അന്ത്യനാളുമായി ബന്ധപ്പെട്ട വിഷയങ്ങൾ വിഭിന്ന രീതികളിൽ വിശുദ്ധ ഖുർആൻ ആദ്യാന്തം പരാമർശിച്ചത് ഏതൊരാൾക്കും നന്നേ വ്യക്തമാണ്. പ്രസ്‌തുത പരാമർശങ്ങളിൽനിന്ന് ഏതാനും ഭാഗങ്ങളാണ് ഈ അദ്ധ്യായം.

അല്ലാഹുവിൽ നിന്നുള്ള പ്രഖ്യാപനം

അന്ത്യനാളിൻറെ സംഭവ്യതക്കുള്ള ഏറ്റവും വലിയ തെളിവ് അതിനെക്കുറിച്ചുള്ള അല്ലാഹുവിന്റെ പ്രഖ്യാപനങ്ങളാകുന്നു. പ്രസ്തുത വിശ്വാസം മനസ്സിൽ രൂഢമൂലമാകുന്നതിനും ഹൃദയത്തിൽ വേരുറക്കുന്നതിനും ഭിന്നമാർന്ന ശൈലികളാണ് വിശുദ്ധ ഖുർആനിൽ അല്ലാഹു ഉപയോഗിച്ചിരിക്കുന്നത്. അവയിൽ ഏതാനും ശൈലികളും പ്രഖ്യാപനങ്ങളുമാണ് ഇവിടെ നൽകുന്നത്.

1. ആശയങ്ങളെ ശക്തിപ്പെടുത്തുവാനുള്ള അവ്യയങ്ങൾ ഉപയോഗിച്ച് വചനങ്ങളിലൂടെ അന്ത്യനാളിന്റെ സംഭവ്യത ഉറപ്പിച്ച് പറയുക. അല്ലാഹു പറയുന്നു:

إِنَّ ٱلسَّاعَةَ ءَاتِيَةٌ أَكَادُ أُخْفِيهَا لِتُجْزَىٰ كُلُّ نَفْسِۭ بِمَا تَسْعَىٰ

തീര്‍ച്ചയായും അന്ത്യസമയം വരിക തന്നെ ചെയ്യും. ഓരോ വ്യക്തിക്കും താന്‍ പ്രയത്നിക്കുന്നതിനനുസൃതമായി പ്രതിഫലം നല്‍കപ്പെടാന്‍ വേണ്ടി ഞാനത് ഗോപ്യമാക്കി വെച്ചേക്കാം. (ഖു൪ആന്‍:20/15)

وَمَا خَلَقْنَا ٱلسَّمَٰوَٰتِ وَٱلْأَرْضَ وَمَا بَيْنَهُمَآ إِلَّا بِٱلْحَقِّ ۗ وَإِنَّ ٱلسَّاعَةَ لَـَٔاتِيَةٌ ۖ فَٱصْفَحِ ٱلصَّفْحَ ٱلْجَمِيلَ

ആകാശങ്ങളും ഭൂമിയും അവ രണ്ടിനും ഇടയിലുള്ളതും യുക്തിപൂര്‍വ്വകമായല്ലാതെ നാം സൃഷ്ടിച്ചിട്ടില്ല. തീര്‍ച്ചയായും അന്ത്യസമയം വരുക തന്നെ ചെയ്യും. അതിനാല്‍ നീ ഭംഗിയായി മാപ്പ് ചെയ്ത് കൊടുക്കുക. (ഖു൪ആന്‍:15/85)

إِنَّمَا تُوعَدُونَ لَوَٰقِعٌ

തീര്‍ച്ചയായും നിങ്ങളോട് താക്കീത് ചെയ്യപ്പെടുന്ന കാര്യം സംഭവിക്കുന്നതു തന്നെയാകുന്നു. (ഖു൪ആന്‍:77/7)

2. അന്ത്യനാളിന്റെ ആഗമനവും സംഭവ്യതയും സത്യം ചെയ്‌ത്‌ ഉറപ്പിച്ച്‌ പറയുക. അല്ലാഹു പറയുന്നു:

وَٱلذَّٰرِيَٰتِ ذَرْوًا ‎﴿١﴾‏ فَٱلْحَٰمِلَٰتِ وِقْرًا ‎﴿٢﴾‏ فَٱلْجَٰرِيَٰتِ يُسْرًا ‎﴿٣﴾‏ فَٱلْمُقَسِّمَٰتِ أَمْرًا ‎﴿٤﴾‏ إِنَّمَا تُوعَدُونَ لَصَادِقٌ ‎﴿٥﴾‏ وَإِنَّ ٱلدِّينَ لَوَٰقِعٌ ‎﴿٦﴾‏

ശക്തിയായി (പൊടി) വിതറിക്കൊണ്ടിരിക്കുന്നവ (കാറ്റുകള്‍) തന്നെയാണ, സത്യം. (ജല) ഭാരം വഹിക്കുന്ന (മേഘങ്ങള്‍) തന്നെയാണ, സത്യം. നിഷ്പ്രയാസം സഞ്ചരിക്കുന്നവ (കപ്പലുകള്‍) തന്നെയാണ, സത്യം! കാര്യങ്ങള്‍ വിഭജിച്ചു കൊടുക്കുന്നവര്‍ (മലക്കുകള്‍) തന്നെയാണ, സത്യം. തീര്‍ച്ചയായും നിങ്ങള്‍ക്കു താക്കീത് നല്‍കപ്പെടുന്ന കാര്യം സത്യമായിട്ടുള്ളത് തന്നെയാകുന്നു. തീര്‍ച്ചയായും ന്യായവിധി സംഭവിക്കുന്നതു തന്നെയാകുന്നു. (ഖു൪ആന്‍:51/1-6)

