ആമുഖം

പ്രമുഖ ഈജിപ്ഷ്യൻ സാഹിത്യകാരനായ മുസ്ത്വഫ ലുത്വുഫി അൽമൻഫലൂത്വിയുടെ മനോഹരമായ ഈ ലേഖനം പ്രമുഖന്മാരായ നിരവധി പണ്ഡിതന്മാർ അവരുടെ രചനകളിൽ അതേപടി ഉദ്ധരിക്കുകയും പരാമർശിക്കുകയും ചെയ്തിട്ടുണ്ട്. സൗദിഅറേബ്യയിലെ മതകാര്യ മന്ത്രാലയം ഈ ലേഖനത്തെ പ്രത്യേകം കാറ്റലോഗായി അച്ചടിച്ച് ഇസ്‌ലാമിക പ്രചാരണാർഥം പൊതുജനങ്ങൾക്കു വിതരണം ചെയ്യുന്നുമുണ്ട്. ഇന്ത്യയും ഈജിപ്തും ഉൾപ്പെടെ ലോകത്തിന്റെ വിവിധ ഭാഗങ്ങളിൽ നടന്നുവരുന്ന ക്വബ്ർ പൂജക്കെതിരിൽ മൻഫലൂത്വിയുടെ ലളിത മനോഹര ഭാഷയിലും ശൈലിയിലുമുള്ള വാക്കുകൾ മഹത്തായ രോഷത്തിൽനിന്നും ഉടലെടുത്തതാണ്. ഭൂമുഖത്ത് ആവർത്തിച്ചുകൊണ്ടിരിക്കുന്ന കൈപേറിയ ഒരു യാഥാർഥ്യത്തെക്കുറിച്ചുള്ള വിവരണവും അതിലുണ്ട്. അല്ലാഹുവിന്റെ ഏറ്റവും മഹത്തായ അവകാശത്തിനു വേണ്ടിയുള്ളതാണ് ‘അന്നദ്വറാത്’ എന്ന ഗ്രന്ഥത്തിലെ മൻഫലൂത്വിയുടെ ആ രോഷമെന്നു പണ്ഡിതന്മാരെല്ലാം വിലയിരുത്തിയിട്ടുമുണ്ട്.

‘ദുഃഖകരമായ ഈ കാഴ്ചയ്ക്ക് മുന്നിൽ, ഒരു തുള്ളി കണ്ണീരെങ്കിലും തന്റെ കൺതടങ്ങളിൽനിന്ന് ഒഴുക്കിക്കളയാതിരിക്കാൻ ഏതു കണ്ണിനാണ് സാധിക്കുക? മുസ്‌ലിം സമൂഹത്തിന്റെ കാഴ്ചയാണിത്! ക്വബ്‌റിന്റെ പടിവാതിൽക്കൽ റുകൂഉം സുജൂദുമായി അവർ കാത്തുനിൽക്കുന്നു. ഒരുപക്ഷേ, ആ ക്വബ്‌റിൽ കിടക്കുന്ന വ്യക്തിയെക്കാൾ ഉത്തമനായവൻ ആ പ്രണാമം അർപ്പിക്കുന്നവരുടെ കൂട്ടത്തിൽ ജീവിച്ചിരിപ്പുണ്ടാവാം, മരണാനന്തരവും അങ്ങനെയുണ്ടാവുക എന്നത് എത്രയോ വലിയ സത്യമാണ്.

ഏകദൈവ വിശ്വാസത്തിന്റെ അനുയായികളായ മുസ്‌ലിംകൾ, ബഹുദൈവവിശ്വാസികളെക്കാൾ അല്ലാഹുവിൽ പങ്കുചേർക്കുന്നവരും ദൈവങ്ങളുടെ എണ്ണത്തിലും ആരാധനാമൂർത്തികളുടെ ബാഹുല്യത്തിലും അവരെക്കാൾ വിശാലമായ വൃത്തമുള്ളവരുമായി കാണപ്പെടുമ്പോൾ, ഒരു നിമിഷമെങ്കിലും തന്റെ നെഞ്ചിൻകൂട്ടിൽ അടങ്ങിയിരിക്കാൻ ഏത് ഹൃദയത്തിനാണ് സാധിക്കുക? വേദനകൊണ്ട് അത് പറന്നുപോകാതിരിക്കുമോ?

