അശ്ശഫാഅത്തുൽ കുബ്റാ

മഹ്ശറിന്റെ ഭയാനകതയിൽ പരീക്ഷണങ്ങൾ കഠിനമാവുകയും കാത്തിരിപ്പിന് ദൈർഘ്യം കൂടുകയും ചെയ്യുമ്പോൾ ആളുകൾ ഉന്നതി പദവിക്കാരെ തങ്ങളുടെ രക്ഷിതാവിങ്കൽ ശഫാഅത്ത് പറയുവാനായി അന്വേഷിക്കുകയായി; നാഥൻ വിധി തീർപ്പ് നടത്തുകയും ജനങ്ങളെ മഹ്‌ശറിൻ്റെ ഭീതിയിൽനിന്നും മൗക്വിഫിൻ്റെ ഭയാനകതയിൽനിന്നും രക്ഷപ്പെടുത്തുന്നതിന് വേണ്ടിയുമാണ് പ്രസ്ത്‌തുത ശഫാഅത്ത്.

ആദം, ഉലുൽഅസ്‌മിൽപ്പെട്ട നൂഹ്, ഇബ്റാഹീം, മൂസാ, ഈസാ عليهم السلام എന്നീ അമ്പിയാക്കളെ ഓരോരുത്തരേയും സമീപിച്ച് അവർക്ക് അല്ലാഹുവിങ്കലുള്ള ആദരവ് എണ്ണിപ്പറഞ്ഞ് ഈ ഉത്തരവാദിത്തം ഏൽക്കുവാൻ ആളുകൾ ആവശ്യപ്പെടും. അവരാകട്ടെ ഓരോരുത്തരും തൻ്റെ ശേഷക്കാരനിലേക്ക് ബാധ്യതയേൽപ്പിക്കുകയും തനിക്കുള്ള ഒഴിവ്കഴിവ് പറയുകയും ചെയ്യും. അതോടെ ആളുകൾ അന്തിമദൂതനും അശ്റഫുൽ ഖൽഖുമായ തിരുനബി ﷺയെ സമീപ്പിക്കുകയായി. തിരുനബി പൂർവ്വികരും പിൽകാലക്കാരും ഒരുപോലെ വാഴ്ത്തുന്നതായ വേദിയിൽ അഥവാ മക്വാമുൻമഹ്‌മൂദിൽ എഴുന്നേറ്റ് നിൽക്കുകയും അനുവാദം തേടുകയും ചെയ്യും. അനുവാദം നേടിയാൽ അല്ലാഹുവെ വാഴ്ത്തി പുകഴ്ത്തി അവനോട് ശഫാഅത്ത് നടത്തുകയും തിരുനബി ﷺക്ക് ഉത്തരം ലഭിക്കുകയും ചെയ്യും.

قَالَ رَسُولُ اللَّهِ صلى الله عليه وسلم ‏ “‏ أَنَا سَيِّدُ وَلَدِ آدَمَ يَوْمَ الْقِيَامَةِ وَأَوَّلُ مَنْ يَنْشَقُّ عَنْهُ الْقَبْرُ وَأَوَّلُ شَافِعٍ وَأَوَّلُ مُشَفَّعٍ ‏”‏ ‏.‏

അബൂഹുറയ്‌റ رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ ﷺ പറഞ്ഞു:അന്ത്യനാളിൽ ആദം സന്തതികളിൽ സയ്യിദ് ഞാനാകുന്നു. ആദ്യമായി ക്വബ്ർ പിളരുന്ന വ്യക്തിയും ഞാൻ ആയിരിക്കും. ഒന്നാമതായി ശഫാഅത്ത് പറയുന്നവനും ശഫാഅത്ത് സ്വീകരിക്കപ്പെടുന്നവനും ഞാൻ ആയിരിക്കും. (മുസ്‌ലിം:2278)

അശ്ശഫാഅത്തുൽ കുബ്റാ തിരുമൊഴിയിൽ

ജനങ്ങളെ മഹ്ശറിൻ്റെ ഭീതിയിൽനിന്നും മൗക്വിഫിൻ്റെ ഭയാനകതയിൽനിന്നും രക്ഷപ്പെടുത്തുന്നതിന് വേണ്ടി രക്ഷിതാവിങ്കൽ ശഫാഅത്ത് പറയുവാനായി ആളുകൾ നബിമാരെ സമീപിക്കുന്നതിനെ കുറിച്ച് ഉണർത്തിയല്ലോ. അല്ലാഹു അനുവാദമേകുമ്പോൾ തിരുനബി ﷺയാണ് പ്രസ്തുത ശഫാഅത്തിനർഹനും അതിന്റെ വക്താവും. ശഫാഅത്തിൻ്റെ വിഷയത്തിൽ ഹദീഥുകൾ ധാരാളമാണ്. അനസ് ഇബ്‌നു മാലിക് رَضِيَ اللَّهُ عَنْهُ വിൽ നിന്നും ഇമാം മുസ്‌ലിം رحمه الله റിപ്പോർട്ട് ചെയ്‌ത ഹദീഥ് താഴെ നൽകുന്നു. അല്ലാഹുവിൻ്റെ റസൂൽ പറഞ്ഞു:

إِذَا كَانَ يَوْمُ الْقِيَامَةِ مَاجَ النَّاسُ بَعْضُهُمْ إِلَى بَعْضٍ فَيَأْتُونَ آدَمَ فَيَقُولُونَ لَهُ اشْفَعْ لِذُرِّيَّتِكَ ‏.‏ فَيَقُولُ لَسْتُ لَهَا وَلَكِنْ عَلَيْكُمْ بِإِبْرَاهِيمَ – عَلَيْهِ السَّلاَمُ – فَإِنَّهُ خَلِيلُ اللَّهِ ‏.‏ فَيَأْتُونَ إِبْرَاهِيمَ فَيَقُولُ لَسْتُ لَهَا وَلَكِنْ عَلَيْكُمْ بِمُوسَى – عَلَيْهِ السَّلاَمُ – فَإِنَّهُ كَلِيمُ اللَّهِ ‏.‏ فَيُؤْتَى مُوسَى فَيَقُولُ لَسْتُ لَهَا وَلَكِنْ عَلَيْكُمْ بِعِيسَى – عَلَيْهِ السَّلاَمُ – فَإِنَّهُ رُوحُ اللَّهِ وَكَلِمَتُهُ ‏.‏ فَيُؤْتَى عِيسَى فَيَقُولُ لَسْتُ لَهَا وَلَكِنْ عَلَيْكُمْ بِمُحَمَّدٍ صلى الله عليه وسلم فَأُوتَى فَأَقُولُ أَنَا لَهَا ‏.‏ فَأَنْطَلِقُ فَأَسْتَأْذِنُ عَلَى رَبِّي فَيُؤْذَنُ لِي فَأَقُومُ بَيْنَ يَدَيْهِ فَأَحْمَدُهُ بِمَحَامِدَ لاَ أَقْدِرُ عَلَيْهِ الآنَ يُلْهِمُنِيهِ اللَّهُ ثُمَّ أَخِرُّ لَهُ سَاجِدًا فَيُقَالُ لِي يَا مُحَمَّدُ ارْفَعْ رَأْسَكَ وَقُلْ يُسْمَعْ لَكَ وَسَلْ تُعْطَهْ وَاشْفَعْ تُشَفَّعْ ….

അന്ത്യനാളായാൽ ജനങ്ങൾ ചിലർ ചിലരിലേക്ക് ചലിക്കും. അങ്ങിനെ അവർ ആദമിൻ്റെ അരികിൽ എത്തും. അവർ പറയും: താങ്കൾ, താങ്കളുടെ സന്തതികൾക്കായി ശഫാഅത്ത് പറയുക. അപ്പോൾ ആദം (വിനയത്താലും വിഷയത്തിൻ്റെ ഗൗരവത്താലും) പറയും: ഞാൻ അതിന് ആളല്ല. എന്നാൽ നിങ്ങൾ ഇബ്റാഹീമിനെ സമീപിക്കുക. കാരണം അദ്ദേഹം അല്ലാഹുവിൻ്റെ ഖലീൽ ആകുന്നു. അങ്ങിനെ അവർ ഇബ്‌റാഹീമിന് അരികിൽ എത്തും. അപ്പോൾ ഇബ്റാഹീ (വിനയത്താലും വിഷയത്തിൻ്റെ ഗൗരവത്താലും) പറയും: ഞാൻ അതിന് ആളല്ല. എന്നാൽ നിങ്ങൾ മൂസായെ സമീപിക്കുക. കാരണം അദ്ദേഹം അല്ലാഹുവിൻ്റെ കലീം ആകുന്നു. അങ്ങിനെ മൂസായുടെ അടുക്കൽ എത്തപ്പെടും. അപ്പോൾ മൂസാ (വിനയത്താലും വിഷയത്തിൻ്റെ ഗൗരവത്താലും) പറയും: ഞാൻ അതിന് ആളല്ല. എന്നാൽ നിങ്ങൾ ഈസായെ സമീപിക്കുക. കാരണം അദ്ദേഹം അല്ലാഹുവിൻ്റെ റൂഹും കലിമത്തുമാകുന്നു. അങ്ങിനെ ഈസായുടെ അടുക്കൽ എത്തപ്പെടും. ഈസാ (വിനയത്താലും വിഷയത്തിൻ്റെ ഗൗരവത്താലും) പറയും: ഞാൻ അതിന് ആളല്ല. എന്നാൽ നിങ്ങൾ മുഹമ്മദിനെ സമീപിക്കുക. അങ്ങിനെ എൻ്റെ അടുക്കൽ എത്തപ്പെടും. ഞാൻ പറയും: അതിന് ഞാൻ ഉണ്ട്. ശേഷം ഞാൻ പോകും. അങ്ങിനെ എൻ്റെ റബ്ബിനോട് അനുവാദം തേടും. അപ്പോൾ എനിക്ക് അനുവാദം നൽകപ്പെടും. ഞാൻ റബ്ബിനു മുമ്പിൽ നിൽക്കുകയും സത്യവചനങ്ങൾ കൊണ്ട് അവനെ വാഴ്ത്തുകയും ചെയ്യും. ഇപ്പോഴാണെങ്കിൽ എനിക്ക് അതിന് കഴിയുകയില്ല. (അത്രയും അന്ന് ഞാൻ അല്ലാഹുവിനെ വാഴ്ത്തും). അല്ലാഹു അതിന് എനിക്ക് ബോധനമേകും. ശേഷം ഞാൻ നമ്മുടെ രക്ഷിതാവിന് സുജൂദ് ചെയ്യുന്നവനായി വീഴും. അപ്പോൾ എന്നോട് പറയപ്പെടും: മുഹമ്മദ്, താങ്കളുടെ തല ഉയർത്തൂ. താങ്കൾ പറഞ്ഞു കൊള്ളുക. താങ്കളുടെ സംസാരം കേൾക്കപ്പെടും. താങ്കൾ ചോദിച്ചുകൊള്ളുക. താങ്കൾക്ക് നൽകപ്പെടും. താങ്കൾ ശഫാഅത്ത് പറഞ്ഞുകൊളളുക. താങ്കളുടെ ശഫാഅത്ത് സ്വീകരിക്കപ്പെടും … (മുസ്ലിം:193)

