ജനങ്ങളെ ഭയപ്പെടുത്താനും തനിക്ക് ആരാധന നിർവഹിക്കുന്നവരെ അതിന് സജ്ജമാക്കാനും ഉയിർത്തെഴുന്നേൽപ് നാളിന്റെ ഭയാനകതയും കാഠിന്യവും അല്ലാഹു ഇവിടെ വിവരിക്കുന്നു. അല്ലാഹു പറയുന്നു:

{നീ കാണും} ആ ദിനത്തെ കാണുന്നവൻ.

{എല്ലാ സമുദായങ്ങളെയും മുട്ടുകുത്തിയ നിലയിൽ} മുട്ടുകളിൽ, ഭയത്തോടെയും പേടിയോടെയും പരമകാരുണികനായ രാജാധികാരമുള്ളവന്റെ തീരുമാനം പ്രതീക്ഷിച്ച്.

{ഓരോ സമുദായവും അതിന്റെ രേഖയിലേക്ക് വിളിക്കപ്പെടും} അല്ലാഹുവിങ്കൽനിന്നും അവർക്ക് വന്ന അവരുടെ പ്രവാചകന്റെ ശരീഅത്തിലേക്ക്. അപ്പോൾ മൂസാ عليه السلام യുടെ സമുദായം മൂസാ ശരീഅത്തിലേക്ക്, ഈസാ عليه السلام യുടെ സമുദായം അപ്രകാരം ആ ശരീഅത്തിലേക്കും, മുഹമ്മദ് നബി ﷺ യുടെ സമുദായം ആ ശരീഅത്തിലേക്കും. ഇതുപോലെ മറ്റുള്ളവരും. ഏതൊരു ശരീഅത്താണോ ഓരോരുത്തർക്കും ബാധ്യതയുള്ളത് അവർ അതിലേക്ക് ക്ഷണിക്കപ്പെടും. ഇതാണ് ഈ വചനത്തിന്റെ ഒരു വ്യാഖ്യാനം. അതാണ് ശരിയും. അതിൽ സംശയത്തിന് വകയില്ല.

ഈ വചനത്തിന്റെ മറ്റൊരു വ്യാഖ്യാനം:

{ഓരോ സമുദായവും അതിന്റെ രേഖയിലേക്ക് വിളിക്കപ്പെടും}കർമരേഖയിലേക്കും അതിൽ രേഖപ്പെടുത്തിയ നന്മതിന്മകളിലേക്കും. ഓരോരുത്തർക്കും സ്വന്തം പ്രവർത്തിച്ചതിന് പ്രതിഫലം നൽകപ്പെടും. അല്ലാഹു പറയുന്നു:

مَنْ عَمِلَ صَٰلِحًا فَلِنَفْسِهِۦ ۖ وَمَنْ أَسَآءَ فَعَلَيْهَا ۖ

വല്ലവനും നല്ലത് പ്രവർത്തിച്ചാൽ അതിന്റെ ഗുണം അവനുതന്നെയാകുന്നു. വല്ലവനും തിന്മ ചെയ്താൽ അതിന്റെ ദോഷവും അവനുതന്നെ. (ഖു൪ആന്‍:45/15)

ഈ രണ്ട് വ്യാഖ്യാനങ്ങളും ഈ വചനത്തിന്റെ ആശയമായി പരിഗണിക്കാം.

തഫ്സീറുസ്സഅ്ദി

വിവര്‍ത്തനം : ഹാരിസ് ബിന്‍ സലീം

www.kanzululoom.com