അല്ലാഹു പറയുന്നു:

كَيْفَ تَكْفُرُونَ بِٱللَّهِ وَكُنتُمْ أَمْوَٰتًا فَأَحْيَٰكُمْ ۖ ثُمَّ يُمِيتُكُمْ ثُمَّ يُحْيِيكُمْ ثُمَّ إِلَيْهِ تُرْجَعُونَ

നിങ്ങള്‍ക്ക് എങ്ങനെയാണ് അല്ലാഹുവിനെ നിഷേധിക്കാന്‍ കഴിയുക ? നിങ്ങള്‍ നിര്‍ജീവ വസ്തുക്കളായിരുന്ന അവസ്ഥയ്ക്ക് ശേഷം അവന്‍ നിങ്ങള്‍ക്ക് ജീവന്‍ നല്‍കി. പിന്നെ അവന്‍ നിങ്ങളെ മരിപ്പിക്കുകയും വീണ്ടും ജീവിപ്പിക്കുകയും ചെയ്യുന്നു. പിന്നീട് അവങ്കലേക്ക് തന്നെ നിങ്ങള്‍ തിരിച്ചുവിളിക്കപ്പെടുകയും ചെയ്യും. (ഖു൪ആന്‍:2/28)

قوله تعالى: {وكنتم أمواتاً}: وذلك: قبل نفخ الروح في الإنسان هو ميت؛ جماد؛ {فأحياكم} أي بنفخ الروح؛ {ثم يميتكم} ثانية؛ وذلك بعد أن يخرج إلى الدنيا؛ {ثم يحييكم} الحياة الآخرة التي لا موت بعدها؛ {ثم إليه ترجعون}: بعد الإحياء الثاني ترجعون إلى الله، فينبئكم بأعمالكم، ويجازيكم عليها ..

അല്ലാഹുവിന്റെ വചനം: {നിങ്ങൾ നിർജീവ വസ്തുക്കളായിരുന്നു}: മനുഷ്യനിൽ ആത്മാവ് ഊതപ്പെടുന്നതിന് മുമ്പ് അവൻ നിർജീവമായ, ജീവനില്ലാത്ത വസ്തുവായിരുന്നു. {അവൻ നിങ്ങൾക്ക് ജീവൻ നൽകി}: അതായത് ആത്മാവിനെ ഊതിയതിലൂടെ.{പിന്നീട് അവൻ നിങ്ങളെ മരിപ്പിക്കും}: അത് രണ്ടാമത്തെ മരണമാണ്; അതായത് മനുഷ്യൻ ഈ ദുൻയാവിലേക്ക് വന്നതിന് ശേഷം സംഭവിക്കുന്നത്. {പിന്നീട് അവൻ നിങ്ങൾക്ക് വീണ്ടും ജീവൻ നൽകും}: അതായത്, അതിനുശേഷം മരണമില്ലാത്ത പരലോക ജീവിതം {പിന്നീട് അവനിലേക്ക് തന്നെ നിങ്ങൾ മടക്കപ്പെടും}: രണ്ടാമത്തെ ജീവിപ്പിക്കലിന് ശേഷം നിങ്ങൾ അല്ലാഹുവിലേക്ക് മടക്കപ്പെടും. തുടർന്ന് അവൻ നിങ്ങളുടെ പ്രവർത്തനങ്ങളെക്കുറിച്ച് നിങ്ങളെ ബോധ്യപ്പെടുത്തുകയും അവയ്ക്ക് നിങ്ങൾക്ക് പ്രതിഫലം നൽകുകയും ചെയ്യും.