എന്തിനാണ് മുസ്‌ലിംകൾ ക്രിസ്ത്യാനികളുടെ ത്രിയേകത്വത്തെ കുറ്റപ്പെടുത്തുന്നതെന്ന അദ്ദേഹത്തിന്റെ ചോദ്യത്തിന് ഉത്തരം കണ്ടെത്താൻ നാം ഓരോരുത്തരും ബാധ്യസ്ഥരാണ്. അവർ മൂന്ന് ദൈവങ്ങളിൽ വിശ്വസിക്കുന്നു. എന്നാൽ ഈ ബഹുത്വത്തിന്റെ വിചിത്രതയും യുക്തിഹീനതയും അവർക്ക് ബോധ്യമുണ്ട്. അതിനാൽ അവരതിന് വ്യാഖ്യാനങ്ങൾ ചമയ്ക്കുകയും ആ മൂന്നും ഒന്നാണെന്ന് പറയുകയും ചെയ്യുന്നു. എന്നാൽ മുസ്‌ലിംകളാകട്ടെ ആയിരക്കണക്കിന് നേർച്ചക്കാരിൽ വിശ്വസിക്കുന്നു. അവയിൽ മിക്കതും മരക്കുറ്റികളും അജ്ഞാത മൃതശരീരങ്ങളും പാറക്കെട്ടുകളുമാണ്. എന്നാൽ മുസ്‌ലിം സമൂഹമാകട്ടെ തങ്ങൾ ചെയ്യുന്നതിനെക്കുറിച്ച് ബോധവാന്മാരുമല്ല.

മൻഫലൂത്വിയുടെ വാക്കുകൾ ഇപ്രകാരം വായിക്കാം:

“ഇന്ത്യക്കാരനായ ഒരു പണ്ഡിതൻ എനിക്കൊരു കത്തെഴുതി. അതിൽ അദ്ദേഹം പറഞ്ഞിരുന്നത്, മദ്രാസിന്റെ തെക്ക് ഭാഗത്തുമുള്ള നാഗൂരിൽ താമസിക്കുന്ന, ഇന്ത്യക്കാർ സംസാരിക്കുന്ന തമിഴ് ഭാഷയിൽ, പുതുതായി ഇറങ്ങിയ ഒരു പുസ്തകം അദ്ദേഹത്തിന്റെ ശ്രദ്ധയിൽപ്പെട്ടുവെന്നാണ്. സയ്യിദ് അബ്ദുൽ ക്വാദിർ ജീലാനിയുടെ ജീവിത ചരിത്രവും അദ്ദേഹത്തിന്റെ മഹത്ത്വങ്ങളും കറാമത്തുകളും പ്രതിപാദിക്കുന്നതായിരുന്നു ആ ഗ്രന്ഥം.

അതിൽ സയ്യിദ് അബ്ദുൽ ക്വാദിറിനെ വിശേഷിപ്പിക്കാനും അഭിസംബോധന ചെയ്യാനും ഉപയോഗിച്ചിട്ടുള്ള ചില പദവികളും സ്ഥാനപ്പേരുകളും അല്ലാഹുവിന്റെ സ്ഥാനത്തിന് കൂടുതൽ യോജിച്ചതാണെന്നും പ്രവാചകത്വത്തിനോ ഔലിയാ പദവിക്കോ പോലും ചേരുന്നതല്ലെന്നും അദ്ദേഹം പറഞ്ഞു. ഉദാഹരണത്തിന്, ‘ആകാശഭൂമികളുടെ നേതാവ്,’ ‘ഉപകാരിയും ഉപദ്രവകാരിയും,’ ‘പ്രപഞ്ചത്തെ നിയന്ത്രിക്കുന്നവൻ,’ ‘സൃഷ്ടികളുടെ രഹസ്യങ്ങൾ അറിയുന്നവൻ,’ ‘മരിച്ചവരെ ജീവിപ്പിക്കുന്നവൻ,’ ‘കുഷ്ഠരോഗികളെയും അന്ധരെയും കാഴ്ചയില്ലാത്തവരെയും സുഖപ്പെടുത്തുന്നവൻ,’ ‘അദ്ദേഹത്തിന്റെ കൽപന അല്ലാഹുവിന്റെ കൽപ്പനയാണ്,’ ‘പാപങ്ങൾ മായ്ക്കുന്നവൻ,’ ‘വിപത്തുകളെ തടയുന്നവൻ,’ ‘ഉയർത്തുന്നവനും താഴ്ത്തുന്നവനും,’ ‘ശരീഅത്തിന്റെ ഉടമ,’ ‘സമ്പൂർണമായ അസ്തിത്വത്തിന്റെ ഉടമ’ എന്നിങ്ങനെയുള്ള നിരവധി വിശേഷണങ്ങൾ അതിലുണ്ടായിരുന്നു.

