ഒരു സത്യവിശ്വാസി ഈ ജീവിതത്തിൽ ഒരു പാതയിലൂടെ സഞ്ചരിക്കുന്നവനാണ്. ആ പാതയ്ക്ക് വ്യക്തമായ ഒരു ലക്ഷ്യവും ഉദ്ദേശ്യവുമുണ്ട്; അത് പ്രതാപവാനും ഉന്നതനുമായ അല്ലാഹുവിനെ അനുസരിക്കുകയും അവന്റെ തൃപ്തി നേടിയെടുക്കുകയും ചെയ്യുക എന്നതാണ്. താൻ അല്ലാഹുവിന്റെ ഒരു ദാസനാണെന്നും, ഈ ജീവിതത്തിൽ തന്നിലുള്ള ബാധ്യത അല്ലാഹുവിനോടുള്ള അടിമത്തം പൂർണ്ണമായി നിറവേറ്റുകയാണെന്നും അവൻ ഉറച്ചു വിശ്വസിക്കുന്നു. താൻ ആരാണെന്ന് കണ്ടെത്താനും, തന്റെ റബ്ബിനെ കുറിച്ചും ഉടമസ്ഥനെ കുറിച്ചും അറിയാനുമാണ് അവൻ ഈ ജീവിതത്തിൽ സഞ്ചരിക്കുന്നത്. അല്ലാഹു അവന്റെ ദാസന്മാർക്ക് പരിചയപ്പെടുത്തിക്കൊടുത്ത അവന്റെ മനോഹരമായ നാമങ്ങൾ, ഉന്നതമായ വിശേഷണങ്ങൾ, അവന്റെ മഹത്വത്തിന്റെയും പൂർണ്ണതയുടെയും  ഔന്നത്യത്തിന്റെയും അടയാളങ്ങൾ എന്നിവയിലൂടെ അവൻ തന്റെ റബ്ബിനെ തിരിച്ചറിയുന്നു. അല്ലാഹു സർവ്വകാര്യങ്ങളും നിയന്ത്രിക്കുന്നവനും, ആകാശഭൂമികളുടെ കൈകാര്യകർത്താവുമാണെന്നം അവൻ മനസ്സിലാക്കുന്നു. തുടർന്ന്, ഈ അറിവിനെ സത്യവിശ്വാസി, അല്ലാഹുവിനോടുള്ള അടിമത്തം പൂർണ്ണമായി നിർവ്വഹിച്ചുകൊണ്ട് പ്രാവർത്തികമാക്കുന്നു; അങ്ങനെ അവൻ തന്റെ മതം മുഴുവനും അല്ലാഹുവിന് വേണ്ടി മാത്രമായി നിഷ്കളങ്കമാക്കുന്നു.

قُلْ إِنَّ صَلَاتِى وَنُسُكِى وَمَحْيَاىَ وَمَمَاتِى لِلَّهِ رَبِّ ٱلْعَٰلَمِينَ ‎﴿١٦٢﴾‏ لَا شَرِيكَ لَهُۥ ۖ وَبِذَٰلِكَ أُمِرْتُ وَأَنَا۠ أَوَّلُ ٱلْمُسْلِمِينَ ‎﴿١٦٣﴾

പറയുക: തീര്‍ച്ചയായും എന്‍റെ പ്രാര്‍ത്ഥനയും, എന്‍റെ ആരാധനാകര്‍മ്മങ്ങളും, എന്‍റെ ജീവിതവും, എന്‍റെ മരണവും ലോകരക്ഷിതാവായ അല്ലാഹുവിന്നുള്ളതാകുന്നു. അവന്ന് പങ്കുകാരേയില്ല. അപ്രകാരമാണ് ഞാന്‍ കല്‍പിക്കപ്പെട്ടിരിക്കുന്നത്‌. (അവന്ന്‌) കീഴ്പെടുന്നവരില്‍ ഞാന്‍ ഒന്നാമനാണ്‌. (ഖു൪ആന്‍:6/162-163)

