പ്രബോധനം ചെയ്യപ്പെടേണ്ടതും, പ്രബോധകർ ജനങ്ങൾക്ക് വ്യക്തമാക്കിക്കൊടുക്കേണ്ടതുമായ കാര്യം, റസൂലുകൾ عليهم الصلاة والسلام വ്യക്തമാക്കിയതുപോലെ, അല്ലാഹുവിന്റെ നേരായ പാതയിലേക്ക് ക്ഷണിക്കലാണ്. അതാണ് ഇസ്‌ലാം, അതാണ് അല്ലാഹുവിന്റെ സത്യദീൻ. ഇതാണ് പ്രബോധനത്തിന്റെ വിഷയം. അല്ലാഹു പറയുന്നു:

ادْعُ إِلَىٰ سَبِيلِ رَبِّكَ

നിന്റെ രക്ഷിതാവിന്റെ മാര്‍ഗത്തിലേക്ക് നീ ക്ഷണിച്ച് കൊള്ളുക. (ഖു൪ആന്‍:16/125)

അല്ലാഹുവിന്റെ മാർഗം ഇസ്‌ലാമാണ്. അതാണ് നേരായ പാത. അതാണ് അല്ലാഹു തന്റെ നബി മുഹമ്മദ് ﷺ യെക്കൊണ്ട് അയച്ച ദീൻ. ഇതിലേക്കാണ് പ്രബോധനം ചെയ്യേണ്ടത്. ഇന്നയാളുടെ മദ്‌ഹബിലേക്കോ, ഇന്നയാളുടെ അഭിപ്രായത്തിലേക്കോ അല്ല. മറിച്ച്, അല്ലാഹുവിന്റെ ദീനിലേക്ക്, അവന്റെ നേരായ പാതയിലേക്ക്. അല്ലാഹു തന്റെ നബിയും ഇഷ്ടക്കാരനുമായ മുഹമ്മദ് ﷺ യെക്കൊണ്ട് അയച്ച മാർഗത്തിലേക്ക്. അത് ഖുർആനും, നബി ﷺ യിൽ നിന്ന് സ്ഥിരപ്പെട്ട സുന്നത്തും വ്യക്തമാക്കുന്ന കാര്യമാണ്. അതിൽ ഏറ്റവും പ്രധാനം, ശരിയായ വിശ്വാസത്തിലേക്ക് ക്ഷണിക്കലാണ്. ആരാധനയിൽ അല്ലാഹുവിനോട് ഇഖ്‌ലാസ് കാണിക്കുവാനും, അവനെ ഏകനാക്കുവാനും, അവനിലും അവന്റെ റസൂലുകളിലും, അന്ത്യദിനത്തിലും, അല്ലാഹുവും റസൂലും അറിയിച്ച എല്ലാ കാര്യങ്ങളിലും വിശ്വസിക്കുവാനും ക്ഷണിക്കലാണ് അത്. ഇതാണ് നേരായ പാതയുടെ അടിസ്ഥാനം. “ലാ ഇലാഹ ഇല്ലല്ലാഹ്, മുഹമ്മദുർ റസൂലുല്ലാഹ്” എന്ന ശഹാദത്തിലേക്ക് ക്ഷണിക്കലാണത്. അതിന്റെ അർത്ഥം, അല്ലാഹുവിന്റെ തൗഹീദിലേക്കും, അവനോടുള്ള ഇഖ്‌ലാസിലേക്കും, അവനിലും അവന്റെ റസൂലുകളിലും വിശ്വസിക്കുവാനും ക്ഷണിക്കലാണ്.

അല്ലാഹുവും റസൂലും അറിയിച്ച, കഴിഞ്ഞുപോയതും വരാനിരിക്കുന്നതുമായ പരലോക കാര്യങ്ങളിലും, അവസാന കാലത്തെ സംഭവങ്ങളിലും, മറ്റു കാര്യങ്ങളിലും വിശ്വസിക്കാൻ ക്ഷണിക്കുന്നതും ഇതിൽ ഉൾപ്പെടും. അതുപോലെ, നമസ്കാരം നിലനിർത്തുക, സകാത്ത് നൽകുക, റമദാനിൽ നോമ്പനുഷ്ഠിക്കുക, ഹജ്ജ് ചെയ്യുക തുടങ്ങിയ അല്ലാഹു നിർബന്ധമാക്കിയ കാര്യങ്ങളിലേക്ക് ക്ഷണിക്കുന്നതും ഇതിൽ ഉൾപ്പെടും. അതുപോലെ, അല്ലാഹുവിന്റെ മാർഗത്തിൽ ജിഹാദ് ചെയ്യുക, നന്മ കൽപ്പിക്കുക, തിന്മ വിരോധിക്കുക, ശുദ്ധീകരണം, നമസ്കാരം, ഇടപാടുകൾ, വിവാഹം, വിവാഹമോചനം, കുറ്റകൃത്യങ്ങൾ, ചെലവുകൾ, യുദ്ധം, സമാധാനം തുടങ്ങി എല്ലാ കാര്യങ്ങളിലും അല്ലാഹു നിയമമാക്കിയത് സ്വീകരിക്കാൻ ക്ഷണിക്കുന്നതും ഇതിൽ ഉൾപ്പെടും. കാരണം, അല്ലാഹുവിന്റെ ദീൻ സമഗ്രമാണ്. അത് അടിമകളുടെ ഇഹപര ജീവിതത്തിലെ നന്മകൾ ഉൾക്കൊള്ളുന്നു. ജനങ്ങൾക്ക് അവരുടെ ദീനിന്റെ കാര്യത്തിൽ ആവശ്യമായതെല്ലാം അതിലുണ്ട്.