وَٱلطُّورِ ‎﴿١﴾‏ وَكِتَٰبٍ مَّسْطُورٍ ‎﴿٢﴾‏ فِى رَقٍّ مَّنشُورٍ ‎﴿٣﴾‏ وَٱلْبَيْتِ ٱلْمَعْمُورِ ‎﴿٤﴾‏ وَٱلسَّقْفِ ٱلْمَرْفُوعِ ‎﴿٥﴾‏ وَٱلْبَحْرِ ٱلْمَسْجُورِ ‎﴿٦﴾‏ إِنَّ عَذَابَ رَبِّكَ لَوَٰقِعٌ ‎﴿٧﴾‏ مَّا لَهُۥ مِن دَافِعٍ ‎﴿٨﴾

ത്വൂര്‍ പര്‍വ്വതം തന്നെയാണ, സത്യം. എഴുതപ്പെട്ട ഗ്രന്ഥം തന്നെയാണ, സത്യം.  നിവര്‍ത്തിവെച്ച തുകലില്‍, അധിവാസമുള്ള മന്ദിരം തന്നെയാണ, സത്യം. ഉയര്‍ത്തപ്പെട്ട മേല്‍പുര (ആകാശം) തന്നെയാണ, സത്യം. (5) നിറഞ്ഞ സമുദ്രം തന്നെയാണ, സത്യം. തീര്‍ച്ചയായും നിന്‍റെ രക്ഷിതാവിന്‍റെ ശിക്ഷ സംഭവിക്കുന്നത് തന്നെയാകുന്നു. അതു തടുക്കുവാന്‍ ആരും തന്നെയില്ല. (ഖു൪ആന്‍:52/1-8)

3. അന്ത്യനാൾ സംഭവിക്കുമെന്ന് തന്റെ ദൂതനെക്കൊണ സത്യം ചെയ്യിച്ച് പറയിപ്പിക്കുക. അല്ലാഹു പറയുന്നു:

وَقَالَ ٱلَّذِينَ كَفَرُوا۟ لَا تَأْتِينَا ٱلسَّاعَةُ ۖ قُلْ بَلَىٰ وَرَبِّى لَتَأْتِيَنَّكُمْ عَٰلِمِ ٱلْغَيْبِ ۖ

ആ അന്ത്യസമയം ഞങ്ങള്‍ക്ക് വന്നെത്തുകയില്ലെന്ന് സത്യനിഷേധികള്‍ പറഞ്ഞു. (നബിയെ) താങ്കൾ പറയുക: അല്ല, എന്‍റെ റബ്ബിനെ തന്നെയാണെ സത്യം, അത് നിങ്ങള്‍ക്ക് വന്നെത്തുക തന്നെ ചെയ്യും. അദൃശ്യകാര്യങ്ങള്‍ അറിയുന്നവനായ (റബ്ബ്). (ഖുർആൻ:34/3)

وَيَسْتَنۢبِـُٔونَكَ أَحَقٌّ هُوَ ۖ قُلْ إِى وَرَبِّىٓ إِنَّهُۥ لَحَقٌّ ۖ وَمَآ أَنتُم بِمُعْجِزِينَ

ഇത് സത്യമാണോ എന്ന് നിന്നോട് അവര്‍ അന്വേഷിക്കുന്നു. (നബിയെ) താങ്കൾ പറയുക: അതെ; എന്‍റെ റബ്ബിനെ തന്നെയാണെ സത്യം! തീര്‍ച്ചയായും അത് സത്യം തന്നെയാണ്‌. നിങ്ങള്‍ക്ക് തോല്‍പിച്ചു കളയാനാവില്ല. (ഖുർആൻ:10/53)

زَعَمَ ٱلَّذِينَ كَفَرُوٓا۟ أَن لَّن يُبْعَثُوا۟ ۚ قُلْ بَلَىٰ وَرَبِّى لَتُبْعَثُنَّ ثُمَّ لَتُنَبَّؤُنَّ بِمَا عَمِلْتُمْ ۚ وَذَٰلِكَ عَلَى ٱللَّهِ يَسِيرٌ

തങ്ങള്‍ ഉയിര്‍ത്തെഴുന്നേല്‍പിക്കപ്പെടുകയില്ലെന്ന് ആ അവിശ്വാസികള്‍ ജല്‍പിച്ചു.(നബിയെ) താങ്കൾ പറയുക: അതെ; എന്‍റെ റബ്ബിനെ തന്നെയാണെ സത്യം, നിങ്ങള്‍ ഉയിര്‍ത്തെഴുന്നേല്‍പിക്കപ്പെടും. പിന്നീട് നിങ്ങള്‍ പ്രവര്‍ത്തിച്ചതിനെപ്പറ്റി നിങ്ങള്‍ക്ക് വിവരമറിയിക്കപ്പെടുകയും ചെയ്യും. അത് അല്ലാഹുവെ സംബന്ധിച്ചിടത്തോളം എളുപ്പമുള്ളതാകുന്നു. (ഖുർആൻ:64/7)

അന്ത്യനാളിന്റെ സംഭവ്യതയെ കളവാക്കുന്നവരെ ആക്ഷേപിക്കുക.

قَدْ خَسِرَ ٱلَّذِينَ كَذَّبُوا۟ بِلِقَآءِ ٱللَّهِ وَمَا كَانُوا۟ مُهْتَدِينَ

അല്ലാഹുവുമായി കണ്ടുമുട്ടുന്നതിനെ നിഷേധിച്ചുതള്ളിയവര്‍ നഷ്ടത്തിലായിരിക്കുന്നു. അവര്‍ സന്‍മാര്‍ഗം പ്രാപിക്കുന്നവരായതുമില്ല. (ഖുർആൻ:10/45)

بَلِ ٱدَّٰرَكَ عِلْمُهُمْ فِى ٱلْـَٔاخِرَةِ ۚ بَلْ هُمْ فِى شَكٍّ مِّنْهَا ۖ بَلْ هُم مِّنْهَا عَمُونَ

അല്ല, അവരുടെ അറിവ് പരലോകത്തില്‍ എത്തി നില്‍ക്കുകയാണ്‌. അല്ല, അവര്‍ അതിനെപ്പറ്റി സംശയത്തിലാകുന്നു. അല്ല, അവര്‍ അതിനെപ്പറ്റി അന്ധതയില്‍ കഴിയുന്നവരത്രെ. (ഖുർആൻ:27/66)