ഈ സഞ്ചാരപഥത്തിലുള്ള സത്യവിശ്വാസിക്ക് തുടക്കവും ഒടുക്കവുമുണ്ട്. ഇതിന്റെ തുടക്കം ഈ ഐഹിക ജീവിതമാണ്. വിശ്വാസി തന്റെ ജീവിതത്തിലുടനീളം അല്ലാഹുവിങ്കലേക്ക് സഞ്ചരിച്ചുകൊണ്ടിരിക്കുകയാണ്; ഒരു പദവിയിൽ നിന്ന് മറ്റൊരു പദവിയിലേക്കും, ഒരു അടിമത്തത്തിൽ  നിന്ന് മറ്റൊരു അടിമത്തത്തിലേക്കും, ഒരു അനുസരണത്തിൽ നിന്ന് മറ്റൊരു അനുസരണത്തിലേക്കും. അങ്ങനെ ആയുസ്സ് അവസാനിക്കുകയും മരണം കടന്നുവരികയും ചെയ്യുന്നത് വരെ അവൻ ആ സഞ്ചാരം തുടരുന്നു.

ﻭَٱﻋْﺒُﺪْ ﺭَﺑَّﻚَ ﺣَﺘَّﻰٰ ﻳَﺄْﺗِﻴَﻚَ ٱﻟْﻴَﻘِﻴﻦُ

ഉറപ്പായ ആ കാര്യം (മരണം) നിനക്ക് വന്നെത്തുന്നത് വരെ നീ നിന്റെ രക്ഷിതാവിനെ ആരാധിക്കുകയും ചെയ്യുക. (ഖു൪ആന്‍:15/99)

ഈ യാത്രയുടെ ആത്യന്തിക ലക്ഷ്യസ്ഥാനം സ്വർഗ്ഗമാണ്.

وَسَارِعُوٓا۟ إِلَىٰ مَغْفِرَةٍ مِّن رَّبِّكُمْ وَجَنَّةٍ عَرْضُهَا ٱلسَّمَٰوَٰتُ وَٱلْأَرْضُ أُعِدَّتْ لِلْمُتَّقِينَ

നിങ്ങളുടെ രക്ഷിതാവിങ്കല്‍ നിന്നുള്ള പാപമോചനവും, ആകാശഭൂമികളോളം വിശാലമായ സ്വര്‍ഗവും നേടിയെടുക്കാന്‍ നിങ്ങള്‍ ധൃതിപ്പെട്ട് മുന്നേറുക. ധര്‍മ്മനിഷ്ഠ പാലിക്കുന്നവര്‍ക്കുവേണ്ടി ഒരുക്കിവെക്കപ്പെട്ടതത്രെ അത്‌. (ഖു൪ആന്‍:3/133)

അല്ലാഹുവിലേക്കുള്ള ആ യാത്രയുടെ അന്ത്യസ്ഥാനം സ്വർഗ്ഗത്തിലാണ്.  യാത്രക്കാർ തങ്ങളുടെ ഭാരങ്ങൾ ഇറക്കിവെക്കുന്ന ഇടവും, എല്ലാ പ്രതീക്ഷകളുടെയും വിളഭൂമിയും അവിടെയാണ്. അല്ലാഹുവിലേക്കുള്ള സഞ്ചാരികളുടെയെല്ലാം ആനന്ദവും ആസ്വാദനവും അവിടെയാണ്. കണ്ണുകൾ കണ്ടിട്ടില്ലാത്തതും, കാതുകൾ കേട്ടിട്ടില്ലാത്തതും, ഒരു മനുഷ്യന്റെയും മനസ്സിൽ ഉദിച്ചിട്ടില്ലാത്തതുമായ ശാശ്വതമായ അനുഗ്രഹങ്ങളാണവിടെയുള്ളത്. സ്വർഗ്ഗവാസികൾ സ്വർഗ്ഗത്തിൽ പ്രവേശിച്ചുകഴിഞ്ഞാൽ, ഉന്നതനും പ്രതാപവാനുമായ അല്ലാഹു അവരോട് ഇങ്ങനെ പറയും:

عَنْ صُهَيْبٍ، عَنِ النَّبِيِّ صلى الله عليه وسلم قَالَ : إِذَا دَخَلَ أَهْلُ الْجَنَّةِ الْجَنَّةَ – قَالَ – يَقُولُ اللَّهُ تَبَارَكَ وَتَعَالَى تُرِيدُونَ شَيْئًا أَزِيدُكُمْ فَيَقُولُونَ أَلَمْ تُبَيِّضْ وُجُوهَنَا أَلَمْ تُدْخِلْنَا الْجَنَّةَ وَتُنَجِّنَا مِنَ النَّارِ – قَالَ – فَيَكْشِفُ الْحِجَابَ فَمَا أُعْطُوا شَيْئًا أَحَبَّ إِلَيْهِمْ مِنَ النَّظَرِ إِلَى رَبِّهِمْ عَزَّ وَجَلَّ ‏

സുഹൈബ് رَضِيَ اللَّهُ عَنْهُ വിൽ നിന്ന് നിവേദനം: നബി ﷺ പറഞ്ഞു: സ്വര്‍ഗക്കാര്‍ സ്വര്‍ഗത്തില്‍ പ്രവേശിച്ചാല്‍, അല്ലാഹു അവരോടു ചോദിക്കും: ഞാന്‍ നിങ്ങള്‍ക്ക് വല്ലതും അധികരിപ്പിച്ച് നല്‍കുവാന്‍ നിങ്ങള്‍ ആഗ്രഹിക്കുന്നുവോ? അവര്‍ മറുപടി പറയും: നീ ഞങ്ങളുടെ മുഖം വെളുപ്പിച്ച് (ഞങ്ങള്‍ക്ക് സന്തോഷം നല്‍കി) നല്‍കിയല്ലോ. ഞങ്ങളെ സ്വര്‍ഗത്തില്‍ പ്രവേശിപ്പിക്കുകയും, ഞങ്ങളെ നരകത്തില്‍ നിന്നു രക്ഷപ്പെടുത്തുകയും ചെയ്തുതന്നല്ലോ. (ഇനി എന്താണ് ഞങ്ങള്‍ക്കുവേണ്ടത്) നബി ﷺ പറഞ്ഞു: അതോടെ അല്ലാഹു മറയെ നീക്കും. അതില്‍പിന്നെ തങ്ങളുടെ റബ്ബിനെ നോക്കിക്കാണുന്നതിനെക്കാള്‍ ഇഷ്ടപ്പെട്ടതായി മറ്റൊന്നും തന്നെ അവര്‍ക്ക് നല്‍കപ്പെട്ടിട്ടുണ്ടാവില്ല. (മുസ്ലിം: 181)

അല്ലാഹുവിലേക്കുള്ള ഈ യാത്രയിൽ സത്യവിശ്വാസിയെ മുന്നോട്ട് നയിക്കാനും ആ വേഗത വർദ്ധിപ്പിക്കാനും ചില ‘പ്രേരകശക്തികൾ’ അനിവാര്യമാണ്.  സത്യവിശ്വാസിയുടെ ഹൃദയത്തിൽ ഈ യാത്രക്ക് മൂന്ന് പ്രധാന പ്രേരകശക്തികളാണുള്ളത്:

1.സ്നേഹം (المحبة)

2.പ്രതീക്ഷ (الرجاء)

3.ഭയം (الخوف)