ആ ഗ്രന്ഥത്തിൽ, സയ്യിദ് അബ്ദുൽ ക്വാദർ ജീലാനിയുടെ ക്വബ്‌റിടം സന്ദർശിക്കേണ്ട രീതി വിവരിക്കുന്ന ഒരു അധ്യായമുണ്ടെന്നും ആ എഴുത്തുകാരൻ പറഞ്ഞു. അതിൽ പറയുന്നതനുസരിച്ച്, സന്ദർശകൻ ആദ്യം നല്ല രീതിയിൽ വുദൂഅ് ചെയ്യണം, പിന്നീട് ഭക്തിയോടെ രണ്ട് റക്അത്ത് നമസ്‌കരിക്കണം, ശേഷം ആ മഹത്തായ കഅ്ബക്ക് സമാനമായ ക്വബ്‌റിടത്തിന് നേരെ തിരിയണം. ആ ക്വബ്‌റിന്റെ ഉടമക്ക് സലാം പറഞ്ഞ ശേഷം ഇങ്ങനെ പറയണം:

‘ഓ! രണ്ട് ലോകങ്ങളുടെയും നേതാവേ, എന്നെ സഹായിക്കണേ. എന്റെ ആവശ്യങ്ങൾ നിറവേറ്റാനും ദുരിതങ്ങൾ നീക്കാനും എന്നെ പിന്തുണക്കണേ, എന്നെ സഹായിക്കണേ. ഓ! മുഹ്‌യിദ്ദീൻ അബ്ദുൽ ക്വാദിർ, എന്നെ സഹായിക്കണേ. ഓ! വലിയ്യ് അബ്ദുൽ ക്വാദിർ, എന്നെ സഹായിക്കണേ. ഓ! സുൽത്താൻ അബ്ദുൽ ക്വാദിർ, എന്നെ സഹായിക്കണേ. ഓ! ബാദ്ഷാ അബ്ദുൽ ക്വാദിർ, എന്നെ സഹായിക്കണേ. ഓ! ഖോജ അബ്ദുൽ ക്വാദിർ, ഓ! നിത്യനായ രക്ഷകന്റെ സാന്നിധ്യമേ, ഓ! എന്റെ നേതാവേ, അബ്ദുൽ ക്വാദിർ ജീലാനീ, ഞാൻ അങ്ങയുടെ ദാസനും മുരീദും ദുർബലനും ദുരിതമനുഭവിക്കുന്നവനും അങ്ങയെ ദീനിലും ദുൻയാവിലും ആഖിറത്തിലും എല്ലാ കാര്യങ്ങളിലും ആശ്രയിക്കുന്നവനുമാകുന്നു.’

കൂടാതെ, ഇന്ത്യയിലെ നാഗൂർ പട്ടണത്തിൽ ‘ശാഹുൽ ഹമീദ്’ എന്ന് പേരുള്ള ഒരു ക്വബ്‌റിടമുണ്ടെന്നും അദ്ദേഹം സയ്യിദ് അബ്ദുൽ ക്വാദിറിന്റെ മക്കളിലൊരാളാണെന്ന് അവർ വിശ്വസിക്കുന്നുണ്ടെന്നും അദ്ദേഹം പറഞ്ഞു. ഇന്ത്യക്കാർ ആ ക്വബ്‌റിന് മുന്നിൽ അല്ലാഹുവിന് ചെയ്യുന്നതുപോലെ സുജൂദ് ചെയ്യുകയാണെന്നും, ഇന്ത്യയിലെ എല്ലാ പട്ടണങ്ങളിലും ഗ്രാമങ്ങളിലും സയ്യിദ് അബ്ദുൽ ക്വാദിറിന്റെ ക്വബ്‌റിനെ പ്രതിനിധീകരിക്കുന്ന ആരാധനാലയങ്ങൾ ഉണ്ടെന്നും അദ്ദേഹം കൂട്ടിച്ചേർത്തു. അവിടങ്ങളിലെ മുസ്‌ലിംകൾ തിരിയുന്ന ക്വിബ്‌ലയും അവരുടെ ആവശ്യങ്ങളിലും ദുരിതങ്ങളിലും അഭയം തേടുന്ന സ്ഥലവും അതാണ്. അതിന്റെ നടത്തിപ്പുകാർക്കും പരിപാലകർക്കും അതിന്റെ ആഘോഷങ്ങൾക്കും മറ്റുമായി അവർ ചെലവഴിക്കുന്ന പണം ലോകത്തിലെ മുഴുവൻ ദരിദ്രർക്കും വീതിച്ചു നൽകിയിരുന്നെങ്കിൽ അവരെല്ലാം ധനികരായി മാറുമായിരുന്നു!