ഉയിർത്തെഴുന്നേൽപ്പ് (البعث) സത്യമാണെന്ന് ഈ ആയത്ത് സ്ഥിരീകരിക്കുന്നു. {പിന്നീട് അവൻ നിങ്ങൾക്ക് ജീവൻ നൽകും, ശേഷം അവനിലേക്ക് തന്നെ നിങ്ങൾ മടക്കപ്പെടും} എന്ന വാക്കാണ് ഇതിന് തെളിവ്. ജനങ്ങളിൽ ചിലർ ഉയിർത്തെഴുന്നേൽപ്പിനെ തള്ളിക്കളയുകയും അസാധ്യമായി കാണുകയും ചെയ്തു. അവർ ചോദിച്ചു:

مَن يُحْىِ ٱلْعِظَٰمَ وَهِىَ رَمِيمٌ

എല്ലുകള്‍ ദ്രവിച്ച് പോയിരിക്കെ ആരാണ് അവയ്ക്ക് ജീവന്‍ നല്‍കുന്നത്‌? (ഖു൪ആന്‍:36/78)

എന്നാൽ സൂറത്തു യാസീന്റെ അവസാനത്തിൽ ഇത് സാധ്യമാണെന്നതിന് അല്ലാഹു എട്ട് തെളിവുകൾ സ്ഥാപിച്ചിട്ടുണ്ട്:

ഒന്നാമത്തെ തെളിവ്: അല്ലാഹു പറയുന്നു:

قُلْ يُحْيِيهَا ٱلَّذِىٓ أَنشَأَهَآ أَوَّلَ مَرَّةٍ ۖ

പറയുക: ആദ്യതവണ അവയെ ഉണ്ടാക്കിയവനാരോ അവന്‍ തന്നെ അവയ്ക്ക് ജീവന്‍ നല്‍കുന്നതാണ്‌. (ഖു൪ആന്‍:36/79)

ദ്രവിച്ചുപോയ എല്ലുകൾക്ക് ജീവൻ നൽകാൻ സാധിക്കുമെന്നതിൻ്റെ തെളിവാണിത്. {ആദ്യതവണ അവയെ ഉണ്ടാക്കിയവൻ} എന്ന അല്ലാഹുവിൻ്റെ വാക്ക്, അതിനെ പുനഃസൃഷ്ടിക്കുക എന്നത് സാധ്യമാണ് എന്നതിനുള്ള ഖണ്ഡിതമായ തെളിവും വ്യക്തമായ പ്രമാണവുമാണ്. അല്ലാഹു പറഞ്ഞതുപോലെ:

وَهُوَ ٱلَّذِى يَبْدَؤُا۟ ٱلْخَلْقَ ثُمَّ يُعِيدُهُۥ وَهُوَ أَهْوَنُ عَلَيْهِ ۚ

അവനാകുന്നു സൃഷ്ടി ആരംഭിക്കുന്നവന്‍. പിന്നെ അവന്‍ അത് ആവര്‍ത്തിക്കുന്നു. അത് അവനെ സംബന്ധിച്ചിടത്തോളം കൂടുതല്‍ എളുപ്പമുള്ളതാകുന്നു. (ഖു൪ആന്‍:30/27)

രണ്ടാമത്തെ തെളിവ്: അല്ലാഹു പറയുന്നു:

وَهُوَ بِكُلِّ خَلْقٍ عَلِيمٌ

അവന്‍ എല്ലാതരം സൃഷ്ടിപ്പിനെപ്പറ്റിയും അറിവുള്ളവനത്രെ. (ഖു൪ആന്‍:36/79)

അതായത്: അല്ലാഹു എല്ലാ സൃഷ്ടികളെക്കുറിച്ചും കൃത്യമായി അറിയുന്നവനായിരിക്കെ, അതിനെ പുനഃസൃഷ്ടിക്കുന്നതിൽ അവൻ എങ്ങനെ അശക്തനാകും? വസ്തുക്കളെ എങ്ങനെ സൃഷ്ടിക്കണമെന്നും അവയെ എങ്ങനെ നിർമ്മിക്കണമെന്നും അവൻ അറിയുന്നു; അതിനാൽ സൃഷ്ടിയെ പുനഃസൃഷ്ടിക്കുന്നതിൽ അവൻ അശക്തനാവുകയില്ല.