 أَلَآ إِنَّ ٱلَّذِينَ يُمَارُونَ فِى ٱلسَّاعَةِ لَفِى ضَلَٰلِۭ بَعِيدٍ

ശ്രദ്ധിക്കുക: തീര്‍ച്ചയായും അന്ത്യസമയത്തിന്‍റെ കാര്യത്തില്‍ തര്‍ക്കം നടത്തുന്നവര്‍ വിദൂരമായ പിഴവില്‍ തന്നെയാകുന്നു. (ഖുർആൻ:42/18)

അന്ത്യനാളിന്റെ സംഭവ്യതയിൽ വിശ്വസിക്കുന്ന മുഅ്മിനീങ്ങളെ പ്രശംസിക്കുക

الٓمٓ ‎﴿١﴾‏ ذَٰلِكَ ٱلْكِتَٰبُ لَا رَيْبَ ۛ فِيهِ ۛ هُدًى لِّلْمُتَّقِينَ ‎﴿٢﴾‏ ٱلَّذِينَ يُؤْمِنُونَ بِٱلْغَيْبِ وَيُقِيمُونَ ٱلصَّلَوٰةَ وَمِمَّا رَزَقْنَٰهُمْ يُنفِقُونَ ‎﴿٣﴾‏ وَٱلَّذِينَ يُؤْمِنُونَ بِمَآ أُنزِلَ إِلَيْكَ وَمَآ أُنزِلَ مِن قَبْلِكَ وَبِٱلْـَٔاخِرَةِ هُمْ يُوقِنُونَ ‎﴿٤﴾‏ أُو۟لَٰٓئِكَ عَلَىٰ هُدًى مِّن رَّبِّهِمْ ۖ وَأُو۟لَٰٓئِكَ هُمُ ٱلْمُفْلِحُونَ ‎﴿٥﴾‏

അലിഫ് ലാം മീം. ഇതാകുന്നു ഗ്രന്ഥം. അതില്‍ സംശയമേയില്ല. സൂക്ഷ്മത പാലിക്കുന്നവര്‍ക്ക് നേര്‍വഴി കാണിക്കുന്നതത്രെ അത്‌. അദൃശ്യകാര്യങ്ങളില്‍ വിശ്വസിക്കുകയും, പ്രാര്‍ത്ഥന അഥവാ നമസ്കാരം മുറപ്രകാരം നിര്‍വഹിക്കുകയും, നാം നല്‍കിയ സമ്പത്തില്‍ നിന്ന് ചെലവഴിക്കുകയും, നിനക്കും നിന്റെമുന്‍ഗാമികള്‍ക്കും നല്‍കപ്പെട്ട സന്ദേശത്തില്‍ വിശ്വസിക്കുകയും, പരലോകത്തില്‍ ദൃഢമായി വിശ്വസിക്കുകയും ചെയ്യുന്നവരത്രെ അവര്‍ (സൂക്ഷ്മത പാലിക്കുന്നവര്‍). അവരുടെ നാഥന്‍ കാണിച്ച നേര്‍വഴിയിലാകുന്നു അവര്‍. അവര്‍ തന്നെയാകുന്നു സാക്ഷാല്‍ വിജയികള്‍. (ഖുർആൻ:2/1-5)

സത്യമായും പുലരുന്ന വാഗ്ദാനവും വൃത്താന്തവുമാണ് അന്ത്യനാളെന്ന് ഉണർത്തുക.

إِنَّ فِي ذَلِكَ لَآيَةً لِمَنْ خَافَ عَذَابَ الْآخِرَةِ ذَلِكَ يَوْمٌ تَجْمُوعٌ لَهُ النَّاسُ وَذَلِكَ يَوْمٌ مَشْهُودٌ

പരലോകശിക്ഷയെ ഭയപ്പെടുന്നവര്‍ക്ക് തീര്‍ച്ചയായും അതില്‍ ദൃഷ്ടാന്തമുണ്ട്‌. സര്‍വ്വ മനുഷ്യരും സമ്മേളിപ്പിക്കപ്പെടുന്ന ഒരു ദിവസമാണത്‌. (സര്‍വ്വരുടെയും) സാന്നിദ്ധ്യമുണ്ടാകുന്ന ഒരു ദിവസമാകുന്നു അത്‌. (ഖുർആൻ:11/103)

إِنَّ وَعْدَ ٱللَّهِ حَقٌّ ۖ

തീര്‍ച്ചയായും അല്ലാഹുവിന്റെ വാഗ്ദാനം സത്യമാകുന്നു. (ഖുർആൻ:31/103)

അടുത്ത് സംഭവിക്കുമെന്ന് പ്രഖ്യാപിക്കുക

إِنَّهُمْ يَرَوْنَهُۥ بَعِيدًا ‎﴿٦﴾‏ وَنَرَىٰهُ قَرِيبًا ‎﴿٧﴾‏

തീര്‍ച്ചയായും അവര്‍ അതിനെ വിദൂരമായി കാണുന്നു. നാം അതിനെ അടുത്തതായും കാണുന്നു. (ഖുർആൻ:70/6-7)

ٱقْتَرَبَتِ ٱلسَّاعَةُ وَٱنشَقَّ ٱلْقَمَرُ

ആ (അന്ത്യ) സമയം അടുത്തു. ചന്ദ്രന്‍ പിളരുകയും ചെയ്തു. (ഖുർആൻ:54/2)

أَتَىٰٓ أَمْرُ ٱللَّهِ فَلَا تَسْتَعْجِلُوهُ ۚ

അല്ലാഹുവിന്‍റെ കല്‍പന വരാനായിരിക്കുന്നു, എന്നാല്‍ നിങ്ങളതിന് ധൃതികൂട്ടേണ്ട. (ഖുർആൻ:16/1)

സൃഷ്ടികൾക്ക് അശക്തമായ പുനഃസൃഷ്ടി തനിക്ക് ഏറെ എളുപ്പമാണെന്ന് വ്യക്തമാക്കുക.