ഇതായിരുന്നു ആ എഴുത്തുകാരൻ എനിക്കയച്ച കത്ത്. ആ കത്ത് ഞാൻ വായിച്ചു തീർന്നപ്പോൾ, ദുഃഖവും സങ്കടവും കാരണം ലോകം എന്റെ കണ്ണുകൾ ഇരുണ്ടുപോയെന്ന് അല്ലാഹുവിന് അറിയാം. ഇസ്‌ലാമിന്റെ അവസ്ഥ ഇങ്ങനെയായി മാറിയതിലുള്ള ദുഃഖത്താൽ എനിക്ക് ചുറ്റുമുള്ളതൊന്നും കാണാൻ കഴിഞ്ഞില്ല. ഇസ്‌ലാമിനെ അറിഞ്ഞതിന് ശേഷം അവരതിനെ നിഷേധിച്ചു. ഉയർത്തിയതിന് ശേഷം താഴ്ത്തി. അതിനെ പുതിയ വഴികളിലേക്ക് കൊണ്ടുപോയി. അത് ഒരിക്കലും താങ്ങാൻ കഴിയുന്നതല്ല.

മരിച്ച ഒരാളുടെ ക്വബ്‌റിന് മുന്നിൽ റുകൂഉം സുജൂദും ചെയ്യുന്ന ആ മുസ്‌ലിംകളുടെ ഈ അവസ്ഥ കാണുമ്പോൾ, ഒരു തുള്ളി കണ്ണുനീർ പോലും പൊഴിക്കാതെ ഒരു കണ്ണും എങ്ങനെ അവശേഷിക്കും? ഒരുപക്ഷേ ആ മരിച്ച വ്യക്തിയെക്കാൾ ജീവിതത്തിൽ മഹാനായ ഒരാൾ ആ കൂട്ടത്തിലുണ്ടായിരിക്കും, അദ്ദേഹത്തിന്റെ മരണശേഷം അങ്ങനെയായിരിക്കാൻ കൂടുതൽ സാധ്യതയുണ്ട്!

ഏകദൈവവിശ്വാസികളായ മുസ്‌ലിംകൾ ബഹുദൈവവിശ്വാസികളിൽ വെച്ച് ഏറ്റവും കൂടുതൽ ബഹുദൈവത്വം വെച്ചുപുലർത്തുന്നവരും, ദേവന്മാരുടെയും ആരാധനാമൂർത്തികളുടെയും എണ്ണത്തിൽ ഏറ്റവും വലിയ വൃത്തം സൃഷ്ടിക്കുന്നവരും ആയിരിക്കുന്നത് കാണുമ്പോൾ, ഏത് ഹൃദയമാണ് മിടിക്കാതെയും ദുഃഖം കൊണ്ട് പിടക്കാതെയും ഒരു നിമിഷം പോലും അതിന്റെ ഉടമസ്ഥന്റെ നെഞ്ചിൽ അടങ്ങിയിരിക്കുക?

മുസ്‌ലിംകൾ എന്തുകൊണ്ടാണ് ക്രിസ്ത്യാനികളോട് ത്രിത്വത്തെക്കുറിച്ച് നീരസം കാണിക്കുന്നത്? എന്തുകൊണ്ടാണ് ത്രിത്വത്തെക്കുറിച്ച് അവരോട് മനസ്സിൽ അത്രയും വെറുപ്പും വിദ്വേഷവും വെച്ച് പുലർത്തുന്നത്? എന്തിനാണ് അവരുമായി സംവാദ-സമരങ്ങളിൽ ഏർപ്പെടുന്നത്? അവർ അല്ലാഹുവിനോടുള്ള ശിർക്കിൽ മുസ്‌ലിംകൾ എത്തിച്ചേർന്ന അത്രയും എത്തിച്ചേർന്നിട്ടില്ല, അവരതിൽ അത്രയധികം മുങ്ങിയിട്ടുമില്ല.