ഹൃദയങ്ങളെ ചലിപ്പിക്കുന്ന മൂന്ന് ഘടകങ്ങളാണിവ. ഇതിൽ ‘സ്നേഹം’ ആണ് മുസ്ലിമിനെ നേരായ പാതയിലേക്ക് തിരിയാനും അതിലൂടെ സഞ്ചരിക്കാൻ ദൃഢനിശ്ചയം ചെയ്യാനും പ്രേരിപ്പിക്കുന്നത്; ആ സ്നേഹത്തിന്റെ ശക്തിക്കനുസരിച്ചായിരിക്കും അവന്റെ യാത്രയിലെ ഊർജ്ജവും. ‘പ്രതീക്ഷ’യാണ് സത്യവിശ്വാസിയുടെ യാത്രയിലെ വഴികാട്ടിയായ നേതാവ്, ‘ഭയം’ ആകട്ടെ, അവനെ തെറ്റുകളിൽ നിന്ന് തടഞ്ഞുനിർത്തുന്ന ഘടകവുമാണ്. അല്ലാഹു വിശുദ്ധ ഖുർആനിൽ ഈ മൂന്ന് കാര്യങ്ങളെയും ഒന്നിച്ചു ചേർത്ത് പ്രതിപാദിച്ചിട്ടുണ്ട്.

أُو۟لَٰٓئِكَ ٱلَّذِينَ يَدْعُونَ يَبْتَغُونَ إِلَىٰ رَبِّهِمُ ٱلْوَسِيلَةَ أَيُّهُمْ أَقْرَبُ وَيَرْجُونَ رَحْمَتَهُۥ وَيَخَافُونَ عَذَابَهُۥٓ ۚ إِنَّ عَذَابَ رَبِّكَ كَانَ مَحْذُورًا

അവര്‍ വിളിച്ച് പ്രാര്‍ത്ഥിച്ചുകൊണ്ടിരിക്കുന്നത് ആരെയാണോ അവര്‍ തന്നെ തങ്ങളുടെ രക്ഷിതാവിങ്കലേക്ക് സമീപനമാര്‍ഗം തേടിക്കൊണ്ടിരിക്കുകയാണ്‌. അതെ, അവരുടെ കൂട്ടത്തില്‍ അല്ലാഹുവോട് ഏറ്റവും അടുത്തവര്‍ തന്നെ (അപ്രകാരം തേടുന്നു.) അവര്‍ അവന്‍റെ കാരുണ്യം ആഗ്രഹിക്കുകയും അവന്‍റെ ശിക്ഷ ഭയപ്പെടുകയും ചെയ്യുന്നു, നിന്‍റെ രക്ഷിതാവിന്‍റെ ശിക്ഷ തീര്‍ച്ചയായും ഭയപ്പെടേണ്ടതാകുന്നു. (ഖു൪ആന്‍:17/57)

അല്ലാഹുവിലേക്കുള്ള യാത്രയ്ക്ക് ഒഴിവാക്കാനാവാത്തതും, നിർബന്ധമായും നിറവേറ്റേണ്ടതുമായ ചില കർമ്മങ്ങളുണ്ട്: യാത്രക്കാര്‍ പ്രത്യേകം ശ്രദ്ധിക്കേണ്ട കാര്യങ്ങളാണിവ: ഇസ്‌ലാമിലെ നിർബന്ധ കർമ്മങ്ങളും, മതപരമായ ബാധ്യതകളും  നിറവേറ്റുകയും, സർവ്വജ്ഞനായ അല്ലാഹുവിന്റെ ശിക്ഷയെ ഭയന്നുകൊണ്ട് പാപങ്ങളിൽ നിന്ന് അകന്നുനിന്നുകൊണ്ടും നിഷിദ്ധമായവയിൽ ഹറാം നിന്ന് വിട്ടുനിന്നുകൊണ്ടും അല്ലാഹുവോടുള്ള എല്ലാവിധ അടിമത്തങ്ങളും  നിർവ്വഹിക്കുകയും ചെയ്യുക.