അത് ഉത്തമമായ സ്വഭാവങ്ങളിലേക്കും, നല്ല കർമ്മങ്ങളിലേക്കും ക്ഷണിക്കുന്നു. മോശം സ്വഭാവങ്ങളിൽ നിന്നും, ചീത്ത കർമ്മങ്ങളിൽ നിന്നും വിലക്കുന്നു. അത് ആരാധനയും നേതൃത്വവുമാണ്; ഒരാൾ ആരാധകനും, സൈന്യത്തിന്റെ നേതാവുമാകാം. ആരാധനയും ഭരണവുമാണ്; ഒരാൾ നമസ്കരിക്കുന്നവനും, നോമ്പനുഷ്ഠിക്കുന്നവനും, അല്ലാഹുവിന്റെ നിയമമനുസരിച്ച് ഭരിക്കുന്നവനും, അവന്റെ വിധികൾ നടപ്പിലാക്കുന്നവനുമാകാം. ആരാധനയും ജിഹാദുമാണ്; അല്ലാഹുവിലേക്ക് ക്ഷണിക്കുകയും, അവന്റെ ദീനിൽ നിന്ന് പുറത്തുപോയവരോട് അവന്റെ മാർഗത്തിൽ സമരം ചെയ്യുകയും ചെയ്യുന്നു. മുസ്ഹഫും വാളുമാണ്; ഖുർആൻ പാരായണം ചെയ്യുകയും, ചിന്തിക്കുകയും, ആവശ്യമെങ്കിൽ വാളുകൊണ്ട് അതിന്റെ വിധികൾ നടപ്പിലാക്കുകയും ചെയ്യുന്നു. രാഷ്ട്രീയവും സാമൂഹികവുമാണ്; അത് ഉത്തമമായ സ്വഭാവങ്ങളിലേക്കും, ഈമാനികമായ സാഹോദര്യത്തിലേക്കും, മുസ്‌ലിംകൾക്കിടയിൽ ഒരുമിക്കാനും, യോജിപ്പിക്കാനും ക്ഷണിക്കുന്നു. അല്ലാഹു പറയുന്നു:

وَاعْتَصِمُوا بِحَبْلِ اللَّهِ جَمِيعًا وَلَا تَفَرَّقُوا

നിങ്ങളൊന്നിച്ച് അല്ലാഹുവിന്റെ കയറില്‍ മുറുകെപിടിക്കുക. നിങ്ങള്‍ ഭിന്നിച്ച് പോകരുത്‌. (ഖു൪ആന്‍:3/103)

അല്ലാഹുവിന്റെ ദീൻ ഒരുമയിലേക്കും, ഭിന്നിപ്പിക്കാത്ത, യോജിപ്പിക്കുന്ന, അകറ്റാത്ത, നല്ല യുക്തിപരമായ രാഷ്ട്രീയത്തിലേക്കും ക്ഷണിക്കുന്നു. ഹൃദയശുദ്ധിയിലേക്കും, ഇസ്‌ലാമിക സാഹോദര്യത്തെ ബഹുമാനിക്കുന്നതിലേക്കും, നന്മയിലും തഖ്‌വയിലും സഹകരിക്കുന്നതിലേക്കും, അല്ലാഹുവിനും അവന്റെ അടിമകൾക്കും ഗുണകാംക്ഷ നൽകുന്നതിലേക്കും ക്ഷണിക്കുന്നു. അതുപോലെ, വിശ്വസ്തത നിർവഹിക്കാനും, ശരീഅത്ത് അനുസരിച്ച് ഭരിക്കാനും, അല്ലാഹു അവതരിപ്പിച്ചതല്ലാത്തതുകൊണ്ട് ഭരിക്കുന്നത് ഉപേക്ഷിക്കാനും അത് ക്ഷണിക്കുന്നു. അല്ലാഹു പറയുന്നു:

إِنَّ اللَّهَ يَأْمُرُكُمْ أَن تُؤَدُّوا الْأَمَانَاتِ إِلَىٰ أَهْلِهَا وَإِذَا حَكَمْتُم بَيْنَ النَّاسِ أَن تَحْكُمُوا بِالْعَدْلِ

വിശ്വസിച്ചേല്‍പിക്കപ്പെട്ട അമാനത്തുകൾ അതിന്റെ അവകാശികള്‍ക്ക് നിങ്ങള്‍ കൊടുത്തു വീട്ടണമെന്നും, ജനങ്ങള്‍ക്കിടയില്‍ നിങ്ങള്‍ തീര്‍പ്പുകല്‍പിക്കുകയാണെങ്കില്‍ നീതിയോടെ തീര്‍പ്പുകല്‍പിക്കണമെന്നും അല്ലാഹു നിങ്ങളോട് കല്‍പിക്കുന്നു). (ഖു൪ആന്‍:4/58)