മൂന്നാമത്തെ തെളിവ്: അല്ലാഹു പറയുന്നു:

ٱلَّذِى جَعَلَ لَكُم مِّنَ ٱلشَّجَرِ ٱلْأَخْضَرِ نَارًا فَإِذَآ أَنتُم مِّنْهُ تُوقِدُونَ

പച്ചമരത്തില്‍ നിന്ന് നിങ്ങള്‍ക്ക് തീ ഉണ്ടാക്കിത്തന്നവനത്രെ അവന്‍ അങ്ങനെ നിങ്ങളതാ അതില്‍ നിന്ന് കത്തിച്ചെടുക്കുന്നു. (ഖു൪ആന്‍:36/80)

പച്ചമരത്തിൽ തണുപ്പും ഈർപ്പവുമാണുള്ളത്; എന്നാൽ തീയിലാകട്ടെ ചൂടും വരൾച്ചയുമാണുള്ളത്. ചൂടുള്ളതും വരണ്ടതുമായ ഈ തീ പുറത്തുവരുന്നത് തണുപ്പും ഈർപ്പവുമുള്ള മരത്തിൽ നിന്നാണ്! മുൻകാലങ്ങളിൽ ആളുകൾ പ്രത്യേക തരം മരങ്ങളുടെ കൊമ്പുകൾ കൂട്ടിയുരയ്ക്കുമായിരുന്നു; അങ്ങനെ ഉരയ്ക്കുമ്പോൾ അതിൽ നിന്ന് തീപ്പൊരി ചിതറുകയും, പെട്ടെന്ന് തീപിടിക്കുന്ന വസ്തുക്കൾ ഉപയോഗിച്ച് അവർ തീ കത്തിക്കുകയും ചെയ്തിരുന്നു. അതുകൊണ്ടാണ് അല്ലാഹു {അങ്ങനെ നിങ്ങളതാ അതില്‍ നിന്ന് കത്തിച്ചെടുക്കുന്നു} എന്ന് ഇതിനെ ഉറപ്പിച്ചു പറഞ്ഞത്.

ഇതിലെ തെളിവ് (വ്യക്തമാക്കുന്നത്): പരസ്പര വിരുദ്ധമായ പ്രകൃതമായിരുന്നിട്ടും പച്ചമരത്തിൽ നിന്ന് ചൂടുള്ളതും വരണ്ടതുമായ തീയെ പുറത്തെടുക്കാൻ കഴിവുള്ളവന്, ദ്രവിച്ചുപോയ അസ്ഥികൾക്ക് ജീവൻ നൽകാനും കഴിവുള്ളവനാണ് എന്നതാണ്.

നാലാമത്തെ തെളിവ്: അല്ലാഹു പറയുന്നു:

أَوَلَيْسَ ٱلَّذِى خَلَقَ ٱلسَّمَٰوَٰتِ وَٱلْأَرْضَ بِقَٰدِرٍ عَلَىٰٓ أَن يَخْلُقَ مِثْلَهُم ۚ بَلَىٰ …

ആകാശങ്ങളും ഭൂമിയും സൃഷ്ടിച്ചവന്‍ അവരെപ്പോലുള്ളവരെ സൃഷ്ടിക്കാന്‍ കഴിവുള്ളവനല്ലേ? അതെ ….. (ഖു൪ആന്‍:36/81)

ഇതിലെ തെളിവ് (വ്യക്തമാക്കുന്നത്): ആകാശങ്ങളുടെയും ഭൂമിയുടെയും സൃഷ്ടിപ്പ് മനുഷ്യരുടെ സൃഷ്ടിപ്പിനേക്കാൾ വലുതാണ് എന്നതാണ്. കൂടുതൽ വലിയ കാര്യങ്ങൾ സൃഷ്ടിക്കാൻ കഴിവുള്ളവന്, അതിനേക്കാൾ ചെറിയ കാര്യങ്ങൾ സൃഷ്ടിക്കുക എന്നത് തീർച്ചയായും എളുപ്പമുള്ളതാണല്ലോ.