ഇത്തരുണത്തിലാണ് തിരുമേനി അശ്ശഫാഅത്തുൽ കബ്റാ നിർവ്വഹിക്കുക. മറ്റൊരു റിപ്പോർട്ടിൽ തൽവിഷയത്തിൽ ഇപ്രകാരം കാണാം:

فَيَشْفَعُ لِيُقْضَى بَيْنَ الْخَلْقِ،

അങ്ങിനെ അടിയാറുകൾക്കിടയിൽ വിധിതീർപ്പാക്കപ്പെടുന്നതിനു വേണ്ടി തിരുമേനി ശഫാഅത്ത് നടത്തും. (ബുഖാരി:1475)

ശഫാഅത്തിന്റെ ഇനങ്ങൾ

ഒന്ന്: അശ്ശഫാഅത്തുൽകുബ്റാ

ഈ ശഫാഅത്തിനെ കുറിച്ച് മുമ്പ് വിവരിച്ചു. ഇത് നമ്മുടെ നബിക്ക് മാത്രമുള്ള ശഫാഅത്താണ്.

രണ്ട്: സ്വർഗ്ഗത്തിൽ പ്രവേശിക്കുന്നവർക്ക് അതിനു വേണ്ടി മഹ്ശറിൽ വെച്ചുള്ള ശഫാഅത്ത്.

ഇതും നമ്മുടെ നബിക്ക് മാത്രമുള്ള ശഫാഅത്താണ്. ശഫാഅത്തിന്റെ വിഷയം വിവരിക്കുന്ന വിശാലമായ ഹദീഥിൽ അല്ലാഹു, തിരുമേനിയോട് കൽപ്പിക്കുന്നതായി അല്ലാഹുവിൻ്റെ റസൂൽ ﷺ തന്നെ പറയുന്നു:

يَا مُحَمَّدُ ارْفَعْ رَأْسَكَ، سَلْ تُعْطَهْ، وَاشْفَعْ تُشَفَّعْ، فَأَرْفَعُ رَأْسِي، فَأَقُولُ أُمَّتِي يَا رَبِّ، أُمَّتِي يَا رَبِّ فَيُقَالُ يَا مُحَمَّدُ أَدْخِلْ مِنْ أُمَّتِكَ مَنْ لاَ حِسَابَ عَلَيْهِمْ مِنَ الْبَابِ الأَيْمَنِ مِنْ أَبْوَابِ الْجَنَّةِ وَهُمْ شُرَكَاءُ النَّاسِ فِيمَا سِوَى ذَلِكَ مِنَ الأَبْوَابِ،

മുഹമ്മദ്, താങ്കൾ താങ്കളുടെ തലയുയർത്തുക. താങ്കൾ ചോദിക്കുക; താങ്കൾക്കത് നൽകപ്പെടും. താങ്കൾ ശഫാഅത്ത് ചെയ്യുക; താങ്കളുടെ ശഫാഅത്ത് സ്വീകരിക്കപ്പെടും.’ അപ്പോൾ ഞാൻ എൻ്റെ തല ഉയർത്തും. അങ്ങിനെ ഞാൻ പറയും: രക്ഷിതാവേ, എന്റെ ഉമ്മത്ത്. രക്ഷിതാവേ, എൻ്റെ ഉമ്മത്ത്. അപ്പോൾ പറയപ്പെടും: ‘ഓ മുഹമ്മദ്, താങ്കൾ താങ്കളുടെ ഉമ്മത്തികളിൽ ആരുടെ മേലാണോ വിചാരണയില്ലാത്തത് അവരെ സ്വർഗ്ഗ കവാടങ്ങളിൽനിന്ന് വലതുഭാഗത്തുള്ള കവാടത്തിലൂടെ പ്രവേശിപ്പിക്കുക; അവർ മറ്റു ജനവിഭാഗങ്ങളോടൊപ്പം അതൊഴികെയുള്ള ഇതര കവാടങ്ങളിൽ പങ്കാളികളുമായിരിക്കും. (ബുഖാരി:4712)

മൂന്ന്: അബൂത്വാലിബിനുള്ള ശിക്ഷ ലഘൂകരിക്കുവാനായുള്ള ശഫാഅത്ത്

ഇത് നമ്മുടെ നബി നിർവ്വഹിക്കുന്നതും അബൂത്വാലിബിന് മാത്രം ലഭിക്കുന്നതുമായ ശഫാഅത്താണ്.

അല്ലാഹുവിൻറെ റസൂൽ ﷺ പിതൃവ്യൻ അബൂത്വാലിബിനെ കുറിച്ച് പറയുന്നത് കേട്ടതായി അബൂസഈദ് അൽഖുദ്രി رضي الله عنه നിവേദനം ചെയ്യുന്നു:

‏ لَعَلَّهُ تَنْفَعُهُ شَفَاعَتِي يَوْمَ الْقِيَامَةِ فَيُجْعَلُ فِي ضَحْضَاحٍ مِنَ النَّارِ، يَبْلُغُ كَعْبَيْهِ، يَغْلِي مِنْهُ أُمُّ دِمَاغِهِ‏‏.‏

ഒരു പക്ഷേ, അന്ത്യനാളിൽ എൻ്റെ ശഫാഅത്ത് അദ്ദേഹത്തിന് ഉപകരിച്ചേക്കും. അപ്പോൾ അദ്ദേഹം നരകത്തിൽ തൻ്റെ നെരിയാണിവരെ തീ എത്തുംവിധം ആഴം കുറഞ്ഞ ഒരു സ്ഥലത്ത് പ്രവേശിപ്പിക്കപ്പെടുന്നതാണ്. അതിൽ അബൂത്വാലിബിൻ്റെ തലച്ചോർ തിളച്ചുമറിയും. (ബുഖാരി, മുസ്‌ലിം)

عن العباس : قلت: يَا رَسُولَ اللَّهِ إِنَّ أَبَا طَالِبٍ كَانَ يَحُوطُكَ وَيَنْصُرُكَ فَهَلْ نَفَعَهُ ذَلِكَ قَالَ ‏ “‏ نَعَمْ وَجَدْتُهُ فِي غَمَرَاتٍ مِنَ النَّارِ فَأَخْرَجْتُهُ إِلَى ضَحْضَاحٍ

അബ്ബാസ് رَضِيَ اللَّهُ عَنْهُ വില്‍ നിന്ന് നിവേദനം: ഞാൻ ചോദിച്ചു: അല്ലാഹുവിൻ്റെ ദൂതരേ, നിശ്ചയം അബൂത്വാലിബ് താങ്കളെ സംരക്ഷിക്കുകയും സഹായിക്കുകയും ചെയ്‌തിരുന്നുവല്ലോ? അത് അബൂത്വാലിബിന് ഉപകരിച്ചുവോ? തിരുമേനി പറഞ്ഞു: അതെ. അദ്ദേഹത്തെ ഞാൻ നരകത്തിൻ്റെ ആഴങ്ങളിൽ കണ്ടു. അപ്പോൾ ഞാൻ അദ്ദേഹത്തെ നരകത്തിൽ മുകൾപരപ്പിലേക്ക് കൊണ്ടുവന്നു. (മുസ്‌ലിം:209)

നാല്: നരകം അനിവാര്യമായിരുന്നവർക്ക് അതിൽ പ്രവേശിക്കാതിരിക്കുവാനുള്ള ശഫാഅത്ത്.