അത് രാഷ്ട്രീയവും സാമ്പത്തികവുമാണ്. അത് ആരാധനയും ജിഹാദുമായിരിക്കുന്നതുപോലെ. അത് മിതമായ, ശറഇയ്യായ സാമ്പത്തിക വ്യവസ്ഥയിലേക്ക് ക്ഷണിക്കുന്നു. നിഷിദ്ധമായ കാര്യങ്ങൾ പരിഗണിക്കാതെ, എല്ലാ മാർഗങ്ങളിലൂടെയും ധനം സമ്പാദിക്കുന്ന, അക്രമപരമായ മുതലാളിത്തമല്ല അത്. ജനങ്ങളുടെ സമ്പത്തിനെ ബഹുമാനിക്കാത്ത, അവരെ സമ്മർദ്ദത്തിലാക്കുന്നതിലും, അക്രമിക്കുന്നതിലും, അതിക്രമം കാണിക്കുന്നതിലും യാതൊരു മടിയുമില്ലാത്ത, നിരീശ്വരവാദപരമായ കമ്മ്യൂണിസ്റ്റ് സാമ്പത്തിക വ്യവസ്ഥയുമല്ല അത്. ഇതു രണ്ടുമല്ല, മറിച്ച് അത് രണ്ട് സാമ്പത്തിക വ്യവസ്ഥകൾക്കും ഇടയിലുള്ള, രണ്ട് വഴികൾക്കും ഇടയിലുള്ള മധ്യമ മാർഗമാണ്. രണ്ട് അസത്യങ്ങൾക്കിടയിലുള്ള സത്യമാണ്. പടിഞ്ഞാറ് ധനത്തെ മഹത്വപ്പെടുത്തുകയും, അത് സമ്പാദിക്കുന്നതിൽ അതിരുകവിയുകയും ചെയ്തു. അവർ എല്ലാ മാർഗങ്ങളിലൂടെയും അത് സമ്പാദിച്ചു. അല്ലാഹു നിഷിദ്ധമാക്കിയ വഴികളിലൂടെ സഞ്ചരിച്ചു. കിഴക്ക്, സോവിയറ്റ് യൂണിയനിലെ നിരീശ്വരവാദികളും, അവരുടെ മാർഗം പിൻപറ്റിയവരും, അടിമകളുടെ സമ്പത്തിനെ ബഹുമാനിച്ചില്ല. മറിച്ച്, അവരത് പിടിച്ചെടുക്കുകയും, അനുവദനീയമാക്കുകയും ചെയ്തു. അവർ ചെയ്ത കാര്യങ്ങളിൽ അവർക്ക് യാതൊരു മടിയുമുണ്ടായിരുന്നില്ല. മറിച്ച്, അവർ അടിമകളെ അടിമകളാക്കുകയും, ജനങ്ങളെ പീഡിപ്പിക്കുകയും, അല്ലാഹുവിനെ നിഷേധിക്കുകയും, ദീനുകളെ നിഷേധിക്കുകയും ചെയ്തു. “ദൈവമില്ല, ജീവിതം പദാർത്ഥമാണ്” എന്ന് അവർ പറഞ്ഞു. അവർ ഈ ധനത്തെ പരിഗണിച്ചില്ല. അന്യായമായി അത് എടുക്കുന്നതിൽ അവർക്ക് യാതൊരു മടിയുമുണ്ടായിരുന്നില്ല. ജനങ്ങളെ നശിപ്പിക്കുന്നതിലും, സമ്പത്ത് പിടിച്ചെടുക്കുന്നതിലും, അല്ലാഹു അവർക്ക് നൽകിയ സമ്പാദിക്കാനും, പ്രയോജനപ്പെടുത്താനും, അവരുടെ കഴിവുകളിൽ നിന്നും ബുദ്ധിയിൽ നിന്നും, അല്ലാഹു നൽകിയ ഉപകരണങ്ങളിൽ നിന്നും പ്രയോജനമെടുക്കാനുമുള്ള മാർഗങ്ങൾ തടയുന്നതിലും അവർക്ക് യാതൊരു മടിയുമുണ്ടായിരുന്നില്ല.

ഇസ്‌ലാം ധനം സംരക്ഷിക്കാനും, അക്രമം, വഞ്ചന, പലിശ, ജനങ്ങളെ അക്രമിക്കൽ, അതിക്രമം കാണിക്കൽ എന്നിവയിൽ നിന്ന് മുക്തമായ ശറഇയ്യായ മാർഗങ്ങളിലൂടെ അത് സമ്പാദിക്കാനും കൽപ്പിച്ചു. അതുപോലെ, വ്യക്തിപരവും സാമൂഹികവുമായ ഉടമസ്ഥാവകാശത്തെ അത് ബഹുമാനിച്ചു. അത് രണ്ട് അക്രമപരമായ വ്യവസ്ഥകൾക്കും ഇടയിലുള്ള മധ്യമ മാർഗമാണ്. അത് ധനം അനുവദിക്കുകയും, അതിലേക്ക് ക്ഷണിക്കുകയും, യുക്തിപരമായ മാർഗങ്ങളിലൂടെ അത് സമ്പാദിക്കാൻ ക്ഷണിക്കുകയും ചെയ്തു. അത് സമ്പാദിക്കുന്നവൻ അല്ലാഹുവിനെയും റസൂലിനെയും അനുസരിക്കുന്നതിൽ നിന്നും, അല്ലാഹു നിർബന്ധമാക്കിയത് നിർവഹിക്കുന്നതിൽ നിന്നും അശ്രദ്ധനാകാത്ത രൂപത്തിൽ. അല്ലാഹു പറയുന്നു:

يَا أَيُّهَا الَّذِينَ آمَنُوا لَا تَأْكُلُوا أَمْوَالَكُم بَيْنَكُم بِالْبَاطِلِ

സത്യവിശ്വാസികളേ, നിങ്ങള്‍ അന്യോന്യം നിങ്ങളുടെ സ്വത്തുക്കള്‍ അന്യായമായി എടുത്ത് തിന്നരുത്‌. (ഖു൪ആന്‍:4/29)

നബി ﷺ പറഞ്ഞു:

كُلُّ الْمُسْلِمِ عَلَى الْمُسْلِمِ حَرَامٌ دَمُهُ وَمَالُهُ وَعِرْضُهُ

ഓരോ മുസ്‌ലിമിനും മറ്റൊരു മുസ്‌ലിമിന്റെ രക്തവും, ധനവും, അഭിമാനവും ഹറാമാണ്. (മുസ്ലിം)

നബി ﷺ പറഞ്ഞു:

أَلاَ إِنَّ دِمَاءَكُمْ وَأَمْوَالَكُمْ وَأَعْرَاضَكُمْ عَلَيْكُمْ حَرَامٌ كَحُرْمَةِ يَوْمِكُمْ هَذَا فِي شَهْرِكُمْ هَذَا فِي بَلَدِكُمْ هَذَا

അറിയുക, നിങ്ങളുടെ ഈ ദിവസത്തിന്റെ, ഈ മാസത്തിന്റെ, ഈ നാടിന്റെ പവിത്രത പോലെ, നിങ്ങളുടെ രക്തവും, ധനവും, അഭിമാനവും നിങ്ങൾക്ക് ഹറാമാണ്. (ബുഖാരി, മുസ്ലിം)