അഞ്ചാമത്തെ തെളിവ്: അല്ലാഹു പറയുന്നു:

…. وَهُوَ ٱلْخَلَّٰقُ ٱلْعَلِيمُ

…. അവനത്രെ സര്‍വ്വവും സൃഷ്ടിക്കുന്നവനും എല്ലാം അറിയുന്നവനും. (ഖു൪ആന്‍:36/81)

الخلاق (സൃഷ്ടിക്കുന്നവൻ) എന്നത് അവന്റെ നിത്യമായ വിശേഷണമാണ്. അവൻ നിരന്തരം സൃഷ്ടിക്കുന്നവനും, സൃഷ്ടിപ്പ് അവന്റെ നിത്യമായ വിശേഷണവുമാണെങ്കിൽ, ദ്രവിച്ചുപോയ എല്ലുകൾക്ക് ജീവൻ നൽകുന്നതിൽ അവൻ ഒരിക്കലും അശക്തനാവുകയില്ല.

ആറാമത്തെ തെളിവ്: അല്ലാഹു പറയുന്നു:

إِنَّمَآ أَمْرُهُۥٓ إِذَآ أَرَادَ شَيْـًٔا أَن يَقُولَ لَهُۥ كُن فَيَكُونُ

താന്‍ ഒരു കാര്യം ഉദ്ദേശിച്ചാല്‍ അതിനോട് ഉണ്ടാകൂ എന്ന് പറയുക മാത്രമാകുന്നു അവന്‍റെ കാര്യം. അപ്പോഴതാ അതുണ്ടാകുന്നു. (ഖു൪ആന്‍:36/82)

അവൻ ഏതൊരു കാര്യം ഉദ്ദേശിച്ചാലും – അത് എത്ര വലിയ കാര്യമായിരുന്നാലും ശരി – അതിനോട് പറയുക മാത്രമാണ് ചെയ്യുന്നത്. ഇവിടെ شَيْـًٔا (ഒരു കാര്യം) എന്നത് ചെറുതോ വലുതോ ആയ ഏതൊരു കാര്യത്തെയും (എല്ലാറ്റിനെയും) ഉദ്ദേശിച്ചുള്ളതാണ്. അല്ലാഹുവിന് ഒരു വ്യത്യാസവുമില്ലാതെ ഏത് കാര്യവും ഉദ്ദേശിച്ച മാത്രയിൽ നിമിഷനേരം കൊണ്ട് നടത്താൻ സാധിക്കും എന്നാണ് ഇതിന്റെ അർത്ഥം.

أَمْرُهُۥٓ (അവന്റെ കാര്യം) അതായത്: ആ കാര്യത്തിൽ അവന്റെ രീതി എന്തെന്നാൽ, അതിനോട് ‘ഉണ്ടാകൂ’ എന്ന് പറയുക മാത്രമാണ്; അപ്പോൾ അത് ഉണ്ടാകുന്നു.

അല്ലെങ്കിൽ أَمْرُهُۥٓ എന്നതിന് أوامر (കൽപ്പനകൾ) എന്നതിന്റെ ഏകവചനം എന്ന അർത്ഥവുമാകാം; അപ്പോൾ അർത്ഥം: അവൻ ‘ഉണ്ടാകൂ’ എന്ന് കൽപ്പിക്കുക മാത്രമാണ് ചെയ്യുന്നത്, അങ്ങനെ അവൻ അതിനെ വീണ്ടും പുനഃസൃഷ്ടിക്കുന്നു.

ഇതിലെ തെളിവ് (വ്യക്തമാക്കുന്നത്): അല്ലാഹു ഉദ്ദേശിച്ച ഒരു കാര്യവും അവന് അവന് അസാധ്യമായിരിക്കുകയില്ല എന്നതാണ്.

ഏഴാമത്തെ തെളിവ്: അല്ലാഹു പറയുന്നു:

فَسُبْحَٰنَ ٱلَّذِى بِيَدِهِۦ مَلَكُوتُ كُلِّ شَىْءٍ ……

മുഴുവന്‍ കാര്യങ്ങളുടെയും ആധിപത്യം ആരുടെ കയ്യിലാണോ അവന്‍ എത്ര പരിശുദ്ധന്‍! (ഖു൪ആന്‍:36/83)

ഓരോ വസ്തുവും അല്ലാഹുവിന്റെ ഉടമസ്ഥതയിലുള്ളതാണ്; നിലവിലുള്ളതിനെ അവൻ ഇല്ലാതാക്കുന്നു, ഇല്ലാത്തതിനെ അവൻ ഉണ്ടാക്കുകയും ചെയ്യുന്നു. കാരണം അവൻ സകല വസ്തുക്കളുടെയും രക്ഷിതാവാകുന്നു.