عن ابن عباس قال سمعت رسول الله صلى الله عليه وسلم يقول: مَا مِنْ رَجُلٍ مُسْلِمٍ يَمُوتُ فَيَقُومُ عَلَى جَنَازَتِهِ أَرْبَعُونَ رَجُلاً لاَ يُشْرِكُونَ بِاللَّهِ شَيْئًا إِلاَّ شَفَّعَهُمُ اللَّهُ فِيهِ

അബ്ദുല്ലാഹ് ഇബ്നു‌ അബ്ബാസ് رَضِيَ اللَّهُ عَنْهُ വില്‍ നിന്ന് നിവേദനം:. അല്ലാഹുവിൻ്റെ റസൂൽ ﷺ പറയുന്നതായി ഞാൻ കേട്ടു: ‘ഒരു മുസ്‌ലിമായ മനുഷ്യൻ മരിക്കുന്നു. അപ്പോൾ അയാളുടെ ജനാസക്കായി അല്ലാഹുവിൽ യാതൊന്നിനേയും പങ്കുചേർക്കാതെ  നാൽപത് ആളുകൾ നമസ്‌കരിക്കുന്നു; എങ്കിൽ അയാളുടെ വിഷയത്തിലുള്ള അവരുടെ ശുപാർശ അല്ലാഹു സ്വീകരിക്കുക തന്നെ ചെയ്യും. (മുസ്‌ലിം:948)

അഞ്ച്: നരകത്തിൽ പ്രവേശിപ്പിക്കപ്പെട്ടവർ അതിൽ നിന്ന് രക്ഷപ്പെടുവാൻ വേണ്ടിയുള്ള ശഫാഅത്ത്.

ഈ വിഷയത്തിൽ ധാരാളം ഹദീഥുകൾ സ്വഹീഹായി സ്ഥിരപ്പെട്ടത് കാണാം. ശഫാഅത്തിൻ്റെ വിഷയം വിവരിക്കുന്ന അനസ് ഇബ്നു‌ മാലിക് رَضِيَ اللَّهُ عَنْهُ വില്‍ നിന്നുള്ള വിശാലമായ ഹദീഥിൽ ഇപ്രകാരംകാണാം. അല്ലാഹുവിൻ്റെ റസൂൽ ﷺ പറഞ്ഞു:

فَأَرْفَعُ رَأْسِي فَأَحْمَدُ رَبِّي بِتَحْمِيدِ يُعَلِّمُنِيهِ رَبِّي ثُمَّ أَشْفَعُ فَيَحُدُّ لِي حَدًّا فَأُخْرِجُهُمْ مِنَ النَّارِ وَأُدْخِلُهُمُ الْجَنَّةَ ثُمَّ أَرْجِعُ فَأَقُولُ يَا رَبِّ مَا بَقِيَ فِي النَّارِ إِلَّا مَنْ حَبَسَهُ الْقُرْآنُ وَوَجَبَ عَلَيْهِ الْجُلُودُ قَالَ النَّبِيُّ ﷺ يَخْرُجُ مِنَ النَّارِ مَنْ قَالَ لَا إِلَهَ إِلَّا اللَّهُ. وَكَانَ فِي قَلْبِهِ مِنَ الْخَيْرِ مَا يَزِنُ شَعِيرَةً ، ثُمَّ يَخْرُجُ مِنَ النَّارِ مَنْ قَالَ لَا إِلَهَ إِلَّا اللَّهُ. وَكَانَ فِي قَلْبِهِ مِنَ الْخَيْرِ مَا يَزِنُ بُرَّةً ثُمَّ يَخْرُجُ مِنَ النَّارِ مَنْ قَالَ لَا إِلَهَ إِلَّا اللَّهُ وَكَانَ فِي قَلْبِهِ مَا يَزِنُ مِنَ الْخَيْرِ ذَرَّةٌ

….. അപ്പോൾ ഞാൻ എൻ്റെ തല ഉയർത്തും. എൻ്റെ രക്ഷിതാവ് എന്നെ പഠിപ്പിക്കുന്ന ഹംദുകൊണ്ട് ഞാൻ രക്ഷിതാവിനെ സ്‌തുതിക്കും. ശേഷം ഞാൻ ശഫാഅത്ത് നടത്തും. അപ്പോൾ എനിക്ക് ഒരു പരിധി നിശ്ചയിച്ചുതരും. അങ്ങിനെ ഞാൻ അവരെ നരകത്തിൽനിന്ന് പുറത്ത് കൊണ്ടുവരികയും സ്വർഗ്ഗത്തിൽ പ്രവേശിക്കുകയും ചെയ്യും. ശേഷം ഞാൻ മടങ്ങും. എന്നിട്ട് പറയും: രക്ഷിതാവേ ഖുർആൻ തടയുകയും നരകത്തിൽ നിത്യവാസം നിർബന്ധമാവുകയും ചെയ്‌തവരല്ലാതെ (നരകത്തിൽ നിത്യവാസി കളാണെന്ന് ഖുർആൻ പറഞ്ഞവരല്ലാതെ) നരകത്തിൽ ശേഷിക്കുന്നില്ല. നബി പറഞ്ഞു: ഒരാളുടെ ഹൃദയത്തിൽ ഒരു യവത്തിൻ തൂക്കം നന്മ ഉണ്ടായിരിക്കേ അയാൾ ലാ ഇലാഹ ഇല്ലല്ലാഹ് പറഞ്ഞാൽ അയാൾ നരകത്തിൽനിന്ന് പുറത്തുകടക്കും. പിന്നീട് ഹൃദയത്തിൽ ഒരു ഗോതമ്പിൻ്റെ തൂക്കം നന്മ ഉണ്ടായിരിക്കേ അയാൾ ലാ ഇലാഹ ഇല്ലല്ലാഹ് പറഞ്ഞാൽ അയാൾ നരകത്തിൽ നിന്ന് പുറത്തുകടക്കും. പിന്നീട് ഹൃദയത്തിൽ ഒരു പരമാണുവിൻ തൂക്കം നന്മ ഉണ്ടായിരിക്കേ ഒരാൾ ലാ ഇലാഹ ഇല്ലല്ലാഹ് പറഞ്ഞാൽ അയാൾ നരകത്തിൽനിന്ന് പുറത്തുകടക്കും. (മുസ്‌ലിം)

ആറ്: സ്വർഗ്ഗത്തിൽ പ്രവേശിപ്പിക്കപ്പെട്ടവർക്ക് പദവി ഉയരുവാനും കൂലി വർദ്ധിക്കുവാനുമുളള ശഫാഅത്ത്

അല്ലാഹുവിൻ്റെ റസൂൽ ﷺ അബൂസലമ رضي الله عنه വിന് വേണ്ടി അദ്ദേഹത്തിൻറെ മരണവേളയിൽ ദുആചെയ്യുന്നതായി കേട്ടത് ഉമ്മുസലമ رضي الله عنها ഇപ്രകാരം നിവേദനം ചെയ്യുന്നു:

اللَّهُمَّ اغْفِرْ لِأَبِي سَلَمَةَ وَارْفَعْ دَرَجَتَهُ فِي الْمَهْدِيِّينَ

അല്ലാഹുവേ, അബൂസലമക്ക് നീ പൊറുക്കേണമേ. സന്മാർഗ്ഗചാരികളിൽ അദ്ദേഹത്തിൻ്റെ പദവി നീ ഉയർത്തേണമേ… (മുസ്‌ലിം)

ശഫാഅത്തും നിബന്ധനകളും

ശഫാഅത്തിന്റെ യഥാർത്ഥ പരമാധികാരം അല്ലാഹുവിന് മാത്രമാണ്. അതായത്, ആരൊക്കെയാണ് ശഫാഅത്ത് ചെയ്യേണ്ടതെന്നും ആർക്കൊക്കെയാണ് ശഫാഅത്ത്’ ഉപകാരപ്പെടുകയെന്നും ആത്യന്തികമായി തീരുമാനിക്കുന്നത് അല്ലാഹു മാത്രമാണെന്ന് ചുരുക്കം. അല്ലാഹു പറഞ്ഞു:

قُل لِّلَّهِ ٱلشَّفَٰعَةُ جَمِيعًا ۖ لَّهُۥ مُلْكُ ٱلسَّمَٰوَٰتِ وَٱلْأَرْضِ ۖ ثُمَّ إِلَيْهِ تُرْجَعُونَ

പറയുക: അല്ലാഹുവിനാകുന്നു ശുപാര്‍ശ മുഴുവന്‍ (അവന്റെ ഹിതമനുസരിച്ചേ അത് നടക്കൂ). അവനാകുന്നു ആകാശങ്ങളുടെയും, ഭൂമിയുടെയും ആധിപത്യം. പിന്നീട് അവങ്കലേക്ക് തന്നെയാകുന്നു നിങ്ങള്‍ മടക്കപ്പെടുന്നത്‌. (ഖുർആൻ:39/44)

ഏതാനും നിബന്ധനകൾക്ക് വിധേയമായാണ് ശഫാഅത്തെന്ന് വിശുദ്ധ ഖുർആനിൽനിന്നും തിരുസുന്നത്തിൽനിന്നും വ്യക്തമാകുന്നുണ്ട്.

ഒന്ന്: ശഫാഅത്ത് ചെയ്യുന്നവർക്ക് ശഫാഅത്ത് ചെയ്യുവാൻ അല്ലാഹുവിൻ്റെ അനുമതിയുമുണ്ടായിരിക്കണം.