ക്രിസ്ത്യാനികൾ മൂന്ന് ദൈവങ്ങളെയാണ് ആരാധിക്കുന്നത്. പക്ഷേ, ഈ ബഹുത്വവും യുക്തിക്ക് നിരക്കാത്തതാണെന്ന് അവർക്ക് തോന്നുന്നതിനാൽ അവർ അതിനെ ഭംഗിയാക്കി പറയുന്നു; മൂന്നാണെങ്കിലും അത് ഒന്നാണെന്ന്. എന്നാൽ മുസ്‌ലിംകളോ, ആയിരക്കണക്കിന് ദൈവങ്ങളെ ആരാധിക്കുന്നു. അതിൽ മിക്കതും മരത്തടികളും മരിച്ചവരുടെ ജഡങ്ങളും കല്ലുകളും ആണെന്ന് അവർ അറിയുന്നില്ല!

ഒരാൾ അറിയാതെ തന്നെ തന്റെ മനസ്സിൽ ചില കാര്യങ്ങൾ ഒളിപ്പിച്ചു വെക്കാറുണ്ട്. അതുപോലെ തന്റെ മനസ്സിൽ ഒരു വിശ്വാസം നിലനിർത്താറുമുണ്ട്. ക്വബ്‌റിൽ കിടക്കുന്ന ആളുകളോട് തങ്ങളുടെ ആവശ്യങ്ങൾക്കായി അഭയം തേടുകയും ആരാധിക്കപ്പെടുന്ന ദൈവത്തോട് യാചിക്കുന്നതുപോലെ അവരോട് യാചിക്കുകയും ചെയ്യുന്ന മുസ്‌ലിംകളെക്കാൾ ഇതിന് മറ്റൊരു ഉദാഹരണം ഞാൻ കാണുന്നില്ല. എന്നിട്ട് ആരെങ്കിലും അവരെ കുറ്റപ്പെടുത്തിയാൽ അവർ പറയും: ‘ഞങ്ങൾ അവരെ ആരാധിക്കുന്നില്ല, അല്ലാഹുവിലേക്ക് ഒരു ഇടയാളനെ മാത്രമായിട്ടാണ് അവരെ കാണുന്നത്.’ എന്നാൽ അവർ ചെയ്യുന്ന പ്രവൃത്തിയാണ് യഥാർഥത്തിൽ ആരാധനയെന്നും ആരാധിക്കപ്പെടുന്ന ദൈവത്തിന്റെ ഏറ്റവും വലിയ ലക്ഷണങ്ങളിലൊന്നാണ് അവന്റെ അടിമകൾ അവർക്കു മുന്നിൽ താഴ്മയോടെ നിൽക്കുകയും അവന്റെ സഹായവും പിന്തുണയും തേടുകയും ചെയ്യുക എന്നതെന്നും അവർ അറിയുന്നില്ല. അതിനാൽ അവർ യഥാർഥത്തിൽ, അറിയാതെതന്നെ ആ മരിച്ചവരെ ആരാധിക്കുന്നവരാണ്.

ഇസ്‌ലാം ഏകദൈവവിശ്വാസവുമായി കടന്നുവന്നത് മുസ്‌ലിംകളുടെ ആത്മാവിനെ ഉയർത്താനും അവരുടെ ഹൃദയങ്ങളിൽ അന്തസ്സും അഭിമാനവും ആത്മാഭിമാനവും നട്ടുപിടിപ്പിക്കാനുമാണ്. അവരുടെ കഴുത്തുകളെ അടിമത്തത്തിൽനിന്ന് മോചിപ്പിക്കാനുമാണ്. അതിനാൽ അവരിൽ ചെറിയവർ വലിയവരുടെ മുന്നിൽ തല കുനിക്കില്ല, ദുർബലർ ശക്തരെ ഭയപ്പെടില്ല, അധികാരിക്ക് നീതിയുടെയും സത്യത്തിന്റെയും അടിസ്ഥാനത്തിലല്ലാതെ അധികാരം ഉണ്ടാകില്ല. ഏകദൈവവിശ്വാസത്തിന്റെ രഹസ്യം കാരണം ഇസ്‌ലാം ആദ്യകാല മുസ്‌ലിംകളുടെ മനസ്സിൽ നല്ല സ്വാധീനം ചെലുത്തി. അവർക്ക് അന്തസ്സും അഭിമാനവും ആത്മാഭിമാനവും ഉണ്ടായിരുന്നു. അതിക്രമം കാണിച്ചാൽ അക്രമിയുടെ കൈകളിൽ അവർ പ്രഹരിച്ചിരുന്നു. ഒരു ഭരണാധികാരി അതിരുകടന്നാൽ അവനോട് അവർ പറയും: ‘നിങ്ങളുടെ സ്വന്തം സ്ഥാനത്തെ അതിരുകടന്ന് കാണരുത്, നിങ്ങളുടെ പരിധിയിൽ നിന്ന് പുറത്തുപോകരുത്. നിങ്ങൾ ഒരു അടിമയും സൃഷ്ടിയുമാണ്, ആരാധിക്കപ്പെടുന്ന ഒരു ദൈവമല്ല, അല്ലാഹുവല്ലാതെ മറ്റൊരു ആരാധ്യനില്ലെന്ന് നിങ്ങൾ അറിയുക.’