നബി ﷺ പറഞ്ഞു:

لأَنْ يَأْخُذَ أَحَدُكُمْ حَبْلَهُ فَيَأْتِيَ بِحُزْمَةِ الْحَطَبِ عَلَى ظَهْرِهِ فَيَبِيعَهَا فَيَكُفَّ اللَّهُ بِهَا وَجْهَهُ، خَيْرٌ لَهُ مِنْ أَنْ يَسْأَلَ النَّاسَ أَعْطَوْهُ أَوْ مَنَعُوهُ

നിങ്ങളിലൊരാൾ തന്റെ കയറെടുത്ത്, മുതുകിൽ വിറക് കെട്ടുമായി വന്ന് അത് വിറ്റ്, അതുകൊണ്ട് അല്ലാഹു അവന്റെ മുഖം സംരക്ഷിക്കുന്നത്, ജനങ്ങളോട് യാചിക്കുന്നതിനേക്കാൾ ഉത്തമമാണ്. അവർ അവന് നൽകിയാലും ഇല്ലെങ്കിലും. (ബുഖാരി)

ഏത് സമ്പാദ്യമാണ് ഏറ്റവും നല്ലതെന്ന് ചോദിച്ചപ്പോൾ അവിടുന്ന് ﷺ പറഞ്ഞു:

عَمَلُ الرَّجُلِ بِيَدِهِ وَكُلُّ بَيْعٍ مَبْرُورٍ

ഒരാൾ തന്റെ കൈകൊണ്ട് അധ്വാനിക്കുന്നതും, പുണ്യമുള്ള എല്ലാ കച്ചവടവും. (അഹ്മദ്)

നബി ﷺ പറഞ്ഞു:

مَا أَكَلَ أَحَدٌ طَعَامًا قَطُّ خَيْرًا مِنْ أَنْ يَأْكُلَ مِنْ عَمَلِ يَدِهِ، وَإِنَّ نَبِيَّ اللَّهِ دَاوُدَ عَلَيْهِ السَّلاَمُ كَانَ يَأْكُلُ مِنْ عَمَلِ يَدِهِ

ഒരാളും തന്റെ കൈകൊണ്ട് അധ്വാനിച്ചുണ്ടാക്കിയതിനേക്കാൾ ഉത്തമമായ ഭക്ഷണം കഴിച്ചിട്ടില്ല. അല്ലാഹുവിന്റെ നബി ദാവൂദ് عليه السلام തന്റെ കൈകൊണ്ട് അധ്വാനിച്ചാണ് ഭക്ഷിച്ചിരുന്നത്. (ബുഖാരി)

ഇസ്‌ലാമിന്റെ സാമ്പത്തിക വ്യവസ്ഥ മധ്യമ മാർഗമാണെന്ന് ഇത് വ്യക്തമാക്കുന്നു. പടിഞ്ഞാറിന്റെ അക്രമപരമായ മുതലാളിത്തത്തോടോ, അവരുടെ പിൻപറ്റുന്നവരോടോ, സമ്പത്ത് പിടിച്ചെടുക്കുകയും, അതിന്റെ അവകാശികൾക്ക് നിഷേധിക്കുകയും, ജനങ്ങളെ അടിമകളാക്കുകയും, നശിപ്പിക്കുകയും, അല്ലാഹു നിഷിദ്ധമാക്കിയത് അനുവദനീയമാക്കുകയും ചെയ്ത നിരീശ്വരവാദികളായ കമ്മ്യൂണിസ്റ്റുകളോടോ അത് യോജിക്കുന്നില്ല. നിനക്ക് ശറഇയ്യായ മാർഗങ്ങളിലൂടെ ധനം സമ്പാദിക്കാം. അല്ലാഹു നിയമമാക്കിയതും അനുവദിച്ചതുമായ മാർഗങ്ങളിലൂടെ നിന്റെ സമ്പാദ്യത്തിന് നീയാണ് ഏറ്റവും അർഹൻ. ഇസ്‌ലാം ഈമാനികമായ സാഹോദര്യത്തിലേക്കും, അല്ലാഹുവിനും അവന്റെ അടിമകൾക്കും ഗുണകാംക്ഷ നൽകുന്നതിലേക്കും, ഒരു മുസ്‌ലിം തന്റെ സഹോദരനെ ബഹുമാനിക്കുന്നതിലേക്കും ക്ഷണിക്കുന്നു. പകയോ, അസൂയയോ, വഞ്ചനയോ, ചതിയോ, മറ്റു മോശം സ്വഭാവങ്ങളോ പാടില്ല. അല്ലാഹു പറയുന്നു:

وَالْمُؤْمِنُونَ وَالْمُؤْمِنَاتُ بَعْضُهُمْ أَوْلِيَاءُ بَعْضٍ

സത്യവിശ്വാസികളും സത്യവിശ്വാസിനികളും അന്യോന്യം മിത്രങ്ങളാകുന്നു. (ഖു൪ആന്‍:9/71)

അല്ലാഹു പറയുന്നു:

إِنَّمَا الْمُؤْمِنُونَ إِخْوَةٌ

തീര്‍ച്ചയായും സത്യവിശ്വാസികള്‍ സഹോദരങ്ങളാകുന്നു. (ഖു൪ആന്‍:49/10)

നബി ﷺ പറഞ്ഞു:

الْمُسْلِمُ أَخُو الْمُسْلِمِ لاَ يَظْلِمُهُ وَلاَ يَحْقِرُهُ وَلاَ يَخْذُلُهُ

മുസ്‌ലിം മുസ്‌ലിമിന്റെ സഹോദരനാണ്. അവനെ അക്രമിക്കുകയോ, നിസ്സാരപ്പെടുത്തുകയോ, കൈവിടുകയോ ചെയ്യരുത്. (മുസ്ലിം)