لَّهُۥ مَا فِى ٱلسَّمَٰوَٰتِ وَمَا فِى ٱلْأَرْضِ ۗ مَن ذَا ٱلَّذِى يَشْفَعُ عِندَهُۥٓ إِلَّا بِإِذْنِهِۦ ۚ يَعْلَمُ مَا بَيْنَ أَيْدِيهِمْ وَمَا خَلْفَهُمْ ۖ

അല്ലാഹുവിന്റേത് മാത്രമാണ് ആകാശഭൂമികളിലുള്ളതെല്ലാം. അവന്റെ അനുവാദപ്രകാരമല്ലാതെ അവന്‍റെയടുക്കല്‍ ശുപാര്‍ശ നടത്താനാരുണ്ട്? അവരുടെ മുമ്പിലുള്ളതും അവര്‍ക്ക് പിന്നിലുള്ളതും അവന്‍ അറിയുന്നു. (ഖുർആൻ:2/255)

രണ്ട്: ശഫാഅത്ത് ലഭിക്കേണ്ടവൻ അല്ലാഹു തൃപ്‌തിപ്പെട്ട വാക്കുകളുടേയും കർമ്മങ്ങളുടേയും ഉടമയായിരിക്കണം.

يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلَا يَشْفَعُونَ إِلَّا لِمَنِ ٱرْتَضَىٰ وَهُم مِّنْ خَشْيَتِهِۦ مُشْفِقُونَ

അവരുടെ മുമ്പിലുള്ളതും പിന്നിലുള്ളതും അവന്‍ അറിയുന്നു. അവന്‍ തൃപ്തിപ്പെട്ടവര്‍ക്കല്ലാതെ അവര്‍ ശുപാര്‍ശ ചെയ്യുകയില്ല. അവരാകട്ടെ, അവനെപ്പറ്റിയുള്ള ഭയത്താല്‍ നടുങ്ങുന്നവരാകുന്നു. (ഖുർആൻ:21/28)

ﻳَﻮْﻣَﺌِﺬٍ ﻻَّ ﺗَﻨﻔَﻊُ ٱﻟﺸَّﻔَٰﻌَﺔُ ﺇِﻻَّ ﻣَﻦْ ﺃَﺫِﻥَ ﻟَﻪُ ٱﻟﺮَّﺣْﻤَٰﻦُ ﻭَﺭَﺿِﻰَ ﻟَﻪُۥ ﻗَﻮْﻻً

അന്നേ ദിവസം പരമകാരുണികന്‍ ആരുടെ കാര്യത്തില്‍ അനുമതി നല്‍കുകയും ആരുടെ വാക്ക് തൃപ്തിപ്പെടുകയും ചെയ്തിരിക്കുന്നുവോ അവനല്ലാതെ ശുപാര്‍ശ പ്രയോജനപ്പെടുകയില്ല.(ഖു൪ആന്‍:20/109)

وَكَم مِّن مَّلَكٍ فِى ٱلسَّمَٰوَٰتِ لَا تُغْنِى شَفَٰعَتُهُمْ شَيْـًٔا إِلَّا مِنۢ بَعْدِ أَن يَأْذَنَ ٱللَّهُ لِمَن يَشَآءُ وَيَرْضَىٰٓ

ആകാശങ്ങളില്‍ എത്ര മലക്കുകളാണുള്ളത്‌. അവരുടെ ശുപാര്‍ശ യാതൊരു പ്രയോജനവും ചെയ്യുകയില്ല; അല്ലാഹു അവന്‍ ഉദ്ദേശിക്കുകയും തൃപ്തിപ്പെടുകയും ചെയ്യുന്നവര്‍ക്ക് (ശുപാര്‍ശയ്ക്ക്‌) അനുവാദം നല്‍കിയതിന്റെ ശേഷമല്ലാതെ. (ഖു൪ആന്‍:53/26)

ശഫാഅത്തിന്റെ യഥാർത്ഥ പരമാധികാരം അല്ലാഹുവിന് മാത്രമാണെന്നതും ശഫാഅത്ത് ചെയ്യുന്നവർ ശഫാഅത്ത് ചെയ്യണമെങ്കിൽ അവൻ്റെ അനുമതി ഉണ്ടായിരിക്കണമെന്നതും ശഫാഅത്ത് ലഭിക്കേണ്ടവൻ അല്ലാഹു തൃപ്‌തിപ്പെട്ട വാക്കുകളുടേയും കർമ്മങ്ങളുടേയും ഉടമയായിരിക്കണമെന്നതും വ്യക്തമായിരിക്കെ ശഫാഅത്തിന് തേടേണ്ടതും ചോദിക്കേണ്ടതും അല്ലാഹുവിനോട് മാത്രമാണെന്നതിൽ യാതൊരു വിശ്വാസിയും സംശയിക്കുകയില്ലല്ലോ?

ശഫാഅത്ത് ചെയ്യുന്നവർ എത്ര മഹത്വമുള്ളവരായാലും ശഫാഅത്ത് ലഭിക്കേണ്ടവർ അല്ലാഹു തൃപ്‌തിപ്പെട്ട വാക്കുകളുടേയും കർമ്മങ്ങളുടേയും ഉടമകളായില്ലെങ്കിൽ ശഫാഅത്ത് ഫലം ചെയ്യില്ലെന്നതിന് തെളിവാണ് അന്ത്യനാളിൽ ഖലീലുല്ലാഹി ഇബ്റാഹീം عليه السلام പിതാവ് ആസറിന് വേണ്ടി നിർവ്വഹിക്കുന്നതായ ശഫാഅത്ത്.

عَنْ أَبِي هُرَيْرَةَ ـ رضى الله عنه ـ عَنِ النَّبِيِّ صلى الله عليه وسلم قَالَ ‏ “‏ يَلْقَى إِبْرَاهِيمُ أَبَاهُ آزَرَ يَوْمَ الْقِيَامَةِ، وَعَلَى وَجْهِ آزَرَ قَتَرَةٌ وَغَبَرَةٌ، فَيَقُولُ لَهُ إِبْرَاهِيمُ أَلَمْ أَقُلْ لَكَ لاَ تَعْصِنِي فَيَقُولُ أَبُوهُ فَالْيَوْمَ لاَ أَعْصِيكَ‏.‏ فَيَقُولُ إِبْرَاهِيمُ يَا رَبِّ، إِنَّكَ وَعَدْتَنِي أَنْ لاَ تُخْزِيَنِي يَوْمَ يُبْعَثُونَ، فَأَىُّ خِزْىٍ أَخْزَى مِنْ أَبِي الأَبْعَدِ فَيَقُولُ اللَّهُ تَعَالَى إِنِّي حَرَّمْتُ الْجَنَّةَ عَلَى الْكَافِرِينَ، ثُمَّ يُقَالُ يَا إِبْرَاهِيمُ مَا تَحْتَ رِجْلَيْكَ فَيَنْظُرُ فَإِذَا هُوَ بِذِيخٍ مُلْتَطِخٍ، فَيُؤْخَذُ بِقَوَائِمِهِ فَيُلْقَى فِي النَّارِ ‏”‏‏.‏

അബൂഹുറൈറ رَضِيَ اللَّهُ عَنْهُ വിൽ നിന്ന് നിവേദനം :അല്ലാഹുവിൻ്റെ റസൂൽ ﷺ പറഞ്ഞു: ഇബ്റാഹീം തൻ്റെ പിതാവ് ആസറിനെ അന്ത്യനാളിൽ കണ്ടുമുട്ടും. ആസറിൻ്റെ മുഖത്ത് കൂരിരുട്ടും പൊടിയുമുണ്ട്. അപ്പോൾ അദ്ദേഹത്തോട് ഇബ്‌റാഹീം عليه السلام പറയും: ഞാൻ താങ്കളോട് എന്നെ ധിക്കരിക്കരുത് എന്ന് പറഞ്ഞിട്ടില്ലായിരുന്നോ? അപ്പോൾ അദ്ദേഹത്തിൻ്റെ പിതാവ് പറയും: ഇന്നേ ദിനം ഞാൻ നിന്നെ ധിക്കരിക്കുകയില്ല. അപ്പോൾ ഇബ്റാഹീം عليه السلام പറയും: എൻ്റെ രക്ഷിതാവേ, നിശ്ചയം ആളുകൾ ഉയിർത്തെഴുന്നേൽപ്പിക്കപ്പെടുന്ന ദിനം എന്നെ അപമാനിക്കുകയില്ലെന്ന് നീ എനിക്ക് കരാർ നൽകിയിട്ടുണ്ടല്ലോ? (നിൻ്റെ കാരുണ്യത്തിൽനിന്ന്) ഏറ്റം വിദൂരനായ എന്റെ പിതാവിനാലുണ്ടാകുന്ന അപമാനത്തേക്കാൾ വലിയ അപമാനം ഏതാണ്? അപ്പോൾ അല്ലാഹു പറയും: നിശ്ചയം, ഞാൻ സ്വർഗ്ഗത്തെ കാഫിരീങ്ങൾക്ക് ഹറാമാക്കിയിരിക്കുന്നു. ശേഷം പറയപ്പെടും: ഇബ്റാഹീം, താങ്കളുടെ ഇരുകാലുകൾക്കടിയിൽ എന്താണ്? അപ്പോൾ അദ്ദേഹം നോക്കും. അപ്പോഴതാ ആസർ ചെളിയിൽ പുരണ്ട ഒരു കഴുതപ്പുലിയായിരിക്കുന്നു. അങ്ങിനെ അതിൻ്റെ കൈകാലുകൾ പിടിക്കപ്പെടുകയും നരകത്തിൽ എറിയപ്പെടുകയും ചെയ്യും. (ബുഖാരി: 3350)

ശഫാഅത്തിന് അനുമതി നൽകപ്പെടുന്നവർ

തിരുനബി

അല്ലാഹു എല്ലാ നബിമാർക്കും ദുൻയാവിൽവെച്ച് ഉത്തരം നൽകപ്പെടുന്ന ഒരു ദുആ നൽകി. എല്ലാ നബിമാരും അവരുടെ ആ ദുആയിൽ ധൃതികാണിക്കുകയും അവർ ദുനിയാവിൽ തന്നെ അതുകൊണ്ട് ദുആ ചെയ്യുകയും ചെയ്തു. എന്നാൽ തിരുനബി മുഹമ്മദ് ﷺ തൻ്റെ ദുആ പരലോകത്ത് തൻ്റെ ഉമ്മത്തികൾക്ക് ശഫാഅത്തിനുവേണ്ടി സൂക്ഷിച്ചുവെച്ചു.