ഇതായിരുന്നു ഏകദൈവവിശ്വാസത്തിന്റെ കാലഘട്ടത്തിലെ മുസ്‌ലിംകളുടെ ആത്മാവിന്റെ ഒരു ചിത്രം. എന്നാൽ ഇന്ന്, അവരുടെ വിശ്വാസത്തിൽ ചിലപ്പോൾ പ്രകടമായും ചിലപ്പോൾ രഹസ്യമായും ശിർക്ക് കടന്നുകൂടിയിരിക്കുന്നു. അവരുടെ കഴുത്തുകൾ കീഴടങ്ങി, തലകൾ കുനിഞ്ഞു, ആത്മാക്കൾ ദുർബലമായി, അവരുടെ ആത്മാഭിമാനം നശിച്ചു, അവർ അപമാനത്തിന്റെ പാതയിൽ സംതൃപ്തരായി, താഴ്ന്ന നിലയിലേക്ക് അവർ ഒതുങ്ങി. അതുവഴി അവരുടെ ശത്രുക്കൾ അവരിലേക്ക് വഴികൾ കണ്ടെത്തി, അവരുടെ മാർഗങ്ങളെ കീഴടക്കി, അവരുടെ ആത്മാക്കളെയും സ്വത്തുക്കളെയും രാജ്യങ്ങളെയും ഭവനങ്ങളെയും അവർ സ്വന്തമാക്കി. അങ്ങനെ അവർ തികച്ചും നഷ്ടക്കാരായി മാറി.

അല്ലാഹുവാണെ, മുസ്‌ലിംകൾ തങ്ങളുടെ പഴയ പ്രതാപം തിരിച്ചുപിടിക്കില്ല. തങ്ങൾക്കു വേണ്ടി അവർ ആഗ്രഹിക്കുന്ന ജീവിതത്തിലെ സന്തോഷവും സമാധാനവും അവർക്ക് ലഭിക്കില്ല. അതിനുമുമ്പ് അവർ നഷ്ടപ്പെടുത്തിയ ഏകദൈവവിശ്വാസം അവർ തിരികെ കൊണ്ടുവന്നാൽ മാത്രമെ അത് സാധ്യമാകൂ. സൂര്യൻ പടിഞ്ഞാറുനിന്ന് ഉദിക്കുന്നതിനെക്കാളും, നദി അതിന്റെ ഉത്ഭവസ്ഥാനത്തേക്ക് തിരികെ ഒഴുകിപ്പോകുന്നതിനെക്കാളും ഏറ്റവും എളുപ്പമാണത്. മുസ്‌ലിംകൾ അല്ലാഹുവിന്റെ മുന്നിൽ നിൽക്കുന്നതുപോലെ ജീലാനിയുടെ മുന്നിൽ നിൽക്കുകയും അല്ലാഹുവിനെ വിളിക്കുന്നതുപോലെ അദ്ദേഹത്തെ വിളിച്ച് ‘നീയാണ് പ്രപഞ്ചത്തെ നിയന്ത്രിക്കുന്നവൻ, നീയാണ് ഭൂമികളുടെയും ആകാശങ്ങളുടെയും നേതാവ്’ എന്ന് പറയുകയും ചെയ്യുന്ന കാലത്തോളം ഇസ്‌ലാമിന് അതിന്റെ പഴയ പ്രതാപം ഒരിക്കലും തിരിച്ചുപിടിക്കാൻ സാധിക്കില്ല.

അല്ലാഹുവിനെ നിന്ദിക്കുകയും അവഗണിക്കുകയും ചെയ്യുന്ന ഒരു ജനതയെ സഹായിക്കാൻ അല്ലാഹുവിന് അവന്റെ സ്വന്തം കാര്യത്തിൽ കൂടുതൽ രോഷമുണ്ട്. അവർക്ക് എന്തെങ്കിലും വിപത്ത് വന്നാൽ, അവനെ ഓർക്കുന്നതിന് മുമ്പ് കല്ലിനെയും ക്വബ്‌റിനെയും വിഗ്രഹങ്ങളെയും ഓർക്കുന്നവർ, അവനെ വിളിക്കുന്നതിന് മുമ്പ് മരത്തടിയെ വിളിക്കുന്നവർ!