മതപരമായ നിർബന്ധ കർമ്മങ്ങളേക്കാളും മതപരമായ  ബാധ്യതകളേക്കാളും അല്ലാഹുവിന് കൂടുതൽ ഇഷ്ടപ്പെട്ട മറ്റൊന്നുകൊണ്ടും ഒരു അടിമയ്ക്കും അവനിലേക്ക് അടുക്കാൻ സാധിക്കുകയില്ല.

عَنْ أَبِي هُرَيْرَةَ رَضِيَ اللَّهُ عَنْهُ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: ” إِنَّ اللَّهَ عَزَّ وَجَلَّ قَالَ: مَنْ عَادَى لِي وَلِيًّا، فَقَدْ آذَنْتُهُ بِالْحَرْبِ، وَمَا تَقَرَّبَ إِلَيَّ عَبْدِي بِشَيْءٍ أَحَبَّ إِلَيَّ مِمَّا افْتَرَضْتُ عَلَيْهِ، وَمَا يَزَالُ عَبْدِي يَتَقَرَّبُ إِلَيَّ بِالنَّوَافِلِ حَتَّى أُحِبَّهُ، فَإِذَا أَحْبَبْتُهُ، كُنْتُ سَمْعَهُ الَّذِي يَسْمَعُ بِهِ، وَبَصَرَهُ الَّذِي يُبْصِرُ بِهِ، وَيَدَهُ الَّتِي يَبْطِشُ بِهَا، وَرِجْلَهُ الَّتِي يَمْشِي بِهَا، وَإِنْ سَأَلَنِي لَأُعْطِيَنَّهُ، وَلَئِنْ اسْتَعَاذَنِي لَأُعِيذَنَّهُ،

അബൂഹുറൈറ رَضِيَ اللَّهُ عَنْهُ വിൽ നിന്ന് നിവേദനം: നബി ﷺ പറഞ്ഞു: ഉന്നതനും പ്രതാപവാനുമായ അല്ലാഹു പറഞ്ഞു. “എന്റെ ഇഷ്ടദാസനോട് ആരെങ്കിലും ശത്രുത പുലർത്തിയാൽ അവനോട് ഞാനിതാ യുദ്ധം പ്രഖ്യാപിച്ചിരിക്കുന്നു. ഞാൻ നിർബന്ധമായി കൽപിച്ച കർമ്മങ്ങളേക്കാൾ പ്രിയങ്കരമായ മറ്റൊന്നു കൊണ്ടും എന്റെ ദാസന് എന്റെ സാമീപ്യം കരസ്ഥമാക്കാൻ ഉപയുക്തമായിട്ടില്ല. ഐഛികമായ ആരാധനാകർമ്മങ്ങൾ നിർവ്വഹിച്ചു എന്റെ ദാസൻ എന്നോട് അടുത്തു കൊണ്ടേയിരിക്കും. അങ്ങനെ ഞാനവനെ സ്നേഹിക്കുന്നു. ഞാൻ അവനെ സ്നേഹിച്ചു കഴിഞ്ഞാൽ അവൻ കേൾക്കുന്ന കാതും, കാണുന്ന കണ്ണും, പിടിക്കുന്ന കയ്യും, നടക്കുന്ന കാലും ഞാനായിരിക്കും. എന്നോടവൻ ചോദിച്ചാൽ ഞാനതവന് നൽകുക തന്നെ ചെയ്യും. എന്നോടവൻ രക്ഷ ചോദിച്ചാൽ ഞാനവന് രക്ഷനൽകുകതന്നെ ചെയ്യും. . (ബുഖാരി:6502)