مَّا خَلْقُكُمْ وَلَا بَعْثُكُمْ إِلَّا كَنَفْسٍ وَٰحِدَةٍ ۗ

നിങ്ങളെ സൃഷ്ടിക്കുന്നതും പുനരുജ്ജീവിപ്പിക്കുന്നതും ഒരൊറ്റ വ്യക്തിയെ (സൃഷ്ടിക്കുകയും പുനരുജ്ജീവിപ്പിക്കുകയും ചെയ്യുന്നത്‌) പോലെ മാത്രമാകുന്നു. (ഖുർആൻ:31/28)

أَيَحْسَبُ ٱلْإِنسَٰنُ أَلَّن نَّجْمَعَ عِظَامَهُۥ ‎﴿٣﴾‏ بَلَىٰ قَٰدِرِينَ عَلَىٰٓ أَن نُّسَوِّىَ بَنَانَهُۥ ‎﴿٤﴾

മനുഷ്യന്‍ വിചാരിക്കുന്നുണ്ടോ; നാം അവന്‍റെ എല്ലുകളെ ഒരുമിച്ചുകൂട്ടുകയില്ലെന്ന്‌? അതെ, നാം അവന്‍റെ വിരല്‍ത്തുമ്പുകളെ പോലും ശരിപ്പെടുത്താന്‍ കഴിവുള്ളവനായിരിക്കെ. (ഖുർആൻ:75/3-4)

وَٱتَّخَذُوا۟ مِن دُونِهِۦٓ ءَالِهَةً لَّا يَخْلُقُونَ شَيْـًٔا وَهُمْ يُخْلَقُونَ وَلَا يَمْلِكُونَ لِأَنفُسِهِمْ ضَرًّا وَلَا نَفْعًا وَلَا يَمْلِكُونَ مَوْتًا وَلَا حَيَوٰةً وَلَا نُشُورًا

അവന്ന് പുറമെ പല ദൈവങ്ങളേയും അവര്‍ സ്വീകരിച്ചിരിക്കുന്നു. അവര്‍ (ദൈവങ്ങള്‍) യാതൊന്നും സൃഷ്ടിക്കുന്നില്ല. അവര്‍ തന്നെയും സൃഷ്ടിക്കപ്പെടുകയാകുന്നു. തങ്ങള്‍ക്ക് തന്നെ ഉപദ്രവമോ ഉപകാരമോ അവര്‍ അധീനപ്പെടുത്തുന്നുമില്ല. മരണത്തെയോ ജീവിതത്തെയോ ഉയിര്‍ത്തെഴുന്നേല്‍പിനെയോ അവര്‍ അധീനപ്പെടുത്തുന്നില്ല. (ഖുർആൻ:25/3)

ആദ്യതവണയിലെ സൃഷ്ടിപ്പുകൊണ്ട് തെളിവ് പറയുക

പുനഃസൃഷ്ടിക്കും ഉയിർത്തെഴുന്നേൽപ്പിനും തെളിവായി വിശുദ്ധ ഖുർആൻ പലയിടങ്ങളിലും ഉണർത്തുന്നതും ചിന്തയിലേക്ക് നൽകുന്നതും ആദ്യതവണയിലെ സൃഷ്ടിപ്പാണ്. മനുഷ്യർ പിറന്നുവീഴുന്നു. പക്ഷികൾ വിരിഞ്ഞിറങ്ങുന്നു. മൃഗങ്ങൾ പെറ്റ് പെരുകുന്നു. മത്സ്യങ്ങൾ ജലാശയങ്ങളിൽ നീന്തിത്തുടിക്കുന്നു. സസ്യലതാദികൾ മുളപൊട്ടി വളർന്ന് പന്തലിക്കുന്നു. എല്ലാത്തിനും മനുഷ്യൻ ജീവിക്കുന്ന സാക്ഷിയാണ്. എന്നിട്ടും അവൻ മറ്റൊരിക്കൽ കൂടി ഇത്തരമൊരു സൃഷ്ടിപ്പ് നടക്കുന്നതിനെ നിഷേധിക്കുകയും അതിലുള്ള വിശ്വാസം നിരാകരിക്കുകയും ചെയ്യുന്നു.

ഇത്തരക്കാരോടുള്ള വിശുദ്ധ ഖുർആനിന്റെ ചോദ്യം:

يَٰٓأَيُّهَا ٱلنَّاسُ إِن كُنتُمْ فِى رَيْبٍ مِّنَ ٱلْبَعْثِ فَإِنَّا خَلَقْنَٰكُم مِّن تُرَابٍ ثُمَّ مِن نُّطْفَةٍ ثُمَّ مِنْ عَلَقَةٍ ثُمَّ مِن مُّضْغَةٍ مُّخَلَّقَةٍ وَغَيْرِ مُخَلَّقَةٍ لِّنُبَيِّنَ لَكُمْ ۚ وَنُقِرُّ فِى ٱلْأَرْحَامِ مَا نَشَآءُ إِلَىٰٓ أَجَلٍ مُّسَمًّى ثُمَّ نُخْرِجُكُمْ طِفْلًا ثُمَّ لِتَبْلُغُوٓا۟ أَشُدَّكُمْ ۖ وَمِنكُم مَّن يُتَوَفَّىٰ وَمِنكُم مَّن يُرَدُّ إِلَىٰٓ أَرْذَلِ ٱلْعُمُرِ لِكَيْلَا يَعْلَمَ مِنۢ بَعْدِ عِلْمٍ شَيْـًٔا ۚ وَتَرَى ٱلْأَرْضَ هَامِدَةً فَإِذَآ أَنزَلْنَا عَلَيْهَا ٱلْمَآءَ ٱهْتَزَّتْ وَرَبَتْ وَأَنۢبَتَتْ مِن كُلِّ زَوْجِۭ بَهِيجٍ ‎﴿٥﴾ ذَٰلِكَ بِأَنَّ ٱللَّهَ هُوَ ٱلْحَقُّ وَأَنَّهُۥ يُحْىِ ٱلْمَوْتَىٰ وَأَنَّهُۥ عَلَىٰ كُلِّ شَىْءٍ قَدِيرٌ ‎﴿٦﴾‏ وَأَنَّ ٱلسَّاعَةَ ءَاتِيَةٌ لَّا رَيْبَ فِيهَا وَأَنَّ ٱللَّهَ يَبْعَثُ مَن فِى ٱلْقُبُورِ ‎﴿٧﴾‏