ഇതിലെ തെളിവ് (വ്യക്തമാക്കുന്നത്): അല്ലാഹു തന്റെ പരിശുദ്ധിയെ എടുത്തുപറഞ്ഞിരിക്കുന്നു; ദ്രവിച്ചുപോയ അസ്ഥികൾക്ക് വീണ്ടും ജീവൻ നൽകുന്നതിൽ അവൻ അശക്തനാണ് എന്നതിൽ നിന്നുള്ള അവന്റെ പരിശുദ്ധിയും ഇതിൽ ഉൾപ്പെടുന്നു.

എട്ടാമത്തെ തെളിവ്: അല്ലാഹു പറയുന്നു:

… وَإِلَيْهِ تُرْجَعُونَ

…. നിങ്ങള്‍ മടക്കപ്പെടുന്നത് ആരുടെ അടുത്തേക്കാണോ (അവന്‍ എത്ര പരിശുദ്ധന്‍) (ഖു൪ആന്‍:36/83)

ഇതിലെ തെളിവ് (വ്യക്തമാക്കുന്നത്): അല്ലാഹു ഈ സൃഷ്ടികളെ പടച്ചുണ്ടാക്കുകയും, അവരോട് കൽപ്പിക്കുകയും വിലക്കുകയും ചെയ്യുക, അവരിലേക്ക് പ്രവാചകന്മാരെ നിയോഗിക്കുക, സത്യവിശ്വാസിയും സത്യനിഷേധിയും തമ്മിൽ പോരാട്ടങ്ങൾ വരെ സംഭവിക്കുക, എന്നിട്ട് ഒടുവിൽ കാര്യങ്ങളെല്ലാം യാതൊരു ലക്ഷ്യവുമില്ലാതെ (ശൂന്യമായി) അവസാനിക്കുക എന്നത് അല്ലാഹുവിന്റെ യുക്തിക്ക് നിരക്കുന്നതല്ല എന്നതാണ്. മറിച്ച്, (മരണശേഷം അല്ലാഹുവിലേക്ക്) ഒരു മടങ്ങിപ്പോക്ക് അനിവാര്യമാണ്. ഇതൊരു യുക്തിപരമായ തെളിവാണ്.

ദ്രവിച്ച എല്ലുകൾക്ക് ജീവൻ നൽകാൻ അല്ലാഹുവിന് കഴിവുണ്ടെന്നതിലേക്ക് വിരൽ ചൂണ്ടുന്ന എട്ട് തെളിവുകളാണിവ. അല്ലാഹു ഖുർആനിലെ ഒരൊറ്റ സ്ഥലത്ത് തന്നെ (സൂറത്ത് യാസീന്റെ അവസാന ഭാഗത്ത്) ഇവയെല്ലാം ഒരുമിച്ചുകൂട്ടിയിരിക്കുന്നു. ഇതു കൂടാതെ ഖുർആനിലെ മറ്റു പല സ്ഥലങ്ങളിലും സുന്നത്തിലും ധാരാളം തെളിവുകൾ വേറെയുമുണ്ട്. (അവലംബം: كتاب تفسير العثيمين)

എങ്കിൽ, അല്ലാഹുവിന്റെ അസ്തിത്വത്തെ നിഷേധിക്കുന്ന മതനിഷേധികളും ദൈവനിഷേധികളും, അല്ലാഹുവിന് പുറമെയുള്ളവരെ ആരാധിക്കുന്ന ബഹുദൈവാരാധകരും ചിന്തിക്കുക: നിങ്ങള്‍ക്ക് എങ്ങനെയാണ് അല്ലാഹുവിനെ നിഷേധിക്കാന്‍ കഴിയുക?