അല്ലാഹുവിലേക്കുള്ള ഈ യാത്രയിൽ വഴിയിൽ മറികടക്കേണ്ട ചില തടസ്സങ്ങളുണ്ട്. ആ തടസ്സങ്ങളെ മറികടക്കാത്തവർക്ക്, അവ അല്ലാഹുവിലേക്കുള്ള അവരുടെ യാത്രയിൽ വലിയ തടസ്സം തന്നെയാണ്. അതിനാൽ, അല്ലാഹുവിന്റെ കാരുണ്യം ആഗ്രഹിക്കുകയും അവന്റെ ശിക്ഷയെ ഭയപ്പെടുകയും ചെയ്യുന്ന ഏതൊരു സഞ്ചാരിയും തന്റെ യാത്രയിൽ നേരിടുന്ന ഈ പ്രതിസന്ധികളെക്കുറിച്ചും തടസ്സങ്ങളെക്കുറിച്ചും അതീവ ജാഗ്രത പുലർത്തേണ്ടതുണ്ട്. ഇവ പ്രധാനമായും മൂന്ന് പ്രതിസന്ധികളായി സംഗ്രഹിക്കാം:

1: ശിർക്ക്:  ദീൻ അല്ലാഹുവിന് വേണ്ടി മാത്രം നിഷ്കളങ്കമാക്കുന്നതിലൂടെ (ഇഖ്ലാസ്) മാത്രമാണ് ഈ കടമ്പയെ മറികടക്കാൻ സാധിക്കുക.

2.ബിദ്അത്ത്: മുഹമ്മദ് നബി ﷺ യെ സമ്പൂര്‍ണ്ണമായി ഇത്തിബാഅ് (പിൻപറ്റൽ) ചെയ്യുന്നത് മാത്രമാണ് ഈ കടമ്പയെ മറികടക്കാൻ സാധിക്കുന്നത്.

3.പാപങ്ങൾ. ചെയ്തുപോയ തെറ്റുകളിൽ നിന്ന് തൗബ (പശ്ചാത്താപം) ചെയ്യുന്നതിലൂടെയും, അവയിൽ നിന്ന് അകന്നുനിൽക്കുമെന്ന് ദൃഢനിശ്ചയം ചെയ്യുന്നതിലൂടെയും, വീണ്ടും അത്തരം പാപങ്ങളിൽ വീണുപോകാതിരിക്കാൻ ജാഗ്രത പാലിക്കുന്നതിലൂടെയും മാത്രമാണ് ഈ കടമ്പയെ മറികടക്കാൻ സാധിക്കുന്നത്.

അല്ലാഹുവിലേക്കുള്ള ഈ യാത്രയിൽ വഴിമധ്യേ പതിയിരിക്കുന്ന കള്ളന്മാരും വഴിതടയുന്നവരുമുണ്ട്. അവർ സഞ്ചാരിയെ തടയുകയും അവന്റെ യാത്രയിൽ ആശയക്കുഴപ്പങ്ങൾ സൃഷ്ടിക്കുകയും ചെയ്യും. അതിനാൽ, അവരെക്കുറിച്ച് വലിയ ജാഗ്രത പുലർത്തേണ്ടതുണ്ട്. വഴിതടയുന്നവരിൽ ഏറ്റവും വലിയവൻ ശൈത്വാനാണ്. ഈ ശത്രുവിനെക്കുറിച്ച് മുന്നറിയിപ്പ് നൽകുന്ന നിരവധി ആയത്തുകൾ അല്ലാഹുവിന്റെ ഗ്രന്ഥത്തിൽ വന്നിട്ടുണ്ട്. അവനെ ശത്രുവായിത്തന്നെ കാണണമെന്നതും, മനുഷ്യന്റെ മുന്നിൽ നിന്നും പിന്നിൽ നിന്നും വലതുഭാഗത്തു നിന്നും ഇടതുഭാഗത്തു നിന്നും അവൻ കടന്നുവരുമെന്നും അല്ലാഹു വ്യക്തമാക്കുന്നു. അല്ലാഹുവിന്റെ ദീനിൽ നിന്ന് തടയുവാനും അവനെ അനുസരിക്കുന്നതിൽ നിന്ന് അകറ്റുവാനും അവൻ എല്ലാ പാതകളിലും പതിയിരിക്കുന്നു.