മുസ്‌ലിം മുസ്‌ലിമിന്റെ സഹോദരനാണ്. അവനെ ബഹുമാനിക്കുകയും, നിസ്സാരപ്പെടുത്താതിരിക്കുകയും, അവനോട് നീതി കാണിക്കുകയും, അല്ലാഹു നിയമമാക്കിയ എല്ലാ അവകാശങ്ങളും നൽകുകയും ചെയ്യേണ്ടത് നിർബന്ധമാണ്. അവിടുന്ന് ﷺ പറഞ്ഞു:

الْمُؤْمِنُ لِلْمُؤْمِنِ كَالْبُنْيَانِ، يَشُدُّ بَعْضُهُ بَعْضًا

സത്യവിശ്വാസി മറ്റൊരു സത്യവിശ്വാസിക്ക് ഒരു കെട്ടിടം പോലെയാണ്. അതിന്റെ ചില ഭാഗങ്ങൾ മറ്റു ചില ഭാഗങ്ങളെ ശക്തിപ്പെടുത്തുന്നു. (ബുഖാരി)

നബി ﷺ പറഞ്ഞു:

الْمُؤْمِنُ مِرْآةُ أَخِيهِ الْمُؤْمِنِ

സത്യവിശ്വാസി തന്റെ സഹോദരന്റെ കണ്ണാടിയാണ്.

സഹോദരാ, നീ നിന്റെ സഹോദരന്റെ കണ്ണാടിയാണ്. നീ ഈമാനികമായ സാഹോദര്യത്തിന്റെ കെട്ടിടത്തിലെ ഒരു ഇഷ്ടികയാണ്. നിന്റെ സഹോദരന്റെ കാര്യത്തിൽ നീ അല്ലാഹുവിനെ സൂക്ഷിക്കുക. അവന്റെ അവകാശം അറിയുകയും, അവനോട് സത്യസന്ധതയോടും ഗുണകാംക്ഷയോടും കൂടി പെരുമാറുകയും ചെയ്യുക.
നീ ഇസ്‌ലാം പൂർണ്ണമായി സ്വീകരിക്കുക. ഒരു ഭാഗം സ്വീകരിച്ച് മറ്റൊരു ഭാഗം ഉപേക്ഷിക്കരുത്. വിശ്വാസം സ്വീകരിച്ച് കർമ്മങ്ങൾ ഉപേക്ഷിക്കുകയോ, കർമ്മങ്ങൾ സ്വീകരിച്ച് വിശ്വാസം ഉപേക്ഷിക്കുകയോ ചെയ്യരുത്. മറിച്ച്, ഇസ്‌ലാം പൂർണ്ണമായി സ്വീകരിക്കുക. വിശ്വാസമായും, കർമ്മമായും, ആരാധനയായും, ജിഹാദായും, സാമൂഹികമായും, രാഷ്ട്രീയമായും, സാമ്പത്തികമായും, മറ്റു എല്ലാ നിലയിലും അത് സ്വീകരിക്കുക. അല്ലാഹു പറയുന്നു:

يَا أَيُّهَا الَّذِينَ آمَنُوا ادْخُلُوا فِي السِّلْمِ كَافَّةً وَلَا تَتَّبِعُوا خُطُوَاتِ الشَّيْطَانِ ۚ إِنَّهُ لَكُمْ عَدُوٌّ مُّبِينٌ

സത്യവിശ്വാസികളേ, നിങ്ങള്‍ പരിപൂര്‍ണ്ണമായി ഇസ്ലാമില്‍ പ്രവേശിക്കുക. പിശാചിന്റെ കാല്‍പാടുകളെ നിങ്ങള്‍ പിന്തുടരാതിരിക്കുക. തീര്‍ച്ചയായും അവന്‍ നിങ്ങളുടെ പ്രത്യക്ഷ ശത്രുവാകുന്നു. (ഖു൪ആന്‍:2/208)

ഇവിടെ ‘സിൽമ്’ എന്നാൽ ഇസ്‌ലാം ആണെന്ന് ഒരു വിഭാഗം സലഫുകൾ പറഞ്ഞിട്ടുണ്ട്. അത് രക്ഷയുടെയും സമാധാനത്തിന്റെയും മാർഗമായതുകൊണ്ടാണ് അങ്ങനെ പേര് വന്നത്. ഇസ്‌ലാം സമാധാനത്തിലേക്ക് ക്ഷണിക്കുന്നു. ശിക്ഷാവിധികൾ, പ്രതിക്രിയ, ശരിയായ ജിഹാദ് എന്നിവയിലൂടെ രക്തച്ചൊരിച്ചിൽ തടയാൻ അത് ക്ഷണിക്കുന്നു. അത് സമാധാനവും, ഇസ്‌ലാമും, സുരക്ഷയും, ഈമാനുമാണ്. അതുകൊണ്ടാണ് അല്ലാഹു പറഞ്ഞത്:

ادْخُلُوا فِي السِّلْمِ كَافَّةً

പരിപൂര്‍ണ്ണമായി ഇസ്ലാമില്‍ പ്രവേശിക്കുക.

അതായത്, ഈമാനിന്റെ എല്ലാ ശാഖകളിലും പ്രവേശിക്കുക. ചിലത് സ്വീകരിച്ച് ചിലത് ഉപേക്ഷിക്കരുത്. നിങ്ങൾ ഇസ്‌ലാം പൂർണ്ണമായി സ്വീകരിക്കണം.

وَلَا تَتَّبِعُوا خُطُوَاتِ الشَّيْطَانِ

പിശാചിന്റെ കാല്‍പാടുകളെ നിങ്ങള്‍ പിന്തുടരാതിരിക്കുക.