മനുഷ്യരേ, ഉയിര്‍ത്തെഴുന്നേല്‍പിനെ പറ്റി നിങ്ങള്‍ സംശയത്തിലാണെങ്കില്‍ (ആലോചിച്ച് നോക്കുക:) തീര്‍ച്ചയായും നാമാണ് നിങ്ങളെ മണ്ണില്‍ നിന്നും,പിന്നീട് ബീജത്തില്‍ നിന്നും, പിന്നീട് ഭ്രൂണത്തില്‍ നിന്നും, അനന്തരം രൂപം നല്‍കപ്പെട്ടതും രൂപം നല്‍കപ്പെടാത്തതുമായ മാംസപിണ്ഡത്തില്‍ നിന്നും സൃഷ്ടിച്ചത്‌. നാം നിങ്ങള്‍ക്ക് കാര്യങ്ങള്‍ വിശദമാക്കിത്തരാന്‍ വേണ്ടി (പറയുകയാകുന്നു.) നാം ഉദ്ദേശിക്കുന്നതിനെ നിശ്ചിതമായ ഒരു അവധിവരെ നാം ഗര്‍ഭാശയങ്ങളില്‍ താമസിപ്പിക്കുന്നു. പിന്നീട് നിങ്ങളെ നാം ശിശുക്കളായി പുറത്ത് കൊണ്ടു വരുന്നു. അനന്തരം നിങ്ങള്‍ നിങ്ങളുടെ പൂര്‍ണ്ണ ശക്തി പ്രാപിക്കുന്നതു വരെ (നാം നിങ്ങളെ വളര്‍ത്തുന്നു.) (നേരത്തെ) ജീവിതം അവസാനിപ്പിക്കപ്പെടുന്നവരും നിങ്ങളുടെ കൂട്ടത്തിലുണ്ട്‌. അറിവുണ്ടായിരുന്നതിന് ശേഷം യാതൊന്നും അറിയാതാകും വിധം ഏറ്റവും അവശമായ പ്രായത്തിലേക്ക് മടക്കപ്പെടുന്നവരും നിങ്ങളുടെ കൂട്ടത്തിലുണ്ട്‌. ഭൂമി വരണ്ടു നിര്‍ജീവമായി കിടക്കുന്നതായി നിനക്ക് കാണാം. എന്നിട്ട് അതിന്‍മേല്‍ നാം വെള്ളം ചൊരിഞ്ഞാല്‍ അത് ഇളകുകയും വികസിക്കുകയും, കൌതുകമുള്ള എല്ലാതരം ചെടികളേയും അത് മുളപ്പിക്കുകയും ചെയ്യുന്നു. അതെന്തുകൊണ്ടെന്നാല്‍ അല്ലാഹു തന്നെയാണ് സത്യമായുള്ളവന്‍. അവന്‍ മരിച്ചവരെ ജീവിപ്പിക്കും. അവന്‍ ഏത് കാര്യത്തിനും കഴിവുള്ളവനാണ്‌. അന്ത്യസമയം വരിക തന്നെചെയ്യും. അതില്‍ യാതൊരു സംശയവുമില്ല. ഖബ്‌റുകളിലുള്ളവരെ അല്ലാഹു ഉയിര്‍ത്തെഴുന്നേല്‍പിക്കുകയും ചെയ്യും.  (ഖുർആൻ:22/5-7)

വലിയതും ഭാരിച്ചതും സൃഷ്ടിച്ച നാഥന് ചെറിയത് സൃഷ്ടിക്കൽ ക്ഷിപ്രസാധ്യമാണെന്ന് ഉണർത്തുക.

മനുഷ്യരേക്കാൾ വലിയതും ശക്തിമത്തായതുമായ സൃഷ്ടിപ്പ് നടത്തിയ അല്ലാഹുവിന് പുനഃസൃഷ്ടി നടത്തൽ ഒരിക്കലും ഭാരിച്ചതല്ല. അല്ലാഹു പറയുന്നു:

أَوَلَمْ يَرَوْا۟ أَنَّ ٱللَّهَ ٱلَّذِى خَلَقَ ٱلسَّمَٰوَٰتِ وَٱلْأَرْضَ وَلَمْ يَعْىَ بِخَلْقِهِنَّ بِقَٰدِرٍ عَلَىٰٓ أَن يُحْـِۧىَ ٱلْمَوْتَىٰ ۚ بَلَىٰٓ إِنَّهُۥ عَلَىٰ كُلِّ شَىْءٍ قَدِيرٌ

ആകാശങ്ങളും ഭൂമിയും സൃഷ്ടിക്കുകയും അവയെ സൃഷ്ടിച്ചതുകൊണ്ട് ക്ഷീണിക്കാതിരിക്കുകയും ചെയ്ത അല്ലാഹു മരിച്ചവരെ ജീവിപ്പിക്കാന്‍ കഴിവുള്ളവന്‍ തന്നെയാണെന്ന് അവര്‍ക്ക് കണ്ടുകൂടെ? അതെ; തീര്‍ച്ചയായും അവന്‍ ഏതു കാര്യത്തിനും കഴിവുള്ളവനാകുന്നു.(ഖുർആൻ:46/33)

ذَٰلِكَ جَزَآؤُهُم بِأَنَّهُمْ كَفَرُوا۟ بِـَٔايَٰتِنَا وَقَالُوٓا۟ أَءِذَا كُنَّا عِظَٰمًا وَرُفَٰتًا أَءِنَّا لَمَبْعُوثُونَ خَلْقًا جَدِيدًا ‎﴿٩٨﴾‏ ۞ أَوَلَمْ يَرَوْا۟ أَنَّ ٱللَّهَ ٱلَّذِى خَلَقَ ٱلسَّمَٰوَٰتِ وَٱلْأَرْضَ قَادِرٌ عَلَىٰٓ أَن يَخْلُقَ مِثْلَهُمْ وَجَعَلَ لَهُمْ أَجَلًا لَّا رَيْبَ فِيهِ فَأَبَى ٱلظَّٰلِمُونَ إِلَّا كُفُورًا ‎﴿٩٩﴾