عَنْ أَنَسَ بْنَ مَالِكٍ ـ رضى الله عنه ـ أَنَّ نَبِيَّ اللَّهِ صلى الله عليه وسلم قَالَ ‏ “‏ لِكُلِّ نَبِيٍّ دَعْوَةٌ دَعَاهَا لأُمَّتِهِ وَإِنِّي اخْتَبَأْتُ دَعْوَتِي شَفَاعَةً لأُمَّتِي يَوْمَ الْقِيَامَةِ ‏”‏ ‏.‏

അനസ് ഇബ്നു മാലിക് رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിൻ്റെ റസൂൽ ﷺപറഞ്ഞു: എല്ലാ നബിമാർക്കും ഒരു ദുആയുണ്ട്. ഓരോ നബിയും തൻ്റെ ഉമ്മത്തിനായി അതുകൊണ്ട് ദുആ ചെയ്‌തു. തീർച്ചയായും എൻ്റെ ദുആ ഞാൻ എൻ്റെ ഉമ്മത്തികൾക്ക് അന്ത്യനാളിൽ ശഫാഅത്തിനുവേണ്ടി സൂക്ഷിച്ചുവെച്ചു. (മുസ്‌ലിം:200)

عَنْ جَابِرِ بْنِ عَبْدِ اللَّهِ، قَالَ قَالَ رَسُولُ اللَّهِ صلى الله عليه وسلم : ‏ لِكُلِّ نَبِيٍّ دَعْوَةٌ قَدْ دَعَا بِهَا فِي أُمَّتِهِ وَخَبَأْتُ دَعْوَتِي شَفَاعَةً لأُمَّتِي يَوْمَ الْقِيَامَةِ ‏”‏ ‏.‏

ജാബിർ ഇബ്നു അബ്ജില്ല رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ ﷺ പറഞ്ഞു: എല്ലാ നബിമാർക്കും ഒരു ദുആയുണ്ട്. നിശ്ചയം, ഓരോ നബിയും തന്റെ ഉമ്മത്തിൻ്റെ കാര്യത്തിൽ അതുകൊണ്ട് ദുആ ചെയ്‌തു. ഞാൻ എൻ്റെ ദുആ എൻ്റെ ഉമ്മത്തികൾക്ക് അന്ത്യനാളിൽ ശഫാഅത്തിനു വേണ്ടി സൂക്ഷിച്ചുവെച്ചു. (മുസ്‌ലിം:201)

മലക്കുകൾ, നബിമാർ, ശുഹദാക്കൾ

عن أَبَي بَكْرَةَ عَنِ النَّبِىِّ –صلى الله عليه وسلم- قَالَ : يُحْمَلُ النَّاسُ عَلَى الصِّرَاطِ يَوْمَ الْقِيَامَةِ، فَتَقَادَعُ بِهِمْ جَنَبَتَا ‌الصِّرَاطِ ‌تَقَادُعَ ‌الْفَرَاشِ فِي النَّارِ “، قَالَ: ” فَيُنْجِي اللهُ بِرَحْمَتِهِ مَنْ يَشَاءُ “، قَالَ: ” ثُمَّ يُؤْذَنُ لِلْمَلَائِكَةِ وَالنَّبِيِّينَ وَالشُّهَدَاءِ أَنْ يَشْفَعُوا فَيَشْفَعُونَ، وَيُخْرِجُونَ وَيَشْفَعُونَ، وَيُخْرِجُونَ وَيَشْفَعُونَ، وَيُخْرِجُونَ “، وَزَادَ عَفَّانُ مَرَّةً فَقَالَ أَيْضًا: ” وَيَشْفَعُونَ وَيُخْرِجُونَ مَنْ كَانَ فِي قَلْبِهِ مَا يَزِنُ ذَرَّةً مِنْ إِيمَانٍ “،

അബൂബക്റ رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിൻ്റെ റസൂൽ ﷺപറഞ്ഞു: അന്ത്യനാളിൽ ജനങ്ങൾ സ്വിറാത്ത്വിന്മേൽ കയറ്റപ്പെടും. അപ്പോൾ പാറ്റകൾ തീയിൽ മേൽക്കുമേൽ വീഴുന്നതുപോലെ സ്വിറാത്ത്വിൻ്റെ പാർശ്വം അവരെ ചിലർ ചിലർക്കുമേലായി നരകത്തിൽ വീഴ്ത്തും. അന്നേരം അല്ലാഹു തൻ്റെ കാരുണ്യത്താൽ താനുദ്ദേശിക്കുന്നവരെ രക്ഷപ്പെടുത്തും. ശേഷം മലക്കുകൾക്കും നബിമാർക്കും ശുഹദാക്കൾക്കും ശഫാഅത്തിന് അനുമതി നൽകും, അപ്പോൾ അവർ ശഫാഅത്ത് ചെയ്യുകയും ചിലരെ നരകത്തിൽ നിന്ന് പുറത്ത് കൊണ്ടുവരികയും ചെയ്യും. (വീണ്ടും)അവർ ശഫാഅത്ത് ചെയ്യുകയും പുറത്ത് കൊണ്ടുവരികയും ചെയ്യും. (വീണ്ടും) അവർ ശഫാഅത്ത് ചെയ്യുകയും പുറത്ത് കൊണ്ടുവരികയും ചെയ്യും. (അഫ്‌ഫാൻ ഒരു തവണ കൂടി വർദ്ധിപ്പിച്ചുകൊണ്ട് പറഞ്ഞു) അവർ ശഫാഅത്ത് ചെയ്യുകയും തൻറെ ക്വൽബിൽ പരമാണുവിൻ്റെ തൂക്കം വരുന്ന ഈമാൻ ഉള്ളവരെയെല്ലാം (നരകത്തിൽനിന്ന്) അവർ പുറത്ത് കൊണ്ടുവരികയും ചെയ്യും. (അഹ്മദ്)

ശഹീദ് (പുണ്യയുദ്ധത്തിൽ രക്തസാക്ഷിത്വം വഹിച്ച വിശ്വാസി) ശഫാഅത്ത് നടത്തുന്ന വിഷയത്തിൽ മറ്റൊരു ഹദീഥ് ഇപ്രകാരമുണ്ട്. അല്ലാഹുവിൻ്റെ റസൂൽ ﷺ പറഞ്ഞു:

لِلشَّهِيدِ عِنْدَ اللَّهِ سِتُّ خِصَالٍ : …. وَيُشَفَّعُ فِي سَبْعِينَ مِنْ أَقَارِبِهِ

രക്തസാക്ഷിക്ക് അല്ലാഹുവിൻ്റെ അടുത്ത് ആറ് കാര്യങ്ങളുണ്ട് …അയാളുടെ ബന്ധുക്കളിൽ എഴുപത് പേരുടെ കാര്യത്തിൽ അയാളുടെ ശഫാഅത്ത് സ്വീകരിക്കപ്പെടും. (തിര്‍മിദി:1663)

മലക്കുകൾ, നബിമാർ, വിശ്വാസികൾ

അബൂസഈദ് رَضِيَ اللَّهُ عَنْهُ വിൽ നിന്ന് നിവേദനം :അല്ലാഹുവിൻ്റെ റസൂൽ ﷺ പറഞ്ഞു:

فَيَشْفَعُ النَّبِيُّونَ وَالْمَلاَئِكَةُ وَالْمُؤْمِنُونَ فَيَقُولُ الْجَبَّارُ بَقِيَتْ شَفَاعَتِي‏.‏

……ശേഷം നബിമാരും മലക്കുകളും വിശ്വാസികളും ശഫാഅത്ത് ചെയ്യും. അപ്പോൾ ജബ്ബാറായ അല്ലാഹു പറയും: എന്റെ ശഫാ അത്ത് ശേഷിക്കുന്നു ….. (ബുഖാരി:7439)

മുഅ്‌മിനീങ്ങളിൽ ചിലരുടെ ശഫാഅത്തിനെ പ്രത്യേകമാക്കി പറഞ്ഞ ഏതാനും ഹദീഥുകൾ ഉണ്ട്.