അതായത്, അല്ലാഹു നിഷിദ്ധമാക്കിയ പാപങ്ങൾ. പിശാച് പാപങ്ങളിലേക്കും, അല്ലാഹുവിന്റെ ദീൻ പൂർണ്ണമായി ഉപേക്ഷിക്കുന്നതിലേക്കും ക്ഷണിക്കുന്നു. അവൻ ഏറ്റവും വലിയ ശത്രുവാണ്.

അതുകൊണ്ട്, മുസ്‌ലിം ഇസ്‌ലാം പൂർണ്ണമായി മുറുകെ പിടിക്കുകയും, അല്ലാഹുവിന്റെ പാശം മുറുകെ പിടിക്കുകയും, എല്ലാ സാഹചര്യങ്ങളിലും ഭിന്നതയുടെയും അഭിപ്രായവ്യത്യാസത്തിന്റെയും കാരണങ്ങളിൽ നിന്ന് വിട്ടുനിൽക്കുകയും ചെയ്യേണ്ടത് നിർബന്ധമാണ്.

നീ ആരാധനകളിലും, ഇടപാടുകളിലും, വിവാഹത്തിലും, വിവാഹമോചനത്തിലും, ചെലവുകളിലും, മുലകുടിയിലും, സമാധാനത്തിലും, യുദ്ധത്തിലും, ശത്രുവിനോടും മിത്രത്തോടും, കുറ്റകൃത്യങ്ങളിലും, എല്ലാ കാര്യങ്ങളിലും അല്ലാഹുവിന്റെ നിയമം നടപ്പിലാക്കുക. അല്ലാഹുവിന്റെ ദീൻ എല്ലാ കാര്യങ്ങളിലും നടപ്പിലാക്കപ്പെടണം. നിന്റെ സഹോദരൻ നിന്നോട് ഒരു കാര്യത്തിൽ യോജിച്ചതുകൊണ്ട് അവനെ മിത്രമാക്കുകയും, മറ്റൊരു അഭിപ്രായത്തിലോ വിഷയത്തിലോ നിന്നോട് വിയോജിച്ചതുകൊണ്ട് അവനെ ശത്രുവാക്കുകയും ചെയ്യരുത്. ഇത് നീതിയല്ല. സ്വഹാബികൾ رضي الله عنهم ചില വിഷയങ്ങളിൽ ഭിന്നിച്ചിരുന്നു. എന്നാൽ, അത് അവർക്കിടയിലുള്ള സ്നേഹബന്ധത്തെയും സൗഹൃദത്തെയും ബാധിച്ചില്ല.

സത്യവിശ്വാസി അല്ലാഹുവിന്റെ നിയമമനുസരിച്ച് പ്രവർത്തിക്കുകയും, ദീൻ സ്വീകരിക്കുകയും, തെളിവിന്റെ അടിസ്ഥാനത്തിൽ അതിന് മറ്റെന്തിനേക്കാളും മുൻഗണന നൽകുകയും ചെയ്യും. എന്നാൽ, ഗവേഷണപരമായ വിഷയങ്ങളിൽ, തെളിവുകൾ അവ്യക്തമായേക്കാവുന്ന വിഷയങ്ങളിൽ, തന്റെ സഹോദരൻ തന്നോട് വിയോജിച്ചാൽ, അത് അവനെ അക്രമിക്കാനോ, അവനോട് അനീതി കാണിക്കാനോ അവനെ പ്രേരിപ്പിക്കുകയില്ല. അതുപോലെ, ഒരു പ്രമാണത്തിന്റെ വ്യാഖ്യാനത്തിൽ അഭിപ്രായവ്യത്യാസമുണ്ടാകുമ്പോൾ, അവന് ഒഴികഴിവുണ്ടായേക്കാം. നീ അവന് ഗുണകാംക്ഷ നൽകുകയും, അവന് നന്മ ആഗ്രഹിക്കുകയും ചെയ്യുക. അത് ശത്രുതയിലേക്കും, ഭിന്നതയിലേക്കും, ശത്രുവിന് നിങ്ങളിലും നിന്റെ സഹോദരനിലും സ്വാധീനം ചെലുത്താൻ അവസരം നൽകുന്നതിലേക്കും നിന്നെ നയിക്കരുത്. ഇസ്‌ലാം നീതിയുടെയും, സത്യസന്ധമായ വിധിയുടെയും, നന്മയുടെയും ദീനാണ്. അല്ലാഹു ഒഴിവാക്കിയതല്ലാത്ത കാര്യങ്ങളിൽ സമത്വത്തിന്റെ ദീനാണ്. അതിൽ എല്ലാ നന്മയിലേക്കുമുള്ള ക്ഷണമുണ്ട്. ഉത്തമമായ സ്വഭാവങ്ങളിലേക്കും, നല്ല കർമ്മങ്ങളിലേക്കും, നീതിയിലേക്കും, എല്ലാ മോശം സ്വഭാവങ്ങളിൽ നിന്നും വിട്ടുനിൽക്കുന്നതിലേക്കുമുള്ള ക്ഷണമുണ്ട്. അല്ലാഹു പറയുന്നു:

إِنَّ اللَّهَ يَأْمُرُ بِالْعَدْلِ وَالْإِحْسَانِ وَإِيتَاءِ ذِي الْقُرْبَىٰ وَيَنْهَىٰ عَنِ الْفَحْشَاءِ وَالْمُنكَرِ وَالْبَغْيِ ۚ يَعِظُكُمْ لَعَلَّكُمْ تَذَكَّرُونَ

തീര്‍ച്ചയായും അല്ലാഹു കല്‍പിക്കുന്നത് നീതി പാലിക്കുവാനും, നന്‍മ ചെയ്യുവാനും, കുടുംബബന്ധമുള്ളവര്‍ക്ക് സഹായം നല്‍കുവാനുമാണ്‌. അവന്‍ വിലക്കുന്നത് നീചവൃത്തിയില്‍ നിന്നും ദുരാചാരത്തില്‍ നിന്നും അതിക്രമത്തില്‍ നിന്നുമാണ്‌. നിങ്ങള്‍ ചിന്തിച്ചു ഗ്രഹിക്കുവാന്‍ വേണ്ടി അവന്‍ നിങ്ങള്‍ക്ക് ഉപദേശം നല്‍കുന്നു. (ഖു൪ആന്‍:16/90)

