതിഥികളുള്ള മറ്റാരും ഇല്ല. എന്നിട്ട്‌ അദ്ധേഹം പോയി പഴുത്തതും പച്ചയും നനഞ്ഞതുമായ കുറച്ച്‌ കാരക്കയുമായി വന്നു. എന്നിട്ട്‌ അവരോട്‌ തിന്നാൻ പറഞ്ഞു. അതിനു ശേഷം (ആടിനെ അറുക്കാൻ വേണ്ടി) കത്തിയെടുത്തു , അപ്പോൾ നബി ﷺ അദ്ധേഹത്തോട്‌ പറന്നു : ‘പാൽ ചുരത്തുന്നതിനെ വിട്ടേക്കുക’. അങ്ങനെ അദ്ധേഹം അവർക്കൊരു ആടിനെ അറുക്കുകയും വയ൪ നിറയെ കഴിക്കുകയും ചെയ്തപ്പോൾ നബി ﷺ അവരോട്‌ രണ്ട് പേരോടുമായി പറഞ്ഞു : എന്റെ ആത്മാവ്‌ ആരുടെ കയ്യിലാണോ അവൻ തന്നെയാണെ സത്യം , ഈ അനുഗ്രഹത്തെ കുറിച്ച് നിങ്ങൾ അന്ത്യ നാളിൽ ചോദ്യം ചെയ്യപ്പെടുക തന്നെ ചെയ്യും , വിശപ്പ്‌ നിങ്ങളെ വീട്ടിൽ നിന്ന് പുറത്തിറക്കുകയും , ഒടുവിൽ ഈ അനുഗ്രഹം വന്നെത്തിയിട്ടല്ലാതെ നിങ്ങൾ അവിടേക്ക്‌ മടങ്ങുന്നുമില്ല. (മുസ്ലിം:2038)
എങ്കിൽ ഭക്ഷണം പാഴാക്കുന്നവരുടെ കാര്യമോ? അല്ലാഹുവിൽ അഭയം.
അതിനാൽ,
- ആവശ്യമുള്ളത്ര ഭക്ഷണം മാത്രം പാകം ചെയ്യാൻ പരിശ്രമിക്കുക.
- കറികൾ വരെ പാഴാകുന്നില്ലെന്ന് ഉറപ്പ് വരുത്തുക
- ഫ്രൂട്സുകൾ വേസ്റ്റ് ആകുന്നതിന് മുമ്പ് ഉപയോഗിച്ച് തീര്‍ക്കുക
- ബേക്കറി സാധനങ്ങളും മറ്റുമൊക്കെ Expiry date ന് മുമ്പ് ഉപയോഗിച്ച് തീര്‍ക്കുക.
- ഭക്ഷണത്തിന് ക്ഷണിക്കപ്പെട്ടാൽ, കഴിക്കാൻ കഴിയുന്നത് മാത്രം വിളമ്പി വാങ്ങുക.
www.kanzululoom.com