عَنْ عَبْدِ اللَّهِ بْنِ عَبَّاسٍ،قَالَ فَإِنِّي سَمِعْتُ رَسُولَ اللَّهِ صلى الله عليه وسلم يَقُولُ : مَا مِنْ رَجُلٍ مُسْلِمٍ يَمُوتُ فَيَقُومُ عَلَى جَنَازَتِهِ أَرْبَعُونَ رَجُلاً لاَ يُشْرِكُونَ بِاللَّهِ شَيْئًا إِلاَّ شَفَّعَهُمُ اللَّهُ فِيهِ

അബ്ദുല്ലാഹ് ഇബ്നു‌ അബ്ബാസ് رَضِيَ اللَّهُ عَنْهُ പറയുന്നു. അല്ലാഹുവിൻ്റെ റസൂൽ ﷺ പറയുന്നതായി ഞാൻ കേട്ടു: ഒരു മുസ്‌ലിമായ മനുഷ്യൻ മരിക്കുന്നു. അപ്പോൾ അയാളുടെ ജനാസക്കായി അല്ലാഹുവിൽ യാതൊന്നിനേയും പങ്കുചേർക്കാത്ത നാൽപത് ആളുകൾ നമസ്‌കരിക്കുന്നു; എങ്കിൽ അയാളുടെ വിഷയത്തിലുള്ള അവരുടെ ശുപാർശ അല്ലാഹു സ്വീകരിക്കുക തന്നെ ചെയ്യും. (മുസ്‌ലിം:948)

അബ്ദുല്ലാഹ് ഇബ്നു അബീജദ്ആഇൽനിന്ന് നിവേദനം. അല്ലാഹുവിൻ്റെ റസൂൽ പറഞ്ഞു:

يَدْخُلُ الْجَنَّةَ بِشَفَاعَةِ رَجُلٍ مِنْ أُمَّتِي أَكْثَرُ مِنْ بَنِي تَمِيمٍ ‏”‏ ‏.‏ قِيلَ يَا رَسُولَ اللَّهِ سِوَاكَ قَالَ ‏”‏ سِوَاىَ ‏”‏ ‏.‏

എൻ്റെ ഉമ്മത്തികളിൽ ഒരാളുടെ ശഫാഅത്ത് കൊണ്ട് ബനൂ തമീം ഗോത്രക്കാരെക്കാൾ കൂടുതൽ ആളുകൾ സ്വർഗ്ഗത്തിൽ പ്രവേശിക്കും. പറയപ്പെട്ടു. അല്ലാഹുവിൻ്റെ തിരുദൂതരേ, താങ്കളെല്ലാത്ത വ്യക്തിയാണോ (ആ ശുപാർശകൻ)? തിരുമേനി പറഞ്ഞു: ഞാനല്ലാത്ത വ്യക്തിയാണ്. (തിര്‍മിദി)

അല്ലാഹു ശഫാഅത്ത് നടത്തുവാൻ സമ്മതം നിഷേധിക്കുന്ന മുസ്‌ലിംകളും അന്ത്യനാളിലുണ്ട്.

عَنْ أَبِي الدَّرْدَاءِ، سَمِعْتُ رَسُولَ اللَّهِ صلى الله عليه وسلم يَقُولُ ‏ “‏ إِنَّ اللَّعَّانِينَ لاَ يَكُونُونَ شُهَدَاءَ وَلاَ شُفَعَاءَ يَوْمَ الْقِيَامَةِ ‏”‏ ‏

അബുദ്ദർദാഅ് رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ പറഞ്ഞു: നിശ്ചയം, വല്ലാതെ ശപിക്കുന്നവർ അന്ത്യനാളിൽ സാക്ഷികളോ ശഫാഅത്ത് ചെയ്യുന്നവരോ ആവുകയില്ല. (മുസ്‌ലിം:2598)

കുട്ടികൾ

عَنْ أَبِي هُرَيْرَةَ، عَنِ النَّبِيِّ صلى الله عليه وسلم قَالَ ‏”‏ مَا مِنْ مُسْلِمَيْنِ يَمُوتُ بَيْنَهُمَا ثَلاَثَةُ أَوْلاَدٍ لَمْ يَبْلُغُوا الْحِنْثَ إِلاَّ أَدْخَلَهُمَا اللَّهُ بِفَضْلِ رَحْمَتِهِ إِيَّاهُمُ الْجَنَّةَ ‏”‏ ‏.‏ قَالَ ‏”‏ يُقَالُ لَهُمُ ادْخُلُوا الْجَنَّةَ فَيَقُولُونَ حَتَّى يَدْخُلَ آبَاؤُنَا فَيُقَالُ ادْخُلُوا الْجَنَّةَ أَنْتُمْ وَآبَاؤُكُمْ ‏”‏ ‏.‏

അബൂഹുറയ്‌റ رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ ﷺ പറഞ്ഞു: മുസ്‌ലിംകളായ മാതാപിതാക്കൾക്കിടയിൽ (അവരുടെ)കുട്ടികളിൽ നിന്ന് പ്രായപൂർത്തിയെത്തിയിട്ടില്ലാത്ത മൂന്നുപേർ മരണപ്പെടുന്നുവെങ്കിൽ അല്ലാഹു അവരോടുള്ള അവൻ്റെ കാരുണ്യത്തിന്റെ മഹത്വംകൊണ്ട്’ അവർ രണ്ടുപേരേയും സ്വർഗ്ഗത്തിൽ പ്രവേശിപ്പിക്കുകതന്നെ ചെയ്യും. തിരുമേനി പറഞ്ഞു: അവരോട്’ പറയപ്പെടും: നിങ്ങൾ സ്വർഗ്ഗത്തിൽ പ്രവേശിക്കുക. അപ്പോൾ അവർ പറയും: ഞങ്ങളുടെ മാതാപിതാക്കൾ പ്രവേശിക്കുന്നതുവരെ (ഞങ്ങൾ പ്രവേശിക്കുകയില്ല.) അപ്പോൾ പറയപ്പെടും: നിങ്ങളും നിങ്ങളുടെ മാതാപിതാക്കളും സ്വർഗ്ഗത്തിൽ പ്രവേശിക്കുക. (നസാഇ:1876)

അബൂഹുറയ്‌റ رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ ﷺ പറഞ്ഞു:

صِغَارُهُمْ دَعَامِيصُ الْجَنَّةِ يَتَلَقَّى أَحَدُهُمْ أَبَاهُ – أَوْ قَالَ أَبَوَيْهِ – فَيَأْخُذُ بِثَوْبِهِ – أَوْ قَالَ بِيَدِهِ – كَمَا آخُذُ أَنَا بِصَنِفَةِ ثَوْبِكَ هَذَا فَلاَ يَتَنَاهَى – أَوْ قَالَ فَلاَ يَنْتَهِي – حَتَّى يُدْخِلَهُ اللَّهُ وَأَبَاهُ الْجَنَّةَ ‏”‏ ‏.‏

അവരുടെ കുരുന്നുകൾ സ്വർഗ്ഗത്തിലെ സ്വീകരണക്കാരും യഥേഷ്ടം എല്ലായിടത്തും കയറിയിറങ്ങുന്നവരുമായിരിക്കും. അവരിലൊരാൾ തൻ്റെ പിതാവിനേയോ അല്ലെങ്കിൽ (തിരുമേനി പറഞ്ഞു) മാതാപിതാക്കളേയോ കണ്ടാൽ അദ്ദേഹത്തിൻ്റെ വസ്ത്രത്തിൽ പിടിക്കും. അല്ലെങ്കിൽ (തിരുമേനി പറഞ്ഞു) അദ്ദേഹത്തിൻറെ കയ്യിൽ പിടിക്കും. ഞാൻ (ഇപ്പോൾ) താങ്കളുടെ വസ്ത്രത്തിൻ്റെ അറ്റത്ത് പിടിക്കുന്നതു പോലെ. അല്ലാഹു അവനേയും പിതാവിനേയും സ്വർഗ്ഗത്തിൽ പ്രവേശിപ്പിക്കാതെ അവൻ പിന്മാറുകയില്ല അ ല്ലെങ്കിൽ (തിരുമേനി പറഞ്ഞു) അവൻ വിരമിക്കുകയില്ല. (മുസ്‌ലിം:2635)

വിശുദ്ധ ഖുർആൻ

عَنْ أَبِي أُمَامَةَ الْبَاهِلِيِّ، قَالَ سَمِعْتُ رَسُولَ اللَّهِ صلى الله عليه وسلم يَقُولُ ‏ “‏ اقْرَءُوا الْقُرْآنَ فَإِنَّهُ يَأْتِي يَوْمَ الْقِيَامَةِ شَفِيعًا لأَصْحَابِهِ

അബീഉമാമത് അൽബാഹിലി رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ ﷺ പറയുന്നതു ഞാൻ കേട്ടു: നിങ്ങൾ ഖുർആൻ പരായണം ചെയ്യുക. കാരണം അത് അന്ത്യനാളിൽ അതിന്റെ ആളുകൾക്ക് ശുപാർശകനായിവരും. .. (മുസ്‌ലിം:804)

عن عبد الله بن عمرو أن رسول الله – صلى الله عليه وسلم – قال :الصِّيَامُ وَالْقُرْآنُ يَشْفَعَانِ لِلْعَبْدِ يَوْمَ الْقِيَامَةِ ….. وَيَقُولُ الْقُرْآنُ مَنَعْتُهُ النَّوْمَ بِاللَّيْلِ فَشَفْعْنِي فِيهِ. قَالَ فَيُشَفْعَانِ»

അബ്ദുല്ലാഹിബ്നു അംറ് رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ ﷺ പറഞ്ഞു: നോമ്പും ഖുർആനും അന്ത്യനാളിൽ ദാസനുവേണ്ടി ശഫാഅത്ത് പറയുന്നതാണ്…..ഖുർആൻ പറയും: ‘ഞാൻ രാത്രിയിൽ ഇയാളെ ഉറക്കിൽനിന്നും തടഞ്ഞു: അതിനാൽ ഇയാൾക്കുവേണ്ടിയുള്ള എന്റെ ശഫാഅത്ത് നീ സ്വീകരിക്കേണമേ.’ അങ്ങിനെ അവ രണ്ടിൻറേയും ശഫാഅത്ത് സ്വീകരിക്കപ്പെടുന്നതാണ്. (അഹ്മദ്)