അല്ലാഹു പറയുന്നു:

يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِندَ اللَّهِ أَتْقَاكُمْ ۚ إِنَّ اللَّهَ عَلِيمٌ خَبِيرٌ

ഹേ; മനുഷ്യരേ, തീര്‍ച്ചയായും നിങ്ങളെ നാം ഒരു ആണില്‍ നിന്നും ഒരു പെണ്ണില്‍ നിന്നുമായി സൃഷ്ടിച്ചിരിക്കുന്നു. നിങ്ങള്‍ അന്യോന്യം അറിയേണ്ടതിന് നിങ്ങളെ നാം വിവിധ സമുദായങ്ങളും ഗോത്രങ്ങളും ആക്കുകയും ചെയ്തിരിക്കുന്നു. തീര്‍ച്ചയായും അല്ലാഹുവിന്റെ അടുത്ത് നിങ്ങളില്‍ ഏറ്റവും ആദരണീയന്‍ നിങ്ങളില്‍ ഏറ്റവും സൂക്ഷ്മത പാലിക്കുന്നവനാകുന്നു. തീര്‍ച്ചയായും അല്ലാഹു സര്‍വ്വജ്ഞനും സൂക്ഷ്മജ്ഞാനിയുമാകുന്നു. (ഖു൪ആന്‍:49/13)

ഇസ്‌ലാമിക പ്രബോധകൻ ഇസ്‌ലാം പൂർണ്ണമായി പ്രബോധനം ചെയ്യേണ്ടത് നിർബന്ധമാണ്. അവൻ ജനങ്ങൾക്കിടയിൽ വേർതിരിവ് കാണിക്കരുത്. ഒരു മദ്‌ഹബിനോടോ, ഗോത്രത്തോടോ, തന്റെ ശൈഖിനോടോ, നേതാവിനോടോ പക്ഷപാതം കാണിക്കരുത്. മറിച്ച്, അവന്റെ ലക്ഷ്യം സത്യം സ്ഥാപിക്കുകയും, അത് വ്യക്തമാക്കുകയും, ജനങ്ങളെ അതിൽ ഉറപ്പിച്ചു നിർത്തുകയുമായിരിക്കണം. അത് ഇന്നയാളുടെയോ മറ്റൊരാളുടെയോ അഭിപ്രായത്തിന് എതിരാണെങ്കിൽ പോലും. മദ്‌ഹബുകളോട് പക്ഷപാതം കാണിക്കുകയും, ഇന്നയാളുടെ മദ്‌ഹബ് മറ്റൊരാളുടെ മദ്‌ഹബിനേക്കാൾ ഉത്തമമാണെന്ന് പറയുകയും ചെയ്യുന്ന ആളുകൾ ജനങ്ങളിൽ ഉണ്ടായപ്പോൾ, ഭിന്നതയും അഭിപ്രായവ്യത്യാസവും വന്നു. ചിലർ തന്റെ മദ്‌ഹബുകാരനല്ലാത്തവരുടെ പിന്നിൽ നമസ്കരിക്കാത്ത അവസ്ഥ വരെ എത്തി. ശാഫിഈ മദ്‌ഹബുകാരൻ ഹനഫിയുടെ പിന്നിലും, ഹനഫി മാലികിയുടെയോ ഹമ്പലിയുടെയോ പിന്നിലും നമസ്കരിക്കാത്ത അവസ്ഥ. ഇത് തീവ്രവാദികളായ ചില പക്ഷപാതികളിൽ നിന്ന് സംഭവിച്ചതാണ്. ഇത് ഒരു വിപത്തും, പിശാചിന്റെ കാൽപ്പാടുകൾ പിന്തുടരലുമാണ്.