രോഗം വന്നാൽ ഞാൻ ആരോടാണ് സഹായം തേടേണ്ടത്? ഈ വിപത്തിനെതിരെ ഞാൻ ആരെയാണ് വിളിക്കേണ്ടത്? പള്ളിപ്പെരുന്നാൾ ദിനങ്ങളിൽ പാനീയങ്ങളിലേക്ക് ഈച്ചകൾ പറന്നുവന്നു പൊതിയുന്നതുപോലെ പോലെ പാറിനടക്കുന്ന ഈജിപ്തിലെ പണ്ഡിതന്മാരെയാണോ ഞാൻ വിളിക്കേണ്ടത്, അതോ ഇസ്‌ലാമിന്റെ തത്ത്വചിന്തകനായിരുന്ന ജമാലുദ്ദീൻ അഫ്ഗാനിയെ കൊന്നവരും രിഫാഇയ്യഃ ത്വരീഖത്തിന്റെ ശൈഖായ അബുൽ ഹുദാ അസ്സയ്യാദിയെ ‘പുനർജീവിപ്പിച്ച’വരുമായ ഇസ്താംബൂളിലെ പണ്ഡിതന്മാരെയാണോ? അതോ, പരിശുദ്ധ കഅ്ബയിലേക്ക് ഹജ്ജ് ചെയ്യുന്നതുപോലെ ഇമാമിന്റെ ക്വബ്‌റിലേക്ക് ഹജ്ജ് ചെയ്യുന്ന ഇറാനിയൻ പണ്ഡിതന്മാരെയാണോ, അതോ ആ പുസ്തകത്തിന്റെ എഴുത്തുകാരനെപ്പോലുള്ള ഇന്ത്യയിലെ പണ്ഡിതന്മാരെയാണോ?

ഓ, മുസ്‌ലിം ഉമ്മത്തിന്റെ നേതാക്കന്മാരേ, ഭരണാധികാരികളേ, സാധാരണക്കാരുടെ ശിർക്കിനെയും അവരുടെ തെറ്റായ വിശ്വാസങ്ങളെയും ഞങ്ങൾ ക്ഷമിക്കുന്നു. ഞങ്ങൾ പറയും: ‘സാധാരണക്കാർക്ക് അറിവും വിവരവും വളരെ കുറവാണ്, ദൈവികതയെ വിഗ്രഹങ്ങളിലും പ്രതിമകളിലും ക്വബ്‌റുകളിലും അല്ലാതെ അവർക്ക് മനസ്സിലാക്കാൻ കഴിയില്ല.’

എന്നാൽ നിങ്ങൾക്കോ? നിങ്ങൾ അല്ലാഹുവിന്റെ ഗ്രന്ഥം പാരായണം ചെയ്യുകയും അവന്റെ വിശേഷണങ്ങൾ വായിക്കുകയും ചെയ്യുന്നവരാണ്. ഈ ക്വുര്‍ആൻ വചനങ്ങളുടെ അർഥം നിങ്ങൾക്ക് മനസ്സിലാകുന്നില്ലേ?

قُل لَّا يَعْلَمُ مَن فِى ٱلسَّمَٰوَٰتِ وَٱلْأَرْضِ ٱلْغَيْبَ إِلَّا ٱللَّهُ ۚ

(നബിയേ,) പറയുക; ആകാശങ്ങളിലും ഭൂമിയിലും ഉള്ളവരാരും അദൃശ്യകാര്യം അറിയുകയില്ല;  (ഖു൪ആന്‍: 27/65)

قُل لَّآ أَمْلِكُ لِنَفْسِى نَفْعًا وَلَا ضَرًّا إِلَّا مَا شَآءَ ٱللَّهُ ۚ

(നബിയേ,) പറയുക: എന്‍റെ സ്വന്തം ദേഹത്തിന് തന്നെ ഉപകാരമോ, ഉപദ്രവമോ വരുത്തല്‍ എന്‍റെ അധീനത്തില്‍ പെട്ടതല്ല. അല്ലാഹു ഉദ്ദേശിച്ചതൊഴികെ. (ഖു൪ആന്‍: 7/188)

وَمَا رَمَيْتَ إِذْ رَمَيْتَ وَلَٰكِنَّ ٱللَّهَ رَمَىٰ ۚ

(നബിയേ,) നീ എറിഞ്ഞ സമയത്ത് നീ എറിഞ്ഞിട്ടുമില്ല. പക്ഷെ അല്ലാഹുവാണ് എറിഞ്ഞത്‌. (ഖു൪ആന്‍: 8/17)