അവര്‍ നമ്മുടെ ദൃഷ്ടാന്തങ്ങളെ നിഷേധിച്ചതിനും, ഞങ്ങള്‍ എല്ലുകളും ജീര്‍ണാവശിഷ്ടങ്ങളും ആയിക്കഴിഞ്ഞിട്ടാണോ പുതിയൊരു സൃഷ്ടിയായി ഞങ്ങള്‍ ഉയിര്‍ത്തെഴുന്നല്‍പിക്കപ്പെടുന്നത് എന്ന് അവര്‍ പറഞ്ഞതിനും അവര്‍ക്കുള്ള പ്രതിഫലമത്രെ അത്‌. ആകാശങ്ങളും ഭൂമിയും സൃഷ്ടിച്ച അല്ലാഹു ഇവരെപ്പോലെയുള്ളവരെയും സൃഷ്ടിക്കാന്‍ ശക്തനാണ് എന്ന് ഇവര്‍ മനസ്സിലാക്കിയിട്ടില്ലേ? ഇവര്‍ക്ക് അവന്‍ ഒരു അവധി നിശ്ചയിച്ചിട്ടുണ്ട്‌. അതില്‍ സംശയമേ ഇല്ല. എന്നാല്‍ നന്ദികേട് കാണിക്കാനല്ലാതെ ഈ അക്രമികള്‍ക്ക് മനസ്സ് വന്നില്ല. (ഖുർആൻ:17/98-99)

സൃഷ്ടികളിൽ കാണുന്ന പരിണാമങ്ങളിൽ ചിന്തിപ്പിക്കുക

സൃഷ്ടിച്ചതിന് ശേഷം സൃഷ്ടികളിൽ വിവിധങ്ങളായ പരിണാമങ്ങൾ നടത്തുന്നവനാണ് അല്ലാഹു. അവൻ സൃഷ്ടിക്കുകയും സംഹരിക്കുകയും ജീവിപ്പിക്കുകയും മരിപ്പിക്കുകയും ചെയ്യുന്നു. വിത്തുകളിൽനിന്നും ധാന്യമണികളിൽനിന്നും വ്യക്ഷലതാദികളെ കൊണ്ടുവരുന്നു. വൃക്ഷലതാദികളിൽനിന്ന് ഫലങ്ങളും പഴങ്ങളും പുഷ്പങ്ങളും അവയിൽനിന്ന് ധാന്യമണികളും വിത്തുകളും വിളയായുണ്ടാക്കുന്നു. ഇത്തരം അവസ്ഥാമാറ്റങ്ങൾക്ക് പിന്നിലെല്ലാം അല്ലാഹുവിൻ്റെ കഴിവും സൃഷ്ടിപ്പും മാത്രമാണെന്നരിക്കെ പുനഃസൃഷ്ടി അവന് ക്ഷിപ്രസാദ്ധ്യമാണ്. അല്ലാഹു പറയുന്നു:

 إِنَّ ٱللَّهَ فَالِقُ ٱلْحَبِّ وَٱلنَّوَىٰ ۖ يُخْرِجُ ٱلْحَىَّ مِنَ ٱلْمَيِّتِ وَمُخْرِجُ ٱلْمَيِّتِ مِنَ ٱلْحَىِّ ۚ ذَٰلِكُمُ ٱللَّهُ ۖ فَأَنَّىٰ تُؤْفَكُونَ ‎﴿٩٥﴾‏ فَالِقُ ٱلْإِصْبَاحِ وَجَعَلَ ٱلَّيْلَ سَكَنًا وَٱلشَّمْسَ وَٱلْقَمَرَ حُسْبَانًا ۚ ذَٰلِكَ تَقْدِيرُ ٱلْعَزِيزِ ٱلْعَلِيمِ ‎﴿٩٦﴾

തീര്‍ച്ചയായും ധാന്യമണികളും ഈന്തപ്പഴക്കുരുവും പിളര്‍ക്കുന്നവനാകുന്നു അല്ലാഹു നിര്‍ജീവമായതില്‍ നിന്ന് ജീവനുള്ളതിനെ അവന്‍ പുറത്ത് വരുത്തുന്നു. ജീവനുള്ളതില്‍ നിന്ന് നിര്‍ജീവമായതിനെയും അവന്‍ പുറത്ത് വരുത്തുന്നതാണ്‌. അങ്ങനെയുള്ളവനത്രെ അല്ലാഹു. പ്രഭാതത്തെ പിളര്‍ത്തിക്കൊണ്ട് വരുന്നവനാണവന്‍. രാത്രിയെ അവന്‍ ശാന്തമായ വിശ്രമവേളയാക്കിയിരിക്കുന്നു. സൂര്യനെയും ചന്ദ്രനെയും കണക്കുകള്‍ക്ക് അടിസ്ഥാനവും (ആക്കിയിരിക്കുന്നു.) പ്രതാപിയും സര്‍വ്വജ്ഞനുമായ അല്ലാഹുവിന്‍റെ ക്രമീകരണമത്രെ അത്‌. (ഖുർആൻ:6/95-96)

മരണപ്പെട്ട ചിലർക്ക് ജീവനേകിയ ചരിത്രത്തിലേക്ക് ശ്രദ്ധക്ഷണിക്കുക.

ജീവനറ്റതും ജീവനറ്റ് ജീർണ്ണിച്ചതുമായ ചില ശരീരങ്ങളിൽ ജീവനരിക്കുകയും അവ സജീവമാവുകയും ചെയ്ത ഏതാനും സംഭവങ്ങൾക്ക് കാലം സാക്ഷിയാണ്. എന്ന് മാത്രമല്ല നിർജ്ജീവ മായ ചില വസ്‌തുക്കൾവരെ ജീവനുള്ളവയായി പരിണമിച്ചതിന് ചരിത്രം സാക്ഷ്യം മൊഴിയുന്നുണ്ട്.