ഇമാം ശാഫിഈ, മാലിക്, അഹ്മദ്, അബൂഹനീഫ, ഔസാഇ, ഇസ്ഹാഖ് ബ്നു റാഹവൈഹി തുടങ്ങിയവരെല്ലാം സന്മാർഗത്തിന്റെ ഇമാമുമാരും, സത്യത്തിന്റെ പ്രബോധകരുമായിരുന്നു. അവർ ജനങ്ങളെ അല്ലാഹുവിന്റെ ദീനിലേക്ക് ക്ഷണിക്കുകയും, അവരെ സത്യത്തിലേക്ക് മാർഗദർശനം നൽകുകയും ചെയ്തു. ചില വിഷയങ്ങളിൽ അവർക്കിടയിൽ അഭിപ്രായവ്യത്യാസമുണ്ടായി. ചിലർക്ക് തെളിവുകൾ വ്യക്തമല്ലാത്തതുകൊണ്ടായിരുന്നു അത്. അവരിൽ ശരി കണ്ടെത്തിയ ഗവേഷകന് രണ്ട് പ്രതിഫലമുണ്ട്. സത്യം തെറ്റിയ ഗവേഷകന് ഒരു പ്രതിഫലമുണ്ട്. നീ അവരുടെ പദവിയും ശ്രേഷ്ഠതയും അറിയുകയും, അവർക്ക് വേണ്ടി കാരുണ്യത്തിന് പ്രാർത്ഥിക്കുകയും, അവർ ഇസ്‌ലാമിന്റെ ഇമാമുമാരും സന്മാർഗത്തിന്റെ പ്രബോധകരുമാണെന്ന് മനസ്സിലാക്കുകയും ചെയ്യേണ്ടത് നിർബന്ധമാണ്. എന്നാൽ, അത് നിന്നെ പക്ഷപാതത്തിലേക്കും അന്ധമായ അനുകരണത്തിലേക്കും നയിക്കരുത്. ഇന്നയാളുടെ മദ്‌ഹബ് എല്ലാ നിലയിലും സത്യത്തോട് ഏറ്റവും അടുത്തതാണെന്നോ, ഇന്നയാളുടെ മദ്‌ഹബ് ഒരിക്കലും തെറ്റാത്തതാണെന്നോ നീ പറയരുത്. അത് തെറ്റാണ്. നീ സത്യം സ്വീകരിക്കുകയും, അതിന്റെ തെളിവ് വ്യക്തമായാൽ അത് പിൻപറ്റുകയും ചെയ്യുക. അത് ഇന്നയാൾക്ക് എതിരാണെങ്കിൽ പോലും. നീ പക്ഷപാതം കാണിക്കുകയോ, അന്ധമായി അനുകരിക്കുകയോ ചെയ്യരുത്. മറിച്ച്, ഇമാമുമാരുടെ ശ്രേഷ്ഠതയും പദവിയും അറിയുക. അതോടൊപ്പം, നിന്റെ ദീനിന്റെ കാര്യത്തിൽ നീ സൂക്ഷ്മത പാലിക്കുക. സത്യം സ്വീകരിക്കുകയും, അതിൽ തൃപ്തിപ്പെടുകയും, നിന്നോട് ചോദിച്ചാൽ അതിലേക്ക് മാർഗദർശനം നൽകുകയും ചെയ്യുക. അല്ലാഹുവിനെ ഭയപ്പെടുകയും, അവനെ നിരീക്ഷിക്കുകയും, നിന്നോട് തന്നെ നീതി കാണിക്കുകയും ചെയ്യുക. സത്യം ഒന്നാണെന്നും, ഗവേഷകർ ശരി കണ്ടെത്തിയാൽ അവർക്ക് രണ്ട് പ്രതിഫലമുണ്ടെന്നും, തെറ്റിയാൽ അവർക്ക് ഒരു പ്രതിഫലമുണ്ടെന്നും വിശ്വസിക്കുക. അഹ്ലുസ്സുന്നത്തി വൽ ജമാഅത്തിലെ, വിജ്ഞാനത്തിന്റെയും ഈമാനിന്റെയും സന്മാർഗത്തിന്റെയും ആളുകളായ ഗവേഷകരുടെ കാര്യമാണിത്. റസൂൽ ﷺ യിൽ നിന്ന് സ്ഥിരപ്പെട്ട ഹദീസ് അങ്ങനെയാണ്.

പ്രബോധനത്തിന്റെ ലക്ഷ്യവും ഉദ്ദേശ്യവും ജനങ്ങളെ ഇരുട്ടുകളിൽ നിന്ന് വെളിച്ചത്തിലേക്ക് കൊണ്ടുവരികയും, അവരെ സത്യത്തിലേക്ക് മാർഗദർശനം നൽകുകയും, അങ്ങനെ അവർ അത് സ്വീകരിക്കുകയും, നരകത്തിൽ നിന്നും അല്ലാഹുവിന്റെ കോപത്തിൽ നിന്നും രക്ഷപ്പെടുകയും ചെയ്യുക എന്നതാണ്. കാഫിറിനെ കുഫ്റിന്റെ ഇരുട്ടിൽ നിന്ന് വെളിച്ചത്തിലേക്കും സന്മാർഗത്തിലേക്കും കൊണ്ടുവരിക. ജാഹിലിനെ ജഹ്ലിന്റെ ഇരുട്ടിൽ നിന്ന് വിജ്ഞാനത്തിന്റെ വെളിച്ചത്തിലേക്ക് കൊണ്ടുവരിക. പാപിയെ പാപത്തിന്റെ ഇരുട്ടിൽ നിന്ന് അനുസരണത്തിന്റെ വെളിച്ചത്തിലേക്ക് കൊണ്ടുവരിക. ഇതാണ് പ്രബോധനത്തിന്റെ ലക്ഷ്യം. അല്ലാഹു പറയുന്നു:

اللَّهُ وَلِيُّ الَّذِينَ آمَنُوا يُخْرِجُهُم مِّنَ الظُّلُمَاتِ إِلَى النُّورِ

വിശ്വസിച്ചവരുടെ രക്ഷാധികാരിയാകുന്നു അല്ലാഹു. അവന്‍ അവരെ ഇരുട്ടുകളില്‍ നിന്ന് വെളിച്ചത്തിലേക്ക് കൊണ്ടു വരുന്നു. (ഖു൪ആന്‍:2/257)

റസൂലുകൾ അയക്കപ്പെട്ടത് ജനങ്ങളെ ഇരുട്ടുകളിൽ നിന്ന് വെളിച്ചത്തിലേക്ക് കൊണ്ടുവരാനാണ്. സത്യത്തിന്റെ പ്രബോധകരും അതുപോലെ പ്രബോധനം നിർവഹിക്കുകയും, അതിൽ സജീവമാകുകയും ചെയ്യുന്നത് ജനങ്ങളെ ഇരുട്ടുകളിൽ നിന്ന് വെളിച്ചത്തിലേക്ക് കൊണ്ടുവരാനും, അവരെ നരകത്തിൽ നിന്നും പിശാചിന്റെ അനുസരണയിൽ നിന്നും രക്ഷിക്കാനും, തന്നിഷ്ടത്തെ അനുസരിക്കുന്നതിൽ നിന്ന് അല്ലാഹുവിനെയും റസൂലിനെയും അനുസരിക്കുന്നതിലേക്ക് കൊണ്ടുവരാനുമാണ്.

 

ശൈഖ് ഇബ്നു ബാസ് رَحِمَهُ اللَّهُ രചിച്ച الدعوة إلى الله وأخلاق الدعاة എന്ന ഗ്രന്ഥത്തിൽ നിന്നും

 

www.kanzululoom.com