നിങ്ങൾ രാവിലെയും വൈകുന്നേരവും യാത്ര ചെയ്യുമ്പോഴും എപ്പോഴും പറയാറുണ്ട്: ‘എല്ലാ നന്മയും മുൻഗാമികളെ പിന്തുടരുന്നതിലാണ്, എല്ലാ തിന്മയും പിൻഗാമികളുടെ പുതിയ ആചാര കാര്യങ്ങളിലുമാണ്.’ മുൻഗാമികളിൽ ആരെങ്കിലും ഒരു ക്വബ്ർ കുമ്മായം തേച്ചതായോ ഒരു ക്വബ്‌റിടത്തെ ഇടയാളനായി കണ്ടതായോ നിങ്ങൾക്ക് അറിയാമോ? പ്രവാചകനോടോ അദ്ദേഹത്തിന്റെ അനുയായികളോടോ കുടുംബാംഗങ്ങളോടോ ആരെങ്കിലും ഒരു ആവശ്യം സാധിക്കാനോ ഒരു ദുരിതം നീക്കാനോ വേണ്ടി അവരുടെ ക്വബ്‌റിനരികിൽ നിന്ന് ആവശ്യപ്പെട്ടതായി നിങ്ങൾക്ക് അറിയാമോ?

രിഫാഇ, ദസൂഖി, ജീലാനി, ബദവി എന്നിവർക്ക് അല്ലാഹുവിന്റെ അടുക്കൽ പ്രവാചകന്മാരെക്കാളും റസൂലുമാരെക്കാളും സ്വഹാബികളെക്കാളും താബിഉകളെക്കാളും കൂടുതൽ ബഹുമാനവും ഇടയാള പദവിയുമുണ്ടെന്ന് നിങ്ങൾ വിശ്വസിക്കുന്നുണ്ടോ? പ്രവാചകൻﷺ ചിത്രങ്ങളും പ്രതിമകളും ഉണ്ടാക്കുന്നത് വിലക്കിയത് വെറുതെയാണോ? മുസ്‌ലിംകൾ അവരുടെ ആദ്യകാല ജാഹിലിയ്യത്തിലേക്ക് തിരികെ പോകാതിരിക്കാൻ വേണ്ടിയാണതെന്ന് നിങ്ങൾക്ക് അറിയുമോ? ചിത്രങ്ങളും പ്രതിമകളും ക്വബ്‌റിടങ്ങളും തമ്മിൽ എന്താണ് വ്യത്യാസം; അവയെല്ലാം ശിർക്കിലേക്ക് നയിക്കുകയും ഏകദൈവവിശ്വാസത്തെ നശിപ്പിക്കുകയും ചെയ്യുമ്പോൾ?

അല്ലാഹുവാണെ, ഇതൊന്നും നിങ്ങൾക്ക് അറിയാത്തതല്ല. പക്ഷേ, നിങ്ങൾ ദുൻയാവിനെ ആഖിറത്തിനെക്കാൾ തെരഞ്ഞെടുത്തിരിക്കുന്നു. അതുകൊണ്ട് അല്ലാഹു നിങ്ങളെ അവന്റെ അനുഗ്രഹങ്ങൾ എടുത്തുകളഞ്ഞുകൊണ്ട് ശിക്ഷിച്ചിരിക്കുന്നു. നിങ്ങളുടെ കാര്യങ്ങൾ അവൻ ദുർബലപ്പെടുത്തിയിരിക്കുന്നു. നിങ്ങളുടെ ശത്രുക്കൾക്ക നിങ്ങളുടെമേൽ അവൻ അധികാരം നൽകിയിരിക്കുന്നു. അവർ നിങ്ങളുടെ രാജ്യങ്ങൾ പിടിച്ചെടുക്കുന്നു, നിങ്ങളുടെ പിരടികളെ അടിമകളാക്കുന്നു, നിങ്ങളുടെ ഭവനങ്ങളെ നശിപ്പിക്കുന്നു. അല്ലാഹു അതികഠിനമായി ശിക്ഷിക്കുന്നവനാകുന്നു.

 

മുസ്ത്വഫ ലുത്വുഫി അൽമൻഫലൂത്വി

വിവര്‍ത്തനം : ഇ.യൂസുഫ് സാഹിബ് നദുവി, ഓച്ചിറ

 

 

www.kanzululoom.com