വിശുദ്ധ ഖുർആൻ ഇത്തരം സംഭവങ്ങളിലേക്ക് വെളിച്ചം വീശി. ലോകം ശുദ്ധശൂന്യതയിൽ നിന്ന് പടച്ച്’ അവയിൽ ഇത്തരം അത്ഭുതങ്ങളും അമാനുഷികതകളും കാഴ്ച്ചവെച്ചത് അല്ലാഹു മാത്രമാണെന്നും അവൻ എല്ലാ കാര്യങ്ങൾക്കും കഴിവുറ്റവനാണെന്നും ലോകം വായിച്ചെടുക്കുവാനും അവന് അശക്തമായതായി യാതൊന്നുമില്ലെന്ന് അറിയുവാനുമാണത്.

അല്ലാഹുവിനെ പരസ്യമായി കാണുകയാണെങ്കിൽ മാത്രമേ വിശ്വസിക്കൂ എന്ന് മൂസായുടെ ജനത ദുശ്ശാഠ്യം കാണിച്ചപ്പോൾ അവരെ പിടികൂടിയ പ്രകമ്പനവും അതിൽ അവർ മരിക്കുകയും ശേഷം അല്ലാഹു അവർക്ക് ജീവൻ നൽകുകയും ചെയ്തത് വിശുദ്ധ ഖുർആൻ ഉണർത്തുന്നു.

وَإِذْ قُلْتُمْ يَٰمُوسَىٰ لَن نُّؤْمِنَ لَكَ حَتَّىٰ نَرَى ٱللَّهَ جَهْرَةً فَأَخَذَتْكُمُ ٱلصَّٰعِقَةُ وَأَنتُمْ تَنظُرُونَ ‎﴿٥٥﴾‏ ثُمَّ بَعَثْنَٰكُم مِّنۢ بَعْدِ مَوْتِكُمْ لَعَلَّكُمْ تَشْكُرُونَ ‎﴿٥٦﴾

ഓ; മൂസാ, ഞങ്ങള്‍ അല്ലാഹുവെ പ്രത്യക്ഷമായി കാണുന്നത് വരെ താങ്കളെ ഞങ്ങള്‍ വിശ്വസിക്കുകയേ ഇല്ല എന്ന് നിങ്ങള്‍ പറഞ്ഞ സന്ദര്‍ഭം (ഓര്‍ക്കുക.) തന്നിമിത്തം നിങ്ങള്‍ നോക്കി നില്‍ക്കെ ഇടിത്തീ നിങ്ങളെ പിടികൂടി. പിന്നീട് നിങ്ങളുടെ മരണത്തിന് ശേഷം നിങ്ങളെ നാം എഴുന്നേല്‍പിച്ചു. നിങ്ങള്‍ നന്ദിയുള്ളവരായിത്തീരാന്‍ വേണ്ടി. (ഖുർആൻ:2/55-56)

മരണം ഭയന്ന് തങ്ങളുടെ ഭവനങ്ങളിൽനിന്ന് ഓടിയകന്നവരെ അല്ലാഹു മരിപ്പിക്കുകയും ശേഷം ജീവിപ്പിക്കുകയും ചെയ്‌ത സംഭവം വിശുദ്ധ ഖുർആനിൽ മറ്റൊരിടത്ത് വിവരിക്കുന്നുണ്ട്.

أَلَمْ تَرَ إِلَى ٱلَّذِينَ خَرَجُوا۟ مِن دِيَٰرِهِمْ وَهُمْ أُلُوفٌ حَذَرَ ٱلْمَوْتِ فَقَالَ لَهُمُ ٱللَّهُ مُوتُوا۟ ثُمَّ أَحْيَٰهُمْ ۚ إِنَّ ٱللَّهَ لَذُو فَضْلٍ عَلَى ٱلنَّاسِ وَلَٰكِنَّ أَكْثَرَ ٱلنَّاسِ لَا يَشْكُرُونَ

ആയിരക്കണക്കിന് ആളുകളുണ്ടായിട്ടും മരണഭയം കൊണ്ട് സ്വന്തം വീട് വിട്ട് ഇറങ്ങിപ്പോയ ഒരു ജനതയെപ്പറ്റി നീ അറിഞ്ഞില്ലേ? അപ്പോൾ അല്ലാഹു അവരോട് പറഞ്ഞു: നിങ്ങൾ മരിച്ചുകൊള്ളുക. പിന്നീട് അല്ലാഹു അവർക്ക് ജീവൻ നൽകി. അല്ലാഹു തീർച്ചയായും മനുഷ്യരോട് ഔദാര്യം കാണിക്കുന്നവനാകുന്നു. പക്ഷെ മനുഷ്യരിൽ അധികപേരും നന്ദികാണിക്കുന്നില്ല. (ഖുർആൻ:2/243)

ഭൂമുഖത്തെ മഴ വർഷിപ്പിച്ച് സജീവമാക്കിയതിനോട് ഉപമിക്കുക

ജീവനറ്റ ഭൗതിക ശരീരങ്ങളിലേക്കും ജീർണ്ണിച്ച് നുരുമ്പിയ അസ്തികളിലേക്കും ആത്‌മാവിനെ മടക്കുന്നതിനെ അല്ലാഹു ഉപമിച്ചത് വരണ്ടു നശിച്ച് ശൂന്യമായ ഭൂതലത്തിലേക്ക് മഴ വർഷിപ്പി ച്ച്’ അതിനെ സജീവമാക്കുന്നതിനോടാണ്. മനുഷ്യന്റെ കൺവെട്ടത്ത് ഭൂമിക്കുപരിയിൽ ഈ അവസ്ഥാമാറ്റത്തിന് പിന്നിൽ ആരാണ്? ഈ അവസ്ഥാമാറ്റം നൽകുന്ന പാഠങ്ങളിൽ അതിപ്രധാനമായത് എന്താണ്? അല്ലാഹു പറയുന്നു:

وَمِنْ ءَايَٰتِهِۦٓ أَنَّكَ تَرَى ٱلْأَرْضَ خَٰشِعَةً فَإِذَآ أَنزَلْنَا عَلَيْهَا ٱلْمَآءَ ٱهْتَزَّتْ وَرَبَتْ ۚ إِنَّ ٱلَّذِىٓ أَحْيَاهَا لَمُحْىِ ٱلْمَوْتَىٰٓ ۚ إِنَّهُۥ عَلَىٰ كُلِّ شَىْءٍ قَدِيرٌ

നീ ഭൂമിയെ വരണ്ടുണങ്ങിയതായി കാണുന്നു. എന്നിട്ട് അതില്‍ നാം വെള്ളം വര്‍ഷിച്ചാല്‍ അതിന് ചലനമുണ്ടാവുകയും അത് വളരുകയും ചെയ്യുന്നു. ഇതും അവന്‍റെ ദൃഷ്ടാന്തങ്ങളില്‍ പെട്ടതത്രെ. അതിന് ജീവന്‍ നല്‍കിയവന്‍ തീര്‍ച്ചയായും മരിച്ചവര്‍ക്കും ജീവന്‍ നല്‍കുന്നവനാകുന്നു. തീര്‍ച്ചയായും അവന്‍ ഏതുകാര്യത്തിനും കഴിവുള്ളവനാകുന്നു. (ഖുർആൻ:41/39)

وَٱلَّذِى نَزَّلَ مِنَ ٱلسَّمَآءِ مَآءَۢ بِقَدَرٍ فَأَنشَرْنَا بِهِۦ بَلْدَةً مَّيْتًا ۚ كَذَٰلِكَ تُخْرَجُونَ

ആകാശത്ത് നിന്ന് ഒരു തോത് അനുസരിച്ച് വെള്ളം വര്‍ഷിച്ചു തരികയും ചെയ്തവന്‍. എന്നിട്ട് അത് മൂലം നാം നിര്‍ജീവമായ രാജ്യത്തെ പുനരുജ്ജീവിപ്പിച്ചു. അത് പോലെ തന്നെ നിങ്ങളും (മരണാനന്തരം) പുറത്തു കൊണ്ടു വരപ്പെടുന്നതാണ്‌. (ഖുർആൻ:43/11)

നാഥന്റെ യുക്തിയുടേയും നീതിയുടേയും തേട്ടമാണ് പുനഃസൃഷ്ടി

മഹത്വമുടയവനായ പ്രപഞ്ചനാഥന്റെ യുക്തിയുടേയും നീതിയുടേയും തേട്ടമാണ് പുനഃസൃഷ്ടി നടത്തലും കർമ്മങ്ങൾക്ക് പ്രതിഫലമേകലും. തന്നെ മാത്രം ആരാധിക്കുന്നതിനുവേണ്ടിയാണ് അല്ലാഹു സൃഷ്ടിപ്പ്’ നടത്തിയത്. വേദഗ്രന്ഥങ്ങൾ അവതരിപ്പിച്ചും ദൂതന്മാരെ നിയോഗിച്ചും എങ്ങിനെ തന്നെ ആരാധിക്കണമെന്നും അവൻ പഠിപ്പിച്ചു. അതിൽപിന്നെ അല്ലാഹുവിനെ മാത്രം ആരാധിച്ച് സന്മാർഗ്ഗത്തിൽ വഴിനടന്നവനുണ്ട്. അതിക്രമിയായി മാർഗ്ഗഭ്രംശിയായവനുമുണ്ട്. സധർമ്മം പ്രവർത്തിച്ചവന് മോക്ഷവും പ്രതിഫലവും അധർമ്മം പ്രവർത്തിച്ചവന് ശിക്ഷയും അല്ലാഹുവിൻ്റെ നിയമമാണ്. അല്ലാഹു പറയുന്നത് നോക്കൂ:

وَمَا خَلَقْنَا ٱلسَّمَآءَ وَٱلْأَرْضَ وَمَا بَيْنَهُمَا بَٰطِلًا ۚ ذَٰلِكَ ظَنُّ ٱلَّذِينَ كَفَرُوا۟ ۚ فَوَيْلٌ لِّلَّذِينَ كَفَرُوا۟ مِنَ ٱلنَّارِ ‎﴿٢٧﴾‏ أَمْ نَجْعَلُ ٱلَّذِينَ ءَامَنُوا۟ وَعَمِلُوا۟ ٱلصَّٰلِحَٰتِ كَٱلْمُفْسِدِينَ فِى ٱلْأَرْضِ أَمْ نَجْعَلُ ٱلْمُتَّقِينَ كَٱلْفُجَّارِ ‎﴿٢٨﴾

ആകാശവും ഭൂമിയും അവയ്ക്കിടയിലുള്ളതും നാം നിരര്‍ത്ഥകമായി സൃഷ്ടിച്ചതല്ല. സത്യനിഷേധികളുടെ ധാരണയത്രെ അത്‌. ആകയാല്‍ സത്യനിഷേധികള്‍ക്ക് നരകശിക്ഷയാല്‍ മഹാനാശം! അതല്ല, വിശ്വസിക്കുകയും സല്‍കര്‍മ്മങ്ങള്‍ പ്രവര്‍ത്തിക്കുകയും ചെയ്തവരെ ഭൂമിയില്‍ കുഴപ്പമുണ്ടാക്കുന്നവരെ പോലെ നാം ആക്കുമോ? അതല്ല, ധര്‍മ്മനിഷ്ഠ പാലിക്കുന്നവരെ ദുഷ്ടന്‍മാരെ പോലെ നാം ആക്കുമോ? (ഖുർആൻ:38/27-28)

ഈ ഉലകത്തിന്റെ സൃഷ്ടിപ്പ് വ്യർത്ഥവും വൃഥാവേലയുമാണെന്നതും അതിൽ യാതൊരു യുക്തിയുമില്ലെന്നതും അവിശ്വാസികളുടെ ഊഹങ്ങളും ദുർചിന്തകളും മാത്രമാണ്.

 

അബ്ദുൽ ജബ്ബാർ മദീനി

 

www.kanzululoom.com