അല്ലാഹു പറയുന്നു:

كَيْفَ تَكْفُرُونَ بِٱللَّهِ وَكُنتُمْ أَمْوَٰتًا فَأَحْيَٰكُمْ ۖ ثُمَّ يُمِيتُكُمْ ثُمَّ يُحْيِيكُمْ ثُمَّ إِلَيْهِ تُرْجَعُونَ

നിങ്ങള്‍ക്ക് എങ്ങനെയാണ് അല്ലാഹുവിനെ നിഷേധിക്കാന്‍ കഴിയുക? നിങ്ങള്‍ നിര്‍ജീവ വസ്തുക്കളായിരുന്ന അവസ്ഥയ്ക്ക് ശേഷം അവന്‍ നിങ്ങള്‍ക്ക് ജീവന്‍ നല്‍കി. പിന്നെ അവന്‍ നിങ്ങളെ മരിപ്പിക്കുകയും വീണ്ടും ജീവിപ്പിക്കുകയും ചെയ്യുന്നു. പിന്നീട് അവങ്കലേക്ക് തന്നെ നിങ്ങള്‍ തിരിച്ചുവിളിക്കപ്പെടുകയും ചെയ്യും. (ഖു൪ആന്‍:2/28)

ശൈഖ് നാസിര്‍ അസ്സഅദി رحمة الله പറയുന്നു: ഇത് ആശ്ചര്യം, കുറ്റപ്പെടുത്തൽ, നിഷേധിക്കൽ എന്നിവയുടെ അർത്ഥത്തിലുള്ള ഒരു ചോദ്യമാകുന്നു. അതായത്: ഇല്ലാത്തവസ്ഥയിൽ നിന്ന് നിങ്ങളെ സൃഷ്ടിക്കുകയും, വിവിധ തരത്തിലുള്ള അനുഗ്രഹങ്ങൾ നിങ്ങൾക്ക് നൽകി അനുഗ്രഹിക്കുകയും, നിങ്ങളുടെ ആയുസ്സ് പൂർത്തിയാകുമ്പോൾ നിങ്ങളെ മരിപ്പിക്കുകയും, ഖബറുകളിൽ വെച്ച് നിങ്ങൾക്ക് പ്രതിഫലം നൽകുകയും, അതിനുശേഷം ഉയിർത്തെഴുന്നേൽപ്പ വേളയിൽ നിങ്ങളെ ജീവിപ്പിക്കുകയും, പിന്നീട് അവനിലേക്ക് തന്നെ നിങ്ങളെ മടക്കപ്പെടുകയും ചെയ്യുമ്പോൾ അതിനുശേഷം അവൻ നിങ്ങൾക്ക് പൂർണ്ണമായ പ്രതിഫലം നൽകുകയും ചെയ്യുന്ന അല്ലാഹുവിൽ നിങ്ങൾ എങ്ങനെയാണ് അവിശ്വസിക്കുന്നത്?

അങ്ങനെ നിങ്ങൾ അവന്റെ നിയന്ത്രണത്തിലും, പരിപാലനത്തിലും, നന്മയിലും, അവന്റെ മതപരമായ കൽപനകൾക്ക് കീഴിലും, അതിനുശേഷം അവന്റെ പ്രതിഫല വിധിക്കളത്തിലും ആയിരിക്കെ, നിങ്ങൾക്ക് അവനിൽ അവിശ്വസിക്കാൻ യോഗ്യമാണോ?! ഇത് വലിയ അജ്ഞതയും വിഡ്ഢിത്തവും മൂഢതയുമല്ലാതെ മറ്റെന്താണ്?! മറിച്ച്, നിങ്ങൾക്ക് അനുയോജ്യമായത് അവനിൽ വിശ്വസിക്കലും, അവനെ സൂക്ഷിച്ച് ജീവിക്കലും (തഖ്‌വ പാലിക്കൽ), അവന് നന്ദി കാണിക്കലും, അവന്റെ ശിക്ഷയെ ഭയപ്പെടലും, അവന്റെ പ്രതിഫലം ആഗ്രഹിക്കലുമാണ്. (തഫ്സീറുസ്സഅ്ദി)

 

 

www.kanzululoom.com