عَنْ سَبْرَةَ بْنِ أَبِي فَاكِهٍ، قَالَ سَمِعْتُ رَسُولَ اللَّهِ صلى الله عليه وسلم يَقُولُ ‏:‏ إِنَّ الشَّيْطَانَ قَعَدَ لاِبْنِ آدَمَ بِأَطْرُقِهِ …

സബ്റ: ബ്നു അബൂഫാകിഹ് رَضِيَ اللَّهُ عَنْهُ വിൽ നിന്ന് നിവേദനം: നബി ﷺ പറഞ്ഞു: ‘നിശ്ചയമായും ശൈത്വാൻ ആദം സന്തതിയുടെ എല്ലാ പാതകളിലും അവനെ കാത്തിരിക്കുന്നു.’ (നസാഇ:3134)

അഥവാ, അല്ലാഹുവിന്റെ കാരുണ്യം തേടിയും അവന്റെ പ്രതിഫലം ആഗ്രഹിച്ചും മനുഷ്യൻ സഞ്ചരിക്കുന്ന ഏത് വഴിയാണോ, അതിലെല്ലാം പിശാച് അവനെ വഴിതെറ്റിക്കാനും തടയാനും പിന്തിരിപ്പിക്കാനും കാത്തിരിക്കുന്നു. അതുപോലെതന്നെ, വഴിതടയുന്നവരിൽ പിശാചിന്റെ സഹായികളും കൂട്ടാളികളുമായ മനുഷ്യരൂപത്തിലുള്ള പിശാചുക്കളും ജിന്നുകളുമുണ്ട്. അവരുടെ എണ്ണം എത്ര അധികമാണ്!

അല്ലാഹുവിലേക്കുള്ള യാത്രയിൽ മന്ദതയോ, അലസതയോ, മടിയോ ഒട്ടും യോജിച്ചതല്ല. മറിച്ച്, നന്മകളിലേക്ക് വേഗത്തിൽ കുതിക്കുക, ലഭ്യമായ സമയങ്ങളെ ഫലപ്രദമായി ഉപയോഗിക്കുക, സൽക്കർമ്മങ്ങളിൽ മത്സരിക്കുക എന്നതാണ് ഇവിടെ നിർബന്ധമായത്. അപ്പോഴാണ് സഞ്ചാരിക്ക് ഉന്നതമായ വിജയം കൈവരിക്കാനും, ശ്രേഷ്ഠമായ അവസരങ്ങളെയും സമയങ്ങളെയും മുതലെടുത്ത് അല്ലാഹുവിനെ അനുസരിക്കുന്നതിലും ആരാധിക്കുന്നതിലും കൂടുതൽ കഠിനാധ്വാനം ചെയ്യാനും സാധിക്കുക. അതുവഴി, ഈ ജീവിതം അവന് വലിയൊരു സമ്പാദ്യവും, നന്മകളിലേക്കുള്ള ഒരു ഉന്നമനവും ആയി മാറുന്നു.

ഈ ജീവിതത്തിൽ സഞ്ചരിച്ചുകൊണ്ടിരിക്കുന്ന ഓരോ ദാസനും ഒരു നിശ്ചിത കാലപരിധിയുണ്ട്, അതിൽ നിന്ന് അവൻ കടന്നുപോകില്ല. സമയമെത്തിയാൽ, ഒരു നിമിഷം പോലും അതിന് മുന്നോട്ട് പോകാനോ പിന്നോട്ട് പോകാനോ അവന് സാധിക്കില്ല. അല്ലാഹുവിന്റെ ദാസന്മാരിൽ ഏറ്റവും ഭാഗ്യവാൻ, ആ ദിവസത്തിന് വേണ്ടിയുള്ള ഒരുക്കങ്ങൾ മുൻകൂട്ടി നടത്തുകയും, അല്ലാഹുവിനെ അനുസരിച്ചുകൊണ്ടും ആരാധിച്ചുകൊണ്ടും അതിനായി സ്വയം സജ്ജരാകുകയും ചെയ്യുന്നവനാണ്.

 

 

www.kanzululoom.com