സൂറത്തുൽ മുൽക്

عَنْ أَبِي هُرَيْرَةَ، عَنِ النَّبِيِّ صلى الله عليه وسلم قَالَ ‏ “‏ إِنَّ سُورَةً مِنَ الْقُرْآنِ ثَلاَثُونَ آيَةً شَفَعَتْ لِرَجُلٍ حَتَّى غُفِرَ لَهُ وَهِيَ سُورَةُ تَبَارَكَ الَّذِي بِيَدِهِ الْمُلْكُ ‏”‏ ‏.‏

അബൂഹുറയ്‌റ رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ ﷺ പറഞ്ഞു: നിശ്ചയം, ഖുർആനിൽ ഒരു സൂറത്തിന് മുപ്പത് ആയത്തുകളാണ്. അത് ഒരു വ്യക്തിക്കുവേണ്ടി ശഫാഅത്ത് ചെയ്തു. അങ്ങിനെ അദ്ദേഹത്തിന് പൊറുക്കപ്പെട്ടു അതത്രേ തബാറ കസൂറത്ത് (സൂറത്തുൽമുൽക്.) (തിര്‍മിദി:2891)

നോമ്പ്

عن عبد الله بن عمر رضي الله عنهما أن النبي -صلى الله عليه وسلم- قال:الصيامُ والقرآنُ يَشْفَعَانِ للعبدِ يومَ القيامةِ، يقولُ الصيامُ: أَيْ ربِّ، مَنَعْتُهُ الطعامَ والشَّهواتِ بالنهارِ، فَشَفِّعْنِي فيه،…… قال: فَيُشَفَّعَانِ.

അബ്ദുല്ലാഹിബ്നു അംറ് رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ ﷺ പറഞ്ഞു: നോമ്പും ഖുർആനും അന്ത്യനാളിൽ ദാസനുവേണ്ടി ശഫാഅത്ത് പറയുന്നതാണ്. നോമ്പ് പറയും: ‘രക്ഷിതാവേ, ഇയാളെ പകലിൽ ഞാൻ ഭക്ഷണത്തിൽനിന്നും ദേഹേച്ഛകളിൽനിന്നും തടഞ്ഞു. അതിനാൽ ഇയാൾക്കു വേണ്ടിയുള്ള എൻ്റെ ശഫാഅത്ത് നീ സ്വീകരിക്കേണമേ…… അങ്ങിനെ അവ രണ്ടിൻറേയും ശഫാഅത്ത് സ്വീകരിക്കപ്പെടുന്നതാണ്. (അഹ്മദ്)

ശഫാഅത്ത് നേടുന്നവരിൽ ഉൾപ്പെടുവാൻ

ശഫാഅത്ത് നേടുന്ന ഭാഗ്യവാന്മാർ ആരെന്നറിയിക്കുന്ന ധാരാളം ഹദീഥുകൾ സ്വഹീഹായി സ്ഥിരപ്പെട്ടത് കാണാം. ഇവിടെ ആ ഭാഗ്യം നേടുവാനുള്ള വിശ്വാസ കർമ്മാനുഷ്‌ഠാനങ്ങളിൽ ചിലത് തെളിവ് സഹിതം നൽകുന്നു:

തൗഹീദ് സാക്ഷാൽകരിക്കുക

عَنْ أَبِي هُرَيْرَةَ، قَالَ قَالَ رَسُولُ اللَّهِ صلى الله عليه وسلم ‏: لِكُلِّ نَبِيٍّ دَعْوَةٌ مُسْتَجَابَةٌ فَتَعَجَّلَ كُلُّ نَبِيٍّ دَعْوَتَهُ وَإِنِّي اخْتَبَأْتُ دَعْوَتِي شَفَاعَةً لأُمَّتِي يَوْمَ الْقِيَامَةِ فَهِيَ نَائِلَةٌ إِنْ شَاءَ اللَّهُ مَنْ مَاتَ مِنْ أُمَّتِي لاَ يُشْرِكُ بِاللَّهِ شَيْئًا ‏”‏ ‏.‏

അബൂഹുറയ്‌റ رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ ﷺ പറഞ്ഞു: എല്ലാ നബിമാർക്കും ഉത്തരം നൽകപ്പെടുന്ന ഒരു ദുആയുണ്ട്. എല്ലാ നബിമാരും അവരുടെ ദുആയിൽ ധൃതികാണിച്ചു (ദുനിയാവിൽതന്നെ പ്രാർത്ഥിച്ചു) തീർച്ചയായും എൻ്റെ ദുആ ഞാൻ എന്റെ ഉമ്മത്തികൾക്ക് ശഫാഅത്തിനുവേണ്ടി സൂക്ഷിച്ചുവെച്ചു. അല്ലാഹുവിൽ യാതൊന്നും പങ്കുചേർക്കാതെ എൻ്റെ ഉമ്മത്തിൽ നിന്ന് ആരാണോ മരണപ്പെടുന്നത് അവന് അത് ലഭിക്കുന്നതാ إِنْ شَاءَ اللهُ. (മുസ്ലിം:199)

عَنْ أَبِي هُرَيْرَةَ، أَنَّهُ قَالَ قِيلَ يَا رَسُولَ اللَّهِ، مَنْ أَسْعَدُ النَّاسِ بِشَفَاعَتِكَ يَوْمَ الْقِيَامَةِ. قَالَ رَسُولُ اللَّهِ صلى الله عليه وسلم ‏: … أَسْعَدُ النَّاسِ بِشَفَاعَتِي يَوْمَ الْقِيَامَةِ مَنْ قَالَ لاَ إِلَهَ إِلاَّ اللَّهُ، خَالِصًا مِنْ قَلْبِهِ أَوْ نَفْسِهِ ‏”‏‏.‏

അബൂഹുറയ്‌റ رَضِيَ اللَّهُ عَنْهُ വിൽ നിന്ന് നിവേദനം: അദ്ദേഹം പറഞ്ഞു: ഞാൻ ചോദിച്ചു, അല്ലാഹുവിൻ്റെ റസൂലേ, ക്വിയാമത്ത് നാളിൽ താങ്കളുടെ ശഫാഅത്ത്’ ലഭിക്കുന്ന അതിഭാഗ്യവാൻ ജനങ്ങളിൽ ആരാണ്? തിരുമേനി പറഞ്ഞു: തൻ്റെ ഖൽബിൽനിന്നും നിന്നും നിഷ്കളങ്കതയോടെ പറഞ്ഞവൻ ആരാണോ അവൻ. (ബുഖാരി:99)

عَنْ أَبِي هُرَيْرَةَ، قَالَ قَالَ رَسُولُ اللَّهِ صلى الله عليه وسلم ‏: شفاعتي لمن شهد أن لا إله إلا الله مخلصا، وأن محمدا رسول الله يصدق لسانه قلبه وقلبه لسانه

അബൂഹുറയ്‌റ رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ ﷺ പറഞ്ഞു: നിഷ്‌കളങ്കനായി لا إِلَهَ إِلَّا اللَّهِ ، مُحَمَّدٌ رَسُولُ اللَّهِ എന്ന് സാക്ഷ്യം വഹിച്ചവനാണ് എൻ്റെ ശഫാഅത്ത്; അവൻ്റെ നാവ് അവൻ്റെ ഹൃദയത്തേയും അവൻ്റെ ഹൃദയം അവന്റെ നാവിനേയും സത്യപ്പെടുത്തിയിരിക്കണം. (ഇബ്നുഹിബ്ബാൻ)

عَنْ عَوْفِ بْنِ مَالِكٍ الأَشْجَعِيِّ، قَالَ قَالَ رَسُولُ اللَّهِ صلى الله عليه وسلم ‏ : أَتَانِي آتٍ مِنْ عِنْدِ رَبِّي فَخَيَّرَنِي بَيْنَ أَنْ يُدْخِلَ نِصْفَ أُمَّتِي الْجَنَّةَ وَبَيْنَ الشَّفَاعَةِ فَاخْتَرْتُ الشَّفَاعَةَ وَهِيَ لِمَنْ مَاتَ لاَ يُشْرِكُ بِاللَّهِ شَيْئًا.

ഔഫ് ഇബ്നു മാലിക് അൽഅശ്‌ജഈ رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ ﷺ പറഞ്ഞു: എന്റെ റബ്ബിന്റെ അടുക്കൽ നിന്നും ഒരാൾ എൻ്റെ അടുക്കൽ വന്നു. എന്നിട്ട് എൻ്റെ ഉമ്മത്തിൽനിന്ന് പകുതിപേരെ സ്വർഗ്ഗത്തിലേക്ക് പ്രവേശിപ്പിക്കുന്നതിൻ്റേയും ശഫാഅത്തിൻ്റേയും ഇടയിൽ (ഏതാണ് വേണ്ടതെന്ന്) തെരെഞ്ഞെടുക്കുവാനുള്ള അവസരം എനിക്ക് നൽകി. അപ്പോൾ ഞാൻ ശഫാഅത്തിനെ തെരെഞ്ഞെടുത്തു. അല്ലാഹുവിൽ യാതൊന്നിനേയും പങ്കുചേർക്കാതെ മരണപ്പെടുന്നത് ആരാണോ അവനുള്ളതാണ് അത് (ശഫാഅത്ത്) (തിര്‍മിദി:2441)

തിരുമേനിയുടെമേൽ സ്വലാത്ത് ചൊല്ലുക

عَنْ أَبِي اَلدَّرْدَاءِ ‏- رضى الله عنه ‏- قَالَ: قَالَ رَسُولُ اَللَّهِ ‏- صلى الله عليه وسلم ‏مَن صَلَّى عليَّ حين يُصبحُ عَشرًا، وحين يُمسي عَشرًا، أدرَكَته شَفاعَتي يَومَ القيامةِ.

അബുദ്ദർദാഅ് رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ പറഞ്ഞു: വല്ലവനും പ്രഭാതത്തിലാകുമ്പോഴും പ്രദോഷത്തിലാകുമ്പോഴും എൻ്റെമേൽ പത്ത് സ്വലാത്തുകൾ വീതം ചൊല്ലിയാൽ അവൻ അന്ത്യനാളിൽ എൻ്റെ ശഫാഅത്ത് കണ്ടെത്തുന്നതാണ്. (ത്വബ്റാനി)

ബാങ്കിന് ശേഷം വസീലയെ തേടൽ

عَنْ عَبْدِ اللَّهِ بْنِ عَمْرِو بْنِ الْعَاصِ، أَنَّهُ سَمِعَ النَّبِيَّ صلى الله عليه وسلم يَقُولُ ‏ “‏ إِذَا سَمِعْتُمُ الْمُؤَذِّنَ فَقُولُوا مِثْلَ مَا يَقُولُ ثُمَّ صَلُّوا عَلَىَّ فَإِنَّهُ مَنْ صَلَّى عَلَىَّ صَلاَةً صَلَّى اللَّهُ عَلَيْهِ بِهَا عَشْرًا ثُمَّ سَلُوا اللَّهَ لِيَ الْوَسِيلَةَ فَإِنَّهَا مَنْزِلَةٌ فِي الْجَنَّةِ لاَ تَنْبَغِي إِلاَّ لِعَبْدٍ مِنْ عِبَادِ اللَّهِ وَأَرْجُو أَنْ أَكُونَ أَنَا هُوَ فَمَنْ سَأَلَ لِيَ الْوَسِيلَةَ حَلَّتْ لَهُ الشَّفَاعَةُ ‏”‏ ‏.‏

അബ്ദുല്ലാഹിബ്നുഅംറ് رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ ﷺ പറയുന്നതായി അദ്ധേഹം കേട്ടു: നിങ്ങൾ മുഅദ്ദിൻ (ബാങ്ക് വിളിക്കുന്നത്) കേട്ടാൽ, അയാൾ പറയുന്നതുപോലെ നിങ്ങളും പറയുക. ശേഷം നിങ്ങൾ എൻ്റെ മേൽ സ്വലാത്ത് ചൊല്ലുക. കാരണം, വല്ലവനും എൻ്റെ മേൽ ഒരു സ്വലാത്ത് ചൊല്ലിയാൽ അതുകൊണ്ട് അല്ലാഹു അവന് പത്ത് കാരുണ്യങ്ങളെ വർഷിക്കും. ശേഷം നിങ്ങൾ അല്ലാഹുവോട് എനിക്കു വേണ്ടി വസീലയെ തേടുക. കാരണം അത് സ്വർഗ്ഗത്തിലെ ഒരു പദവിയാണ്. അല്ലാഹുവിൻ്റെ ദാസന്മാരിൽ ഒരു ദാസനുമാത്രമാണ് അത് ചേരുക. ആ വ്യക്തി ഞാനാകുവാൻ ഞാൻ ആശിക്കുന്നു. വല്ലവനും എനിക്കുവേണ്ടി വസീലിയെ തേടിയാൽ അവന്’ ശഫാഅത്ത് ലഭിക്കുന്നതാണ്. (മുസ്‌ലിം:384)

عَنْ جَابِرِ بْنِ عَبْدِ اللَّهِ، أَنَّ رَسُولَ اللَّهِ صلى الله عليه وسلم قَالَ ‏ “‏ مَنْ قَالَ حِينَ يَسْمَعُ النِّدَاءَ اللَّهُمَّ رَبَّ هَذِهِ الدَّعْوَةِ التَّامَّةِ وَالصَّلاَةِ الْقَائِمَةِ آتِ مُحَمَّدًا الْوَسِيلَةَ وَالْفَضِيلَةَ وَابْعَثْهُ مَقَامًا مَحْمُودًا الَّذِي وَعَدْتَهُ، حَلَّتْ لَهُ شَفَاعَتِي يَوْمَ الْقِيَامَةِ ‏”‏‏.‏

ജാബിർ ഇബ്നു അബ്ദുല്ല رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ ﷺ പറഞ്ഞു: വല്ലവനും ബാങ്ക് കേൾക്കുമ്പോൾ,

اللَّهُمَّ رَبَّ هَذِهِ الدَّعْوَةِ التَّامَّةِ وَالصَّلاَةِ الْقَائِمَةِ آتِ مُحَمَّدًا الْوَسِيلَةَ وَالْفَضِيلَةَ وَابْعَثْهُ مَقَامًا مَحْمُودًا الَّذِي وَعَدْتَهُ

എന്ന് ദുആ ചെയ്‌താൽ അവന് അന്ത്യനാളിൽ എന്റെ ശഫാഅത്ത് ലഭിച്ചു. (ബുഖാരി:614)

മദീനയിലെ പ്രയാസങ്ങളിൽ ക്ഷമിച്ചുള്ള ജീവിതം

അബൂസഈദിൽഖുദ്രി അബൂഹുറയ്‌റ رَضِيَ اللَّهُ عَنْهُ വിൽ നിന്ന് നിവേദനം:  അദ്ദേഹം പറഞ്ഞു: അല്ലാഹുവിൻ്റെ റസൂൽ പറഞ്ഞതായി ഞാൻ കേട്ടു:

لاَ يَصْبِرُ أَحَدٌ عَلَى لأْوَائِهَا فَيَمُوتَ إِلاَّ كُنْتُ لَهُ شَفِيعًا أَوْ شَهِيدًا يَوْمَ الْقِيَامَةِ إِذَا كَانَ مُسْلِمًا

മദീനയുടെ ജീവിതക്ലേശങ്ങളിൽ ക്ഷമിച്ചുകൊണ്ട് മരണപ്പെടുന്ന ഏതൊരാൾക്കും അന്ത്യനാളിൽ ഞാൻ സാക്ഷിയും ശുപാർശകനുമാകാതിരിക്കില്ല; അവൻ മുസ്‌ലിമാണെങ്കിൽ. (മുസ്‌ലിം:1374)

മദീനയിൽ മരണം

عَنِ ابْنِ عُمَرَ، قَالَ قَالَ رَسُولُ اللَّهِ صلى الله عليه وسلم ‏ :‏ مَنِ اسْتَطَاعَ أَنْ يَمُوتَ بِالْمَدِينَةِ فَلْيَمُتْ فَإِنِّي أَشْفَعُ لِمَنْ يَمُوتُ بِهَا

ഇബ്നു‌ ഉമര്‍ അബൂഹുറയ്‌റ رَضِيَ اللَّهُ عَنْهُ വിൽ നിന്ന് നിവേദനം: അല്ലാഹുവിന്റെ റസൂൽ ﷺ പറഞ്ഞു: മദീനയിൽ മരിക്കുവാൻ വല്ലവനും സാധിച്ചാൽ അവൻ (അവിടെ) മരണം വരിക്കട്ടെ കാരണം, ഞാൻ അവിടെ മരിക്കുന്നവന് ശഫാഅത്ത് പറയുന്നതാണ്. (അഹ്മദ്)

നാഫിലത്തുകൾ വർദ്ധിപ്പിക്കുക

നബി ﷺ യുടെ ഒരു ഖാദിമിൽ നിന്നും നിവേദനം: അദ്ദേഹം പറയുന്നു: നബി ഖാദിമിനോട് ചോദിച്ചുകൊണ്ടിരുന്ന കാര്യങ്ങളിൽ പെട്ടതായിരുന്നു താങ്കൾക്ക് വല്ല ആവശ്യവുമുണ്ടോ എന്നത്. അങ്ങിനെ ഒരു ദിനം ഖാദിം തിരുമേനിയോട് പറഞ്ഞു:

يَا رَسُولَ اللَّهِ حَاجَتِي قَالَ: وَمَا حَاجَتُكَ ؟ قَالَ: حَاجَتِي أَنْ تَشْفَعَ لِي يَوْمَ الْقِيَامَةِ قَالَ: وَمَنْ دَلَّكَ عَلَى هَذَا؟ قَالَ : رَبِّي قَالَ: إِمَّا لَا، فَأَعِنِّي بِكَثْرَةِ السُّجُودِ.

അല്ലാഹുവിൻ്റെ തിരുദൂതരേ, എനിക്കാവശ്യമുണ്ട്. തിരുമേനി പറഞ്ഞു: താങ്കളുടെ ആവശ്യം എന്താണ്? ഖാദിം പറഞ്ഞു: അന്ത്യനാളിൽ താങ്കൾ എനിക്ക് ശഫാഅത്ത് ചെയ്യണമെന്നതാണ്. തിരുമേനി പറഞ്ഞു: ഇത് താങ്കൾക്ക് അറിയിച്ചുതന്നത് ആരാണ്? ഖാദിം പറഞ്ഞു: എൻ്റെ രക്ഷിതാവാണ്. തിരുമേനി പറഞ്ഞു: എന്നാൽ ഇപ്പോൾ (ശഫാഅത്ത് ചോദിക്കൽ) ഇല്ല. ധാരാളം സുജൂദുകൾ കൊണ്ട് താങ്കൾ എന്നെ സഹായിക്കുക. (അഹ്മദ്)

 

അബ്ദുൽ ജബ്ബാര്‍ മദീനി

 

www.kanzululoom.com